Мамыр айының 7 жұлдызында «Қазақ елі» алаңында өткен шараға ел аумағынан 270 соғыс ардагері қатысты. Бұдан бөлек, 6 ардагер мамыр айының 9 жұлдызында Мәскеудегі «Қызыл алаңда» өтетін шараға арнайы шақырту алды. Сейсенбі күні Оңтүстік өңірінің жұртшылығы Астанадағы әскери шеруге қатысатын 15 соғыс ардагерін Шымкент теміржол вокзалынан сәттілік тілеп, шығарып салды. Осы орайда, ардагерлер қауымы да қамқорлық пен ізгіліктің үлгісін танытқан жұртшылыққа ізгі тілегін жеткізді.
Исамуддин РЫСБАЙ,
Шымкент қалалық ардагерлер
кеңесінің төрағасы:
Қариялар – қазынамыз
– Бүгінде Шымкент қаласы бойынша 54 мыңнан астам зейнеткер бар болса, бұл қатарда, 183 соғыс ардагері, 6678 тыл ардагеріне айрықша құрмет үлгісі көрсетіліп келеді. «Самұрық-Қазына» және «Дегдар» қайырымдылық қорының тікелей демеушілік жәрдемімен ардагерлерге түгелдей үйді-үйлеріне сый-сияпаттар мен бір реттік жәрдемақысын жеткізіп бердік. Бұл қатарда, қала аумағында тыл ардагерлерінің қатары айтарлықтай ұлғая түскенін да баса атап өткен жөн. Себебі, біз қазіргі таңда Ұлы Отан соғысы кезінде ерте есейіп, қоғамдық жұмыстарға белсене қатысқан сол кездегі балаң жастағы азаматтарға да тыл ардагері ретінде есепке алудамыз. Яғни, Ұлы Жеңістің дүбірін жақындатқан әрбір азаматтың еселі еңбегі ескеріліп, бүгінде оларға лайықты қамқорлық көрсетілуде. Тек ағымдағы жылы осы мақсатта 700-ден астам азаматқа «Тыл ардагері» дәрежесі берілді. Бұл қатарға енбей қалған азаматтардың әлі де мүмкіндігі бар. Яғни, есепке алу жұмыстары жалғасын табатын болады.
Айтжан БЕКНАЗАРОВ,
соғыс ардагері:
Әскери шеруге қатысу – үлкен мәртебе
– «Жаным арымның садағасы!» деген қағидалы сөзді жанымызға жалау етіп, қан майданда аянып қалмауға тырыстық. 19 жасымда оқ пен оттың бел ортасында жүріп, елді басқаншылардан азат етуді ғана ойладық. Сталинградтағы қанды шайқастар әлі күнге көз алдымда. Бір Алладан тілерім, ел басына мұндай зобалаң кезең енді қайтып оралмасын. Бейбіт дәуірдің, татулық пен тұрақтылығы қалыптасқан бүгінгі күннің қадірін білейік. Бүгінгі ұрпақты Отанын сүюге, елінің, жерінің адал патриоттары болуға, достық пен бірлік туралы түсінік беру арқылы отансүйгіштікке тәрбиелеу – біздің де, бізден кейінгі буынның да азаматтық міндеті. Әскери шеруге қатысуымның өзі бір үлкен қуаныш мен үшін. Және ол ардагерлерге көрсетіліп келе жатқан қамқорлықтың, еліміздегі бейбіт өмірдің, жақсы тұрмыстың арқасы деп білемін.
Абылай ҚАЗЫБАЕВ,
соғыс ардагері:
Ел үшін маңызы зор
– Елордада сән-салтанатымен атап өтілетін әскери шерудің маңызын жоғары бағалаймын. Біріншіден, аталған мереке – Қазақстан әскерінің расында да жетілгендігін, үлкен бір күшке айналғандығының айғағы болса, екіншіден – бұл күн барлық соғыс ардагерлерінің, қатардағы жауынгерлердің және әскери салаға қатысы бар азаматтардың төл мерекесі.
Расында да, қазіргі таңда Қазақстанның қарулы күштері биік белестерге жетті. Әуеде болсын, жерде болсын заманауи қару-жарақпен, техникамен толықтай жабдықталған. Ал, ең бастысы – біздің елде бейбітшілік пен тыныштық орнап отыр. Мұны да ел әскерінің бір үлесі мен жетістігі деп айтуға болады.
Қашанда ел-жұртымыз тыныштық пен бейбіт өмірден ажырамай, тек татулық пен тұрақтылықтың төрінде ғұмыр кеше бергей деп тілеймін.