«Мүлдем төзбеушiлiк» қағидасы қоғам тыныштығын сақтайды
Пятница, 12 Август 2016 09:09Тәуелсіздіктің түп тамыры – тәртіпте. Заң алдында баршаның жауапкершілігі бірдей. Осы орайда, Елбасының 5 институционалды реформасын орындау бағытындағы 100 нақты қадамында ұсақ құқықбұзушылыққа мүлдем төзбеу қағидалары атап көрсетілген.
Белгіленген бағыт-міндеттердің аясында тәртіп сақшыларының қатысуымен жүйелі жұмыстар атқарылуда. «Таза қала» шарасы аясында жүргізілген жұмыстардың нәтижесі бүгінде өз тиімділігін көрсетуде.
Атап айтқанда, шілде айының 7-жұлдызынан бастау алып, 1 ай уақыт мерзіміне созылған шара аясында Шымкент қаласының ішкі істер органдарының қызметкерлері барлығы 991 ұсақ құқықбұзушылық дәйегін анықтаған. Акция барысында полиция қызметкерлері қаладағы көпқабатты тұрғын үй аулалары мен көпшілік демалыс орындарында тазалық пен тыныштықты сақтау, қоғамдық тәртіпті қамтамасыз ету жұмыстарына жұмылдырылды.
– Қазақ мемлекетін дамыған 30 елдің қатарына енгізу бағытында жарияланған 100 нақты қадамының 5 бірдей бағыты осы ұсақ құқықбұзушылықты болдырмауға үндейді. Сол себептен де, ауланы ластау, көршілердің тынышын алу, кәмелет жасқа толмаған жасөспірімдердің түнгі уақытта көшеде ата-анасыз жүруі, қайыр сұрау, қоғамдық орындарда ішімдік ішу мен әртүрлі заңсыз қызметтерді ұсыну, осылардың барлығы жауапқа тартылады. Тиісті мөлшерде айыппұл салынады. Тіпті, сот шешімімен 15 тәулікке дейін қамалады, – дейді Қаратау ауданының прокуроры М. Арыстанов.
Мемлекет бекіткен ереже осындай. Заң алдында ұсақ, ауыр қылмыс демей, бәрі бірдей жауап беруі тиіс. Себебі, ұсақ қылмыстың алдын алу шаралары үлкен қылмыстарды болдырмау үшін жасалуда. Осы бағытта Қаратау ауданының әкімдігі кәмелеттік жасқа толмаған жасөспірімдер арасында құқықбұзушылықтың алдын алу мақсатында мобилді топ жасақтап, рейдтік шаралар ұйымдастыруда. Тамыз айының 7-жұлдызында өткен шараның қорытындысы бойынша шағынаудан көшелерінің бірінде ата-анасының бақылауынсыз жүрген 2 жасөспірім анықталыпты. Олардың ата-аналарына ескерту жасалып, хаттама түзілген.
Айта кетейік, ҚР Әкімшілік құқықбұзушылық туралы Кодексінің 442-бабына сәйкес, кәмелеттік жасқа толмаған жасөспірімдердің сағат кешкі 22-ден таңғы 6-ға дейін ойын-сауық мекемелерінде болуы – олардың ата-аналарына үш айлық есептік көрсеткіш мөлшерінде айыппұл салуына әкеп соғады. Осыған сәйкес, мамандар қандай да бір құқықбұзушылықтың алдын алу бағытында ата-аналар қауымын балаларының әрекеттерін қатаң бақылауға алуды ескертеді.
– Қылмыстың ұсақ, ірісі болмайды. Қандай да бір келеңсіз жайттың алдын алу үшін «ұсақ құқықбұзушылыққа мүлдем төзбеу» қағидасы берік ұсталынады. Бұл дегеніңіз – көшедегі ұсақ қылмыстардың алдын алу бағытында жан-жақты жұмыс атқаралып келеді деген сөз. Ұсақ қылмыс қатарында көшеге қағаз, темекі тұқылын, сағыз сорабын тастап кетуден бастап, жолдың рұқсат етілмеген жерлерін қиып өту, ұрлық, бұзақылық, бәрі-бәрі қамтылады, – дейді Қаратау ауданы әкімінің орынбасары Балмаржан Нарбекова.
Жалпы, облыс аумағында үстіміздегі жылдың алты айында 128430 әкімшілік құқықбұзушылық деректері анықталып, 1 миллиард 113 миллион теңге көлемінде айыппұл салынған. Аталған кезеңде тыныштықты бұзу дерегі бойынша 394 дәйек анықталған. Түрлі деңгейдегі құқықбұзушылықты бұлтартпай дәлелдеу мақсатында облыс аумағында қоғамдық орындарда жалпы саны 379 бейнебақылау камералары орнатылған. Оның ішінде 234 құрылғы Шымкент қаласындағы демалыс орындары мен орталық көшелеріне қойылған. Сондай-ақ, қаланың қозғалысы қарқынды 11 көше қиылысы интеллектуалды бейнебақылау камераларымен жабдықталған. Осы құрылғылардың көмегімен тазалық пен тыныштықты сақтау, қоғамдық тәртіпті қамтамасыз ету жұмыстары тәулік бойы жүргізілуде.
