Отбасы құндылықтарын дәріптеді
Среда, 26 Июль 2017 04:43
Әл-Фараби ауданы әкімі аппаратының ұйымдастыруымен «Гауһар» тігін фабрикасының жұмысшы әйелдер қауымымен «Отбасы құндылығы» тақырыбында кездесу өтті.
Кездесу ҚР Бас Прокуратурасының бастамасымен «Отбасындағы зорлық-зомбылықсыз Қазақстан» атты республикалық пилоттық жобасын жүзеге асыру мақсатында қолға алынған болатын.
Отбасы құндылықтарын және халықтың имандылық мәдениетін қалыптастыруды көздейтін кездесуге Әл-Фараби ауданының әкімі Б. Қалжанов та қатысты. Жиында, сондай-ақ, «Қырғы базар» сатушыларына Әділет басқармасының қызметкерлері, психолог, медиатор, прокурор мамандар өз саласы бойынша кеңес беріп, әлеуметтік көмек көрсетті. Әйелдерге қатысты зорлық-зомбылықты ескерту, алдын алу бағытында қойылған сұрақтарға өмірде кездескен оқиғалардан мысал келтіре отырып жауап берді. Мамандар бұл бағыттағы жұмыстарды тұрақты жүргізуді жоспарлаған. Тіпті, тұрмыстық зорлық-зомбылық тақырыбында қандайда бір кеңеске мұқтаж жандарға көмек көрсетуге дайын екендігін де жасырмады.
Мысырдың айбатты арыстандары – Шымкент циркінде
Четверг, 20 Июль 2017 11:22
Шымкент қаласына Мысырдың айбатты арыстандары келді. Мысырлық аң үйретуші Хамада Кута «Оңтүстік Цирк» алаңында алғаш рет өнер көрсетуде. Даусы күннің күркіреуінен кем түспейтін, үлкен-үлкен 7 арыстанды бір мезетте алаңға шығарып, жалғыз өзі жыртқыш аңдарды басшылыққа алған Хамаданың өнері көрермендерді тәнті етті.
Ол арыстанға бұйрық бергенде аң патшасы ақырса, көрермен демін ішіне тартып отырады. Әйткенмен, айбатты арыстандар талантты жаттықтырушының тапсырмасын орындағанда «қайтер екен?» деген қорқыныш бұлты сейілгендей болады.
Көрермендер әсерлі қойылымнан жыртқыш аңдардан бөлек цирк әртістері мен акробаттардың өнерін де тамашалады. Айналдырған бір сағатта бойды қорқыныш, үрей, қуаныш, шаттық сынды түрлі сезім билейді. Әдеттегідей манежде ғана емес, көрермендердің жанына келіп, езуіне күлкі үйіретін сайқымазақ балалардың ең сүйікті кейіпкеріне айналды.
«10 айбарлы арыстан және Египет ханзадасы» Шымкент қаласының тұрғындары мен қонақтары үшін «Оңтүстік Циркте» 27 тамызға дейін өнер көрсетеді.
Сенімге адал СҮҢГУІРЛЕР
Среда, 19 Июль 2017 05:27
Жазды күні біздің өңірдің аптап ыстығында демалысты, әсіресе, суға сүңгіп кетуді аңсап тұратын әдет барша Оңтүстік тұрғындарына тән болса керек. Тіпті, қолымыз қалт етсе, ондай мүмкіндікті жібермейтініміз де анық. Қала тұрғындарының сұранысына орай Шымкентте аквапарктер, бассейндер ашылып-ақ жатыр. Ал құлашты кеңірек сермеп жүзу мен табиғат аясында сергуді қалайтындар таулы аймақтағы демалыс орындарына тартып отырады. Сондай-ақ, Арыс, Келес өзендеріне, Шардара, Бөген, тіпті, Сырдарияға жүзуге баратындар аз емес. Дегенмен, су көлемі үлкен болған сайын онда қауіп басым. Сондықтан мұндай аймақтарда суға кеткендерді құтқару үшін міндетті түрде сүңгуірлер жасағы қызметте жүреді.
≈ Адам аман қалу үшін...
– «Орталық», «Орталық»!
– «Орталық» тыңдап тұр!
– Құтқару жасағына қосымша күш қажет!
– «Орталық» қабылдады!
