Айгүл Қапбарова – сенатор
Среда, 26 Июнь 2019 06:21Шымкент қаласында ҚР Парламенті Сенатының шығып қалған депутатының орнына сайлау өтті. Сайлауда қалалық мәслихаттың 27 депутаты үміткер ретінде тіркелген 3 кандидаттың арасынан өз таңдауын жасады.
Республикалық маңызы бар қала мәртебесін иеленген Шымкент қаласынан Сенатқа депутаттыққа ұсынылған үміткерлер қатарында «Шымкент ақпарат орталығы» ЖШС директоры-бас редакторы Айгүл Қапбарова (қала мәслихатының ұсынуымен), сондай-ақ, өзiн-өзi ұсынған №45 мектеп-гимназияның директоры Рамиля Искандерова және «Жанубий Қозоғистон» газетінің бас редакторы Әлішер Сатвалдиев болды.
Сайлау қорытындысы бойынша Айгүл Қапбароваға 23 депутат дауыс берді. Сайлау барысында барлық заң рәсімдері сақталды. Заң талаптарына сəйкес, Орталық сайлау комиссиясы 7 күннен соң шешімін шығарып, депутатқа тиісті мандатын береді.
Айгүл Қапбарова 1975 жылы Оңтүстік Қазақстан облысы, Келес ауданы, Абай ауылында дүниеге келген. Әл-Фараби атындағы Қазақ ұлттық университетінің журналистика факультетін тәмамдаған.
«ҚР Тәуелсіздігіне 20 жыл», «Қазақстан Конституциясына 20 жыл», «ҚР Тәуелсіздігіне 25 жыл», «Астананың 20 жылдығы» мерейтойлық медальдарымен, «Шымкент қаласына қосқан ерекше үлесі үшін» төсбелгісімен, сондай-ақ ҚР
Президентінің Алғыс хатымен марапатталған.
Айгүл Жарылқасынқызы еңбек жолын 1997 жылы облыстық телерадиокомпанияның редактор-тілшісі болып бастаған. Одан кейін 2003-2011 жылдары «Оңтүстік Қазақстан» газетінің саясат бөлімінің меңгерушісі, 2011-2012 жылдары «Шымкент Медиа» МКК директоры-бас редакторы болып істеді. 2012 жылдың наурыз айынан бүгінге дейін «Шымкент ақпарат орталығы» ЖШС директор-бас редакторы қызметін абыроймен атқарды.
Еске салсақ, бұған дейін Парламент Сенатының депутаты лауазымын атқарған Дархан Сатыбалды ҚР Президентінің 2019 жылғы 18 наурыздағы Жарлығымен Өзбекстан Республикасындағы Төтенше және Өкілетті Елші болып тағайындалған еді. Орталық сайлау комиссиясы 2019 жылдың 19 наурызында Д. Сатыбалдының Сенат депутаты ретіндегі өкілеттілігін тоқтату қаулысын қабылдаған болатын.
«ТӨЛЕ БИ» фильмінің тұсаукесері өтті
Пятница, 21 Июнь 2019 04:25Түркістан шаһарындағы Қожа Ахмет Ясауи атындағы халықаралық қазақ-түрік Университетінде «Төле би» фильмінің таныстырылымы өтті. Белгілі жазушы-журналист Шойбек Орынбайдың «Қайғы заман немесеТөле би тағдыры» романының желісі бойынша түсірілген телехикаяда Төле бабаның сан қыры көрсетіледі.
«Рухани жаңғыру» бағдарламасы аясында Түркістан облысы әкімдігінің қолдауымен түсірілген телехикая 10 сериядан тұрады. Әр сериясы 30 минуттан. «САҚ» киностудиясы мен «Оңтүстікфильм» мекемесі бірлесіп түсірген «Төле би» телехикаясы өзінің тарихи салмағымен, қызықты оқиғаларымен, шебер сценариімен көрермен жүрегіне жол тауып, бойдағы отаншылдық рухты оята білді.
