Шымкент қаласы әкімдігінің ұйытқы болуымен ел аумағында алғаш болып «Малика» кондитерлік фирмасы жергілікті тұрғындарға тегін нан таратты.
Игілікті бастамаға қолдау көрсеткен Қаратау ауданына қарасты Сайрам тұрғын алабының тұрғыны, жеке кәсіпкер Орынбай Урайымжанов өзінің бұл ісін азаматтық парызы деп біледі. Өз кезегінде іскер азамат өңірде кәсібін өркендетіп отырған әріптестерін ҚР Президентінің Қазақстан халқына Жолдауында айтылған нақты міндеттерді орындау мақсатындағы шараларға қолдау көрсетуге шақырды.
Айта кетейік, аталмыш кондитерлік фирмасы жергілікті аз қамтылған отбасылар үшін апта бойы тегін бөлке нан таратпақ. Бүгінде Қаратау ауданында жалпы әлеуметтік жағынан аз қамтылған 1636 адам болса, оның 36-сын кедейлік шегінен төмен тұратын отбасылар құрайды.
Бұл қайырымдылық акциясы алдағы уақытта қаланың өзге де аудандарында жалғасын таппақ.
