Дәнекерлеуші – беделді мамандық
Пятница, 21 Октябрь 2016 07:55«Достық» шағынауданының тұрғындары – 4-разрядты дәнекерлеуші Мұрат Нышанбаевтың еңбегін айрықша бағалайды. Бүгінде М. Нышанбаев үздік газ-электр дәнекерлеушісі ретінде жоғары құрметке лайық.
Нышанбаевтар жанұясының әдеттегі қызметі отағасының қызын балабақшаға апарып, сүйікті жұмысына асыға қадам басуымен басталады.
– Өзім жұмыс істейтін дәнекерлеу цехы үйдің маңында орналасқан, – дейді дәнекерлеуші. – Темірден түйін түйіп, дәнекерлеп, қажетті материалдар жасап шығару өзіме ұнайды. Сол себепті өзге салаға бет бұру ойымда жоқ.
Әзірге цех ғимаратын жалға алып, өз ісін жандандырып отырған еңбек адамының өмірлік арманы асқақ. Күнделікті тапқан несібесі бүтін бір отбасының еркін тұрмыс-тіршілікте ғұмыр кешуіне жеткілікті екенін айтады. Бұйыртса, алдағы уақытта кәсібін кеңейтіп, өзінің жеке цехында жұмыс істеуді, осы арқылы кәсіпкерлік қызметін жандандыруды қолға алмақ.
Бүгінде цехта тұрғындардың арнайы сұранысына орай, күнделікті тұрмыстық заттар мен өзге де қажетті материалдар әзірленеді. Дәнекерлеу құралдарын жетік меңгерген маман келешекте ұлдарын да осы салада машықтандырмақ.
– Шын мәнінде, дәнекерлеуші – беделді мамандық. Металды дәнекерлеу жұмысы суретшінің шығармашылығы секілді асқан қажырлықты талап етеді. Мен білетін дәнекерлеуші әріптестерімнің көпшілігі тұрақты негізде 150-300 мың теңге аралығындағы жалақыға қызмет етіп жүр. Ай сайын мұндай көлемде табыс табу – өзге қызмет иелерінің қолынан келе бермейді. Мен жастарға мамандық таңдарда ұдайы қателеспеуге, техникалық салаларда өз ісінің маманы болып қалыптасып шығуға кеңес беріп жүремін, – дейді еңбек адамы.
Байқағанымыз, дәнекерлеушінің бүгінгі қызметі де әдеттегідей жетіп-артылады. Ақауы байқалған көлігінің қосалқы бөлшегін иінге келтіру үшін де бірнеше жүргізуші өз кезегіне тұрып жатты. Сөзден гөрі ісіне берік шебер қай кездегі ілтипатына салып, бізбен жылы қоштасты.
Президент лауазымына үміткерлер кімдер?
Пятница, 21 Октябрь 2016 05:50
Ел Конституциясы бойынша, Президент қайтыс болған немесе қызметін атқаруға қабілетсіз болған жағдайда оның міндетін атқару үш ай мерзімге Парламенттің жоғарғы палатасы – Сенат төрағасына жүктелуі тиіс. Дегенмен, Сенат спикері Нигматулла Юлдашев бұл міндеттен бас тартуы себептен, Президент міндетін уақытша атқару жауапкершілігі Үкімет басшысы Шавкат Мирзияевқа жүктеліп отыр.
Президент сайлауы алдындағы науқанға шапшаң кіріскен партиялар бүгінде өз кандитаттарын ұсынды. Өзбекстанның Либералдық-демократиялық партиясы үміткер ретінде Шавкат Мирзияевқа бірауыздан дауыс берген. Бұл орайда, көптеген саясаттанушылар оның Президент болатынына сенімді. Десе де, Парламенттің төменгі палатасы спикерінің орынбасары Сарвар Отармұратовтың да тақтан дәмесі бар. Оны «Миллий Тикланиш» партиясы кандитат ретінде ұсынды. Бұдан бөлек, 2015 жылғы Президент сайлауына түскен Хотамжан Кетмонов пен Нариман Омаров та осы тізімде.
