Қабылдау барысында көп балалы отбасылардың, халықтың әлеуметтік жағынан аз қамтылған санатына жататын тұрғындардың баспана мәселелерін тиімді шешу жолдары қарастырылды. Баспана кезегіне тұрудың тәртібі және кезектегі азаматтардың жеңілдетілген несиелік бағдарламаларға қатысу мүмкіндіктері түсіндірілді.
– Кезекте тұрған адамдардың баспана мәселесін тезірек шешуге барынша жұмыс істеп жатырмыз. Бүгінгі таңда қалада баспана кезегіндегі азаматтарға арналған үйлердің құрылысы жылдан жылға қарқын алып келеді. Баспана мәселесінің оң шешілуіне қатысты жаңашылдықтар енгізілуде. Мемлекет қаражатты тек үй құрылысына ғана емес, жалдау ақысын субсидиялауға да бөліп жатыр. Нәтижесінде
Шымкентте 8 мыңнан астам отбасыға нақты көмек көрсетілу қарастырылып отыр, – деді Ғалымжан Әмірбекұлы.
Басқарма басшысы тұрғындарды әлеуметтік желі арқылы алаяқтардың жалған хабарландыруларына алданып қалмауға шақырды. Бұл бойынша құқық қорғау органдарына шағымдана алатындарын, үй кезегіндегі азаматтарға жалдамалы баспаналар заң аясында, кезек реті бойынша берілетінін жеткізді. Қабылдауға келген тұрғындардың қатарында тұрғын үй кезегі жақын қалған тұрғындар да бар. Азаматтар өз кезегін egov электронды порталы арқылы кез келген уақытта бақылай алады. Тұрғын үй кезегіне қатысты қызметтер толығымен автоматтандырылған.