Фильмде ұлы бабамыз Төле бидің балалық шағынан бастап исі қазаққа Төле би атанған қарт кезіне дейінгі өмірі толық қамтылған. Сондай-ақ данагөй бидің Тәуке хан, Қазыбек би, Әйтеке би, Бөгенбай, Қабанбай секілді тарихи тұлғалармен бірге елдік мәселелерді шешкен сәттері баяндалады.
Тұсаукесер фильмнің қысқартылған нұсқасы түркістандықтардың назарына ұсынылған соң туындының көркемдік жетекшісі, көрнекті режиссер Сатыбалды Нарымбетов осы фильмге қатысқанын мақтан тұтатынын жеткізсе, Төле би туралы кітаптың авторы, жазушы Шойбек Орынбай өз романының экранға сәтті шыққанына қуанышты екенін, сенімі ақталғанын айтты.
Ал фильм режиссері Батырхан Дәуренбеков «Сериал арқылы Төле би бабамыздың тек шешен ғана емес, жас кезінде ел үшін қолына найза алған батыр болғанын, кейін үлкен саясаткерге айналғанын, «Жеті жарғы» заңдар жинағын шығаруға атсалысқан тұлға екенін көрсете білдік. Қолдау білдірген Түркістан облысы әкімдігіне рахмет. Біз енді тарихи фильм түсіруден қорықпаймыз», деді.
Сәтін салса,бұл ұжым енді Қ.А. Ясауи туралы кино түсірмек. Салтанатты жиын соңында фильмге атсалысқан азаматтарға Алғыс хаттар тапсырылды.
Еске сала кетсек, «Хабар» телеарнасы 10 бөлімнен тұратын телехикаяны жақында, елорданың туған күні қарсаңында көрермен назарына ұсынбақ. Қапы қалмаңыздар!
Мегаполиске – 1 жыл: шырайлы шаһардағы мерейлі істер
Среда, 19 Июнь 2019 05:59Шымкенттің республикалық қала атанғанына 19 маусым күні бір жыл толды. 2018 жылы дәл осы күні Елбасы Жарлығымен Шымкент үшінші мегаполис атанды. Осылайша 19 маусым қала тарихында жаңа әріптермен жазылып, Қала күні ретінде атап өтілмек. Осы ретте 1 жылдан бері Шымкентте қандай істер атқарылды, қандай жобалар жүзеге асырылды?
Орта Азияның экономикалық және мәдени орталығы
Шымкенттің бұған мегаполис ретіндегі мүмкіндігі мол. Бұл туралы Елбасы Н.Назарбаев қазан айында Шымкентке жұмыс сапары барысында мәлімдеді.
– Болашақ – ірі қалаларда. Мегаполистер арасындағы бəсекелестік арта түседі. Шымкенттің де даму көшінен қалып қоймауы үшін əлеуеті жеткілікті.
Қаладағы халық саны миллион адамнан асты, өзінің дамуы стратегиясын қалыптастыру керек, - деген Н.Назарбаев миллионды қала дамуы тиіс бірнеше бағытты нақтылап берді. Ең алдымен, Шымкент Орталық Азияның ірі экономикалық жəне туризм орталығы атануы тиіс.
– Шағын жəне орта бизнесті дамыту керек, инвесторларды жұмылдыру қажет. Туризм дамуы үшін жақсы дамыған инфрақұрылым, заманауи əуежай мен теміржол вокзалы болуы тиіс. Туризм – əлемдегі ең табысты бизнес. Ал
Шымкенттің мүмкіндіктері мол: қалада саябақтар, цирк, дендросаябақ, зообақ, концерт залдары бар.
«Шымкенттің өзіндік қайталанбас сəулеттік стилі болуы керек», деген Елбасы қаланың өз мəдени ерекшелігі бар екенін айтты.
Инвестициялар жұмылдыру орталығына айналады
Мегаполис ретінде Шымкентте өткен алғашқы ірі іс-шараның бірі – «Shymkent Development forum-2018» инвестициялық форумы болды. Халықаралық форумға қазақстандық және шетелдік бизнес-қауымдастықтар, инвестиция жұмылдыру саласының сарапшылары, министрліктер мен мемлекеттік органдар, қаржы институттары мен білім беру ұйымдарының өкілдері, трансұлттық СNN, National Geographic корпорацияларының, Дүниежүзілік банктің өкілдері, жаңа жобалардың авторлары, әлеуетті 300 инвестор қатысты.