Бұл жолғы сайлаудың ашықтығын қамтамасыз ету бағытында Өзбекстан Орталық сайлау комитеті бірқатар халықаралық ұйымдарға Президент сайлауына ресми түрде шақырту жолдады. Бұл қатарда Еуропадағы қауіпсіздік және ынтымақтастық ұйымы (ЕҚЫҰ), Тәуелсіз Мемлекеттер Достастығы (ТМД) Атқарушы комитеті, Шанхай Ынтымақтастық Ұйымы (ШЫҰ) да бар.
Бұған дейінгі 2015 жылы 29 наурызда өткен Өзбекстан президенті сайлауына ЕҚЫҰ байқаушыларды шектеулі ғана көлемде жіберген еді. Яғни, 43 елден 300-дей ғана байқаушы сайлау барысын бақылаған болатын.
Сонымен, Өзбекстандағы мерзімінен бұрын өтетін Президент сайлауына 2 айдан аз уақыт қалды. Саяси партиялар өзбек елін басқаруға лайық деп таныған 4 саясаткердің кандидатурасы да дайын. Ал уақытша президент Шавкат Мирзияев аз күннің ішінде не тындырды? Оны қазірден бастап болашақ Президент деп тануға негіз бар ма? Осыған орай, белгілі саясаттанушы Ерлан Қарин әлеуметтік желі арқылы қазіргі Өзбекстандағы жағдайға қатысты өз көзқарасын білдірді. Сарапшының пікірінше, ел саясатының жабықтығын және жергілікті саяси элита құрылымының ерекшелігін ескере отырып, биліктің қандай сценарийлерімен ауысатынын болжау аса қиынға соғады. Дегенмен, елдегі саяси жүйе бүгінде жаңаша бағыт алғандай. Әсіресе, көршілес елдермен ынтымақтастықты тереңдетіп, олармен тығыз қарым-қатынаста болуға мүдделілік танытуда.
Бүгінде, Мирзияев өз пәрменімен Жұлдыз Османова, Обид Осомов, Шерәлі Джураев сынды қудалауда жүрген бірнеше өзбек жұлдыздарын сахнаға қайтарды. Жақында Сырдария облысына іссапармен барған уақытша Президент Кәрімов салып берген сара жолдан ешқашан айнымаймыз деп сұхбат та берді.
Бір қызығы, Кәрімов қайтыс болғаннан кейін әлемдік ірі ақпарат агенттіктері Өзбекстандағы саяси ахуал жайлы жақ ашпады. Бірақ жергілікті басылымдар Шавкат Мирзияевтің іссапарларын кеңінен насихаттауда.
Шынында, Үкімет басшысы, бүгінде Президенттің міндетін уақытша атқару жауапкершілігін алған Шавкат Мирзияевтің жасы қазір 58-де. Яғни, елде белсенді билік жүргізе алатын дер шағы. 2003 жылдан бері Премьер-министр лауазымын атқарып келеді. Оның басшылық карьерасы Ташкент қаласындағы Мырза Ұлықбек ауданының әкімі қызметінен басталған. Осы кезден бастап ол Каримов жақын тартқан кадрлардың бірі болған. Білетіндер Мирзияевтың мінезі қатаңдау екенін айтады.
Өзбекстан – Орталық Азия елдерінің арасында айтарлықтай маңызға ие мемлекеттердің бірі. Бұл орайда, сарапшылар елдегі саяси элита арасындағы топтар немесе жеке адамдардың өзара тартысы елдегі дағдарыс дәуірін туындатуы мүмкін екенін айтуда. Тіпті, ғаламтор беттерінде Өзбекстанда Мирзияевке қарсы ереуілдер өтіп жатқаны жайлы хабарлар да тарауда. Мұның барлығы алдағы сайлауға әсер ететіні сөзсіз. Шын мәнінде, елде Мирзиявке қарсы қарсылық үдей түссе, онда ел басқаруға ниетті Сарвар Отармұратов, Хотамжан Кетмонов, Нариман Омаровтың бірін Президент ретінде көріп қалуымыз да бек мүмкін.
Шамамен 32 миллион халқы бар Өзбекстанда Президенттік сайлауда 21,5 миллион сайлаушы дауыс береді деп күтілуде.
Басты бағыт – медианарықты дамыту
Пятница, 21 Октябрь 2016 05:22Оңтүстік Қазақстан облысы бүгінде елдегі медианарықтың ордасына айналған. Санының көптігімен қатар өңірлік БАҚ республикалық деңгейде алдыңғы лекте аталады. Бұл жөнінде Шымкентте өткен «Жаңа ақпараттық саясат: бағдар мен болашақ» тақырыбындағы екінші республикалық журналистер форумында айтылды.
