Әл-Фараби аудандық әкімдігі Шымкент қаласының көшелерін ретсіз саудадан тазарту мақсатында рейдтік шараларын жалғастыруда.
Қала орталығында ретсіз сауда қатарын қалыптастырған дүңгіршектердің сүрілетіні туралы меншік иесіне бір жыл бұрын хабар берілген. Тіпті, Әкімшілік құқық бұзушылық туралы ҚР Кодексінің 505 бабы бойынша толтырылған хаттамаға сәйкес айыппұл төлеп, дүңгіршекті алдыру туралы талаппен таныс болған. Сондай-ақ, заң шеңберінде сүрілуге ұсынылған нысандардың тізімі газет бетінде де жарық көрген.
Бұл жұмыстардың нәтижесінде 2016 жылы қала көшелерінде заңсыз орнатылған 88 дүңгіршек алынды. Дегенмен, жыл бойы ескерту жасалғанымен кейбір дүңгіршектерді орнынан алдыруды әкімдік қызметкерлері өз міндетіне алды.
– Дулати көшесінің Рысқұловпен қиылысқан тұсында көп жылдан бері жұмысын жүргізіп келе жатқан ретсіз сауда қатарының сүрілетіні туралы осыдан бір жыл бұрын хабарланған. «Дүңгіршекті алып кетеміз» десе де, жыл бойы нәтиже шығармады. Сондықтан мемлекет тарапынан арнайы көлік бөлініп, осы айналадағы тоғыз дүңгіршек иелерінің келісімімен алынып тасталды. Дүңгіршектерді Громова көшесіндегі автотұраққа қалдырамыз, – дейді Әл-Фараби ауданы әкімінің орынбасары Серік Нұрманов.
С.Нұрмановтың айтуынша, ретсіз сауда халық жүріп өтетін аяқжолдарға орналасқан. Соның салдарынан адамдар автожолдармен жүреді, көлік тоқтатады. Мұның бәрі қоғамдық көліктердің қозғалысына кедергі келтіріп, кептеліс тудыруда. Биыл заңсыз орнатылған дүңгіршектер саны жыл басынан бері 15-ке жетіп отыр. Қазіргі таңда Әл-Фараби ауданында ретсіз сауда нүктелерін анықтау, хаттама толтырып, ескерту жасау жұмыстары жүргізілуде.