Мұндай хабар түскеннен-ақ, төтенше жағдайға дайын тұрған сүңгуірлердің келесі жасағы оқиға орнына жетіп барады. Бұл кезде олардың әрбір іс-әрекеті минутпен емес, секундпен өлшенеді. 15 секундта орындайтын тапсырмаға 16 секунд кідірсе, сүңгуір ескерту алады. ТЖД Жедел құтқару жасағының бөлімше басшысы Ілияс Мейірбеков ең қиыны, суға батып кетуден шошып, жанталасқан адамды құтқару кезіндегі арпалыс екенін айтты.
– Суға тұншыққан адамның бірден күші көбейіп, жан-тәнімен аман қалуға ұмтылады. Ондайда ол ештеңе естімейді де, көрмейді де. Құтқарушының өзін суға батырып жібере алатын күшке ие болады. Абдырап, құтқарушыға жармасып, оны басып өзі ауа жұтуға әрекет жасайды, – дейді ол.
Бұл сәтте құтқарушының өзі қимылсыз қалып не тұншығуы әбден мүмкін. Ал бірер минутта бітуі тиіс әрекет көп уақытқа созылып, жағдай қиындай береді. Сондай сәтте құтқарушы жаттығуда көрсетілген тәсілдермен суға тұншығып жатқан адамның қолын қайырады немесе жағынан қыса ұстап, жоғары көтереді. Тіпті қолдарынан қапсыра құшақтап алса, ішінен теуіп, оның құрығынан босап шығуы да жаттығуда қарастырылған. Содан соң асқан жылдамдықпен батып бара жатқан адамды артқа айналдырып бұрады да, қолтығынан ұстап жағаға немесе қайыққа қарай жүзіп алып шығады.
– Кейде жағаға аман-есен шыққан демалушылар алғыс айту былай тұрсын, аты-жөнін де айтпай теріс бұрылып жүре береді. Олар өздері туралы мәліметті беруден бас тартқан соң біздің жұмысымыз көбіне ескерусіз қалады. Кейбірі «рахмет» деп өзі туралы мәліметті толық қалдырады. Бұл біздің еңбек кітапшамызға тіркеледі. Дегенмен, біз кей адамдардың тәжірибемізді арттыратын мәліметтерін бермеуіне үйреніп кеттік. Бастысы, демалуға келгендер жақсы көңіл күймен қайтса болғаны, – дейді І сыныпты сүңгуір Өмір Шегенов.
≈ Жеделдік тынымсыз жаттығуды қажет етеді
Біз Тоғыс су қоймасындағы «Тоғыс» құтқару станциясына барып, сүңгуірлердің жұмысымен таныстық. Станцияда кезекшілікке түскен құтқарушылардың жатын орны, киім ауыстыру, тамақтану және медициналық бақылау бөлмелері бар. Күнделікті таңертеңгі жаттығу сүңгуірлердің денсаулығын тексеруден басталады. Олар спирттік ішімдік қолданбаған, түнде дұрыс тынықан, көңіл күйі жайлы және денсаулығы өте жақсы болуы шарт. Бұл қатаң талаптан өткен соң құтқарушылар сүңгуір киімін кию жылдамдығына жаттығады. Ал суға түсу кезегі келгенде олар 4 шақырымдық «Тоғыс» су қоймасының арғы шетіне тоқтамай жүзіп барып, кідірмей бергі жағаға қайта оралады. Таңертеңгі жаттығудың ең қиын кезеңі тереңдігі 15 метрді құрайтын судың астына түсу.
Бұл кезде ауыр сүңгуір киімі мен оттегі балонынан бөлек, құтқарушының мойны мен беліне кір тасын қапсыра байлайды. Жаттығу кезінде беліне қалың арқан байланған соң сүңгуір суға бір түсіп, бірнеше секундтан соң қайта шықты. Басын иіп, бас бармағын көрсеткен сүңгуірдің бұл әрекеті «құтқаруға дайынмын» дегені екен. Бұдан әрі құтқарушылар сүңгуірдің беліне байланған арқан арқылы «тілдеседі» деді І.Мейірбеков.
– Құтқарушы өз салмағына қосымша 45 келі ауыртпалық түспесе, сүңгуір киімімен суға батпайды. Судың астында жүріп, суға кеткен адамды іздеу үшін тас байланады. Тереңге түскен сайын судың қысымы күшейіп, қараңғылық басады. Бұған су астында өсетін балдыр, басқа да өсімдіктерді қосыңыз. Құтқарушының жағдайын арқанды үш рет сілкілеу арқылы білеміз. Егер дәл солай үш рет сілкілесе, бәрі дұрыс. Бір тартып, бір сілкісе бірдеңені бағамдай алмай тұрғаны. Екі сілкіп, үш рет тартса тапқаны. Ал 4 рет тартса көмекке екінші сүңгуірді шақырғаны. Арқанды тоқтаусыз жұлқи тартқаны – сүңгуірдің өзіне шұғыл көмек қажеттігін білдіреді, – дейді құтқарушылар жасағының жетекшісі.