‒ Үш миллионға жуық тұрғыны бар Оңтүстік өңірінде жалпы саны 236 бұқаралық ақпарат құралы бар. Олардың 175-і газет болса, 37-і журнал, 12-і телеарна, 3-і радио. Бұған қоса, 9 интернет ресурс халыққа жылдам әрі толымды ақпарат таратуда. Біз өз тарапымыздан, БАҚ өкілдерін, Елбасы айтқандай, бір ұлт болып ұйысуға, ілгерілеуге, Ұлт Жоспары мақсатында атқарылған шараларға белсене қатысып, ақпаратпен қамтуға шақырамыз, – деді форумның ашылу салтанатында сөз сөйлеген Жансейіт Қансейітұлы.
Ел Тәуелсіздігінің 25 жылдығы аясында өткен бұл жолғы басқосу – Елбасы Н. Назарбаев айқындап берген «100 нақты қадам – Ұлт Жоспарын» орындауды көздейді. Осы орайда, облыс әкімі алдағы уақытта журналистер қауымымен ортақ диалог алаңын құруға дайын екенін және түрлі тақырыпта аймақтық форум өткізіп тұруды ұсынды.
Форумдағы «Тәуелсіздік құндылықтарын қалыптастырудағы БАҚ-тың маңызы» тақырыбы аясында республикалық «Түркістан» газетінің бас редакторы Шамшиддин Пәттеев, «Айқын» республикалық қоғамдық-саяси газетінің директор-бас редакторы Нұртөре Жүсіп, «Жас Қазақ» газетінің бас редакторы
Срайыл Смайыл толғамды ой-пікірлерін жеткізді. Форумның екінші бөлігінде «Медиакеңістіктегі бәсеке, дәстүрлі БАҚ-тың болашағы» тақырыбында ой-ұсыныстар ортаға салынды.
Форумда айтылған ұсыныстар мен пікірлер екшеліп, жинақталып, алдағы кезде ел пайдасына жұмыс істейтін болады.
«Ордабасы» жүлдеден үмітті
Среда, 19 Октябрь 2016 08:17Шымкенттік «Ордабасы» Премьер-лигадағы 30-тур ойынын Қажымұқан атындағы орталық стадионда керекулік «Ертіске» қарсы өткізді. Турнир кестесінде тиісінше, 3 және 4-орындарға жайғасқан бұл қос команда арасындағы ойын шын мәнінде, іріншіліктің шешуші кездесуіне баланғандай еді. Сол себептен де, бұл ойынға қос команда ойыншылары да ерекше дайындықпен келгені байқалды. «Ертіс» командасының бас бапкері Димитар Димитров 5 қорғаушы жүйесіне көңіл бөлсе, шымкенттік команданың тізгінін ұстайтын Бақтияр Байсейітов шабуылға иек артатынын аңғартты.
Ойындағы бірінші қауіпті соққыны «ордабасылық» легионер ойыншы Симчевич жасаған. Дегенмен, доп Антон Цирин қорғаған қақпадан сәл жоғары кетті.
Алғашқы гол кездесудің 15-минутында соғылды. Айып алаңына еркін енген «Ертістің» жартылай қорғаушысы Карлос Фонсеканы «Ордабасы» қорғаушылары шалып жығудан басқа амал тапқан жоқ. Нәтижесінде, Алмат Бекбаев қорғаған қақпаға 11 метрлік айып добы белгіленді. Ал мұндай мүмкіндікті Роман Мұртазаев тек жіберген жоқ. Есеп ашылды. Екінші гол да көп күттірген жоқ. Араға 6 минут уақыт салып, тағы сол Карлос Фонсека алыс қашықтықтан соққы жасап, қақпашыны қапыда қалдырды. Есеп – 0:2! «Ертіс» командасы басымдыққа ие бола түскен. Осыдан кейін ойын тізгінін біржола қолға алған «Ордабасы» бір сәт есепті қысқартудың ретін тапты. Айып алаңында допты қолмен тоқтатқаны үшін қорғаушы Семир Керла төреші тарапынан сары қағазбен жазаланды. Нүктеге келген Александр Гейнрих допты қақпаға дәл бағыттады. Есеп – 1:2. Араға бірер минут салып, Ордабасы есепті теңестірді де. Көтерілген бұрыштама добын Диакате қақпаға дәл бағыттады. Үзіліске қос команда тең нәтижемен тарқасты.
