Шымкент келбеті

Шымкент қаласының әкімі Ғабидолла Әбдірахымов 2018 жылы атқарылған жұмыстар бойынша ел алдында есеп берді

Елбасы Жарлығымен былтырғы маусым айында миллионды шаһарға айналып, республикалық дербес қала мәртебесін алған Шымкенттің 2200 жылдық тарихы бар. Бүгінде көне шаһардың ажары айшықталып, экономикалық әлеуеті нығайып, келбеті күн санап көріктеніп келеді.

Елбасының тапсырмасына сәйкес, бүгінде еліміздің барша өңірлеріндегі әкімдер жұртшылық алдында есеп беру кездесулерін өткізіп жатыр. Сол дәстүр бойынша Шымкент қаласының әкімі Ғабидолла Әбдірахымов өткен аптада қала тұрғындарымен кездесіп, 2018 жылдың қорытындысы бойынша ел алдында есеп берді.

Жиынға ҚР Ақпарат және коммуникация министрі Дәурен Абаев, ҚР Президенті Әкімшілігінің Мемлекеттік бақылау және аумақтық-ұйымдастыру жұмысы бөлімінің мемлекеттік инспекторы Ерғали Егемберді, Шымкент қаласы мәслихатының депутаттары, қала әкімінің орынбасарлары, басқармалардың басшылары, мемлекеттік қызметкерлер мен зиялы қауым өкілдері, жергілікті тұрғындар қатысты.

Үшінші мегаполиске 580 млрд теңге инвестиция тартылды

Жыл бойы атқарылған жұмыстар сараланып, алдағы мақсат-міндеттер айқындалатын жиында Шымкент қаласының әкімі
Ғабидолла Әбдірахымов өткен жыл қала үшін табысты болғанын айтып, қысқаша баяндама жасады.

Ерекшелігі сол, әкім баяндамадан кейін жарыссөздерден бас тартып, бірден сұрақ-жауапқа көшіп, 2 сағатқа жуық уақытты тұрғындардың сұрақтарына жауап беруге арнады.

Әкімнің мәліметінше, үшінші мегаполисте былтыр бірқатар ірі нысандар қайта жаңғыртудан өтті. Оның ішінде қала экономикасы үшін маңызды 2 ірі жоба бар.

Тарқатып айтар болсақ, біріншісі, Шымкент мұнай өңдеу зауыты жаңғыртудан өтіп, оған 580 млрд теңге инвестиция тартылды. Соның нәтижесінде жоғары октанды жанармай өндірісі жылына 881,7 мыңнан 2 271 мың тоннаға дейін, дизельді отын өндіру 1 209,4 мыңнан 1 916 мың тоннаға дейін, авиациялық отын көлемі 279,7 мыңнан 400 мың тоннаға дейін артады.

Екінші, қалада «Shymkent Temir» болат өндіру зауыты іске қосылды. Жобаның құны – 5,9 млрд теңге. Кәсіпорында 440 жаңа жұмыс орны ашылды.

– Шымкент қаласында 2018 жылы атқарылған жұмыстардың нәтижесінде бюджетке түскен кіріс 2017 жылмен салыстырғанда 27 пайызға немесе 15,3 млрд теңгеге артып, 72,2 млрд теңгені құрады. 2019 жылы бюджеттің кіріс көлемін 11,6%-ға жоғарылатып, 92,4 млрд теңге болады деп жоспарлап отырмыз, – деді қала әкімі Ғабидолла Әбдірахымов.

30-ға жуық кәсіпорын ашылады

Шымкенттегі ауыл шаруашылығы саласында жалпы өнім көлемі 2018 жылдың қорытындысы бойынша 25,3 млрд теңгеге жетіп, өсім 100,3 пайызды құраған.