Инвестициялық форум өз нәтижесін берді. Жалпы сомасы 200 млн АҚШ долларын құрайтын 11 меморандумға қол қойылды. Шетелдік инвесторлар Шымкенттің микрофиба шығару бойынша текстиль фабрикасының құрылысы, қалалық жедел медициналық жәрдем қызметінің автопаркін жаңарту, «Shymkent Сity» қалашығы аумағында тұрғын үйлер, әкімшілік ғимараттар мен жаңа саябақ салу сияқты ірі жобаларына қаржы құймақ.
Жалақы көбейді
Шымкентте бюджет қызметкерлері мен бірқатар кәсіпорын жұмысшыларының жалақысы көбейді. Осылайша Елбасы Н.Назарбаевтың Үкіметке берген қазақстандықтардың ең төменгі жалақысын 28 мыңнан 42 мың теңгеге дейін өсіру туралы тапсырмасы жүзеге асырылды. Бұл бастамаға қаладағы ірі компаниялар қолдау көрсетті.
Бұған қоса мемлекеттік қызметшілердің жалақысы да жоғарылады. 2018 жылдың басынан Мемлекеттік қызмет істері және сыбайлас жемқорлыққа қарсы іс-қимыл агенттігінің бастамасымен еліміздің бірқатар облыстарында жалақы төлеудің жаңа пилоттық жүйесі іске қосылды. Соның нәтижесінде мемлекеттік қызметкерлердің айлық жалақысы жоғарылап отыр.
Жергілікті өнімдер – экспортқа
Шымкенттегі 35 кәсіпорынның өнімдері экспортқа шығарыла бастады. Мегаполис әкімі Ғ.Әбдірахымовтың төрағалығымен қала әкімдігі жанынан құрылған Экспорт жөніндегі кеңес жұмысын бастады. Қалада тамақ өнімдерін өндіру, жеңіл өнеркәсібінде, машина жасау, металлургия, фармацевтика және құрылыс өнімдерін өндіру салаларындағы 35 кәсіпорын экспортқа өнім шығарады.
Үшінші мегаполистің негізгі сауда серіктестері Нидерланды, Ресей Федерациясы, Қытай және Өзбекстан елдері болып отыр. 2018 жылдың қорытындысы бойынша қаланың сыртқы сауда айналым көлемі 903,1 млн АҚШ долларын құраған. Оның ішінде импорт – 568,5 млн доллар, экспорт 334,6 млн АҚШ доллары болып отыр.
Сауда хабына айналған қала
Инвестиция мегаполис экономикасының қайнар көзі бола алады. Осы мақсатта Шымкентте «Shymkent» ӘКК» АҚ және Forbes Kazakhstan ұйымдастырған «Керуендер оралады» инвестициялық-кәсіпкерлік форумы өтті. Қала әкімдігінің қолдауымен өткен форумда белгілі кәсіпкерлер мен ірі компаниялардың басшылары электронды коммерция мен кәсіпкерлікті дамыту жайын талқылады. Нәтижесінде белгілі «BI group» компаниясы қаладағы «Конгресс-холлдан» бөлек жаңа екі шағынауданның құрылысын бастамақ.
Бизнеске арналған үкімет
Шымкентте «Бизнеске арналған үкімет» жобасы ашылды. Жобаның мақсаты – бизнесті «бір терезе» қағидаты бойынша қолдау мен дамытудың барлық іс-шараларын орталықтандыру. Сондай-ақ, инвесторлар мен кәсіпкерлерге қызмет көрсетудің бірыңғай орталығы болады.
Мұнда қалалық кәсіпкерлер палатасының менеджерлері, «Shymkent» ӘКК» АҚ, «Даму» қоры, «Азаматтарға арналған үкімет» мемлекеттік корпорациясы» АҚ және мемлекеттік органдардың өкілдері қызмет көрсетеді. Жоба 6 негізгі бағытты қамтиды: мемлекеттік қызмет, қаржыландыру, өткізу, сандық қызметтер,
Кәсіпкерлер палатасының менеджерлері жүзеге асыратын құқықтық сүйемелдеу және құзыреттер, «Shymkent» ӘКК» АҚ, «ДАМУ» Қоры, ХҚКО менеджерлері және мемлекеттік органдардың қызметкерлері жүзеге асыратын құзыреттер кіреді.