Ойынның екінші кезеңінде де «ордабасылықтар» қарсылас команда қорғаушыларына тыныстауға мүмкіндік берген жоқ десе де болатындай. Толығымен шабуылға ден қойған Байсейітов шәкірттері бір сәт қорғанысты ұмыт қалдырды. Мүмкіндігін мүлт жібермеген керекулік команда Елдос Ахметовтің шеберлігінің нәтижесінде, тағы да алға шықты. Кездесудің 87 минутында төреші Артем Кучин дөрекі ойынымен дараланған керекуліктердің қақпасына тағы бір 11 метрлік айып добын белгіледі. Оны сәтті орындаған Александр Гейнрих маусымдағы өзінің 8-добын соқты. Осылайша, таблода 3:3 есебі тіркелді.
Бұл күні турдың орталық матчы ретінде алматылық «Қайрат» «Астананы» қабылдап, 2:0 есебімен жеңіске жетті. Нәтижесінде, турнир кестесінде тағы да шым-шытырық ахуал сақталып қалды. Яғни, көш бастаған «Астанада» – 68, «Қайратта» – 65 ұпай бар. Тиісінше, еурокубок ойындарында сәтті ойнап жүрген «Астананың» өзгелерден бір ойыны кем, яғни, әлі үш ойыны бар. Дегенмен, алғашқы қос жүлде осы аталған командаларға тиесілі болмақ.
Ал үшінші жүлденің кімге бұйырары да әзірге беймәлім. Жүлдеден үмітті «Ертіс» пен «Ордабасы» командаларының арасын 3 ұпай ғана бөліп тұр. Тиісінше, командаларда 48 және 45 ұпайдан бар. Алдағы қалған қос турда «Ертіс» көш басындағы «Қайрат» пен «Астананы» қабылдайды. Ал «Ордабасы» Көкшетауда «Оқжетпеспен», соңғы турда өз алаңында «Ақтөбемен» кездеседі. Яғни, қарсыластарының әлеует-деңгейіне қарап, «Ордабасының» жүлде алу мүмкіндігі зор деуге келеді.
Ел біріншілігі қазан айының 29-жұлдызында мәреге жетеді.
Оңтүстік күндері елорда төрінде тойланды
Среда, 19 Октябрь 2016 06:25Өткен аптаның демалыс күндері ҚР Тәуелсіздігінің 25 жылдығы аясында «Қуатты өңір – қуатты Қазақстан» атауымен Оңтүстік Қазақстан облысының Астанадағы күндері өтті. Аталған шара қос өңірдің арасындағы ауыл шаруашылығы, мәдениет, туризм, сауда-экономикалық байланысты қалыптастырған тығыз әріптестік қарым-қатынастың бірден-бір көрінісі іспетті еді. «Қазақстанда жасалған» акциясының шеңберінде астаналықтарға Оңтүстік Қазақстан облысы өнеркәсіп өндірушілерінің көрмесі мен ауыл шаруашылығы өнімдерінің жәрмеңкесі тарту етілді.
300 тоннадан астам өнім ұсынылды
|
Оңтүстік |
Қазан айының 15-16 жұлдызында «Хан Шатыр» сауда-ойын-сауық орталығы маңында ауыл шаруашылығы жәрмеңкесі ұйымдастырылды. Жәрмеңке барысында 50-ден астам Оңтүстік өңірінің тауар өндірушілері сапалы әрі арзандатылған өнімдерін тұрғындарға ұсынды.
Аумақта арнайы орналастырылған 50 шатырда 300 тоннадан астам өнім сатылды. Яғни, жәрмеңкеге шығарылған ауыл шаруашылық өнімдерінің жалпы құны 100,8 млн теңгені құрайды. Яғни, жалпы көлемі 304 тонна болатын өнімдердің құрамында 60 тонна ет және ет өнімдері, 126 тонна көкөніс, 29 тонна жеміс-жидек, 7 тонна сүт өнімдері, 5 тонна шұбат, 25 мың дана жұмыртқа, 40 тонна бақша өнімдері, 7 тонна балық, 7 тонна бал, 3 тонна өсімдік майы, 5 тонна кептірілген жеміс және 15 тоннаны құрайтын басқа да өнімдер бар. «Қазақстанда жасалған» акциясының шеңберінде бұл өнімдер нарықтағы бағадан 15-20 пайызға төмен бағада саудаланды.