– «Агробизнес-2020» бағдарламасы аясында 100-ден астам кәсіпкерге 1,4 млрд теңге субсидия бөлінді. 115 гектар жерге қарқынды бау отырғызылды, 9 гектар жерге жылыжайлар салынып, олардың жалпы көлемі 168 гектарға жетті. Алынған өнім көлемі 15 мың тоннаны құрады. Мал шаруашылығын дамыту мақсатында 47 мал бордақылау алаңы, 36 жанұялық сүт фермалары ашылды, – деді қала әкімі.

Шаһар басшысының айтуынша, «Сыбаға» бағдарламасымен 123 бас ірі қара, «Алтын асық» бағдарламасымен 518 бас уақ мал, «Құлан» бағдарламасымен 110 бас жылқы алынған.

Ауыл шаруашылығын дамыту үшін 136 гектар жер бөлініп, Агро-Индустриялық аймақ құру басталды. Осы аймақта ауыл шарушылығы өнімін өңдейтін 30-ға жуық кәсіпорын және заманауи көтерме сауда орталығы ашылады деп күтілуде.

Шымкентте көпбалалы аналарды қолдаудың жаңа тетіктері қарастырылды

Мегаполисте көпбалалы аналарға қызмет көрсететін орталық ашылып, олар мұнда мемлекеттік қызмет түрлерін ала алады.
Қуаныштысы сол, 2019 жылдың 1 наурызынан бастап Алтын алқа, Күміс алқа иегерлері және Батыр аналар мен І және ІІ дәрежедегі орденмен марапатталған аналар қоғамдық көлікте тегін жүреді.

Бұл үшін Шымкент қаласының әкімдігі тасымалдаушы компанияларға субсидия бөлді. Ал табысы күнкөріс деңгейінен төмен отбасыларға берілетін бір реттік жәрдемақы көлемі 25 мыңнан 100 000 теңгеге дейін ұлғайып, тамыздан бастап беріледі. Сонымен қатар кәсіпкерлермен бірге «Сен жалғыз емессің» жобасы жүзеге асырылмақ. Оның аясында тағдыр тауқыметін тартып жатқан отбасыларға баспана салынады.

Бұған қоса Шымкенттегі 1000 отбасыға газ және өрт қауіпсіздігінің алдын алуда дабыл беретін арнайы құрылғылар орнату жұмыстары басталды. Аталған құрылған аз қамтылған және көпбалалы отбасыларға демеушілер есебінен тегін орнатылмақ.

– Əкем 10 ағайынды, анам 7 ағайынды, мен де көпбалалы отбасының перзентімін. Шымкентте 31 мыңнан астам көпбалалы ана бар, Құдайға шүкір. Біз осы бағытта жұмыс істейміз. Кəсіпкерлікті қолдаймыз жəне жақында Шымкент қаласында көпбалалы аналармен жұмыс істейтін орталық ашатын боламыз, – деді Шымкент қаласының әкімі.

Атап өтейік, мегаполисте 2220 Алтын алқа иегері, 6056 Күміс алқа иегері, 511 Батыр ана, 700-ден аса І және ІІ дәрежелі орденмен марапатталған және 3200 көп балалы ана бар.

Мыңнан астам мүмкіндігі шектеулі азамат тұрақты жұмысқа орналасқан

Шымкентте мүмкіндігі шектеулі азаматтардың да тыныс-тіршілігі ерекше назарда. Оларға қоларба, гигиеналық заттар, көмекші және инватакси қызметтері тұрақты көрсетілуде.

Мәселен, өткен жылы 1 мыңнан астам мүмкіндігі шектеулі азамат тұрақты жұмысқа орналасты. Сонымен қатар, халықты жұмыспен қамту және әлеуметтік қолдау саласында бірқатар жаңа бастамалар қолға алынуда.

Атап айтқанда, «Жұмыспен қамту орталығы», жұмыспен қамту және әлеуметтік қорғау, еңбек инспекциясы және көші-қон басқармалары және халыққа қызмет көрсету орталықтары бір ғимаратқа көшіріліп, «бір терезе» қағидасы бойынша қызмет көрсетуде.