– Тәртіп тегеурінді болғанда ғана тәуелсіздік тұғырлы болмақ. Біз осыны үнемі назарымызда ұстаймыз. ҚР Президенті Н. Назарбаевтың «Полицейлер – бұл азаматтардың құқықтары мен бостандықтарын қорғай отырып, қылмыспен күресте алдыңғы қатарда тұратын адамдар» деп айрықша атап өтуін біздің жұмысымыздың қиындықтары мен ауыртпалығын терең білетіндігінен деп санаймыз, – дейді акцияға белсене қатысқан тәртіп сақшылары.
Жалпы, алғашқы жартыжылдықтың қорытындысы бойынша Шымкентте барлығы 6 108 әкімшілік құқық бұзушылық дерегі анықталып, тәртіп бұзушылар тиісті жазаға тартылған.
Тәуекел еткенге жұмыс табылады
Пятница, 12 Август 2016 06:10өзге өңірлер сіз таңдаған мамандыққа зәру
Демографиялық өсімі жағынан елімізде көш бастап тұрған оңтүстік өңірінде туу көрсеткіші басым. Әрбір бесінші бала осы өңірде дүниеге келеді. Ал солтүстік өңірлерде керісінше, өзге өңірлерге қоныс аудару дерегі артып, жергілікті халықтың өсімі баяулай түскен. Қалыптасқан жағдайды ретке келтірудің бірден-бір жолы ретінде «Жұмыспен қамту – 2020 жол картасы» бағдарламасы шеңберінде еңбек ұтқырлығын арттыруға баса ден қойылуда. Ондағы мақсат – ел азаматтарын ерікті түрде еңбек ресурсы тапшылығы сезіліп отырған аудандарға қарай экономикалық тұрғыдан оңтайлы етіп орналастыру.
900 ОТБАСЫ СОЛТҮСТІК ӨҢІРГЕ ЫҚЫЛАС ТАНЫТҚАН 
Биыл Оңтүстік Қазақстан облысынан солтүстік өңірге қоныс аударуға 900-ге таяу отбасы құжат тапсырған. Қазір солтүстікке көшкісі келетін азаматтардың мамандығы анықталып, олардың түйіндемелері жұмыс берушілерге жіберілуде. Бұл орайда, қалалық «Жұмыспен қамту орталығы» КММ-і директорының міндетін атқарушы Арслан Өтегеновтің айтуынша, бағдарламаға қатысушылар тұрақты жұмыспен және баспанамен қамтылатын болады.
– Қоныстандыру көшіп-қону ғана емес, оның негізгі мәні – солтүстік, шығыс облыстарды қазақыландыру. Мектептері мен балабақшалары, басқа да әлеуметтік нысандары тұрғындардың аздығынан жабылуға шақ тұрған ауылдардың тіршілігін түзеу. Қоныс аударушылардың есебінен елдің солтүстік өңірлерінде балабақша мен мектептерде бала санын арттыруға да мүмкіндік бар. Бұдан бөлек, жұмыс күшіне мұқтаж болып отырған шаруашылықтардың жағдайы да түзелмек. Яғни, бір-бірімен жіпсіз байланған өзекті мәселелердің түйіні тарқатылады, – дейді Арслан Исламханұлы.
Бұл ретте, негізінен бағдарламаға қатысу үшін ауылдық жерлерден көшіп баратындарға үлкен басымдық берілген. Себебі, аграрлы өлкеден барғандар ауыл шаруашылығы жұмыстарын дамыта алады. Ондағы жайылымдық жерлер мал шаруашылығын дамытуға өте оңтайлы. Ең бастысы, олардың жергілікті адамдармен етене араласып, сіңісіп кетуіне, жай-күйін түзеп алуына барлық жағдай жасалмақ. Қоныс аударушы үйдің отағасына мемлекет тарапынан 105 мың теңге, ал отбасының өзге мүшелеріне 75 мың теңге қаржылай бір реттік көмек көрсетіледі. Баспанамен, жұмыспен қамтылады.
Биыл күні бүгінге дейін Оңтүстік Қазақстан облысынан солтүстік өңірлерге 70-тен астам отбасы қоныс аударыпты. Бұл қатарда, Шымкенттен Петропавл қаласына көшіп барған 11 отбасы бар. Олар ең алдымен, көлік жүргізуші, тракторшы, механизатор, мұғалім, дәрігер, заңгер мамандықтары бойынша іріктеліп алынған. Мәселен, бұған дейін жұмыссыз атанып, бағдарламаға қатысуға ниет білдірген Күлайхан Рахмет бүгінде жанұяда барлығы 4 адам болып, Петропавл қаласына қоныс аударуға шешім қабылдаған. Бүгінде жанұя мүшелері баспанамен қамтылып, отанасы жергілікті БАҚ саласында тілші қызметін атқаруда. Сондай-ақ, көпбалалы ана Гаухар Мәмбетәлиева сондағы Уәлихан ауданында заңгерлік мамандығы бойынша қызметке кірісіпті.
