Мүгедектерге қолайлы қызмет көрсетедi
Пятница, 17 Июль 2015 05:32Елбасы Н. Назарбаев халыққа арнаған Жолдауында мүмкіндігі шектеулі адамдар үшін Қазақстан кедергісіз аймаққа айналуға тиіс екендігін айтқан болатын. Осы орайда облысымызда мүмкіндігі шектеулі жандарға арнап Халыққа қызмет көрсету орталығының мамандары өз қызметтерін ұсынуда.
Енді олар үйден шықпастан құжат толтырып, орталық қызметіне жүгіне алады. Ол үшін «1414» бірыңғай байланыс орталығына қоңырау шалулары қажет. Орталықта мүгедектердің компьютерлік сауатын ашып, көрсетілетін қызметті өз ыңғайына қарай пайдалануы үшін «Электронды үкімет порталымен жұмыс істеу» сабақтары өтуде.
– Осылайша олар қажетті қызметтер туралы кеңес алып, өзіне керекті мемлекеттік қызметке тапсырыс бере алады. Осыдан кейін ХҚКО қызметкерлері хабарласып, мемлекеттік көрсетілген қызметті алу үшін қажетті құжаттар тізбесін ұсынады және бару үшін қолайлы уақытты белгілейді. Бұл 72 жұмыс сағаты ішінде жүзеге асырылады, – дейді ХҚКО мониторинг бөлімінің маманы Дәурен Мәуленов.
Еске сала кетсек, облыста І және ІІ топтағы 52 260 мүмкіндігі шектеулі азамат бар. Жыл басынан бері олардың 230-ы мемлекеттік қызметтерді үйлерінен шықпастан пайдаланған. Өтінімдердің басым бөлігі Түркістан, Кентау және Шымкент қалаларынан келіп түсіпті.
Тағы бір атап кетерлігі, ХҚКО-ға келуге мүмкіндігі жоқ зейнеткерлердің туыстары немесе жақындары осы орталыққа өтініш қалдыру арқылы жеңілдетілген қызмет көрсету мүмкіндігіне ие болады.
"Адамдарды қорғау – міндетім"
Пятница, 10 Июль 2015 07:47– дейді бозбаланы құтқарған шымкенттік полицей
Бұл тәртіп сақшысы осы аптаның қаһарманына айналды. ОҚО Ішкі істер департаментінің қызметкері Сапархан Ақбаев Шымкенттегі Бадам өзеніне батып бара жатқан 18 жасар бозбаланы өлімнен құтқарып қалды. Оқиға 7 шілде күні кешкі сағат 18.00 шамасында болған.
Суға батқан бозбала ең алдымен жол патрульдік полиция қызметкері Сапархан Ақбаевтың көзіне шалынған. Полиция сержанты сол сәтте үстіндегі киімімен суға түсіп, тұншыққан адамды сыртқа алып шығыпты.
– «102» телефоны арқылы бізге Бадам өзенінде суға батып бара жатқан адам туралы хабарлама келіп түсті. Бізге көмек сұрап хабарласқан екен. Мен сол маңда қызмет атқарып жүрген болатынмын. Жағаға шыға алмай жатқан жігітті көріп, ойланбастан суға секірдім. Судың екпіні күшті болды. Дегенмен, баланы құтқарып қалдым. Адамдарға көмек қолын созу, жәрдем беру – біздің күнделікті жұмысымыз, азаматтық міндетіміз, – дейді Сапархан Ақбаев.
Полицейлердің белсенді әрекетінің арқасында аман қалған Фарух Ташметов сын сағатта қырағылық танытқан тәртіп сақшыларына үлкен алғысын айтады.
– Мұздай судың әсерінен бе, бірден аяғымның сіңірі тартылып қалды. Аяқ-қолым тырысып, жүзуге шамам келмеді. Судың ортасында 15 минуттай тұншығып қалдым. Бірақ, полицейлер дер кезінде келіп, жағаға алып шықты. Оларға алғысым шексіз, – дейді ол.
