Халықаралық ғылыми-көпшілік конференцияға Шымкент қаласы әкімінің орынбасары Сәрсен Құранбек және шетелдік және елімізге белгілі ғалымдар қатысты. Б.Соқпақбаевтың шығармаларын зерттеп жүрген ғалымдар жазушыға қатысты тың деректермен бөлісті.
Ақын, ҚР Еңбек сіңірген қайраткері, Қазақстан Жазушылар Одағы Астана қалалық филиалының төрағасы Дәулеткерей Кәпұлы қазақ әдебиетінің алтын дәуірінің көрнекті өкілі, бабалар әдебиетін биік деңгейге көтерген Бердібек Соқпақбаев шығармашылығындағы шынайылықты, әділдікті, ерекше талантпен үйлесім тапқан көркемдікті атап өтті. Сондай-ақ қаламгердің қоғам келбетін айнытпай суреттеп, оған бала жүрегі арқылы баға беретін шеберлігін айтты.
– Ол уақытта әдеби көркем шығармалар, кинотуындылар қатаң цензурадан өтетін. Қоғамдағы ақиқатты ашық айтуға жол берілмейтін. Ал, жазушы Б.Соқпақбаев өз шығармаларында осындай өзекті жайттарды балалар болмысына сыйдырып, жеп-жеңіл жеткізетін. Мысалы, оның «Менің атым – Қожа» повесіндегі басты кейіпкер Қожаның бір сөзінде «Фамилиям Қадыров, кейде Қадырұлы деп жазғым келеді. Бірақ қасымдағылардың бәрі сондай болған соң Қадыров деп жазамын» дейтіні бар. Аңдаған адамға осы бірауыз сөздің өзінде терең ой жатыр, – деді Дәулеткерей Кәпұлы.
Жазушы Б.Соқпақбаевтың шығармалары алдағы уақытта республикалық «Бір ел – бір кітап» жобасы аясында ел көлемінде насихатталмақ. Әлемдік және отандық ғалымдардың басын қосып «Балалар әлемінің бәйтерегі» атанған қаламгердің әңгімелері мен повестері білім ордаларында, мәдени орталықтарда кеңінен дәріптеледі. Бұл туралы Әл-Фараби атындағы қалалық ғылыми-әмбебап кітапханасының директоры Анар Жаппарқұлова айтты.
– Биыл Әл-Фараби кітапханасының құрылғанына 10 жыл, сонымен бірге, қазақ әдебиетінде айшықты қолтаңбасы бар дара қаламгердің бірі – Бердібек Соқпақбаевтың туғанына 100 жыл. Жазушының шығармаларын оқығанда бала кезіміз еске түсіп, еріксіз ойға жетелейді. Қай шығармасы болсын, басты кейіпкер жазушының өзі. Мысалы, «Менің атым – Қожа» повесі алғашында «Өзім туралы повесть» деп аталған. Қай шығармасын алсақ та шынайылық пен көркемділікті ту етіп жазған Соқпақбаевтың шығармаларын талдауға тек бір күн жетпейді. Келелсі жиынды Алматы қаласында өткізу жоспарлануда, – дейді А.Жаппарқұлова.
Конференцияның екінші бөлімінде Шымкент қалалық жасөспірімдер және қуыршақ театры жазушының шоқтығы биік шығармасы «Менің атым – Қожа» повесін сахналады. Көрерменнің көзайымына айналған Қожа, театр әртістерінің көзқарасымен, режиссерлық шешімнің жоғары деңгейде болуымен тағы да жаңғыра түсті.
Гүлжауһар БАЖАҚАЙ