ЖҰМЫСПЕН ҚАМТУ БАҒЫТЫНДАҒЫ ТҮБЕГЕЙЛІ ӨЗГЕРІС
Бүгінде қала тұрғындарының 370 мыңы экономикалық белсенді, яғни, қызмет жасына лайықты болып табылады. Дегенмен, мұндағы жұмыссыздық деңгейі 5,2 пайызды құрауда. Нақ осы кезеңде 93 отбасы, яғни, барлығы 388 адам кедейлік шегінде есепке алынуда.
Мекеме мамандарының берген мәліметі бойынша, «Жұмыспен қамту – 2020 жол картасы» бағдарламасы жарияланған 5 жыл уақыт мерзімінде 35 мыңнан астам қала тұрғынына түрлі әлеуметтік қолдаулар көрсетілген.
Биылғы бос жұмыс орындары жәрмеңкелеріне жалпы саны 291 мекеме қатысып, 3 576 бос жұмыс орындары ұсынылды. Нәтижесінде, 5 200 қала тұрғыны түйіндеме тапсырып, оның 909-ы жұмысқа орналасты. Оның ішінде 816-сы тұрақты жұмысқа, 84-і жастар практикасына, 9 азамат ақылы қоғамдық жұмыс орындарына жолданды.
Орталық мамандарына биылғы өткен 7 ай уақыт мерзімінде жұмыспен қамту бойынша 14 579 азамат өтінішпен келіпті. Оның 10 834-і, яғни 74,3 пайызы бос жұмыс орындарына жолданған.
Халықтың тұрмыстық әлеуетін арттыруға бағытталған бағдарламаның игілігін сезінгендер қатарында жоғары және орта арнаулы оқу орындарын тәмамдаған жас түлектер де бар. Биыл жергілікті қазынадан 474 миллион теңге көлемінде қаржы қаралып, оған 2 070 жас түлекті жұмыс орындарына жолдау көзделген. Қазірге дейін-ақ, 562 жұмыс беруші мекемеге 2 241 жас маман жолданып, тапсырма 108,2 пайызға орындалыпты.
Шымкент қаласы тұрғындарының 370 мыңы экономикалық белсенді, яғни, қызмет жасына лайықты болып табылады. Жұмыссыздық деңгейі 5,2 пайызды құрайды. 93 отбасы, яғни, барлығы 388 адам кедейлік шегінде есепке алынуда.
«Жұмыспен қамту – 2020 жол картасы» бағдарламасы жарияланған 5 жыл уақыт мерзімінде 35 мыңнан астам қала тұрғынына түрлі әлеуметтік қолдаулар көрсетілген.
Сондай-ақ, 160 азамат қайта даярлау курстарынан өтіп, бүгінде тігінші, туристтік агент, электр маманы, желілік құбыр салушы, шаштараз, токарь, слесарь сантехник, дәнекерлеуші мамандықтары бойынша жұмысқа орналасқан. Айта кетер тағы бір дүние, тың идеямен жаңа кәсіп бастағыңыз келсе, қала жастары үшін орталықта 6 пайыздық мөлшерлемемен 6 миллион теңгеге дейін несие алуға мүмкіндік бар. Кешенді жобаларды жүзеге асыру барысында мамандар жүйелі түрде кеңес жәрдемін көрсетуге де әзір.
«Жұмыспен қамтудың жол картасы – 2020» бағдарламасына енгізілген өзгерістер бойынша 55 пен 64 жас аралығындағы азаматтар да жаңа мамандықты игеруіне мүмкіндік бар. Зейнеткерлік жасына жақындаған жұмыссыз азаматтарды оқыту және әрі қарай жұмыспен қамту мақсатында арнайы оқу бағдарламалары (қайта даярлау) ұйымдастырылуда. 3 айлық курстан өту үшін азаматтар білімін растайтын құжаттың көшірмесі, мекен-жай анықтамасы, №086 нысандағы үлгі бойынша медициналық анықтама, еңбек кітапшасының көшірмесін орталық мамандарына тапсыруы қажет.
«Жұмыспен қамту 2020 жол картасы» бағдарламасының үшінші бағыты шеңберінде Әкімшілік-іскерлік орталығы аумағынан 9 қабатты жатақхана құрылысын салу көзделген. Оған Ұлттық қор есебінен 371,7 миллион теңге қаржы бөлініп, құрылысын «Компания Три-А +» ЖШС мердігер мекемесі жүргізуде. Жыл соңына дейін пайдалануға берілетін 297 орынды жатақхана ғимаратына 29 жасқа дейінгі белгіленген мерзімде қызмет ететін жастар қоныстанатын болады.
Айтпақшы, Шымкент қаласының жұмыспен қамту бөлімінде жуырда «Call-центр» қызметі іске қосылды. Бұл өз кезегінде, қалаға жаңа қосылған елдімекен тұрғындарын «Әлеуметтік қорғау және Азаматтық хал актілерін тіркеу мәселелері» бойынша көрсетілетін көмектердің қолжетімділігін қалыптастыруға септігін тигізуде. Мамандар «Саll-центр» қызметіне қазірдің өзінде 3 мыңнан астам азаматтан түрлі сауалдар келіп түскенін айтады. Сала мамандарына қояр сауалы болса, тұрғындардың 1300 тікелей желісіне не болмаса 27-04-43 байланыс сымтетігіне және
Этот адрес электронной почты защищён от спам-ботов. У вас должен быть включен JavaScript для просмотра.