≈ Сүңгуір болғыңыз келсе, су астында тәжірибе жинайсыз
От пен суды «тілсіз жау» десек, ең қиын мамандық иелері – сүңгуірлер. Сүңгуірге қойылатын ең басты талап – деннің саулығы. Толық тексеруден өткен құтқарушы 20 сағат теориялық оқу сабақтарына қатысады. Ал су астындағы практикалық жұмыстарының уақыт жиынтығы 12 сағатқа жетуі тиіс. Содан кейін сынақтан өткен құтқарушыға «ІІІ сыныпты сүңгуір» дәрежесі беріледі.
– Әр жолғы су астындағы жұмыстар сүңгуірдің кітапшасына 10-15 минут уақыт есебімен жазыла береді. Солай 500 сағат су астында жұмыс істесе, ІІ сыныпты алады. 700 сағаттан асырса, І сыныпты сүңгуір ретінде шені жоғарылайды, – дейді Ілияс Мейірбеков.
Оның айтуынша, жазатайым оқиғалардың алдын алу үшін құтқарушылардың кезекшілігі күзету аймағынан тыс орындарда да ұйымдастырылған. Ересектер арасында өкінішті жағдайға алып баратын оқиғалар көбіне жүзуді білетіндер арасында орын алады дейді мамандар. Ересектер жүзуден жарысады. Бұрынғы күш-қайратын сол күйінде деп ойлайды. Көбіне Тоғыс су қоймасының арғы шетіне жүзіп барып қайтуды көздегенімен судың орта тұсына жүзіп барғанда ғана аяқ-қолының талғанын сезеді. Кейде аптап ыстықтан келіп бірден салқын суға қойып кеткенде сіңір тартылады. Мұндай кезде терең жақта жүзіп жүрген адамның жағдайы қиындап кетуі ғажап емес. Құтқарушыларға құлақ ассақ, демалыстың сәтті өтуі үшін сақтық шараларын назарда ұстап, құтқарушылардың ескертуіне мән берген абзал.
Жыл басынан бері облыста 17 адам суға кетіп қайтыс болған. Оның 11-і кәмелет жасына толмаған балалар. Мұның әрқайсысы қабырғаны қайыстыратын қайғылы жағдай. Үйінен «шомылуға барамыз» деп шыққан жан ешқашан аяғы сәтсіз болады деп ойламайды. Шынтуайтына келгенде, әр адам өз жанының құтқарушысы.
ФАБРИКАДАҒЫ БІР КҮН
Пятница, 14 Июль 2017 06:19
ФОТОТІЛШІ Береке Сейітжаппар
Бал Текстиль» ЖШС халықаралық деңгейдегі отандық тұңғыш кілем тоқыма фабрикасы.
Фабрика 2011 жылы индустрияландыру картасы аясында «Оңтүстік» арнайы экономикалық аймақта құрылып, 2013 жылдың қазан айынан бастап Қазақстанда алғаш рет кілем шығаруды қолға алды. «Бал Текстиль» жылына 5 млн шаршы метр кілем және кілем өнімдерін, сондай-ақ, 4 000 тонна полипропиленді жіп өнімдерін жасап шығарады. Экономикалық аймақтың бірден бір артықшылығы – мұнда орналасқан мекемелер жер, меншіктік және корпоративтік салықтан босатылады.
Жіп иіру цехында
Ертеректе «ұшатын кілем» жайлы ертегіні тыңдамай өскен бала жоқ шығар. Ертегідегі екі шеті шашақты, ортасы ою-өрнекке толы кілемдер бүгінде Қазақстанның өзінде өндіріледі. Іске қосылғанына небәрі 4 жыл болған «Бал Текстиль» кілем тоқыма фабрикасының бүгінгі қайнаған жұмысы сонау ертегі әлемінен бір мысқал да кем түспейді.
Кілемнің құрамы екі бөліктен тұрады. Оның бірі – түгі, екіншісі – астары. Бұл екеуіне екі түрлі жіп қолданылады. Жіп иіру цехының өзі ауқымды өндіріс орны. Мұнда тоқымаға қажетті жіптердің «BCF», «Heat-Set», «Frize» түрлері «Oerlikon Neumag» (Германия) машинасында жасалады. Қап-қап полипропилен алдымен ерітіледі. Түрлі түске боялады. Содан соң талшыққа бөлінеді. Өндіріс басында біз біле бермейтін талай құпия бар. Ал фабриканың жіп иіру бөлімінде қызмет ететін Франгиза Хусанова сол құпияны көзбен көріп жүрген маманның бірі.
