ҚР Жазушылар Одағы Шымкент қалалық филиалының төрағасы М.Әбдіәкімұлының жүргізуімен өткен кеште ақын өлеңдерімен жақсы таныс шығармашыл орта жиналды. Кешті жазушы Захардин Қыстаубайұлы ашып, өлең сөздің қадірін түсінетіндерге құрметінің айырықша екенін атап өтті. Сонымен қатар, әдеби кеште Эльмираның әкесі Сәрсенбай Есхожаев сөз сөйлеп, қызына деген ақ батасын жеткізді. ҚР Жазушылар Одағының мүшелері сатирик, жазушылар Мұхтар Шерім, Сабырбек Олжабай, айтыскер ақын Бөрібай Оразымбет және басқа да әдебиет жанашырлары кеш иесіне деген ақ көңілден шыққан ақжарма тілектерін жеткізіп, сый-сыяпаттарын табыстады.
Кештің көрігін қыздырған «Жас қаламгер» үйірмесінің қосымша білім беру орталығының шәкірттері мен Ә.Қуатбеков атындағы халықтар достығы университетінің студенттері көпшілікке ақын өлеңдерін мәнерлеп оқыды. Ал әншілер А.Саттарова, А.Бекенқызы Эльмираның «Ана мен бала», «Іңкәрім», «Мен қазақпын», «Серт» өлеңдеріне жазылған әндерінен шашу шашты.
Р.ҚОНАРБЕКҚЫЗЫ