Айта кету керек, бозбаланы құтқарып қалған С.Ақбаев Ішкі істер саласында 2012 жылдан бері қызмет атқарып келеді. Әкесі Бегімқұл Ақбаев зейнетке шыққан полиция майоры, көп жылдар бойы Жетісай қаласында учаскелік полиция инспекторы болып жемісті еңбек еткен. Әке жолын қуып, осы салада адал қызмет етіп жүрген Сапархан Ақбаев БАҚ өкілдеріне берген сұхбатында өз жұмысына ерекше жауапкершілікпен қарайтынын және өз мамандығын ерекше жақсы көретінін айтып өтті.
Тұрғындар тілегі – тұрақты назарда
Пятница, 10 Июль 2015 05:45Шағынаудандардағы жұмыстар кестеге сәйкес жүргізілуде
Қала әкімі Дархан Сатыбалды 2015 жылдың 4 ақпанында тұрғындар алдында есеп беру кездесуінде шаһардың инфрақұрылымына қатысты бірқатар түйінді мәселелерді көтерген болатын. Қала әкімі аталған жиында айтылған ұсыныс-ескертулердің барлығы талданатынын, тиісті жоспарлы жұмыстардың қолға алынатынын хабардар еткен еді. Енді сол жоспарға сәйкес, Шымкент қаласын табиғи газбен, ауызсумен және электр жарығымен қамтамасыз ету бойынша қазіргі таңда жұмыстар қарқынды жүргізілуде.
Қайнарбұлақ ауызсудан тапшылық көрмейдi
Қаладағы өзекті мәселелердің бірі – халық жаңадан қоныстанған шағынаудандардың, елді мекендердің инфрақұрылымын дамыту. Шымкент қаласының тұрғын үй коммуналдық-шаруашылық бөлімінің басшысы Мәлік Әбдінұровтың мәлімдеуінше, бүгінде осы бағытта жоспарлы жұмыстар кесте бойынша жүргізіліп жатыр.
Мәселен, Қайнарбұлақ елді мекенін ауызсумен қамтамасыз ету бойынша құрылыс жұмыстары (366,4 шақырым) аяқталып қалды. Ағымдағы жылдың қараша айында мұндағы 47 мың халқы бар елді мекен таза ауызсумен толықтай қамтылмақ. Ауызсу бойынша қараша айында «Нұртас» шағынауданындағы су өткізгіш желілерінің құрылысы (2-кезек) аяқталады. Сондай-ақ, «Қайтпас-2», «Самал-3» шағынаудандарын таза сумен қамтамасыз ету құрылысы қарқынды жүргізілуде. Ал, «Қайтпас-1», «Ұлағат», «Мирас», «Қызылжар» және «Ынтымақ» шағынаудандарының мемсараптама бойынша жобалық-сметалық құны бекітіліп, жұмыстар қолға алынды.
Газ қай шағынаудандарға жеткiзiледi?
Қалалық жерде тұрғындардың тұрмыстық жағдайын жақсартудың басты шарттарының бірі – шағынаудандарды газдандыру екені белгілі. Бұл бағытта да жоспарланған жұмыстар жеткілікті.
Алдағы қазан айының басында «Самал-3» шағынауданын газдандыру жүйелерінің құрылысы бітуі тиіс. Сонымен бірге Шымкенттегі «Қазығұрт» шағынауданын (К.Маркс бөлімшесімен) 1 қыркүйекке дейін газбен қамтамасыз ету көзделіп отыр.
Сол сияқты Шымкент қаласындағы «Қайтпас-2» шағынауданын газ жүйелерімен қамтамасыз ету мәселесі де шешілді. Мұнда құрылыс жұмыстары (49,2 шақырым) 2013 жылы басталған болатын. Аталған шағынауданға көгілдір отын 1 қазаннан қалмай жеткізілуі тиіс. Жоспар бойынша «Самал-2» шағынауданындағы газ құбырын тарту жұмыстары (174,1 шақырым) қараша айының соңында аяқталмақ. «Құрсай» (21,1 шақырым) «Мирас» (39,8 шақырым) шағынаудандары мен Тассай елді мекенін (44,1 шақырым) газбен қамтамасыз ету бойынша жұмыстар атқарылуда.
