Әл-Фараби аудандық әкімдігінің ұйымдастыруымен қоғамдық орындарда санитарлық тазалықты сақтау мақсатында «Қала тазалығы – баршамызға ортақ!» атты кезекті рейд өтті.
Әл-Фараби ауданы әкімінің орынбасары М.Тәжібаев жетекшілік еткен іс-шарада әкімдік қызметкерлерінен бөлек, жергілікті учаскелік полиция инспекторлары мен Әл-Фараби ауданына қарасты ЖОО жастар саясаты бөлімінің қызметкерлері де белсене қатысты.
Қала тұрғындарына және дәмхана, дүкен иелеріне қала тазалығына жауапкершілікпен қарау жайында түсіндіру жұмыстары жүргізілді. Осы бағытта пәтеріне жөндеу жұмыстарын жасап, үйден шыққан қоқысты аулаға қалдырғандарға және темекі, басқа да азық-түлік қалдықтарын тиісті орынға тастамағандарға ескерту жасалды.
– Рейдтік іс-шара апта сайын тұрақты түрде жүргізіледі. Мұндағы мақсатымыз – айыппұл салу емес, тұрғындарға қала тазалығын сақтауды азаматтық парызым деп білетін ой қалыптастыру, жастарды дұрыс жолға бағыттау, – дейді Марат Тәжібаев.