Ол жерде жұмыспен қамту және әлеуметтік қызметтер толығымен электрондық форматқа көшірілді.
Елімізде алғашқылардың бірі болып, «Тұрмыстық зорлық-зомбылық құрбандарына арналған дағдарыс орталығы» коммуналдық мемлекеттік мекемесі Шымкентте құрылды.

«7-20-25» бағдарламасы: Тұрғын үй құрылысы қарқынды

Елбасының тапсырмасымен Шымкент қаласында «7-20-25» бағдарламасы іске асырылуда.
Халыққа кеңінен насихаттау мақсатында елімізде алғаш болып «Халықтық кеңседе» арнайы «Ақпараттандыру орталығы» ашылды.

Ол жерде екінші деңгейлі банк, құрылыс компанияларының және «Баспана» акционерлік қоғамының өкілдері күнделікті түсіндірме жұмыстарын жүргізуде. Бүгінгі күнге дейін 114 азаматқа 1,1 млрд теңге несие берілген.

– Тұрғын үй құрылысы «Шымкент сити» және әкімшілік-іскерлік орталықта қарқынды жүргізілуде. Қазіргі таңда қаламызда әлемдік деңгейде белгілі «Highvill» компаниясы 51 гектар жерге, отандық «BI group» компаниясы 5 гектар жерге тұрғын үй салуға қызығушылық білдірді.

Мен былтыр арнайы Сеул қаласына барып, «Highvill» компаниясының басшысымен келіссөз жүргіздім. Нәтижесінде «Highvill» компаниясымен «Shymkent Сity» жобасына 130 млрд. теңге салу бойынша меморандумға қол қойдық. Биыл құрылыс жұмыстары басталады, – деді әкім.

Тұран шағынауданында 5 мың орындық 14 жатақхана салынады

Студенттер 2021-2022 жылдары жатақханамен толық қамтылады. Бұл да қала әкімі Ғ. Әбдірахымовтың есебінде айтылған жоспар.

Шымкент – жастар қаласы. Елбасының 5 әлеуметтік бастамасы аясында студенттердің жатақхана жағдайын жақсарту міндеті тұр.

Осы мақсатта Тұран шағынауданында 8 гектар жерге 5 мың орындық 14 жатақхана салу жоспарлануда.
Сонымен қатар жеке кәсіпкерлер арқылы 200 және 500 орындық жатақхана салу үшін келісім-шарт жасалды. Құрылыс жұмыстары жүргізілуде.

Одан бөлек, медицина академиясы өз қаржысы есебінен қолданыстағы ғимаратты 450 орындық жатақхана етіп қайта құрады.
Жалпы студенттерді жатақханамен қамту мәселесі 2021-2022 жылдары толық шешілмек.

Мәдени астананың дайындығы зор

2018 жылы Шымкент республикалық маңызы бар қала мәртебесін алды. Ал 2020 жылы ТМД елдерінің мәдени астанасы болмақ.

Осыған байланысты Шымкент қаласында бірнеше ірі жобалар басталды. Қала әкімі 2018 жылы атқарылған жұмыстар туралы есебінде осы жобаларды атап өтті.

Нақты айтқанда, «SСAT» әуе компаниясы әуежайдың жаңа терминалының құрылысын бастады, желтоқсан айынан бастап Шымкент – Дубай бағытында тікелей әуе рейсі ашылды. Келесі әуе рейсі Шымкент – Қазан бағытында ашылады; теміржол вокзалы қайта құрылады; 2200 орындық заманауи Конгресс орталығының құрылысы және 20 мың орындық Қажымұқан атындағы орталық стадионды қайта құру жұмыстары басталды.

Ескі қалашық – «Цитадельді» қалпына келтіру және Қошқар ата өзені жағалауын көріктендіру жұмыстары қарқын алды.
Қырғы базарды заманауи талапқа сай қайта құру мақсатында жаңа жоба әзірленуде.

Бүгінгі таңда Шымкент қаласы бойынша тұрғын үй кезегінде 37 144 азамат тіркелген. Бұл туралы Шымкент қаласының тұрғын үй және тұрғын үй инспекциясы басқармасы мәлім етті.

