Қаланың әр тұсынан көрінетін жаңа, биіктігі 100 метрлік ту бағанасында ұзындығы – 30 метр, ал, ені – 15 метрлік үлкен байрақ желбіреп тұр. Мемлекеттік Тудың қала көгінде желбіреп тұруы халқымыздың көңіліне патриотизм рухын ұялатқандай.
Tulip Hail орталығының жанына Ту тұғырын орнату бұл жерді шаһардағы жаңа көрнекті орынға айналдырды. Оның биіктігі Ордабасы алаңындағы 50 метрлік Ту бағанасынан едәуір асып түседі. Бұл Шымкент қаласының серпінді дамуын және қаланың жаңа биіктерге ұмтылуын бейнелейді.
Шымкент тұрғындары мен қонақтары атап өткендей, биікте желбіреген көк байрақ бүкіл халқымызды бір тудың астына біріктіре отырып, бірлік пен ерекше мақтаныш сезімін тудырады. Мемлекеттік Туымыздың ашық көк түсі бейбітшілік пен ашық аспанды, елдің тұтастығы мен болашаққа деген сенімді білдіреді. Тудың ортасындағы алтын күн мен қыран бейнесі халқымыздың еркіндікке, жаңаруға және жарқын болашаққа ұмтылысын көрсетеді. Бұл бейнелер біздің болмысымыздың терең мәнін ашады, ұлттық мақтаныш сезімін арттырады.
Салтанат ЖАМАЛДИНОВА