Арбат – мерекелік тарту
1 желтоқсан – ҚР Тұңғыш Президенті күніне орай Шымкентте жаңа Арбат ашылды. Ерекше архитектуралық үлгіде бой көтерген демалыс орны қала орталығындағы «Қиял әлемі» саябағы жанынан орын тепкен. Бейбітшілік көшесінің Республика даңғылынан Әл-Фараби алаңына дейінгі бөлігі тұтас демалыс орнына айналып, су бұрқақтары орнатылды.
Арбат тек көркімен ғана емес, қала тұрғындарының тынығуына ыңғайлы болуымен ерекше. Демалыс орнының бір бөлігі шығармашылық иелеріне шабыт сыйласа, суретке түсуді ұнататын жандарға арнайы селфи-аймақ жабдықталған. Жалпы ұзындығы 430 метр аймақта көлік қатынасына шектеу қойылып, екі қапталдан велосипедпен серуендеу үшін арнайы веложолақ салынған.
Мегаполиске – жаңа әуежай терминалы
Шымкентте «СКАТ» әуе компаниясы жаңа терминал құрылысын бастайды. Қала әкімі Ғабидолла Әбдірахымов «СКАТ» əуекомпаниясы» АҚ төрағасы президенті Владимир Денисовпен меморандумға қол қойды. Маңызы зор меморандум аясында «Шымкент қаласы əуежайында жаңа жолаушылар терминалының құрылысы» жобасы жүзеге асырылады.
Әуе компаниясы салатын терминалды 2020 жылдың алғашқы жартыжылдығында пайдалануға беру жоспарлануда. Қала әкімдігі тарапынан терминал құрылысына 2,8 гектар жер телімі бөлінді. Инвестиция көлемі 50 млн АҚШ долларын құрайды. Жаңа терминал құрылысы бірнеше кезеңмен жүргізіледі. Жол құрылысы және инженерлік желілерді қайта құру, әуежай алдындағы автотұрақты және вокзал алдындағы алаңның құрылысы, абаттандыру жұмыстары қала әкімдігі тарапынан жүргізілмек.
Шымкент – Дубай тікелей ұшақ рейсі ашылды
2018 жылдың соңында Шымкент – Дубай қалалары аралығында тікелей ұшақ қатынай бастады. Екі қаланың арасына әуе кемесі 1 аптада екі рет ұшады. Жолаушыларды «Fly Dubai» компаниясының ұшақтары тасымалдайды. Рейстің ұзақтығы – 3 сағат.
Шалғай елдімекендерге – жаңа автобустар
Мегаполис тарихында алғаш рет шалғайдағы елдімекендерге 2018 жылдың 11 шілдесінен бастап жаңа автобустар қатынай бастады. Автобустардың кесте бойынша аралық уақыты 15 минут. Жолақысы сол күйі – 70 теңге. Жаңа автобустар әлеуметтік маңызды 10 бағытта қатынайды. Бүгінде «Газель» шағын автобустары да сыйымдылығы мол автобустарға ауыстырылуда. Бұған қоса 2019 жылдың соңына дейін Шымкентке ұзын-саны 1000 жаңа автобус жеткізу жоспарланған.
ТМД-да баламасы жоқ зауыт
Шымкент қаласында ҚР индустриялық-инновациялық дамытудың 2015-2019 жылдарға арналған мемлекеттік бағдарламасы аясында «Asia Trafo» зауыты ашылды. Бірегей трансформатор зауыты қаладағы «Тассай» өндіріс аумағында 12 гектар жерге орналасқан. Зауыт – кернеуі 110кВ-дан 500кВ-ға дейінгі трансформатор шығаратын Орталық Азиядағы бірден-бір өндіріс орны.
