Шымкент қаласында Оңтүстік Қазақстан облысы кәсіпкерлік, индустриалды-инновациялық даму және туризм басқармасының тапсырысымен, “ЕРНИЯЗ” жарнама өндірістік фирмасының ұйымдастыруымен «Оңтүстік көркі – Красота юга» қолөнершілер мен қолданбалы өнер шеберлерінің көрмесі өткізілді.
Ұлттық мәдениетімізді ұлықтап, төл өнерімізді жан-жақты насихаттаған көрмеге облыстағы қала, аудандардан келген қолөнер шеберлері, қолданбалы өнер шеберлері, кәдесый бұйымдарын өндірушілер, кәдесый бұйымдары дүкендері өкілдері қатысты. Олардың ешқайсысы да осал болған жоқ.
“ЕРНИЯЗ” жарнама өндірістік фирмасының директоры Ербол Дайрашовтың айтуынша, көрмеге өңіріміздегі ең танымал қолөнер шеберлері қатысып, өз шеберліктерін паш етті.
– Көрменің басты мақсаты – облыста ішкі туризмді дамытуға ықпал жасау, этикалық туризмді дамыта отырып, ұлттық мәдениет, салт-дәстүр, қолөнер бұйымдарын жергілікті халыққа таныстыру, ұлттық қолөнер бұйымдарын жасаушыларды ынталандыру, – дейді көрмені ұйымдастырушы Е. Дайрашов.
Айта кету керек, көрме шеңберінде бірнеше номинациялар бойынша байқау өтті. Атап айтар болсақ, «Ең үздік қолөнер шебері» аталымы бойынша жүлделі бірінші орынды Бейсбековтар отбасы (ер-тұрман, тоқыма, алаша) жеңіп алса, екінші орынды Әшірбек Желдібаев (зергерлік бұйымдары, белдік), үшінші орынды Мақсат Сәрсенбаев (макреме, сандық, кебеже) иемденді. «Ең үздік кәдесый бұйымы» аталымы бойынша Түркістан қолөнер мектебінің (кешенді шығармалар) мерейі үстем болды. Сондай-ақ, бұл аталымда Еркеш Қарақойшиева (шиқұрақ, тігін бұйымдары) екінші орыннан көрінсе, Гүлназ Қарабдалова (қыштан жасалған сыйлықтар) жүлделі үшінші орынға иелік етті.
Көрме соңында номинациялар бойынша жеңімпаздар дипломдармен және бағалы сыйлықтармен марапатталды. Басқа да белсенділік танытқан қатысушыларға ынталандыру сыйлықтары табысталып, оларға тарту-таралғы жасалды.
С. ТАСТАНБЕК