Коммуналдық тұрғын үйлерге тоқталсақ, 2008 және 2009 жылдары қалада коммуналдық тұрғын үй қорынан тұрғын үйлер пайдалануға берілмеген. Мәліметтерге зер салсақ, Шымкентте пәтер кілтін алушы отбасылар саны артып келе жатқанын аңғаруға болады.

Салыстырмалы түрде айтар болсақ, 2013 жылы 171 пәтер пайдалануға берілген. Ал былтыр, яғни 2018 жылы 1152 пәтер берілді. Осы орайда 2019 жылы «Шымкент Сити» қалашығында 540 пәтер пайдалануға берілу жоспарлануда.

Несиелік тұрғын үйлерге келсек, 2018 жылы «Самұрық-Қазына» ЖМҚ» АҚ-ы бағыты бойынша 321 пәтер ұсынылып, төлем қабілеттігін растаған 79 азаматпен келісім-шарт түзілді.

Шымкентте алдағы бір ай мерзім ішінде кәсіпкерлік мақсатта пайдаланып отырған нысандарға бақылау күшейтіліп, көлеңкелі экономикамен күрес белсенді жүргізілмек. Бұл туралы Шымкент қаласы бюджетінің кіріс бөлігін ұлғайту бойынша кеңейтілген жиында мәлім болды.

Мәжілісті ашқан қала әкімі Ғабидолла Әбдірахымов «Шымкент қаласы республикалық маңызы бар қала мәртебесін алғаннан кейін алдағы үш жылда дотациялық аймақтан донорлы аймаққа айналуы қажет» деп атап өтті.
Жиында Шымкент қаласы бойынша Мемлекеттік кірістер департаментінің басшысы Нұралхан Көшеров 2018 жылдың орытындысымен және салық салу базасын ұлғайту мәселелері бойынша баяндама жасады. Департамент басшысының мәліметінше, өткен жылға салықтық төлемдер бойынша бекітілген жоспар 73 млрд теңге болса, нақты 78 млрд теңге түсіп, жоспар 107% орындалған, 2017 жылмен салыстырғанда түсімдер 9,7 млрд теңге артығымен түсіп, өсу қарқыны 114 пайызды көрсеткен.

Басқосуда көлеңкелі экономикамен күресіп, салық түсімін арттыру, барлық кәсіпкерлердің жалдамалы жұмысшыларын тіркетіп, олардың табыстарын шынайылыққа келтіру мәселесі сөз болды. Сондай-ақ жалдамалы жұмысшылар үшін төленетін әлеуметтік, жеке табыс салықтарын ұлғайту, кәсіпкерлік мақсатта пайдаланып отырған нысандардың бағалау құндарына қайта бағалау жұмыстарын ұйымдастырып, мүлік салығының түсімін арттыру қажеттігіне баса назар аударылды.
Бүгінде Шымкентте 68 мыңнан астам шағын және орта бизнес субъектісі бар және осы кәсіпкерлік субъектілерінен 2018 жылға мемлекеттік бюджетке 22,6 млрд. тг түскен немесе жалпы түсімнің көрсеткіші – 15,8%.

Сондай-ақ, мүлік салығынан жалтару үшін кәсіпкерлік мақсатта пайдаланатын ғимараттардың құны айтарлықтай аз көрсетілген. Осы орайда Н.Көшеров кәсіпкерлерді бір ай мерзім ішінде нақты табыстарын көрсетіп, қосымша салық есептіліктерін тапсыруға шақырды.
Ал қала әкімі Ғ. Әбдірахымов салықтар мен мемлекеттік бюджетке төленетін міндетті төлемдердің уақытылы түсімі мемлекеттің экономикалық дамуын, халықтың әлеуметтік жағдайын және қауіпсіздікті қамтамасыз ететінін ерекше атап өтті. Басқосу соңында қала әкімі мәжілісте айтылған мәселелер бірлескен жағдайда шешімін табатынын еске салып, уәкілетті органдарға нақты тапсырмалар жүктеді.

