БІР МЕЗЕТТЕ 12 МЫҢ АДАМ МІНӘЖАТ ЕТЕ АЛАДЫ Избранное

Среда, 29 Май 2024 05:42 Автор  Опубликовано в Қала Прочитано 213 раз

Шымкентте бір мезетте 12 мыңға жуық адам мінәжат ете алатын мешіт ашылды. Сейітжан қари Есжанұлы атындағы үлкен мешіттің ашылу салтанатына Шымкент қаласының әкімі Ғабит
Сыздықбеков, ҚМДБ-ның төрағасы, Бас мүфти Наурызбай қажы Тағанұлы, теолог-ғалымдар, мемлекет және қоғам қайраткерлері, қала тұрғындары қатысты. Сонымен қатар, зәулім мешіттің ашылу рәсіміне Меккеден шейх Осман Тоhа да арнайы келген.

MesHT

 

Мешіт Шымкент қаласының жаңа әкімшілік-іскерлік орталығында орналасқан. Классикалық ислам стилі қазақтың ұлттық нақышымен үйлестіріле безендірілген.
Қала әкімі жамағатты жаңа мешіттің ашылуымен құттықтап, еңселі мешіт асыл дініміздің өсіп-өркендеуіне мол үлес қосатынын атап өтті. Ғабит Әбдімәжитұлы ғұмырын Құран жазуға арнаған қандасымыз, әйгілі каллиграф, Сауд Арабиясынан арнайы келген Осман Тоһаға Мемлекет басшысының дұғай сәлемін жеткізіп, иығына шапан жапты.
Бас мүфти Наурызбай қажы Тағанұлы да жаңа мешіт елге қызмет ете беруіне тілектестігін жеткізді.
– Алла Тағала бұл мешітті ізгіліктің, бірлік пен берекенің, білім мен сүйіспеншіліктің ордасы еткей. Осы мешіт жанындағы медреседен тәлім алған жастарымыз шырайлы шаһардың, қала берді Қазақ елінің рухани дамуына өз үлестерін қосады деген сенімдемін. Мешіттің салынуына қолдау көрсеткен қала әкіміне ерекше алғыс айтамын. Ғасырлар бойы дінімізге қызмет ететін мешіт салып берген Серікжан Сейітжанұлы ағамызға да алғысымыз шексіз. Еңселі мешіт елге, дінге қызмет ете берсін, – деді Бас мүфти.
Наурызбай қажы мүфтият атынан Осман Тоhаға құрмет көрсетіп, «Қазақстан мұсылмандары діни басқармасына 30 жыл» мерекелік медалін кеудесіне тағып, иығына шапан жапты.
Сондай-ақ, жиында ҚР Парламенті Сенатының депутаты Әли Бектаев, Мәжіліс депутаты Данабек Исабеков ізгі тілектерін айтты.

MesHT-11


Іс-шара соңында Бас мүфти жамағатқа жаңа мешіттің бас имамын таныстырды. Ол – Қазақстан мұсылмандары діни басқармасы жанындағы Ғұламалар кеңесінің белді мүшесі, діни салада тәжірибесі мол Ерсін Әміре.
Айта кетсек, мешіт кешенінде ислам тарихының мұражайы, медресе, оқу залы бар кітапханалар орналасқан. Сонымен қатар, конференция залы, 600 адамға арналған асхана, неке қию залы, әкімшілік бөлмелер, телеорталық қарастырылған. 736 орынға арналған жерасты паркингі де жұмыс істеп тұр.

Тағабай ҚАСЫМ

Л. Гумилев атындағы ЕҰУ-дің 2010 жылғы түлегі. 2012-2013 жылдары облыстық «Оңтүстік Рабат» газетінің, 2014-2016 жыл аралығында республикалық «Спорт» газетінің тілшісі қызметін атқарды. 2013 жылдың тамыз айынан бері «Шымкент келбеті» газетінде тілші болып жұмыс істейді.