электронды мекен-жайына хабарласу мүмкіндігі бар.
Тәртiп сақшыларының сенiмдi серiктерi
Пятница, 05 Август 2016 06:23КИНОЛОГ МАМАНДАР ҚЫЗМЕТТІК ИТТЕРДІҢ ДАЙЫНДЫҒЫН ЖЕТІЛДІРУДЕ
Қала тыныштығы, тұрғындардың қауіпсіздігі, қылмыскерлерді құрықтау, заңсыздықты анықтау... Аталған ауқымды міндеттерді атқару барысында ҚР Ұлттық гвардиясы сарбаздарына үлкен жауапкершілік жүктеледі. Мұндайда тәртіп сақшыларына төрт аяқты жануардың көрсетер жәрдемі маңызды рөл атқарады. Себебі, есірткі мен жарылғыш заттарды табуда қызметтік иісшіл иттердің нәтижесі жоғары бағаға ие болуда.
Нақ осы күндері ҚР Ұлттық гвардиясының 66/98 әскери бөлімінің Төлеби ауданы аумағындағы кинология қалашығында кинолог-мамандардың дәстүрлі республикалық сайысы өтуде. Яғни, бұл – командалық сынның екінші кезеңі аталады. Өңірлік іріктеу сынында ОҚО, Алматы, Жамбыл, Қызылорда облыстарынан келген барлығы 9 команда өз арасынан «шын мықтыны» анықтамақ. Мұнда жеңімпаз атанған команда қыркүйек айында Алматыда өтетін республикалық қорытынды кезеңде бағын сынауға мүмкіндік алады.
3 күнге созылатын сайыс барысында қызметтік иттер негізінен, 4 сынақтан өтеді: есірткі іздеу, жарылғыш заттарды анықтау, із кесу және одорология. Жарысқа қатысушылардың арасында иіс сезу қабілеті жоғары – бельгиялық және неміс овчаркалары, лабрадор-ретривер, спаниель тұқымдас иттердің түр-түрін кезіктіруге болады. Өз кезегінде, кинолог-мамандар өзі дайындаған қызметтік иттердің иіс сезу қабілетін іс барысында тиімді пайдалануға мүдделілік танытуда.
– Ит – қызметтегі ең сенімді серігің. Онымен жұмыс істеу үшін тіл табыса білуің керек. Өйткені, жан-жақты дайындықтан өткен кинолог мамандар ғана қылмыстың ашылуына септігін тигізеді. Ит иіс сезу арқылы бізге қару-жарақты, жарылғыш заттарды және есірткі құралдарын анықтау мен іздестіру кезінде көмектеседі. Оларды баптау мен үйрету жүйесіне үнемі үлкен күш жұмсалады, – дейді жарысқа «Барон» атты қызметтік итті дайындап әкелген 65/06 әскери бөлімінің сарбазы Нұржан Абдуллаев.
5 жылдан бері кинология саласын жетік меңгерген тәжірибелі маман бүгінде жоғары жетістіктерімен де танылып үлгеріпті. 2014 жылы өңірлік сында облыс командасының сапында бас жүлдеге иелік еткен ол, республикалық қорытынды кезеңде бақ сынауға да мүмкіндік алыпты. Бұл жолғы жарысқа 1 жасар неміс овчаркасын 2 ай уақыт бойы арнайы дайындаған. Бұйыртса, командалық есепте жоғары нәтижеден үміт етуде.
Жарыстың ашылу рәсіміне арнайы қатысқан «Төлеби аудандық №2 балалар үйінің» тәрбиеленушілері де саланың өзіндік қызығы мен қиындықтарын сезініп, танысуға мүмкіндік алды. Арман-мұраты биік жасөскіндер келешекте кинолог-маман атануға бейілді екендігін де жасырмады.
Алғашқы сынақ бойынша иісшіл иттер түрлі қораптардың ішіне жасырынған есірткі затын табуға кірісті. Қаз-қатар қойылған жәшіктердің арасынан есірткіге ұқсас затты жаңылмай табу әрине, оңай тапсырма емес. «Жәшіктерде жасырынған зат – есірткі емес. Онда тек марихуана тектес есірткінің мыңнан бір бөлігіне татитын иіс қана бар. Осындай кішігірім үлесін тауып үйренген иісшіл иттер күні ертең түрлі есірткі заттарын қиналмай табатын болады», – дейді мамандар.
Сонымен, сынаққа қосылған иттер өзге қораптардың қасынан жай ғана иіскеп өтіп кеткенімен, жасырынған заты бар қорапқа жеткен кезде иесіне белгі бере бастады.
