Облыстық тарихи-өлкетану музейінің «Ерлік» филиалында «Ауылына қарап азаматын таны» жобасы жүйелі жүргізіліп келеді.
Аталған жоба бойынша бұл жолы Түркістан қаласының Құрметті азаматы, «Мерейлі отбасы» байқауының алғашқы бас жүлдегері Елтай Бимағамбетовпен сырласу сағаты өтті.
Елбасы Н.Ә.Назарбаевтың «Болашаққа бағдар: рухани жаңғыру» мақаласының аясында өткен жиынның жас буынға берері мол болды. Елтай Бимағамбетов жастайынан көп қиындық көріп, еңбектің арқасында өсіп, жетілген. Білім саласының үздігі, аудандық және қалалық кеңестерінің бірнеше рет депутаты болған. Қазір жасы 90-ға таяса да, көпшілік қоғамдық жұмыстардан шеттеп қалмай, туған өлкенің тыныс-тіршілігіне белсене араласып келеді. Азды-көпті еңбегі еленіп, «Құрмет» орденінің иегері атанды. 3 рет Социалистік жарыстың жеңімпазы медалімен, Ұлы Жеңістің мерейтойлық медальдарымен және көптеген Алғыс хаттармен марапатталды. 2014 жылы 19 қыркүйекте Астанада өткен «Мерейлі отбасы» ұлттық байқауына қатысып, бас жүлдені иеленген.
Қаламгер осынау ғұмырында 15 кітап жазып, көптеген мақалалардың авторы атанды. Елбасы мақаласына орай: «Түркістанды – қазақ елінің туризм астанасы ету туралы» ұсынысын жеткізді.
