Шымкенттіктер белгілі режиссер Асқар Ұзабаевтың жаңа туындысын тамашалады. Тәжік-ауған шекарасында бітімгерлік мақсатта қызмет атқару барысында қаза тапқан сарбаздардың құрметіне түсірілген фильм жабық көрсетілімге келген көпшіліктің көңілінен шықты.
«KAZBAT» көркем туындысында 1995 жылы 7 сәуір күні Пшихарв шатқалында Қазақстан Ішкі әскерінің жетінші құрама ротасына жасалған шабуыл баяндалады. Фильмнің идеясын ұсынған – Қазақстан Республикасы Ұлттық ұланының Бас қолбасшысы генерал-лейтенант Руслан Жақсылықов, режиссер – Асқар Ұзабаев, фильмнің қоюшы бас операторы – Максим Задарновский. Туындыны «АЮ СИНЕМА» кинокомпаниясы Қазақстан Республикасы Ұлттық ұланының қолдауымен жарыққа шығарып отыр.
Фильмде танымал актерлер Дәурен Серғазин мен Ринат Дошибеков, жас актерлер – Халық Рахат, Дияс Мырзахмет, Шарифбек Закиров және Индира Шынболатқызы басты рөлдерді сомдайды.
Шымкент қаласы әкімінің орынбасары Н.Ергешбек қарулы қақтығыста құрбан болған боздақтардың ата-аналарына құрмет көрсетіп, сыйлықтармен марапаттады. Фильм 21 қарашадан бастап прокатқа шығады. Ал, теледидарға арналған нұсқасы келесі жылы 7 сәуірден бастап, аталған қарулы қақтығыстың 25 жылдығына орай «Qazaqstan» телеарнасынан көрсетіледі.