– Жарыстың көздеген мақсаты – қиын да жауапты жедел-іздестіру іс-шараларына қатысушы үздік кинологтар мен иттер резервін қалыптастыру. Жарыс барысында кинологтардың кәсіби деңгейі және есірткі құралдарын іздеуге дайындалған қызметтік-іздестіру иттерінің дайындық деңгейі бағаланады. Сондай-ақ, автокөлікте, ғимаратта, жүкте, өзге де орындарда есірткі құралдарын іздеу және анықтау бойынша дағдылар сарапқа салынады, – дейді жарыстың бас төрешісі, «Оңтүстік» өңірлік қолбасшылығының кинологиялық әскери қызметі басқармасының басшысы, майор-полковник Максим Попов.
Мамандардың айтуынша, бүгінде республиканың әр облысында кинологиялық қызмет орталықтары құрылған. Тіпті, арнайы кинология қалашықтары дайындалған. «Онда дайындалатын иттердің иісшілдігі ерекше дамыған және жаттықтыруға тез бейім», – дейді кинологтар. Бір ғажабы, иттер қажет иісті 5 жыл көлемінде ұмытпайтын көрінеді.
Жөндеуден өткен ғимаратқа көшiрiледi
Пятница, 05 Август 2016 05:12Күрделі жөндеу жұмыстары жүргізілген қала әкімдігінің ескі ғимараты қайта пайдалануға берілді. Ендігі жерде онда қала әкімдігінің үш құрылымдық бөлімі, атап айтқанда, білім бөлімі, жолаушылар көлігі және автомобиль жолдары бөлімі және тұрғын үй-коммуналдық шаруашылық бөлімі, сонымен қатар, Әл-Фараби ауданы әкімдігі орналасатын болады. Күні бүгінге дейін аталған бөлімдер қаланың әр аумағында ғимараттарды жалға алып келген еді.
– Ғимараттың күрделі жөндеу жұмыстары толығымен аяқталды, – дейді Шымкент қаласы әкімі аппаратының жетекшісі Рашид Аюпов. – Алдағы уақытта ғимаратта қала әкімдігінің бірнеше құрылымдық бөлімін орналастыруды жоспарлап отырмыз. Бұған дейін жиі орын ауыстырып келген бөлім қызметкерлерімен байланысу әсіресе, қала тұрғындарына айтарлықтай қиындық туындатқаны рас. Өз кезегінде, құрылымдық бөлімдерді қала меншігіндегі ғимаратқа орналастыру арқылы бюджет қаржысын үнемдеуге де мүмкіндік бар.
Айта кетейік, Еңбекші және Абай ауданы әкімдіктерін де аталған орынға көшіру мәселесі алдағы уақытта нақты шешілетін болады. Бұған дейін қала әкімдігі аталған аудан әкімдіктері үшін жаңа бірыңғай үлгідегі ғимараттардың құрылысын жүргізуді жоспарға енгізген де болатын.
25 жылда: Шымкентте 7677 отбасы қоныс тойын тойлаған
Среда, 03 Август 2016 06:14Тәуелсіздік алған ширек ғасыр ішінде ел аумағында тұрғын үй құрылысы қанатын кеңге жайды. Екпінді сала еңсе тіктеп, ілкімді істер ілгеріледі. Қыз-қыз қайнаған құрылыстың бүгінгідей беталысы алыстағы ауылдың ажарын ашып, қаланың кескін-келбетін көріктендіре түсті. Сәтті жоба ретінде мемлекеттік бағдарламалар тұрғын үй құрылысы қарқынының тұрақты өсімін қамтамасыз етті. Елдегі тұрғын үй құрылысына бағытталған инвестициялар тек соңғы он жылда 10 есеге ұлғайды.
Тұрғындарды баспанамен қамту бағытында әсіресе, Шымкент қаласы құрылысының ауқымдылығымен дараланды. Қалалық құрылыс бөлімі басшысының міндетін атқарушы Тәжібай Егетаевтың айтуынша, тәуелсіздік алған осы жылдар ішінде қала аумағында тұрғын үй саласы бұрын-соңды болмаған қарқынды қадаммен дамыды. Сала басшысы мұндағы жетістіктердің басты себебін мемлекет саясатының оң жолға қойылғандығымен байланыстырады.
– Аталмыш саланың елдің әлеуметтік-экономикалық дамуындағы алар орны мен маңызы ерекше. Өйткені, баспана мәселесі қоғамда қай кезде де өзектілігін жойған емес, – дейді Тәжібай Дүйсенұлы. – Мемлекеттік «Тұрғын үй» бағдарламасы аясында Шымкент қаласында 2005-2015 жылдар аралығында 232 тұрғын үй пайдалануға берілді. Нәтижесінде, жалпы ауданы 383 938 шаршы метр аумақта 7 677 отбасы қоныс тойын тойлады.
Айта кетейік, аталған тұрғын үйлер инженерлік комуникациялық инфрақұрылым жүйелерімен толық қамтылған етілген. Бүгінгі таңда әкімшілік-іскерлік орталығы аумағынан 7 тұрғын үйдің құрылысы жүргізілуде. Нысан пайдалануға берілген сәтте 882 отбасы пәтермен қамтамасыз етілмек. Бұдан бөлек, 35 пәтерлі жатақхана ғимараты тұрғындардың игілігіне берілгелі отыр.