Мегаполистің әлеуметтік-экономикалық даму көрсеткішінде де өсім байқалады. Шымкентке құйылған инвестиция көлемі 24 млрд теңгені көрсетіп, өткен жылмен салыстырғанда 2,8 есеге артты. Бұл көрсеткіш бойынша Шымкент республикада бірінші орында келеді. Сондай-ақ, баспана бойынша былтыр Шымкентте 25 тұрғын үйге тапсырыс берілген болса, биыл 58 тұрғын үй салынды. Яғни, екі еседен аса көбейіп отыр деген сөз. Жалпы, Шымкент – еліміздегі қарқынды дамып келе жатқан үш ірі мегаполистің бірі. Осы орайда халқы еңбекқор құтты қаланың биылғы әлеуметтік-экономикалық жетістіктеріне қысқаша тоқталып өткенді жөн көрдік.

Қаланың дамуы моделі өзгереді

Мемлекет басшысы Нұрсұлтан Назарбаев биылғы қыркүйек айында Шымкентке келген сапарында бірқатар нысандарда болып, шаһардағы атқарылып жатқан жұмыстарға оң бағасын берген болатын. Президент республикалық маңызы бар қала мәртебесіне ие шаһардың ендігі даму бағыты қалай боларын, қай бағытта, қандай көрсеткіштерді жақсарту керегі жөнінде міндеттер жүктеді. Қала активімен кездесуінде Елбасы мегаполистің дамуының басты бағыттарын айқындап, бірқатар тапсырмалар берген еді.
– Шымкентте болашағы бар бірқатар жобалар жүзеге асырылып жатыр және жоспарланғандары одан да көп. Сондықтан, Шымкенттің одан әрі даму жолдарын талқылап, стратегиясын айқындауымыз қажет. Болашақ – ірі қалаларда. Еліміздің бір миллионнан астам халқы бар үшінші мегаполисіне айналған Шымкент Астана мен Алматы қалалары сияқты өзінің даму моделін өзгертуге тиіс, - деді Президент.
Президент миллионды қала дамуы тиіс бірнеше бағытты нақтылап берді. Ең біріншіден, Шымкент Орталық Азияның ірі экономикалық жəне туризм орталығы атануы тиіс. Осы орайда қазіргі таңда Шымкентте ірі серпінді жобалар қолға алынған, нақты жоспар аясында қызу жұмыстар жүріп жатыр.

«Шымкент Сити»: қала ішіндегі қала

Елбасының қолдауымен қаламызда жүзеге асып жатқан ерекше жобаның бірі – «Шымкент Сити» жаңа іскерлік және тұрғын үй кешені. Қаланың солтүстік бөлігінде, Бәйдібек би ескерткішінің жанында 427 гектарды алып жатқан аумақта бүгінгі таңда жол салынып, инфрақұрылым жұмыстары аяқталып қалды. Келер жылы оңтүстіккореялық компания Шымкент шаһарының осы аумағынан зәулім үйлер салатын болды. Шымкент әкімі Ғабидолла Әбдірахымов биыл Сеулге жасаған сапары барысында осындай келісімге қол жеткізді.
Меморандумға сәйкес кореялық компания 10 жылдың ішінде 130 миллиард теңге инвестиция саламыз деп отыр. Шымкент үшін бұл – өте үлкен инвестиция. «Shymkent» әлеуметтік-кәсіпкерлік корпорациясы» АҚ басқарма төрағасы Рашид Аюповтың айтуынша, енді Шымкентте 2019 жылдан бастап жыл сайын 320 мың шаршы метр үй салынбақ. Оның ішінде төрт жоба – жиырма қабаттан отыз төрт қабатқа дейінгі алып ғимараттар.