Ауылшаруашылық жәрмеңкесіне Астана қаласының әкімі Әсет Исекешев және ОҚО басшысы Жансейіт Түймебаев та арнайы келді. Өз кезегінде, Әсет Исекешев елордада азық-түлік бағасының негізсіз өсуіне жол бермейтін мұндай жәрмеңкелерді жиі ұйымдастыру қажеттігін айтты.
– Астана мен Оңтүстік Қазақстан облысы арасында ауыл шаруашылығы, мәдениет, туризм, сауда-экономикалық байланыстар бойынша тығыз әріптестік қарым-қатынас орнатылған. Үнемі тәжірибе алмасып отырамыз. Астанада Тәуелсіздігіміздің 25 жылдығына байланысты қызу іс-шаралар жүргізілуде. Жыл соңына дейін елордада осынау мерекеге байланысты 160-тан астам шара өткізіледі. Оңтүстік өңірі де барлық сый-сияпатымен келіп, айтулы мерекеге мәдениеті және өнерімен, арзан азық-түлік жәрмеңкесімен келіп, жан-жақты үлес қосып отыр, – деді Әсет Өрентайұлы.
Өз кезегінде, ОҚО әкімі Жансейіт Түймебаев ел Тәуелсіздігінің 25 жылдығына орай өткізіліп жатқан шараның маңызына тоқталды. Ең бірінші мақсат – қол жеткізген табыстарды көрсете отырып, өңірлердің байланысын жақсарту екендігін баса айтып өтті.
Сөз соңында, Астана қаласының әкімі мен жұртшылығына осынау жылы қабылдаулары үшін ризашылығын білдірді.
Жәрмеңке барысында арнайы орнатылған сахнада оңтүстік өңірінен келген өнерпаздар әуелетіп ән салып, мың бұралып би биледі. Әсіресе, Шәмшінің әндері жұртшылықтың құлақ құрышын қандырды.
Сөреде тұрған өнімдердің де жаңа піскені байқалады. Бағалары да қымбат емес. Айталық, жылқы еті – 1 200 теңгеден, жылқының қазысы – 1 500 теңгеден, сәбіз, картоп, пияз сияқты көкөністердің келісі 50, құрт – 1 400, ірімшік – 1 100, жұмыртқа – 22 теңгеден саудаланды. Әрине, қарбыз бен қауынның бағасы да қол жетімді.
– Астанада тұрамын. Төрт балам бар. Қалада азық-түліктің бағасы жоғары ғой. Оларды қаптап ала алмаймыз. Осындай жәрмеңкенің біз секілді көп балалы отбасыларына тигізіп отырған жақсылығы көп. Әрбір апта сайын арзанға қыстық азығымды сатып аламын. Бүгін екі қапшық картоп алдым. Әйтеуір, балалар тоқ жүрсе, көңілім жайдары болады. Осы шараны ұйымдастырып жатқан азаматтарға алғысым шексіз, – дейді жәрмеңкеге келген Жанар есімді қала тұрғыны.
«Нұрын шашқан – Оңтүстік»
Астанадағы ауқымды шараның мән-маңызын саралаған облыс әкімінің орынбасары Ұласбек Сәдібеков Орталық коммуникациялар қызметінде БАҚ өкілдеріне арнап брифинг өткізді. Онда Ұласбек Сәдібекұлы Тәуелсіздік жылдарында өңірдің жеткен жетістіктері және Оңтүстік Қазақстанның Астанадағы күндерінің бағдарламасымен таныстырды.
– Биыл ауыл шаруашылығы саласында 470 мың тонна (2015 жылы 246 мың тонна болған) астық жиналып, түсімділігі орташа есеппен гектарына 22 центнерді құрады. Бұл Тәуелсіздік кезеңіндегі ең үлкен рекордтық көрсеткіш болып табылады. Сондай-ақ, жеміс-жидек дақылдары мен жүзімнің көпжылдық екпелерінің көлемі жылдан-жылға ұлғаю үстінде, – деді Ұласбек Сәдібекұлы.