Электр жүйелерi де шешiмiн табады
Әлеуметтік маңызы бар жобаға бюджет қаржысын бөлу үшін алдымен тиісті жобалық-сметалық жұмыстары жасалуы тиіс. Бұл орайда Шымкент қаласын электр жүйелерімен толық қамтамасыз ету бойынша біршама талап-тілектер талқыланып, жобалау жұмыстары жүргізілді.
Мысалы, «Қайнарбұлақ» шағынауданында 10/0,4 кВ электр қуатымен қамтамасыз ету жобасы бар. Құрылысы 2014 жылдың наурызында басталған бұл жоба 2016 жылы ақталады деп жоспарлануда. Сондай-ақ, Шымкентте 220/110/10 кВ болатын «Бозарық» қосалқы стансасының 220 кВ желісінің құрылысы да қарқынды жүруде. Бұл жобаның іске қосылатын мерзімі – 2016 жыл. Атап өтерлігі, жоғарыдағы жұмыстардың бәрі де кесте бойынша атқарылуда.
Шымкент қаласын жылу жүйелерімен қамтамасыз ету бойынша да жұмыстар нәтижесіз емес. Атап айтар болсақ, Шымкент қаласының Оңтүстік бөлігінде орналасқан ішкі орамдық жылу жүйесін (17,2 шақырым) ағымдағы жөндеу жұмыстары жоғары деңгейде жүзеге асуда. Кестеге сәйкес, бұл бағыттағы жұмыстардың аяқталуы ағымдағы жылдың 1 қыркүйегіне жоспарланған.
Шымкентте 8 шақырымдық балалар темір жолы іске қосылды
Понедельник, 01 Июнь 2015 10:45
Бүгін Шымкентте балаларды қорғау күніне орай Қажымұқан стансасынан Дендросаябақ аралығына дейін жүріп өтетін «Тұлпар» балалар темір жолы локомотиві ашылды. Бұл туралы Шымкент қаласы әкімінің баспасөз қызметі хабарлады.Шымкентте «Біз соққан достық үй» мультфильмінің тұсаукесері өтті
Понедельник, 01 Июнь 2015 08:47
Ұзақтығы 10 минуттық бұл туынды Қазақстан халқы Ассамблеясының 20 жылдығына орай түсірілген. Аталған анимациялық мультфильмді бүгін «Оңтүстік ақпарат» баспасөз орталығында облыстық ішкі саясат және дін істері басқармасының басшысы Берік Құрманғали, «Жебе» кинокомпаниясының президенті Керімбек Ниязбаев және облыс әкімі аппараты басшысының орынбасары-Ассамблея хатшылығының меңгерушісі М.Қалмұратов таныстырды.‒ Отандық туынды халықаралық балаларды қорғау күніне орай жарыққа шығып, жергілікті телеарналардын көрсетілетін болады. Жаңа туынды «Балапан» және «Қазақстан» ұлттық телеарнасы, сондай-ақ өңірдегі барлық телеарналар арқылы жас бүлдіршіндерге ұсынылмақ. Бірлік байрағын ту еткен елімізде жасөспірімдерді ұйымшылдыққа шақыратын бұл мультфильм балаларды Отанды сүюге, адамгершілік пен бауырмалдылыққа жетелейді, ‒ деді Б.Құрманғали.
Анимациялық фильмде Қазақстандағы ұлттар бiрлiгi мен ынтымақтастығы көрсетіліп, жастар арасындағы достық қарым-қатынас, елiне, жерiне деген сүйіспеншілік балалардың соққан ортақ «достық үйі» арқылы білдіріледі.‒ Балаларға арналған бұл мультфильмде кейіпкер ретінде қазақ қызы Айсұлу мен орыс қызы Марина, неміс баласы Герман, түрік қызы Ләйлә, украин баласы Микола мен тағы басқа балалар ойнайды.
Анимациялық мультфильмді алғаш қолға алып тапсырыс берген осы Оңтүстік Қазақстан облысы болатын, ‒ деді Керімбек Ниязбаев.
Аталған туындының сценарийінің авторы және қоюшы режиссері К.Ниязбаев болса, өлеңге сөзін жазған Сарсенкүл Айтова, композиторы Дмитрий Андронов, қоюшы суретші Сәбит Серімбетов. Жалпы, бұл мультфильмге бюджеттен 5 миллион теңге қаражат жұмсалған.‒ Жасөспірімдерді игі қасиеттерге жетелейтін ұзақтығы 10 минуттық бұл туында кішкентай көрермендердің көңілінен шығады деген сенімдеміз, – дейді Ассамблея хатшылығының меңгерушісі М.Қалмұратов.