Кәсіпорынның өнімдерін алдағы уақытта ТМД елдерінің нарығына – Ресей, Өзбекстан, Қырғызстан мемлекеттеріне, сондай-ақ Иран, Ауғанстан, Пәкістанға шығару жоспарланып отыр.
Жеңімпаз спортшыларға құрмет көрсетілді
Пятница, 07 Июнь 2019 04:22Жуырда Түркияның Анталия қаласында түркі әлеміне ортақ көне ойын тоғызқұмалақтан өткен әлем чемпионатында шымкенттік спортшылар жеңімпаз атанған еді.
Әлемдік сайыста екі бірдей алтын медаль жеңіп алған Ғалымжан Темірбаев пен күміс медаль иеленген Салтанат Сапарбековаға құрмет көрсетілді. Сондай-ақ, бұл сында Ғалымжан Темірбаевтың бапкері Айгерім Қуанышбаева түріктердің осы ойынға ұқсас Мангала деп аталатын сайысында қола медалге ие болды.
Жеңімпаз атанған спортшылар – Нұрлан Жабаев басқаратын Шымкент қаласының ұлттық және ат спорты түрлері бойынша кешенді спорт клубының саңлақтары. Осы жеңісіне орай чемпиондарға құрмет көрсетілді.
Ұлттық өнеріміздің жанашыры, белгілі меценат «Қаржантау» ЖШС директоры Алихан Амалбаев елімізді әлемге танытып келген топжарған спортшыларға қаржылай сертификаттарды табыс етті. Алдағы жарыстарда да мерейлі болуына тілектестігін білдірді.
Тұрғын үй қатынасы – заң жобасында
Среда, 29 Май 2019 03:58Шымкент қаласының әкімдігінде пәтер иелерінің кооператив төрағаларымен тұрғын үй-коммуналдық шаруашылық туралы заң жобасы талқыланды.
Жиынға қала әкімі Ғ.Әбдірахымов, ҚР Парламенті Мәжілісінің депуттары, Үкімет мүшелері, ПИК төрағалары мен басқа да ұйымдардың басшылары қатысты.
Бүгінгі таңда Шымкент қаласы бойынша 23 басқарушы компания көпқабатты 1409 үйге қызмет көрсетсе, 1491 үйде басқарушылар бар. Ал жаңғырту бағдарламасы аясында 947 үй күрделі жөнделуі тиіс болса, 152 үі күрделі жөнделген. Үйлердегі 266 лифтінің 2013 жылдан бастап бүгінгі таңға дейін 29-ы ауыстырылған.
Заң жобасында «Бір үй - бір қауымдастық - бір есеп» қағидасы бойынша меншік иелері МИҚ бірігуінің жаңа формасы қарастырылған. Депутаттардың айтуынша, заң жобасының негізгі міндеті – жүз пайыздық кондоминиумдарды құру. Заңға енгізілген жаңа түзетулер көптеген рәсімдерді түбегейлі жеңілдетеді.
Аталған заңда әкімдіктерге нысанның қасбетін, шатырын жөндеуге, су деңгейінің көтерілу қауіпі бар аймақтардағы тұрғын үйлердің беріктігін арттыруға, лифтілерді жөндеу мен ауыстыруға, газ саласында бақылау орнатуға қатысты қосымша өкілеттік беріледі.
Айта кетейік, 2019 жылдың сәуір айында ҚР Парламент Мәжілісінің Төрағасы Нұрлан Нығматулиннің төрағалығымен өткен жалпы отырыста «ҚР кейбір заңнамалық актілеріне тұрғын үй-коммуналдық шаруашылық мәселелері бойынша өзгерістер мен толықтырулар енгізу туралы» заң жобасы қаралған болатын.
Қоғамдық көліктерге – электронды төлем жүйесі
Пятница, 17 Май 2019 04:27Шымкенттегі жолаушылар көліктеріне алдағы уақытта электронды жүйесі енгілізеді. Бұл туралы қала әкімі Ғабидолла Әбдірахымов Instagram әлеуметтік желісінде жазды.