Нақтырақ айтқанда, 2008-2016 жылдар аралығында өңірдегі жеміс-жидек дақылдары мен жүзімнің көпжылдық екпелерінің егіс көлемі 17,7 мың гектар болса, биыл бұл 30 мың гектарға жеткен.
Бұл сәтте Астана қаласындағы ҚР Ұлттық музейінде «Шырайлы Оңтүстіктің шежіресі» атты көрме ұйымдастырылды. ОҚО-ның мәдени бағдарламасы аясында ҚР Ұлттық академиялық кітапханасында ақын-жазушылармен кездесу және «Ұлысымның ұйытқысы – Оңтүстік» атты кітап көрмесі өтті.
Оқушылар сарайында Оңтүстікте түсірілген «Балаларға – базарлық», «Толағай», «Қазақстан барысы», «Қазақстан бренді», «Қошқар мен теке», «Момын және қарақшылар», «Мұңлық-Зарлық», «Нәурізек» атты анимациялық және қысқаметражды фильмдер көрсетілді. «Жастар» театрында Ж. Шанин атындағы облыстық қазақ драма театрының ұжымы С. Досановтың «Тозақ шеңбері» қойылымын сахналады. Қарттар мен мүгедектерге арналған медициналық әлеуметтік мекемеде және Балалар психоневрологиялық медициналық әлеуметтік мекемесінде «Жүректен жүрекке» қайырымдылық шарасы ұйымдастырылды. Сонымен қатар, этномәдени бірлестіктердің өкілдерінің қатысуымен «Ет асу» фестивалі және композитор Ш. Қалдаяқовқа ескерткіш орнатуға байланысты белгі қою рәсімі, Оңтүстік жастарының КВН-і, ақындардың жыр кеші ұйымдастырылды. Кешкісін Конгресс-холлда «Ән шашуым өзіңе, мерейлі Астанам!» гала-концерті ұйымдастырылды.
Сүгірдің «Ыңғайтөк» күйімен бастау алған мерейтойлық концертте 300-ге жуық оңтүстікқказақстандық өнер майталмандары асқақ өнерін паш етті. Елорда төрінде «әсем ән мен тәтті күй» орындалып, мың бұралған бишілер шеберлігімен тәнті етті. Осы кеште «Нұрын шашқан – Оңтүстік» фотокөрмесі көпшіліктің назарына ұсынылды. Шараға қатысқан өңір басшысы Жансейіт Түймебаев Астана қаласының қонақтары мен жұртшылығының назарына ұсынылған жылжымалы фотокөрмені тамашалады.
Әлеуметтік нысандарға жылу беріле бастады
Среда, 19 Октябрь 2016 06:19Шымкентте ауа райының күрт құбылуына байланысты биылғы жылу маусымы жоспардан ерте басталмақ.
14 қазаннан бері қаладағы 350 әлеуметтік нысанның жартысына жуығы, яғни, 160-ы жылу жүйелерімен қамтылған. Бұл жөнінде жергілікті БАҚ өкілдеріне арнайы брифинг өткізген қала әкімінің орынбасары Бейсенбек Жанбосынов мәлім етті.
Оның айтуынша, қаланың «Оңтүстік» және «Солтүстік» бөлігіндегі магистралдық жылу жүйелері толық жөндеуден өткен. Бүгінде қаладағы 1676 көпқабатты тұрғын үй қысқы маусымға дайын.
Орталықтандырылған жылу жүйесіне қосылған 1782 көпқабатты тұрғын үй кезең-кезеңімен қазан айының 22-жұлдызына дейін толығымен жылу жүйесіне қосылатын болады. Қазір мұнда ішкі орамдық жұмыстар аяқталып, жылу жүйелері қалпына келтірілуде. Яғни, жылу жүйелеріне химиялық таза су толтырылуы тиіс. Сағатына 300-350 тоннаға дейін су айдалады.
– Қазіргі уақытта қалада 18 мыңға таяу пәтер автономды жылу қазандығының қызметін пайдаланады. Бұл қандай да бір төтенше жағдайлардың туындауына айтарлықтай себеп болуда. Мұндайда, пәтер иелері техникалық шарттарды өз деңгейінде орындауы тиіс. Қазір арнайы ескерту жұмыстары жүргізілуде. Жақын келешекте мұндай жеке автономды қазандығы бар пәтерлер орталықтандырылған жүйеге қосылады, – деді Бейсенбек Керімбекұлы.