Шымкентте “Шанышқылы Бердіқожа батыр: тың зерттеулер мен тұжырымдамалар” атты ғылыми-практикалық конференция өтті
Пятница, 29 Май 2015 05:28Елбасы Н.Назарбаевтың Қазақ хандығының 550 жылдығын дәстүрге сай атап өту туралы бастамасы еліміздің барлық азаматтарына үлкен жауапкершілік жүктегені анық. Осы орайда Шымкентте “Шанышқылы Бердіқожа батыр: тың зерттеулер мен тұжырымдамалар” атты ғылыми-практикалық конференция өтті. Жиынға Парламент мәжілісінің депутаттары, тарихшы-ғалымдар және журналист-жазушылар қатысты.
Жеке басынан жалпақ жұрттың, атаның намысынан жалпы ұлттың, от басынан байтақ Отанның мүддесін жоғары қоя білген, сол жолда басын бәйгеге тіккен қолбасшылардың бірі – Шанышқылы Бердіқожа батыр (1708-1786). Қазақ халқының жоңғар шапқыншылығына қарсы жүргізген майданда қолбасшылар арасында Бердіқожа батырдың айрықша аталуының терең мәні бар. Тарихи мәліметтерге сүйенсек, Бердіқожаның ержүрек қолбасшы және қабілетті елші болғанын аңғарамыз.
Әйгілі МәшҺүр-Жүсіп “Абылай заманындағы ең атақты, сенімді батырлардың бірі болған” деп сипаттаған Шанышқылы Бердіқожа батыр – жоңғарларға қарсы Ұлы жүздің қолын бастаған батырлардың бірі. Ол Қабанбай батырмен қанаттаса жүріп Ұлытау өңіріндегі Бұланты, Білеуті мен Сарысу бойындағы Итішпес, Алакөл маңындағы Аңырақай шайқасында, Алтайдағы Ұлансу, Мамырсу, Шар, Шорға шайқастарында Ұлы жүз жасақтарын басқарған. Бердіқожа батыр тек көзсіз батыр ғана емес, сонымен бірге Төле биден кейінгі үлкен саяси қайраткер, ұлы қолбасшы мәртебесінде құрметтелген. Мәселен, Абылай хан Бердіқожа батырсыз Хан кеңесін өткізбеген, жорыққа да шықпаған. Жоңғарларға тойтарыс берілгеннен кейін жаужүрек батыр Ресей және Қытай басшыларымен мәмілеге жүрген.
Конференцияда Халықаралық Түркі академиясының президенті Дархан Қыдырәлі, белгілі ақын Несіпбек Айтұлы және зерттеуші ғалым Бақтыбай Қасымбеков баяндама жасап, әйгілі батыр жайында тың деректерімен бөлісті.
– Бердіқожа батырдың өшпес ерліктері мен өмір жолын өскелең ұрпаққа үлгі етіп, оларды отансүйгіштік рухта тәрбиелеу мақсатында көптеген жұмыстар атқарылды. Атап айтқанда, «Шанышқылы Бердіқожа батыр» атты кітап жарық көрді. Сондай-ақ, батыр бейнесін қайта қалпына келтіру жұмыстары жүргізіліп, қайта жерлеу рәсімі өткізілді, – деді Дархан Қыдырәлі. Тағы бір атап өтерлігі, бүгінгі таңда айтулы батыр туралы деректі фильмдер түсірілді. Танымал ақын Н. Айтұлының «Бердіқожа батыр» поэмасы елге жарияланып, оның аудио нұсқасы дайындалды. Батыр кесенесінің жобасы дайындалып, арнайы веб-сайт (www.berdeke.kz) пен қоғамдық қор ашылған.
Тарихшылардың айтуынша, даңқты батыр қартайса да қайратын көрсетіп, ат үстінде ерлікпен қаза болады. Аласапыран заманда халқына қорған болған Бердіқожа батырды елі арулап жерлеп, ардақтап күмбез тұрғызады. Қарқаралы жерінде, Көкшетау мен Дуана таулары арасында, Дағанделі өзенінің биік бір белесінде сәулетті мазары бой көтерген.