ФОТОТІЛШІ Береке Сейітжаппар
– Фабрикаға жұмысқа орналасқаныма 5 айдан енді ғана асты. Үйден алып кетіп, жеткізіп салатын көлік қарастырылған. Түскі асымыз да фабрика есебінен төленеді. Айына 85-90 мың теңге жалақы аламын. Жұмыс аса қиын емес. Білмегенімді осында үйрендім. Алдағы уақытта да тәжірибе арттырамын деген ойдамын. Басқа жұмысқа ауысқым келмейді, – дейді ол.
Жіпті қайта өңдеуге дайындайтын Ділдәбек Тұрғанбеков та кәсібін мақтан тұтады.
– Біз Қазақстандағы кілем шығаратын №1 фабрикада жұмыс істейміз. Яғни, отандық өнім өндіреміз. Әр қазақтың шаңырағында отандық екі кілем болса, соның біріне міндетті түрде менің де еңбегім сіңді, – дейді ол.
«Бал Текстиль» кілем тоқыма фабрикасының атқарушы директоры Жомарт Керімшиев жіп өндірісін іске қосуға арналған екі кезеңде 2,7 млрд теңге қаражат жұмсалғанын айтты.
– Кілемнің түгін тоқитын жіпті өзімізде өндіреміз. Бұл тапсырысты дер кезінде игеруге мүмкіндік беруде. Бұрын сатып алушы ұсынған кілем дизайнына қажетті жіпті шетелде өндіруге 70-80 күн уақыт кететін. Қазір біз кілем тоқуға қажетті жіптердің түр-түсін 15 күнде дайындай аламыз, – дейді Ж.Керімшиев. – Астарға қолданылатын жіп әртүрлі болады. Жібектей жұмсақ кілемнің астарын тоқуға жұмсалатын мақта жіпті қазірше біз Түркиядан сатып аламыз. Көбіне кендірден тоқылатын астар жібін бүкіл әлемнің кілем өндірушілері Бангладештен алады. Онда Үнді мұхитының климатында өсетін кендір ағашынан жіп өндіріп, әлемнің түкпір-түкпіріне тиімді бағамен экспорттайтын әйгілі зауыт бар. Ал өңдеуге арналған басқа да жіптерді , Қытай, Малайзия, Индонезия елдерінен аламыз. Біздің бүгінгі мүмкіндіктеріміз бұрынғыға қарағанда әлдеқайда жоғары.
ФОТОТІЛШІ Береке Сейітжаппар
Кілемдер инновациялық қондырғыларда, дәлірек айтқанда «Michel Van De Wiele» (Бельгия) тоқыма құрылғысында тоқылады. Қоржынында 2000-ға жуық кілем дизайны бар компания аз ғана уақытта халықтың ықыласына ие болып, отандық және халықаралық сапа конкурстарында «Үздік тауар» номинациясымен танылды.
Жомарт Керімшиев,
«Бал Текстиль» кілем тоқыма фабрикасының атқарушы директоры:
– Бұрын сатып алушы ұсынған кілем дизайнына қажетті жіпті шетелде өндіруге 70-80 күн уақыт кететін. Қазір біз кілем тоқуға қажетті жіптердің түр-түсін 15 күнде дайындай аламыз.
Кілемдер инновациялық қондырғыларда, дәлірек айтқанда «Michel Van De Wiele» (Бельгия) тоқыма құрылғысында тоқылады.
Кілемді кімдер тоқып жүр?
М.Әуезов атындағы ОҚМУ-дың колледжінде 6 ай оқып, сертификатпен жұмысқа орналасқан Айбар Отарбай бір жылдан бері тоқымашы қызметін атқарады.
ФОТОТІЛШІ Береке Сейітжаппар
– Техниканың мүмкіндіктері жаңа белестерге алып шыққандай әсер қалдырады. Болашақта осында 4 жылдан бері қызмет етіп жүрген Ақерке Шыныбекова, Нұрсұлтан Әмірбек, Олжас Совет аға-апаларым сияқты мықты кадр болып қалыптасқым келеді. Олжас Түркияның Газиантеп қаласында «Kartal Carpets» кілем тоқыма фабрикасында 4-5 ай кәсіби біліктілігін арттырды. Мен де осы салада білімімді жетілдіріп, жетістіктерге қол жеткізгім келеді, – дейді Айбар.