Бүгінде әлі де болса сығымдау жұмыстары жүргізілмеген 36 көпқабатты тұрғын үй анықталған. Мамандар тұрғындардың мұндағы жұмыстарға бей-жайлық танытуы себебінен, жылу берілмейтінін айтады. Жалпы, қазан айының соңына дейін қаладағы әлеуметтік нысандар мен көпқабатты тұрғын үйлер жылумен толық қамтылады.
Көшелер мен аулалар жарықпен қамтылады
Пятница, 14 Октябрь 2016 07:52Қала әкімінің тапсырмасына сәйкес, облыс орталығында ұсақ құқықбұзушылықтың алдын алуға бағытталған «Шымкент – қауіпсіз қала» аталған арнайы Жол картасы әзірленіп отыр. Оның негізгі мәні – қылмыс деңгейін 30 пайызға дейін төмендету. Жуырда қала әкімінің орынбасары Қайрат Нұртайдың төрағалығымен өткен жиында өңірде орын алған қылмыстың 60 пайызға жуығы Шымкент қаласы аумағында тіркелетіні айтылған болатын.
Басты міндет – аулаларды толық жарықтандыру
Қылмыстың ең көп шоғырланған нүктесі ретінде қаладағы «Асар», «Ворошиловка», «Көксай», «Бадам» елдімекендері аталады. Осыған байланысты, арнайы Жол картасын әзірлеген мамандар ондағы туындаған күрделі ахуалдың бірден-бір себебі ретінде жарықтандырылмаған көше бойы мен аулалардың мәселелерін атап отыр.
Сараптама нәтижесі көрсеткендей, күні бүгінге дейін Әл-Фараби ауданына қарасты Терешкова-Быковский көшелері «қауіпті нүктелердің» бірі ретінде аталатын. Кешқұрым бас қосатын ішімдікке әуес жастар мұнда жиі бой көрсетіп келген. Тіпті, ұйымдасқан түрде жасалған пәтер, көлік және қалта ұрлығы деректері де арта түскен. Тек, түнгі жарықтандыру жүйелері орнатылғаннан кейін ғана жағдай бақылауға алынып, тұрғындардың үрейі басылыпты. Аталған көше бойларымен ұзындығы 1968 метр болатын электр желісі тартылып, 68 дана жарық шам орнатылған. Өз кезегінде, қалаға қосылған елдімекен тұрғындары өз ризашылықтарын білдіруде.
– Балаларды тиісінше, мектеп пен балабақшаға жібергенде, бұған дейін орын алып келген қорқыныш сезімдерден арылдық, – дейді қуаныш сезімін жасыра алмаған көпбалалы ана Бейбіт Оспанәлиева.
Сондай-ақ, қаладағы орталық көшелердің бірі Республика даңғылының 40а үйінің тұрғыны Гүлнұр Жорабекова
сәт сайын гүлденіп-көркейіп келе жатқан шаһарда өмір сүретініне қуанады әрі мақтаныш етеді.
– Қаланың жергілікті тұрғыны ретінде ұзақ жылдар ұстаздық қызмет атқарып келемін. Ұл-қыздарым да осы қаламен бірге есейіп келеді. Көңілге кірбің салып келген қараңғылық жағдайы да өз шешімін тапты. Енді кешқұрым уақыттарда балаларымыз аулада алаңсыз уақытын өткізеді, – дейді ол.
Әл-Фараби ауданы әкімдігінің халықпен жұмыс жүргізу бөлімінің бас маманы Бақтияр Салиевтың айтуынша, ағымдағы жылы аудан көлемінде 73 аулаға 210 шам орнатылған. Тиісінше, ІІ кезең аясында 153 аулаға 459 шамды орнату жұмыстары жүргізілуде. Аудан аумағында әлі де болса 68 көпқабатты тұрғын үй ауласы жарықтандыруды қажет етеді.
Диодты шамдардың артықшылығы қандай?
Қазір қаладағы аулаларды жарықтандырумен «Ақсемсерстройсервис» және «Электростроймонтаж» мердігер мекемелері айналысуда. Күні бүгінге дейін қаладағы барлығы 1020 ауланың 334-і жарықпен қамтылған. Жыл соңына дейін тағы 455 аула жарықтандырылуы тиіс.
