Шымкентке Италияның әйгілі сырнайшысы Мауро Маур мен пианиношы Франсуаза де Клоссе келді. Мәдени шара облыстық опера және балет театрында «Италия киносының ұлы музыкасы» деген тақырыпта өтті. Концерт Қазақстандағы Италия күндеріне арналды.
Өнер кешінде көрермендерге Эннио Морриконе, Пьеро Пиччони, Риц Ортолани және Нино Ротаның италиялық фильмдерге арнап жазылған әуендері ұсынылды. Жалпы, 11 шығарма орындалып, оның сегізі шымкенттік симфониялық оркестрмен сүйемелденсе, ал үшеуі хормен орындалды. Осылайша, жергілікті өнерпаздар шетелдік әріптестерімен тәжірибе алмасып, шеберліктерін арттырды. Облыстық опера және балет театрының директоры Жәнібек Тағаевтың айтуынша, екі сағатқа созылған концертте шымкенттіктер зор рухани ләззат алды.
Айта кетейік, Мауро Маур Париж бен Чикагода оқыған. Бірқатар айтулы конкурстардың лауреаты. Римдегі Санта-Чечилия музыка академиясында дәріс береді. Бұған дейін Бразилия, Мысыр, Замбия, Канада, Нигерия, АҚШ, Чили, Эфиопия және Оңтүстік Африкадағы жоғарғы оқу орындарында жұмыс істеген.
Эльмира АЙНАБЕКҚЫЗЫ