Сала мамандарының айтуынша, бүгінгі таңда «Тұран» шағынауданында жалпы саны 270 пәтерлі 5 тұрғын үйдің құрылысы жүргізілуде. Оның ішінде 54 пәтерлі 1 тұрғын үйдің құрылысы жыл соңына дейін аяқталып, пайдалануға тапсырылатын болады. Қалған 4 тұрғын үй 2017 жылға өтпелі. Сонымен қатар, әкімшілік–іскерлік орталығы аумағынан қосымша 1134 пәтерлі 15 тұрғын үйдің құрылысын жүргізу үшін мемлекеттік сатып алу конкурсы жарияланған. Мердігер мекемелер анықталғаннан кейін құрылыс жұмыстары жүргізілетін болады.
Тәуелсіздік алған тұста елде кешегі кеңес дәуірінен мұраға қалған, тұрғындардың меншігіне берілген көпқабатты үйлерді жөндеу, коммуналдық инфрақұрылымдарды жаңғырту мәселесі қолға алына бастады. Коммуналдық жүйелердің 70 пайызы шұғыл жөндеуді немесе толық ауыстыруды қажет ететін жағдайға жетті. Бұл саладағы осындай күрделі жағдайды жете түсінген Мемлекет басшысы ел Үкіметіне әлемдік дағдарысқа қарсы елімізде қабылданған бірлескен іс-қимыл бағдарламасының аясында арнайы «Жол картасы» бағдарламасын әзірлеуді тапсырды. Нәтижесінде, тұрғын үй-коммуналдық шаруашылығы саласында қайта жаңғырту жұмыстарына оң бетбұрыс жасалды.
Облыс аумағында Тәуелсіздік алған жылдары (1991-2015 ж.ж.) барлығы 8 миллион 827 мың шаршы метр тұрғын үй тапсырылған. Яғни 173 мың пәтер. Оның ішінде 72 мың пәтер жеке тұрғын үй құрылысы болып табылады. Сонымен қатар, биыл «Өңірлерді дамыту – 2020» бағдарламасы аясында 469,7 мың шаршы метр болатын 207 тұрғын үйдің құрылысы жүргізілуде. Ал жыл соңына дейін осы үйлердің 156-сы пайдалануға беріліп, 3 992 тұрғын жаңа пәтерге ие болмақ.
Жалпы алғанда, тек өткен соңғы 10 жылда еліміз бойынша 30 миллион шаршы метр тұрғын үй пайдалануға берілген.
Жол-көлiк қызметi жанданады
Пятница, 29 Июль 2016 10:20
– Биыл өткен жылдан өтпелі құрылыс нысандары пайдалануға беріледі, – деп атап өтті Ж. Байдуллаев. – Олардың қатарында Қапал батыр көшесіндегі темір жол үстіндегі өткел, Темірлан тас жолы – Мангельдин көшелері қиылысындағы жерүсті жаяу жүргіншілер өткелі және 3 шағынауданның 13 көшесіндегі қайта құру жұмыстары бар.
Айта кетейік, бүгінде қала аумағында 28 транспорттық компаниясы жолаушыларға 76 бағыт, 1198 кесте бойынша қызмет көрсетеді. Қазіргі таңда, «Шымкент Bus» жаңа транспорт компаниясы құрылуда. Бұған дейін Шымкент қаласының 2020 жылға дейінгі әлеуметтік-экономикалық даму тұжырымдамасында қала аумағында жолаушылар көлігінің қызметін үйлестіретін муниципальды автопарк ашу мәселесі көтерілген еді. Енді осы жұмысты қала әкімдігі мен «Green Bus» бірлесе қолға алып отыр. Жаңа компания акциясының 49 пайызы қала әкімдігінің, 51 пайыз үлесі «Green Bus» мекемесіне тиесілі болмақ.
Қалалық ардагерлер кеңесінің төрағасы, қоғамдық кеңестің мүшесі Исамуддин Рысбай қоғамдық көліктердің қызметін жүйелеу бағытында арнайы бағдарламаның қажет екендігін жеткізді.
– Қоғамдық көліктердің қызметін бір жүйеге келтіреміз десек, ең алдымен, жолаушыларды тасымалдау бағдарламасы дайындалуы тиіс. Бағдарлама аясында автобустар арасындағы қалыпты интарвалды сақтау, аялдамаларда қоғамдық көліктердің келу уақытын көрсететін тақтайшалар орнату сынды өзекті мәселелер қарастырылуы керек, – дейді Исамуддин Нәштайұлы.
Исамуддин Рысбайдың айтуынша, әлемдік тәжірибеде қоғамдық көліктердің бірі екіншісінің жолын 30 пайыздық көрсеткіштен артық қайталамайды. Бұл қағида – алдағы уақытта ескерілуі тиіс. Сондай-ақ, тәжірибелі жүргізушілерді дайындау мәселесі де түйткілді дүниенің бірі болуда. Яғни, қоғамдық көліктерді басқаруға ниетті жастарды техникалық мамандықта дайындайтын арнайы оқу орындарында 5-6 ай бойына дайындықтан өткізген дұрыс. Сонымен қатар, соңғы аялдамаларда қоғамдық көлік жүргізушілері үшін дәретхана және қол жуатын орындардың қажеттігі де көптен бері айтылып жүр.