Кілемдер тоқыма өндірісінен кейін сапа-бақылау бөліміне барады. Мұнда олардың сапасы сұрыпталып, қажетті жағдайда Гүлжанат Мұхамбет сынды сапа бақылаушысының өңдеуінен өтеді.
– Негізгі мамандығым – химия-лаборант. Бұл фабрикаға әпкем шақырып алды. Жұмысқа орналасқаныма 1,5 жыл өтті. Әр түрлі бөлімде жұмыс істеп, кілем өндіру ісін бір кісідей меңгеріп алдым. Осындай ерекше кәсіпті таңдап, отандық өнім өндіруге үлес қоса алғаным үшін қуанамын. Елге қызмет ететін ұжым – менің мақтанышым, – дейді Г.Мұхамбет.
Өңделген кілемдер жуылып, қайта кептірілген соң үтіктеледі. Жцелімделіп, құрғатылады. Бұдан кейін шет-шеті көктеліп, заттаңба қағазы жапсырылады. Мөр басылды, кілем сатылуға дайын!
Отандық кілемді қайдан табуға болады?
Қазақы нақышта тоқылған кілемді шетелден келетін кілемдерден арзан бағаға Қазақстанның барлық аймағынан таба аласыз. Мұнда шығарылатын кілемдер сапасына қарай 15 түрге бөлінеді. «Бал Текстиль» кілем өндіру фабрикасының экспорттық географиясы жылдан жылға артып келеді. Қазіргі таңда Қырғызстан, Ресей, Әзірбайжан, Тәжікстан, Франция және Шведтің ең үлкен сауда желісі «IKEA» арқылы Ұлыбритания мен Германия мемлекеттеріне де «Қазақстанда жасалған» деген белгімен экспортталуда.
ФОТОТІЛШІ Береке Сейітжаппар
«Бал Текстиль» – тұрмыстық тауарларды сату бойынша әлемдік көшбасшылардың бірі саналатын швециялық «IKEA» ірі компаниясымен келісім шартқа отырған еліміздегі тұңғыш фабрика. Кілем өнімдері аталған мемлекеттердің зертханаларында сынақтан өткізіліп, сапа сертификаттарын алып отырады.
Шымкент қаласының үш нүктесінде – Қонаев даңғылы бойында, «Самал» және «Алаш» базарларында «Бал Текстиль» кілемдерінің фирмалық 9 дүкені жергілікті тұрғындарға қызмет етеді. Бұдан өзге тасымалдау қызметімен айналысатын сауда өкілдері де бар.
Фабрика өз өнімдерін халыққа таныстыру мақсатында жыл сайын 3 күндік көрме өткізетін. Алдағы уақытта фабрика басшылығы өңірімізде өтетін көрмені бес күнге жалғастыруды жоспарлап отыр.
Түйін сөз:
«Бал Текстиль» кілем тоқыма фабрикасында өткен бір күнде көптеген ақпаратқа қанықтық. Өндіру ісі бір басқа, мұнда 300-дей адам жұмыспен қамтылған. Сонымен қатар, фабрика басшылығының демеушілігімен өңірімізде ауқымды жұмыстар атқарылуда. Фабрика «Бизнестің әлеуметтік жауапкершілігі» жобасы аясында 2016 жылы Оңтүстік Қазақстан облысы, Бәйдібек ауданы Жүзімдік ауылында 22 млн теңгеге №5 балалар және жасөспірімдер спорт мектебін қайта жөндеуден өткізсе, 2017 жылы Алматы қаласы, Медеу ауданында 5,8 млн теңгеге балалар ойын алаңын абаттандырған.
Зообаққа бардың ба?..
Среда, 12 Июль 2017 06:06
Қайта жаңғырған демалыс орнына қалалықтар дән риза
Шымшаһарда демалыс орындары аз емес. Дәл қазіргі жаз маусымында олардың қайсыбіріне барсаңыз да келушілердің қарасы көп. Қала ішінде орналасқан аквапарктерде адам саны шектен асып жатса, кешкі уақытта дәл осындай көрініс қала саябақтарында кездеседі.
Дендробақта некелескен жұптан көз жазбайсыз. Ал зообақта қайта құру жұмыстары жүріп жатса да хайуанаттар әлемін қызықтауға келушілер толастамады.