Тұрғын үй құрылысы қарқынды

Елімізде екінші жыл қатарынан «Нұрлы жер» мемлекеттік бағдарламасы іске асырылуда. Осы бағдарлама аясында қазір Шымкенттегі әкімшілік-іскерлік орталық пен «Шымкент Сити» аумағында жаңа үйлер салынып жатыр. Тұрғын үй құрылысына зор серпін беріп отырған «Нұрлы жер» бағдарламасы миллионды шаһардың тұрғындарына, әсіресе, жас отбасылардың пәтерлі болуына мүмкіндік береді.
Бүгінгі таңда Шымкентте тұрғын үй кезегінде 34 мың адамның тұрғанын ескерсек, баспана мәселесі шын мәнінде өте өзекті. Осы орайда шаһарда мемлекеттік бағдарламалар аясында халықты тұрғын үймен қамтамасыз ету мәселелеріне ерекше көңіл бөлініп-ақ жатыр. Жоспар бойынша Шымкентте Тұрғын үй құрылыс жинақ банкі салымшылары үшін 2 500 пәтерден тұратын 9, 12 және 16 қабатты 40 тұрғын үй салынбақ. 2017 жылдың тамыз айында Тұрғын үй құрылыс жинақ банкінің басқарма төрайымы Ләззат Ибрагимова мен Шымкент қаласының әкімі Ғабидолла Әбдірахымов «Нұрлы жер» бағдарламасы аясында ынтымақтастық меморандумына қол қойған болатын. Бұл келісімге сәйкес жалпы аумағы 150 мың шаршы метр үй салынады.
Тұрғын үй құрылыс жинақ банкі облыстық филиалы директорының орынбасары Ақылбек Қоспановтың айтуынша, алғашқы 662 пәтерді тұрғындар биыл ала алады, осы мақсатта әкімшілік-іскерлік орталықта қазіргі таңда 12 үй салынып жатыр. Бұл үйлердің құрылысы осы желтоқсан айының соңында аяқталмақ.
Еске сала кетсек, Шымкентте биылғы пайдалануға берілетін 662 пәтердің жалпы аумағы – 50 мың шаршы метр. Ал 2019 жылы әкімшілік-іскерлік орталық пен «Шымкент Ситиде» берілетін көпқабатты үйлер саны – 28. Ондағы пайдалануға берілетін пәтерлердің саны 1816 болмақ.

Инвестицияға тартымды қала

Таяуда ғана Шымкентте өткен «Shymkent Development forum-2018» алғашқы халықаралық инвестициялық форумының да жөні бөлек. Аталған ауқымды іс-шара өз нәтижесін берді. Форум аясында жалпы сомасы 200 млн АҚШ долларын құрайтын 11 меморандумға қол қойылды. Шетелдік инвесторлар Шымкенттің микрофиба шығару бойынша текстиль фабрикасының құрылысына, қалалық жедел медициналық жәрдем қызметінің автопаркін жаңарту, «Shymkent city» қалашығы аумағында тұрғын үйлер, әкімшілік ғимараттар мен жаңа саябақ салу сияқты ірі жобаларға қаржы құймақ.
Келісіидер аясында қалалық жедел жәрдем қызметінің автопаркін жаңғырту үшін 13 млн АҚШ доллары көлемінде инвестиция жұмылдырылмақ. Енді алғашқы 100 жедел жәрдем көлігі келесі жылдың бірінші жартысында сатып алынады. Білім беру саласында да германиялық компаниямен меморандумға қол қойылды. Индустриалды аймақта зауыт салынып, текстиль фабикасы ашылады, Қажымұқан атындағы Орталық стадион әлемдік талаптарға сай деңгейде қайта жаңартылмақ.
Айта кету керек, 2018 жылы Шымкент қаласына 524 млрд теңге инвестиция жұмылдырылды. Бұл 2017 жылмен салыстырғанда 3 есе көп.
Форум барысында қала әкімі Ғабидолла Әбдірахымов Шымкентте қолға алынған ірі жобалармен таныстырды. Шаһар басшысының мәлімдеуінше, Шымкенттің дамуы екі бағытта жүзеге асырылады. Біріншісі – экономиканың жылдам дамуы, соның нәтижесінде қала сауда және өндіріс орталығына айналады. Шағын және орта бизнес дамиды деп күтілуде. Ал екінші бағыт – қала тұрғындарының өмір сүруіне қолайлы орта және мегаполиске келетін қонақтарға қолайлы жағдай жасау. Осы мақсатта әуежайдың жаңа терминалының жобасы жасалған. Халықаралық стандарттарға сай келетін жаңа әуежай 2020 жылдың бірінші жартысында ашылады деп жоспарланып отыр.