Сондай-ақ, кеңес отырысында қалалық кәсіпкерлік бөлімі басшысының орынбасары Әсет Әбдіраханов баяндама жасады. Күн тәртібінде талқыланған мәселелер бойынша сала мамандарына нақты міндеттер жүктелді.
25 жылда... Шымкентте мектептер саны екi есеге артқан
Пятница, 29 Июль 2016 06:13
ОҚУЛЫҚ ТАПШЫЛЫҒЫ ҚАЛАЙ ШЕШIЛЕДI?
Шымкенттегі орта білім беретін 127 мектептің жаңа оқу жылына даярлығы өз деңгейінде жүргізілуде. Қалалық білім бөлімінің басшысы Жанат Тәжиеваның айтуынша, жаңа жүйе бойынша білім алатын 1-сынып оқушылары үшін әдістемелік материалдардың толық ресурсы: оқу бағдарламалары, оқулықтар, күнделікті сабақ жоспарлары, мұғалімдерге арналған әдістемелік нұсқаулықтар, бағалау жөніндегі ұсынымдардың бәрі де дайын. Сондай-ақ, жаңа оқу жылына 1 жəне 8 сынып оқушыларын толығымен оқулықпен қамтамасыз ету үшін 13 баспамен келісім-шарт жасалыпты. Атап айтар болсақ, 4-сыныптың «Ағылшын тілі», 9-сыныптарға арналған «Зайырлы этика және дінтану негіздері» оқулықтары жаңа оқу маусымында беріледі. 1-сынып оқушылары үшін сыйлық ретінде «Менің Отаным - Қазақстан» оқулығы алынуда. Бұл қажеттіліктер үшін 837 миллион 192 мың теңге қаржы қаралыпты. Тапсырыс берілген оқулықтарды баспалардан «Smart jet», «Бекзат-2001» ЖШС-лері тасымалдауда.
ЖАҢА 6 МЕКТЕП АШЫЛАДЫ
Еліміз тәуелсіздік алғалы бері Шымкент қаласындағы орта білім беретін мектептердің саны екі есеге артқан. Бұл қатарда, «Сайрам» шағынауданында іргетасы 1991 жылы қаланған Ы.Алтынсарин атындағы №65 мектеп-гимназиясы ел Тәуелсіздігімен бірге биыл 25 жылдық мерейтойын атап өтуде. Сол кезеңде жаңа тұрпатты мектеп аталған мекеме 1993 жылы көркем-эстетикалық кешенді лицей-мектебі,1996 жылы гуманитарлық-эстетикалық гимназия-мектебі дәрежесін иеленіпті. 2009 жылдан бері аталмыш білім ұясы мектеп-гимназия деңгейінде аталады.
Міне, содан бергі уақытта Шымкент қаласында 60-қа таяу мектеп ғимараты пайдалануға беріліпті. Биыл тағы жаңа оқу жылы қарсаңында 6 білім нысаны елдің игілігіне берілгелі отыр. Атап айтқанда, қала аумағына жаңа қосылған Тассай, Сайрам, Қаратөбе елдімекендерінде бой көтерген жалпы орта мектеп ғимараттары жаңадан қосылған маусымда оқушыларды қабылдауға толығымен дайын. Бұдан бөлек, 8 білім нысанында құрылыс жұмыстары жүргізілуде. Аталмыш мектеп ғимараттарының тапсыру мерзімі 2017 жылға белгіленген.
Шымкент қалалық білім бөлімінің мамандары жаңа оқу жылында 3 мектеп ғимаратында күрделі жөндеу жұмыстары қолға алынғанын жеткізді. Соның бірі Забадамдағы №13 мектепті жаңалауға бюджеттен 106 миллион теңге қаржы бөлініпті. Қазіргі таңда күрделі жөндеу жұмыстары түзілген кестеге сай жүргізілуде.
Айта кетейік, Забадам елдімекеніндегі №13 орта мектептің негізгі ғимараты 1964 жылы қаланған. Бүгінде тозығы жеткен оқу корпусының бірқатар бөлігі жаңаланып, сәулет-кескіні арта түсуде. Есік, терезе, еден, инженерлік коммуникация жүйесінің барлығы белгіленген мерзімде толығымен ауыстырылуы тиіс. Дегенмен, мұнда құрылыстың негізгі бөлігі аяқталған, қазір әрлеу жұмыстары жүргізілуде. Құрылысты «Шалқар құрылыс іnternational» мердігер мекемесі белгіленген кестеге сай атқарып келеді.
Мектеп формасы Шымкентте дайындалады
Биылғы жаңа оқу жылында бірыңғай мектеп формасын кию – ҚР Білім және ғылым министрлігі тарапынан талап етілуде. Бұл ретте, әрбір білім мекемесі ата-аналар комитетімен келісіп, белгілі бір мектеп формасын таңдау мүмкіндігіне ие. Бастысы, форма министрліктің талаптарына сай болуы тиіс. Қазіргі таңда қаладағы «Алтын» және «Гаухар» тігін цехтары мектеп формасын дайындаумен айналысуда.