Бүгінде Шымкенттегі зообақтың келбеті өзгерді. Бақтың оң жақ бөлігінде хайуанаттарға арналған «Африка» аймағы құрылды. Мұнда жан-жануардың түйеқұс, түйе, зебра, антилопа, гну, марал сынды 6 түрі бар. Зообақ басшысы Нұрғазы Бұхарбаев бұл аймаққа отырғызылатын пальма, акация ағаштарына орын дайындап, тапсырыс беріп қойғанын айтты.
– «Африканың» сәнін келтіретін ағаштар жақында келеді. Бұдан өзге зообақтың ішкі жолдарын көгалдандырып, гүлдендіріп, аяқжолдарын жаңарттық.
Келушілер мейлінше таза әрі саялы жерден жақсы көңіл күймен қайтсын деп тынбай қайта құру жұмыстарын жалғастырудамыз.
Бірақ, тұрғындар осы еңбегімізді бағалап, зообақта қоқысты арнайы жәшіктерге қалдырып, көгалмен емес, аяқжолмен жүріп араласа нұр үстіне нұр болар еді. Мұндағы күндіз-түні еңбек ететін кісілерді де ойлау керек. Олар келушілерге жағымды әсер қалдыру үшін бір мезгіл тыным таппайды, – деді.
Жұмысшы еккен гүл жұлынбай, ағаш сынбай тұрса, келушілер мәдениеті де зообақ көркін еселей түсетіні анық.
Біздің «Астана» – 7 жаста
Среда, 05 Июль 2017 09:30
2011 жылы Алматы зообағынан 14 айлық керік келгенде оның туған күні мерекелі күнмен сәйкес келгендіктен бас қаланың құрметіне орай есімін «Астана» деп атаған еді.
Балақайлар зообаққа барып, жануарлар әлемін тамашалағанда Астана атты керіктің де жай-күйімен танысып қайтады. Биыл керік 7 жасқа толады. Бұл күні ең жас қалалықтар үшін қала әкімдігі Шымкент зообағында үлкен мерекелік бағдарлама әзірлеуде. Зообақтағы ашық есік күні таңертеңнен 14:00-ге дейін жалғасады.
Шымқалалық балалар үшін аниматорлар өнер көрсетеді. Балақайлар театрландырылған шоу, концерттік бағдарлама және Астана қаласы туралы фильмдерді тамашалайды. Сондай-ақ, олар үшін зообақтағы ең қызықты шара 7 жасар Астана атты керіктің туған күніне арналған мерекелік құттықтау сәті болмақ.
Таланттардың тұсауын кескен колледж
Пятница, 23 Июнь 2017 08:08
Биыл Ә.Қастеев атындағы Оңтүстік Қазақстан өнер және дизайн колледжін 125 студент бітіргелі отыр. Осыған орай колледжде студенттердің дипломдық жобасын қорғау жұмыстары басталды.
Ерекше мамандық иелерінің қорытынды жұмыстары да жаңалыққа толы. Өйткені, графикалық кескіндеу, мүсіндеу, анимациялық графика, сәндік қолданбалы өнер және халықтық кәсіпшілік, дизайн, көркем сурет мамандықтары бойынша оқу орнын тәмамдайтын әрбір студент өз бетінше жұмыс істеп, туындысының мән-мағынасын тарқата отырып комиссия мүшелеріне еңбегін таныстырады.
– Біздің колледждің студенттеріне білікті мамандар дәріс береді. Атап айтқанда, суретші Рауан Мейірбеков анимациялық графика мамандығы бойынша білім алып жүрген студенттерді оқытады. Ол елімізге танымал «Қошқар мен Теке», «Қазақ елі» анимациялық мультфильмдеріне атсалысқан. Сондай-ақ, биыл диплом алатын студенттер Едіге Тұрлыбеков, Араншы Шаржанов, Қалтөре Атамқұлов сынды білікті мамандардан тәлім алды. Ал графикалық кескіндеу бойынша «Бал Текстиль» кілем-тоқыма фабрикасында бұдан алдын бітірген студенттеріміз жұмыс істеп жатса, қазіргілері сол фабрикада өндірістік тәжірибеден өтті, – дейді колледж директоры Дидар Асқарбекұлы.
Колледж басшысы А.Айдарбековтың айтуынша, бір ғана «Сәндік қолданбалы өнер және халықтық кәсіпшілік» мамандығы студенттердің бес түрлі салада шеберлігін арттыруға мүмкіндік береді. Мәселен, металдан түрлі бұйымдар жасап, ағаштан, керамикадан естелік кәдесыйлар әзірлейді. Сонымен қатар, теріден, тоқымадан дайындалған қолөнер бұйымдарын да осы мамандық иелері жасайды.