Қаланың түнгі шырайын арттыру, қауіпсіздікті қамтамасыз ету мақсатында әкімдік пен тұрғындар арасында ортақ түсінік қалыптасқан. Қазіргі таңда Ш. Уәлиханов, Елшібек батыр, Сайрам және Т. Рысқұлов көшелерін, Жібек жолы көшесін А. Байтұрсынов көшесіне дейін түнгі шамдарын реттеу жұмыстары қолға алынған. Ең бастысы, соңғы үлгідегі бағаналар қойылуда. Қалаға қосылған елдімекендерді, сондай-ақ, «Жұлдыз», «Сайрам», «Қайнарбұлақ» тұрғын алабының орталық көшелерін де жарықтандыру жоспарда тұр.
Қаланың түнгі тыныс-тіршілігіне айрықша реңк беретін ол – диодты шамдар. Мамандардың айтуынша, мұндай энергияны аз қажет ететін, бірақ жарық беру әлеуеті үлкен диодты шамдар ескі жарық көздерімен салыстырғанда 5 есе жарық көп береді. Яғни, 139 көше, 334 аула, 8 саябақ және 30 гүлзарға жалпы саны 1189 дана диодты шам орнатылған.
«Қатерлі нүктелер» азайып келеді
Қалалық тұрғын үй-коммуналдық шаруашылығы бөлімі мамандарының арнайы зерделеуімен алғашқы кезекте жарықтандырылуы тиіс 1-санаттағы 364 көше анықталған. Осының негізінде 2016-2018 жылдарға арналған арнайы жоспар әзірленіп, жұмыстар кезең-кезеңімен атқарылуда. Яғни, биыл барлығы 139 көшені жарықтандыру көзделген. Жыл соңына дейін 40 көшеге ЖСҚ әзірленіп, 23 көшеге жарықтандыру жүйесі жүргізілмек. 4 көше қайта құрылымдалады.
– Қылмыстылық картасында қаланың «қатерлі нүктелері» саналатын аумақтар осыдан бірер жыл уақыт бұрын бірнеше ондап саналушы еді. Енді міне, ауқымды түрде жүргізілген жарықтандыру жұмыстарының нәтижесінде, «нүктелер» санымен қатар, қылмыс деңгейін біршама төмендетуге мүмкіндік туындауда. Осы арқылы, бақылау камераларының қатарын арттырып, тұрғындармен тығыз қарым-қатынас орнату да ендігі міндетіміз аталады, – дейді Әл-Фараби аудандық жергілікті полиция бөлімінің басшысы, полиция подполковнигі Сейтхан Пайзуллаұлы.
Сөз басында айтылған «Шымкент – қауіпсіз қала» Жол картасы аясында барлық көпқабатты үйлердің аулалары жыл соңына дейін толығымен жарықтандырылуы тиіс. Бұдан бөлек, «Шымкент қаласының әлеуметтік-экономикалық даму Тұжырымдамасына» сәйкес, қала көшелерін жарықтандыру жұмыстары 2020 жылға дейін кезең-кезеңімен жүзеге асырылатын болады.
Суретті түсірген М. ШАҒЫРБАЕВ
Бокс саңлақтары Шымкентке жиналды
Пятница, 14 Октябрь 2016 06:04Шымкенттегі Жеңіл атлетикалық спорт кешенінде бокстан ҚР Тәуелсіздігінің 25 жылдық мерейтойына орай, Кеңес Одағының батыры Қарақозы Әбдәлиевті еске алуға арналған 37-ші халықаралық турнир өтуде.
Байрақты додаға Ресей, Қытай, Моңғолия, Өзбекстан, Тәжiкстан, Қырғызстан, Түркіменстан, Армениядан және еліміздің барлық облыстарынан келген 160 спортшы қатысуда.
Дәстүрлі турнир биыл осымен 37-ші рет өткізіліп отыр. Байрақты бокс бәсекесінің жоғары деңгейде өтуіне Шымкент қаласының әкімдігі, ОҚО бокс федерациясы ұйытқы болуда. Кезінде бұл турнирде Василий Жиров сынды саңлақтар да қатысып, тәжірибе жинаған.
Бокс жанкүйерлерінің делебесін қыздырған турнир қазан айының 15 жұлдызына дейін жалғасады.