Айта кетейік, орта білім беру ұйымдарында міндетті мектеп формасының үлгісі, түсі классикалық стильде, бірыңғай түс гаммасында жасалады. Яғни, түрлі түстердің санын үшеуден асырмай араластыруға рұқсат етіледі. Мектеп формасының түсі қалыпты және ашық емес түстерден таңдалады.
Бiлiм беру мазмұнын жаңарту – заман талабы
Жаңа жүйеге сәйкес, 1-сынып оқушылары жаңа оқу жылынан бастап, бес күндік оқу аптасына көшпек. Балалар үшін ата-анасының, отбасының тәрбиесі аса маңызды. Бес күндік оқу жүйесі балалардың сенбі, жексенбі күнгі демалыс уақытында ата-анасымен бірге болуына көп мүмкіндік береді. Сондай-ақ, балалардың шығармашылық қабілетін арттыруға, қосымша білім алуына, әсіресе, спортпен, өнермен айналысуына көбірек уақыт беріледі.
Білім беру бағдарламасының жаңартылуына байланысты 1 қыркүйектен бастап, 1-сынып оқушылары 1 маусымға дейін оқиды. Оқу мерзімінің ұзақтығы — 33 оқу аптасы. 1-сынып оқушылары сенбі күн есебінен 34 күн қосымша демалыс алады. Айта кетейік, Шымкент қаласында биыл 21 046 бүлдіршін алғаш рет мектеп табалдырығын аттамақ.
Биылғы жаңа оқу жылынан бастап 1-сынып оқушылары жаңа жүйе бойынша білім алады. Осылайша, 2020 жылға қарай кезең-кезеңімен барлық сыныптар бес күндік оқу аптасына көшетін болады. Сондай-ақ, 12 жылдық оқу бағдарламасы енгізіледі. Сарапшылардың айтуынша, бұл жүйе – әлемдік тәжірибенің озық үлгісі ретінде қарастырылуда.
Бүгінде Шымкент қаласында жалпы саны 127 орта білім беретін мектеп (оның 3-уі кешкі мектеп) болса, мектепке дейінгі тәрбие беретін 362 мекеме бар. Қала халқы санының едәуір өсімімен байланысты, биыл 42 балабақшы пайдалануға беріліпті. Нәтижесінде, мектепке дейінгі мекемелерде 50 мыңнан астам бүлдіршін қамтылып, жалпы көрсеткіш 82,4 пайызды құрап отыр.
Тұрғын үйлерге өтініш қабылдайды
Пятница, 15 Июль 2016 06:24Төрт күн уақыт ішінде электронды портал арқылы «Асар» шағынауданындағы тұрғын үйлерге 1637 өтініш қабылданған. Ағымдағы жылдың 11-22 шілде аралығында электронды портал арқылы әрбір азаматтан «Қазақстан Ипотекалық Компаниясы» АҚ-ы бағытымен берілетін «Асар» шағынауданындағы тұрғын үйлерге өтініштер қабылдануда.
Кеше Орталық коммуникациялар қызметінде қалалық тұрғын үй қатынастары бөлімі басшысының орынбасары Гүлнар Әшірбаева және Халыққа қызмет көрсету орталығы мамандарының қатысуымен Өңірлерді дамытудың 2020 жылға дейінгі бағдарламасы бойынша жергілікті БАҚ өкілдеріне арнап брифинг ұйымдастырылды. Онда белгілі болғаны, 2015 жылы Казақстан ипотекалық компаниясы бағыты бойынша «Нұрсәт» тұрғын алабынан 8 тұрғын үй (1080 пәтер), 2016 жылы «Қайтпас-2» шағынауданынан 7 тұрғын үй (420 пәтер) және 72 пәтер 17 шағынауданынан бөлінген.
2016 жылдың 4 тоқсанында «Асар» шағынауданынан 15 тұрғын үй (900 пәтер) пайдалануға беріледі деп күтілуде.
– Электронды портал арқылы өтініш берген азаматтардың әлеуметтік жағдайын сараптайтын болсақ, ондағы мемлекеттік қызметкерлер – 1473, көпбалалы, толық емес отбасылар және мүгедек бала асыраушы отбасылар – 164 өтінішті құрайды. Әрбір қатысушы өтініштер мен құжаттарды тапсыру үшін Электронды Цифрлық Қолтаңба (ЭЦҚ) кілті арқылы электронды порталға тіркелуде, – дейді Г. Әшірбаева.
Портал тәулік бойы жұмыс істеп, өтініштерді қабылдауда. Сонымен қатар, бүгінде электронды тапсыру бойынша кеңестер алу үшін халыққа қызмет қөрсету орталықтарында орналасқан «E-gov» пунктері және тұрғын үй қатынастары бөлімі мамандары әрбір азаматпен түсіндірме жұмыстарын жүргізуде.