Биыл Ә.Қастеев атындағы колледжді бітіретін 125 студенттің 73-і дизайнер. Дипломдық жұмысын үздік деген бағаға қорғап шыққан Аяулым Камардиннің шығармашылығымен жақын таныстық.
– Дипломдық жобамды «АLJAMAL» деп атадым. Бұл сөз араб тілінен аударғанда «белгілі сұлу» деген мағынаны білдіреді. Кешкі салтанаттарға киюге арналған киімдерге изумруд түсін таңдадым. Изумруд – байлықтың, тұрақтылық пен парасаттылықтың, ұстамдылықтың және беріктіктің символы. Костюм сәніне аздап шығыстық, яғни араб киім үлгілерінің элементтерін қостым. Ал сол сәнге қазақтың ою-өрнегін қондырдым, – дейді болашақ дизайнер.
Аяулымның қолдан өрген оюлары комиссия алқасының ең жоғарғы бағасына ие болды. Ол – Ә.Қастеев атындағы Оңтүстік Қазақстан өнер және дизайн колледжіне 9 сыныптан кейін оқуға түсіп, 3 жыл 10 ай кәсіби білімін шыңдады.
– Қазір студенттердің барлығы дерлік бір-бір дайын маман. Қаржылық демеушісі болса, әрқайсысы өз кәсібін ашып, оны дөңгелетіп әкетуге дайын, – дейді колледж директоры Д.Айдарбеков.
Көрмедегі екі күн
Пятница, 23 Июнь 2017 07:56
ЭКСПО! Әлемнің ең танымал 35 қаласында 63 рет өткізілген халықаралық көрме! 1851 жылы Англияның «Хрустальды сарайы», 1889 жылы Францияның «Эйфел мұнарасы», 1958 жылғы Брюссельдің «Атомиум» атракционы, 1962 жылы АҚШ-та «Спейс Нидл» тамашалау мұнарасы және 1967 жылы Канадада «Хабитат 67» тұрғын үй кешені осы дүниежүзілік көрмені өткізу кезінде арнайы салынған-ды. Әйгілі ғимараттар бүгінде тарихи оқиғаның жәдігері болып қалды. Ал 2017 жылы Халықаралық көрмені өткізу бақыты Қазақстанға бұйырды.
Шымкент қаласынан алғашқылардың бірі болып Астанаға жол тартқан 150 оқушымен бірге «Шымкент келбеті» газетінің атынан мен де іссапарға аттандым. Іссапарда менен бөлек, 1 педиатр, 1 медбике және әр 10-15 балаға жауапты болып бекітілген бір-бір мұғалім бар еді. Экскурциялық команда «Zhana Talap» спорттық-туристік агенттігі директорының орынбасары Ғани Назарбектің жетекшілігімен жүріп отырды.
Астанаға 12 маусым кешкісін жетіп, Назарбаев университетінің жатақханасына жайғастық.
Жас қала, арман қала – Астана балалардың қиялына қанат бітіргендей. Тіпті, олар Назарбаев университетінің жатақханасына түскенін жақсы ырымға балап, «осы университетте жоғары білім алу бақыты бұйырсын» деп тілек тіледі.
ЭКСПО – ертегілер әлемі
Ертеректе самұрық құс, желаяқ, таусоғар, көлтауысар және саққұлақ жайлы ертегілерді тыңдап өскен балалар бір ғасыр өткенде оның шындыққа айналғанына куә болды.
Ал қазіргі таңда фантастикалық фильмдердің эпизодынан көретін дүниелерді Астанадағы халықаралық көрмеден кездестіру – тағы да сол шындыққа айналған ертегіні еске түсіргендей болды.
Астанада бастау алған халықаралық ЭКСПО-2017 көрмесі «Болашақ энергиясы» тақырыбын таңдады. Мақсат – адамзатты жауапкершілікке шақыру, пікірталастарға жағдай жасап, табиғатқа келтіріп жатқан залалды азайту және жер шарында энергия тұтынуды жоспарлау, оны бақылау бағытында білім мен біліктілікті арттыруды көздейді. Себебі, жылдан-жылға адамзат саны артып, технология дамып, тұтыну мөлшері ұлғая түскен. Ал жерасты қазба байлықтары мен энергия қуаты азайып барады. Бұл халықаралық қауымдастық мамандарының да алаңдаушылығын туғызып отыр. Экологиялық сұрақтардың да күн өткен сайын маңызы артып келеді.
