«Биыл біз жастардың сапалы білім алуына және кәсіби деңгейі өсуіне жағдай жасау мақсатында тағы бір маңызды қадам жасадық. Қала әкімдігі мегаполистегі жетекші жоғары оқу орындарында білім алу үшін абитуриенттерге шәкіртақысымен бірге 285 грант бөледі. Қаламыздың тірегі болатын жоғары білікті мамандар даярлау қажеттілігінің артып келе жатқанын ескере отырып, осындай шешім қабылдадым» деп жазды Ғабит Әбдімажитұлы.
Оның сөзіне сүйенсек, берілген гранттар сапалы білім алуға және мегаполис пен жалпы еліміздің дамуына үлес қосуға ұмтылған дарынды және ынталы жастарға жаңа мүмкіндік ашады. «Білімге салынған инвестиция – біздің болашағымызға салынған инвестиция», - дейді шаһар басшысы.
Қала әкімі грантта оқуға ниет білдірген барлық абитуриенттерді әкімдіктің ресми ресурстарындағы жаңалықтарды бақылап, конкурстық іріктеуге белсенді қатысуға шақырған.
Ғ.Сыздықбеков «Сіздердің білімдеріңіз бен дағдыларыңыз – Шымкенттің табысты дамуының кепілі. Әрбір дарынды жас өз мүмкіндігін жүзеге асыра алатындай болашақ құрайық», - деп ойын қортындылаған.
А.Сайлауұлы
