Аудан әкімдерінің жергілікті тұрғындарға есеп беруі жалғасуда. Қаратау ауданының әкімі Ғабит Мәуленқұловтың кезекті есеп беруі «Асар» мөлтекауданындағы №89 мектеп-лицейінде өтті. Жиынға Асар, Ақжайық, Қайнарбұлақ, Бозарық, Достық, Қайтпас, Тұран, Азат шағынаудандарының тұрғындары және қала әкімінің бірінші орынбасары Бейсенбек Жанбосынов қатысты.
Аудан әкімі Ғ.Патшаханұлы өз баяндамасында 2016 жылы атқарылған істердің негізгілеріне тоқталып өтті.
– Аудан аумағында есепті кезеңде – 2503 кәсіпкерлік субъектісі тіркелген. Оның: – 3 ірі кәсіпорын;
– 9 орта кәсіпкерлік субъектісі;
– 64 жылыжай;
– 25 жер қойнауын пайдаланушылар;
– 1266 шаруа қожалықтары және 1136 кіші кәсіпкерлік субъектілері жұмыс атқаруда. Осы кәсіпкерлік субъектілерінде Қаратау ауданының 23 148 тұрғыны жұмыспен қамтылған.
Таскен мен Бозарыққа – жаңа мектеп
Аудан бойынша жалпы орта білім беретін 30 мектеп, 2 Назарбаев зияткерлік мектебі мен 1 кешкі мектеп оқушыларға білім беруде. 2016 жылы республикалық бюджеттен Бозарық шағынауданы мен Сайрам тұрғын алабында 1200 орындық және Мирас шағынауданында – 900 орындық, ал, Сайрам тұрғын алабында №91 және №111 мектептерде 300 орындық қосымша құрылыс жүргізіліп, пайдалануға берілді.
Қазіргі таңда аудандағы үш ауысымды білім беретін мектептер санын азайту мақсатында Әкімшілік іскерлік орталығы, Қайнарбұлақ тұрғын алабы және Достық шағынауданынан 1200 орындық мектептің құрылысы мен Ақжайық шағынауданындағы №59 мектеп жанынан 600 орындық қосымша мектеп құрылысы жүргізілуде.
Сондай-ақ, Таскен тұрғын алабында орналасқан №103 мектеп жанынан 600 орындық қосымша құрылыс пен Бозарық саяжайынан 900 орындық мектеп құрылысын салу бойынша құзырлы мекемелерге ұсыныс берілді.
Аудан көлемінде 39 денсаулық сақтау мекемесі орналасқан болса, оның ішінде
– 3 облыстық аурухана,
– 4 емхана,
– 14 дәрігерлік амбулатория,
– 2 фельдшерлік бекет,
– 16 жедел жәрдем бригадалары аудан тұрғындарына сапалы қызмет көрсетіп келеді.
Тұрғындар көзімен
«Үй бетін көрмейтін әкім»
Ғ.Мәуленқұловтың баяндамасынан кейін халық қалаулылары, кәсіпкерлер мен жергілікті тұрғындар жарыссөзге шығып, өз пікірін айтты. Қалалық мәслихаттың депутаты Талғат Әмірбеков аудан әкімінің «күн-түн демей, үй бетін көрмей» атқарып жатқан жұмысына оң бағасын бере отырып, алғысын білдірді. Ал Ақжайық шағынауданының орам басшысы Бақыт Балтабеков:
– «Елбасының «100 нақты қадам» стратегиялық жоспары негізінде «Ақжайық» шағынауданында №59 жалпы орта мектеп пайдаланылуға берілді. Елдімекен 100% электр жарығы және көгілдір отынмен қамтамасыз етілді. 5 көшеге асфальт төселді. Мектептің алдына көптің сұрауымен бағдаршам да орнатылды. Ғабит Патшаханұлы аудан әкімдігіне келген аз уақыттың ішінде көптеген ілкімді істер атқарылды. Енді біздің шағынауданға бір үлкен емхана салып берсеңіздер!», – деді. Дәл осы ауданның ардагерлер кеңесінің төрағасы Оралбай Камалов мешітке барар жолды асфальттап беруді өтінді. Ақсақал: «Өздерің білесіңдер, алда «ЭКСПО-2017» көрмесіне келе жатыр, осы ауданнан белсенді 5-6 қарияны сол келелі шараға апарып, әкелсеңдер!» деп өз бұйымтайын да қоса кетті.
