Жалпы, 2020 жылы Қаратау ауданындағы Шымсити тұрғын алабы, Асар-2 шағынауданында 1 200 орынды мектеп пайдалануға берілген.
– Ал 2021 жылы Тұран шағынауданында 1 200 орынды, Сайрам тұрғын алабында 300 орынды мектеп құрылыстары қолға алынып, пайдалануға беру жоспарлануда. Нәтижесінде ауданымызда 3 ауысымды оқыту мәселесі кезеңімен өз шешімін табатын болады, - деді аудан әкімі.
Жалпы Қаратау ауданы бойынша 3 ауысымдағы 4 мектеп бар. №80 және №72 мектептерге 300 орынды қосымша құрылыс салу үшін ЖСҚ дайындалды. №80 мектептен Нұрсәт шағынауданында орналасқан «Мың бала» мектебіне - 800 оқушы, «Әл-Фараби академиялық» мектебіне 1127 оқушы қабылданды. Қалған 669 оқушы Нұрсәт тұрғын алабындағы №130, 132 мектептерге ауысты. Ал 850 орынды №58 мектепте 2292 оқушы бар. Оның 300-ден астамы Тұран шағынауданынан тасымалдау арқылы білім алуда.
– 2021 жылдың алғашқы жарты жылдығында 1200 орынды мектеп құрылысын аяқтау жоспарлануда және Алматы көшесінің бойында жекеменшік 300 орынды мектептің құрылысы аяқталуына орай 3 ауысымды мәселе өз шешімін табады, - деді Абзал Шымкентбайұлы.
№115 мектептегі 3 ауысымды білім алу мәселесін шешу бойынша 1200 орынды мектеп құрылысы үшін 2,7 га жер телімінің құжаттарын рәсімдеу жұмыстары жүргізілуде.
Бұған қоса аудан аумағында 2020-2025 жылдары аралығында 34 мектеп, 3 өнер мектебі және 5 мектепке қосымша құрылыс салу жоспарлануда.
Есепті баяндамадан соң аудан әкімі тұрғындар әлеуметтік желі арқылы қойған сұрақтарға жауап берді.