Шымкентте трансформатор зауыты ашылды

Астанада желтоқсан айында Мемлекет басшысы Нұрсұлтан Назарбаевтың қатысуымен «Индустрияландырудың екінші бесжылдығы: Қазақстанда жасалған» жалпы ұлттық телекөпір өтті. Телекөпір барысында бірнеше кәсіпорын ашылды. Соның бірі – Шымкент қаласында қуаттылығы 220, 500 КВ болатын жоғары кернеулі трансформатор шығаратын зауыт іске қосылды.
«Asia Trafo» инновациялық кәсіпорны «Тассай» индустриалды аймағында орналасқан. Мұндай кең көлемдегі трансформатор өндірісі Қазақстанда алғаш рет қолға алынып отыр. Жобаның жалпы құны 18,9 млрд теңгені құрайды. Жобаның екінші кезеңінде цифрлық трансформаторларды өндіру жоспарланып отыр. Сонымен қатар мұнда Орталық Азияда теңдесі жоқ электрлі сынақ зертханасы да құрылған. Кәсіпкерлікті қолдау картасының аясында жүзеге асырылған өндіріс орнында 220 адам жұмыспен қамтылады.
Жалпы, Шымкент қаласында индустриялық-инновациялық даму мемлекеттік бағдарламасын жүзеге асыру бойынша 2018 жылы құны 9 710,7 млн теңгені құрайтын 9 жоба іске қосылып, жаңа 635 жұмыс орны ашылды.

Түйін сөз:

Миллион тұрғыны бар Шымшаһарды келер жылы да ауқымды жұмыстар, зор өзгерістер күтіп тұр. Яғни, алып мегаполисте жаңа жұмыс орындары көбейеді, қаланың инфрақұрылымы жаңарып, инвестицияға жол ашылады, бір сөзбен айтқанда, жұмыс қыза түседі. Қорыта айтқанда, Шымкенттің алда көздеген бағдары – айқын, мақсаты – биік. Халқымыз «Ескi жыл есiркесiн, жаңа жыл жарылқасын» дейді. Өткен жылға өкпе жоқ, ал келер жылдан үмiтiмiз де, тiлегiмiз де көп.

Еліміз үшін ерекше маңызы бар Қазақстан Республикасының Тұңғыш Президенті күнін шымкенттіктер салтанатты түрде атап өтті.

Екі ой, төрт астармен сөйлейтін қазақтың көрнекті жазушысы Мұхтар Мағауинның «Шымкент Қазақстансыз өмір сүре алады, Қазақстан Шымкентсіз өмір сүре алмайды» дегені бар. Әзілге жығып айтты дегенімізбен де, астарында терең мағынасы бар сөз ғой. Рас, Шымкент өңірі қазақылығымен, салт-дәстүрді сақтап, ұлт демографиясына басты үлес қосып отырған аймақ. Елбасы Нұрсұлтан Назарбаевтың өзі де Шымкентке келген бір сапарында: «Мен облысты үш «Ш»-мен айтамын. «Шырайлы Шымкент шаһары!», – деп айтқаны есімізде. Сондай-ақ, «Адамға өмір бір рет беріледі, оны Шымкентте сүру керек» деген сөзі де елдің аузында жиі айтылады, тіпті қанатты сөздей болып кетті. Жалпы, Президенттің Шымшаһарға әр келген сайын осындай жақсы пікірлер білдіріп тұратыны белгілі.