– 2019 жылдың соңына дейін қалалық қоғамдық көліктерге электронды төлем жүйесін ендіру жоспарлануда. Электронды төлем жүйесін ендіру арқылы қоғамдық көліктердің қызмет көрсету сапасы көтеріліп, тасымалдаушылардың табыстарының ашықтығы қамтамасыз етіледі, қоғамдық көліктердің салондарында болатын ұрлықтардың алдын алады.
Бұл мақсатта Алматы қаласындағы «Оңай» ЖШС-мен келіссөздер жүргізілді, - делінген жазбада.
Жалпы, қаладағы қоғамдық көліктерді жаңарту мақсатында биыл «Шымкент» әлеуметтік-кәсіпкерлік корпорациясы арқылы шаһарға 1000 автобус алу жоспарлануда.
Нақты айтсақ, 2019 жылдың 1 шілдесіне дейін 300 автобус келеді. Қалған 700 автобус жылдың соңына дейін жеткізілмек.
Қазіргі таңда Шымкентте 26 көлік компаниясы бар. Күн сайын 1200 автобус пен шағын автобус қызмет етеді. Күнделікті 500 мыңнан астам жолаушы қоғамдық көлікпен қатынайды.
«АМАНАТ» Сайлаудың әділ өтуін қадағалайды
Пятница, 17 Май 2019 04:19Шымкентте «Аманат» сайлауды бақылау жөніндегі азаматтық алаңы аясында семинар-тренинг өтті.
Жиынға елордадан келген «Аманат» азаматтық платформасының штаб жетекшісі Лима Диас, қоғам қайраткері Мұсағали Дуамбеков және Шымкенттегі «Рухани жаңғыру» кеңсесінің жетекшісі
Зәуре Оралбаева қатысты.
Жиында «Аманат» азаматтық платформасының ресми таныстырылып, қоғамдық ұйымның мақсаттары мен міндеттері түсіндірілді. Семинар барысында «Аманат» азаматтық платформасының мүшесі Мұсағали Дуамбеков мобильді капитандарға оқу тренингін өткізді.
– Тренингтің мақсаты – сайлау туралы құқықтық талаптарға сәйкес ақпарат беру, сайлаушылар мен бақылаушылардың міндеттерін құқықтық негізде түсіндіру, жергілікті сайлау комиссиясымен өзара бірлескен іс-қимылдар жасауға үйрету. Семинардың модулі халықаралық талаптарға және тәжірибеге сәйкес.
ОСК, кандидаттың сайлау штаб-пәтері және өзге де сайлауға қатысты аймақтарда заң бұзу фактілері тіркелсе, онда бірден қандай әрекеттер жасау туралы кеңестер беріледі, - деді М.Дуамбеков.
Семинар соңында барлық қатысушыларға «Аманат» сарапшылары дайындаған «Сайлаушылар естелігі» табыс етілді.
Жол қозғалысына – 10 жаңа бағдаршам
Среда, 15 Май 2019 04:29Шымкент көшелерінде биыл 10 жаңа бағдаршам орнатылады. Бұл туралы қалалық жолаушылар көлігі және автомобиль жолдары басқармасының өкілдері хабарлады.
Бұл іс-шаралар жол қозғалысы қауіпсіздігін қамтамасыз етуге бағытталған. Атап айтқанда, С.Жандосов – Ж.Шаяхметов көшелерінің қиылысы (№24 мектеп) мен Темірлан тасжолындағы «Төржан» мектеп-гимназиясының алдында, Ленгір тасжолы (№97 мектептің маңында), Жібек жолы көшесіндегі «Тассай» индустриалды аймағында, Мәделі қожа – Ж.Тәшенов көшелерінің қиылысында жаяу жүргіншілер бағдаршамы болады.
Сондай-ақ, Бозарық шағынауданы, КХ-37 – Ақалтын көшелерінің қиылысында, Н.Назарбаев даңғылындағы №130 мектеп маңында, Темірлан тасжолы – Ә.Қастеев көшелерінің қиылысында, Т.Рысқұлов – Ескендіров көшелерінің қиылысы («Мәди» аялдамасы) мен С.Бәйтереков – Майтөбе көшелерінің қиылысында жаңа бағдаршамдар қойылмақ.