Айта кетейік, Бердіқожа батыр есімі Қ.Жұмаділов, М.Мағауин, А.Сейдімбек сынды жазушы-зерттеушілердің мақалаларында жан-жақты баяндалған.
Шымкенттік мектеп оқушылары арасында дәстүрлі спартакиада өтті
Пятница, 22 Май 2015 07:30Шымкент қаласында мектеп оқушылары арасында спорттық сайыстан дәстүрлі спартакиада аяқталды. 2014-2015 жылғы оқу жылында ұйымдастырылған спартакиада спорттың 11 түрінен өткізілді.
Жеңімпаздар мен жүлдегерлерді марапаттау рәсімі қаламыздағы №87 орта мектебінің спорт алаңшасында өтті. Қалалық білім бөлімінің қолдауымен ұйымдастырылған спорттық шараға шаһардағы жалпы білім беретін 125 мектептің оқушылары қатысты. Спорттық додада 1-11 сынып аралығындағы барша оқушылар бақ сынады.
Олар спорттың футбол, волейбол, баскетбол, үстел теннисі, тоғызқұмалақ, дойбы, шахмат, президенттік тест, гандбол және жеңіл атлетика түрлері бойынша жарысқа қатысып, жеңімпаздар мен жүлдегерлерді анықтады.
Сайыс қорытындысы бойынша жалпыкомандалық есепте №41 А. Макаренко атындағы мектеп-лицейінің командасы жеңімпаз атанып, 1 орынды жеңіп алды. Жүлделі 2 орынға №66 Қазығұрт атындағы жалпы орта мектебінің командасы лайық болса, №42 Хамза атындағы жалпы орта мектебінің командасы жүлделі 3 орыннан көрінді.
Жеңімпаздар мен жүлдегерлерге арнайы кубоктар, бағалы сыйлықтар мен Құрмет грамоталары табыс етілді.
Қала әкімінің кубогы сарапқа салынды
Пятница, 15 Май 2015 02:28Жеңіс күнінде қаламыздағы жеңілатлетикалық спорт кешенінде бокстан «Шымкент қаласы әкімінің кубогы» жүлдесіне арналған халықаралық турнирдің жеңімпаздары анықталды. 1997-1998 жылы туған жас боксшылар арасындағы жарысты Шымкент қалалық №5 бокс мектебі мен облыстық бокс федерациясы бірлесе ұйымдастырды.
Осымен 6-шы рет жалауын көтерген бокс додасына Ресей, Қазақстан, Қырғызстан, Өзбекстан, Түрікменстан, Тәжікстан, Армения және Моңғолия елдерінің ең үздік боксшылары қатысты. Турнирдің ресми ашылу салтанатында Шымкент қаласының әкімі Дархан Сатыбалды, «Нұр Отан» партиясы Шымкент қалалық филиалының төрағасы Өмірзақ Мелдеханов, спорт ардагері Ақжол Асқаров құттықтау сөз сөйлеп, елде бокстың дамуына барлық жағдай жасалынып жатқанын айтты.
Бес күнге созылған тартысты сайыста Алматы қаласының командасы жарқырай көрінді. Олардың еншісінде – үш алтын. Ал, шымкенттік боксшылар екі алтынға иелік етіп, екінші сатыға орнықты. Қарағанды, Жамбыл, Алматы, Қызылорда облысы, сонымен қоса өзбек елінен келген боксшылар да бір-бір алтын медалға иелік етті. Жарыста 49 келіде сынға түскен жерлесіміз Сәкен Бибосынов турнирдің ең үздік боксшысы болып танылды.
Атап өтерлігі, биылғы бәсекеде Бейжің ойындарының қола жүлдегері, бүгінде кәсіпқой бокста атой салып жүрген қандасымыз Қанат Ислам да турнирге қонақ ретінде қатысты. Қала басшысы даңқты боксшыға сый-құрмет көрсетіп, шапан кигізді. Шымкентке арнайы келген Қанат Сіләмұлына жанкүйерлердің де ыстық ықыласы ерекше болды.