ЭКСПО – 2017 халықаралық көрмесіне 115 мемлекет, 22 халықаралық ұйым қатысуда. «Болашақтың энергиясын», баламалы қуат көздерінен жарық өндірудің, экологиялық ахуалды жақсартудың мүмкіндіктерін әр елдің ғалымдары өзінше зерттеп, бүгінде кәдеге жарайтын жаңалықтарын көрмеге алып келген. Павильондардың барлығы менмұндалап тұр. АҚШ, Жапония, Чехия, Ресей, Швейцария елдерінің павильоны көрме қонақтарына технология саласындағы болашақта орын алатын жаңалықтар туралы мәлімет беруде. Ал Қытай, Корей, Мысыр, Венесуэла, Венгрия, Тайланд, Катар, Латвия павильонынан сол елдердің салт-дәстүрі, кәсібі туралы біле аласыз.
Сонымен қатар, Вьетнам павильонына келушілер саны өте көп. Вьетнамдықтардың қарапайым тұрмысы, кәсібі көрмеге келушілерді ерекше қызықтырды. Салт-дәстүрімен танысып, павильонның бір бұрышында орналасқан сауда сөресінен тек вьетнамдықтарға тән бас киім, тағы басқа да заттарды сатып алуға болады.
• Халықаралық көрме алғаш рет 1851 жылы Англияның Лондон қаласында, ал соңғы рет 2015 жылы Италияның Милан қаласында өткен.
• 2012 жылы 161 мемлекеттің өкілі дауысқа салу нәтижесінде Халықаралық көрме 2017 жылы Қазақстанның Астана қаласында өтетіні белгілі болды. Онда Астана 103 дауысқа ие болса, Бельгияның Льеж қаласы 44 дауыс жинаған.
• ЭКСПО – 2017 көрмесін 115 мемлекет, 22 халықаралық ұйым қатысуда.
• 2020 жылы өтетін халықаралық көрме БАӘ, Дубай қаласында өтеді деп жоспарланды.
Сингапур павильоны да қызық. Тасыр-тұсыр, тоқ-тоқ еткен дыбысқа құлақ түріп жан-жағыңыздан сол дыбысты іздесеңіз, Сингапур павильонына жақындаңыз. Қабырғаға өрмелей отырғызылған гүлдердің ыдысын кішкентай ғана қара түйме, тетіктер соғып, дыбыс шығарып тұр. Жай дыбыс емес, бұл жүйкені тыныштандырып, шаршауды басатын Сингапур халқының ұлттық әні. Бұл сиқырлы әуенді тыңдап жүріп жоғарғы қабатқа көтерілсеңіз, сізді «Тілек» галереясы қарсы алады. Таза және тұрақты болашақты құруға шақырған бір жапырақ қағазға гүлдердің тұқымын қоса береді. Қағазға тілегіңізді жазып қалдырып, гүлдің дәнін сол жерге егесіз, қалғанын үйіңізге алып қайтасыз. Яғни, Сингапур павильонынан алып қайтқан гүлдің тұқымын өндіріп, баптау арқылы сіз де таза болашаққа және өз тілегіңіздің орындалуына бірінші болып үлес қосасыз. Осыған ұқсас «тілек ағашы» Венгрия павильонында да кездеседі.
Қазақстанның «Нұр Әлемі»
Әлемдегі ең үлкен сфералық ғимарат – «Нұр Әлем» Қазақстанның ұлттық павильоны көздің жауын алады. Құрылысының әр бөлігі ерекше. 8 қабатты ғимараттың бірінші қабатында ұлттық павильон Қазақстанның тарихы мен мәдениетінен сыр шертеді.
«Нұр Әлем» сфералық ғимараттың ең биігінен Астана қаласының бүгінгі кескін-келбетін тамашаласаңыз, сол 8 қабатта орналасқан көрме көрнекілігі Астананың болашағы туралы мәлімет береді. 7-2 қабаттарда Болашақ Энергия мұражайы орналасқан. Олардың қатарында ғарыш, күн, жел, биомасса, су және кинетикалық энергия көздері бар.
«Қай павильонды аралаудан бастасам екен» деп абдырауыңыз әбден мүмкін. 115 мемлекет пен 22 халықаралық ұйымның әрқайсысы ашқан павильондар өзінше қызықты. ЭКСПО – 2017 көрмесіне жолыңыз түссе, «Нұр Әлемді» араламай қайтпайтыныңыз анық. Ал өзіңізді қызықтыратын елдердің тізімін алдын ала жасап алыңыз. Сол тізім бойынша асықпай сүйікті елдеріңіздің сырына қанық бола аласыз.