«Асар» шағынауданының тұрғыны Мұнайбек Салимбаев:
– 2015 жылдың тамыз айынан бері Ғабит Мәуленқұловпен қоян-қолтық жұмыс істеп келеміз. «Асарда» қылмыстың алдын алу мақсатында 6 көше жарықтандырылды. Алайда, әлі де атқарылар шаруа шаш етектен. Мысалы, мектептер мен бала-бақшалардың алдына жасанды жол кедергілерін орнату керек. Себебі, бала өмірдің мәні, ертеңгі келешегіміз. Сосын қоғамдық көлік мәселесін шешіп берсеңіз!, – деді асарлық ақсақал. Асарлық тұрғындарды бұлардан бөлек, аялдама және аяқжол, сондай-ақ бағдаршам мәселелері толғандырады.
Қаратау ауданының әкімдігі жергілікті кәсіпкерлерді әлеуметтік жұмыстарға тартып келеді. Мәселен, кәсіпкерлер аудан бойынша 22 көшеге шағал тас төсеп берген. Солардың бірі – «Феруз» ЖШС-і 16 км жерге тас төсеген. Сонымен қатар, аталған мекеме директорының орынбасары Нұрлыбек Жүсіпәлиев, Шапырашты ауылының тұрғындарына бір реттік көмек көрсеткендіктерін айта кетті.
«Қайнарбұлақ» шағынауданының орам басшысы Торғын Аширова елдімекенде атқарылған игі жұмыстарды тізе келе: «7 көшеге шағал тас төселді. Таза ауыз су жүргізілді. Жаңа мектеп салынды. Алайда, осы мектепке барар жолдар тар. Сосын аяқжолдар жоқ. Емхана мен балабақша мәселесінің әбден толғағы жетті», – деді.
Бозарықтық Уәлихан Юсупов жаңадан салынған 1200 орындық №57 жалпы орта мектепке барар жолдың жоқтығын, адамдардың әбден әбігерге түскендігін аудан әкімінің назарына жеткізді. «Асфальт төселеді» дегелі 3 жыл болады. Сол қашан шешімін табады?» деп сұрақты төтесінен қойды.
Ал «Достықта» жарық мәселесі шешімін тапқанымен, қоғамдық көлік және жол өте өзекті мәселе болып отыр.
Қала әкімінің орынбасары Б.Жанбосынов тұрғындардың сауалдарын мұқият тыңдай келе барлық сауалдарға тиянақты жауап беріп өтті.
– 2017 жылы қала аумағы бойынша 27 көше жарықтандырылып, асфальт төселетін болады. Оның басым көпшілігі осы Қаратау ауданына қарайды, – деп нақты қай көшелердің асфальтталатынын тізіп, атап берді. – 42 көшені жарықтандыру үшін жобалық-сметалық құжаттар әзірленуде. Балалардың қауіпсіздігі мақсатында 350 қашықтыққа жасанды жол кедергілері қойылатын болады. 17 бағдаршам обьектісі орналастырылмақ. Көгалдандыру мәселесіне келер болсақ, Төлеметов көшесінің бойы ретке келтірілмек. «Қайнарбұлақ» пен «Бозарықтың» арасындағы бос жатқан сай-сала демалыс аймағына айналады деп жоспарлануда. Емхана мәселесін облыстық денсаулық сақтау басқармасының назарына ұсынамыз, – деді Бейсенбек Керімбекұлы.
