Аталған семинар Қаржы министрлігінің тапсырмасына сәйкес, 2025-2027 жылдарға арналған бюджетті қалыптастыру бойынша жұмыстардың қарсаңында мемлекеттік бюджетті орындау процесіндегі сыбайлас жемқорлықтың алдын алу жөніндегі шаралардың бірі. Жылдың соңғы айларында бюджет қаражатын мақсатсыз пайдалану және ықтимал бұзушылықтарды болдырмау назарда тұр. Семинар-кеңестің басты мақсаты – жемқорлық пен сыбайластықты болдырмау, бюджеттік заңнамалардың талаптарын қатаң сақтау, қолданыстағы бюджеттік заңнамаларға өзгерістер мен толықтырулар енгізу үшін ұсыныс пікірлерді тыңдау.
Жиынға ішкі мемлекеттік аудит департаменті, сыбайлас жемқорлыққа қарсы іс-қимыл департаменті және жергілікті бюджеттің атқарылуына жауапты уәкілетті орган қызметкерлері, жергілікті бюджеттік бағдарлама әкімшілерінің бас есепшілері мен қаржылық жоспар бөлімінің мамандары қатысып, жемқорлық тәуекелдерін бірлесе талқылады.
Шымкент қаласы бойынша қазынашылық департаменті басшысының орынбасары Қалмұханбет Байсариев қаржы құжаттарын рәсімдеу барысында бірқатар мекемелерде кемшіліктер анықталғанына тоқталып өтті. Мекеме есепшілері мен мемлекеттік сатып алумен айналысатын мамандарға төлем құжаттарын дұрыс жүргізу тәртіптерін, бюджеттің атқарылуы бойынша төлем жүргізуде басшылыққа алатын негізгі бес құжатты түсіндірді. Бюджеттік бағдарлама әкімшілері өздеріне қарасты мекемелердің тиянақты, мұқиятты болуын қадағалау қажет.
Қ.Байсариевтің айтуынша, ендігі ретте ақпараттық жүйе жаңа стандарт бойынша жұмыс істейді. Өткен жылдан бастап қаржы құжаттары мемлекеттік тілге өткізілді. Әрбір төлем құжаттарына назар аудару мақсатында түсіндірме жұмыстары жүргізілуде.
Семинар барысында арнайы шақыртылған қызметкерлердің баяндамалары мен ескертулері, бағдарлама әкімшілерінің ұсыныс пікірлері тыңдалды.
