Елбасы Нұрсұлтан Назарбаевтың 5 интитуционалды реформасын жүзеге асыруға бағытталған «100 нақты қадам» Ұлт жоспарын насихаттау және түсіндіру мақсатында өңірімізде ақпараттық топтар құрылып, сала-сала бойынша кездесулер ұйымдастырылып келеді. Осы мақсатта бүгін Шымкентте насихаттық топтың қатысуымен Еңбекші ауданы әкімінің аппараты қызметкерлерімен кездесу өтті.
Жиынды Еңбекші ауданы әкімінің орынбасары Досалы Амангелдиев ашып, жүргізіп отырды. Күн тәртібінде қаралған мәселеге сәйкес, Ұлт жоспарының І бағыты кәсіби мемлекеттік аппарат құруды жүзеге асыру бойынша ақпараттық-насихаттық топ құрамындағы азаматтар баяндама жасады.
Алдымен ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің ОҚО бойынша департаментінің баспасөз хатшысы Ерлан Ермаханбетов сөз алып, мемлекеттік қызметкерлердің қоғамдағы орны, олардың мақсат-міндеттеріне тоқталды.
– Ұлт жоспары мемлекеттік қызметкерлерге жауапкершіліктің жаңа жүгін артып отыр. Бағдарламадағы 13-14 қадамда көрсетілгендей, мемлекеттік аппарат кәсібилігін арттыру ерекше маңызды. Осы орайда әрбір мемлекеттік қызметкер өзінің міндетін халыққа, азаматтардың заңды мүддесіне қызмет ету деп түсінуі керек және де басқару баспалдақтарының бәрінен біртіндеп өткен жоғары кәсіпқой маман болуы тиіс, – деді Е. Ермаханбетов.
Кездесуде «Нұр Отан» партиясының Еңбекші ауданы филиалы төрағасының бірінші орынбасары Садықов Бердіқұл, сондай-ақ қалалық ішкі саясат бөлімінің басшысы Қанат Қалыбеков және қалалық тұрғын үй коммуналдық шаруашылық бөлімі басшысының орынбасары Ерлан Есіркепов Елбасының «100 нақты қадам» бағдарламасы бойынша пікір алмасып, қатысушылардың сауалдарына жауап берді.
С. ТАСТАНБЕК