Бұл құрылыс Бадам көпірінен оңтүстік бағытқа қарай 4,7 шақырымды құрайды. Қазіргі таңда 2,8-4,7 шақырым аралығында жол негіздері салынып, асфальт-бетон жабындысының төменгі қабаты төселген. Сонымен қатар, мұнда инженерлік желілер жобаға сәйкес қайта орнатылды.
Құрылыс жұмыстары Бадам өзені арқылы өтетін көпірден Саттарханов көшесіне дейінгі аралықта жалғасуда. Аталған жол бөлігін 5 қарашаға дейін көлік қозғалысы үшін ашу жоспарланып отыр.
Бүгінде Жансүгіров, Анаров көшелерінен Рашидов көшесіне дейінгі аралықта көлік нөпірі көп. Аталған көшелерде пайда болған шұңқырлардың көлік қозғалысына қауіптілігі анықталып, орташа жөндеу жүргізіліп жатыр.
Қала басшысы осы аумақта атқарылып жатқан жұмыстардың қарқынын қадағалады. Жобада жол жамылғысын жаңарту, құдықшаларды ауыстыру қарастырылған. Орташа жөндеу жұмыстарын 1 қарашаға дейін аяқтау жоспарланған.
Қала әкімі жауаптыларға, ең алдымен, сапаны назарға алып, жұмыстарды өндірістік кестеге сай аяқтауды тапсырды.