«Ерлік – ұрпаққа мұра». Осындай атаумен Аймақтық әлеуметтік-инновациялық университетінде Ауған соғысы ардагерлері мен студент жастардың басқосу жиыны өтті. Бүгінгі жастар бейбіт күннің қадірін біліп жүр ме? Патриот болуды қалай түсінеді? Қан майданнан туған жерге аман-есен оралған жауынгерлердің әңгімесі осы жайында өрбіді.
ҚР Тәуелсіздігінің 25 жылдығы аясында өткен жиынды «Жастар ресурстық орталығы» коммуналдық мемлекеттік мекемесі ұйымдастырды. Ауған соғысы ардагерлері Мәделхан Тоғаев пен Ғалымжан Орынбаевтың әсерлі әңгімесін студент жастар ұйып тыңдады. Іс-шараның мақсаты да жанқиярлық ерлік жасаған азаматтарды жастарға таныту.
Олар – Кеңес әскері сапында Отан алдындағы азаматтық борышын адал атқарғандар. 1979 жылы Ауғанстанда басталған сұрапыл соғыста Кеңес әскерлері ерлік көрсетті. Қаншасы елі үшін жанын пида етсе, бірқатары жоғалып та кеткен.
Мәделхан Жолшыханұлы мен Ғалымжан Жанәбілұлы соғыстағы нәубет жылдар мен қарулас достары жайында естелік айтып, Тәуелсіздікті қадірлей білуге үндеді. Қазіргі жастар белсенді де білімді болу керек. Ауған соғысының ардагерлері мектеп қабырғасынан патриот болуға ұмтылып, студенттерді білім алуға, оны ел қызметіне жұмсауға шақырды.
Оқу орны директорының тәрбие ісі жөніндегі орынбасары Тәттімбек Хабдыразақұлы келген қонақтарға алғысын айтты.
