350 шақырым жол жаңарады

Пятница, 15 Июль 2022 05:31

zhol

Ақпараттық-коммуникациялық орталықта Шымкент қалалық жолаушылар көлігі және автомобиль жолдары басқармасының басшысы Ержан Жолдасов брифинг беріп, саладағы жұмыстарға тоқталып өтті.

Баяндамада Ержан Жақсылықұлы биыл 350 шақырым жолды жөндеу жоспарланып жатқанын жеткізді. Оның 67 шақырымы жол құрылысы мен қайта құру жұмыстарына тиесілі. Оған қаладағы 2 жолайрық, Оңтүстік, Шығыс айналма жолдары және А2 айналма жолының құрылысы кіреді.

Спикер өз сөзінде биыл тамыздың соңына дейін қаладағы барлық жолдың орташа және күрделі жөндеу жұмыстары аяқталатынын атап өтті. Ал, жол құрылыстары келесі жылға өтпелі. Ол жоғарыда айтылған айналма жолдар мен жолайрық құрылысы.

– Алдағы уақытта 178 аялдама қою жоспарда бар. Қалада 444 аялдама жетіспейді. Жоспар бойынша 2025 жылға дейін аялдамасы бар көшелер санын 80 пайыздан асыруымыз керек. 65 аялдамаға демонтаж жасалып, басқа орындарға қойылады. Сонымен бірге, Бәйдібек би даңғылы мен Арғынбеков көшесінің қиылысындағы жолайрықта құрылыс жұмыстары қарқынды. Үш деңгейлі жолайрық құрылысы қаланың көлік қозғалысын реттеудің кешенді жоспарына сәйкес жүзеге асып жатыр. Нәтижесінде аталған көшелерден өтетін көлік сыйымдылығы екі есеге артпақ. Жолайрық құрылысы Бәйдібек би даңғылының 700 метр, Арғынбеков көшесінің 921 метр аумағын алып жатыр. Жоба бойынша ені 80 метр төрт-алты жолақты автомагистраль салынып, жол жиегіне жаяу жүргіншілер және веложол төселмек. Қазіргі уақытта аталмыш құрылыс нысанында Арғынбеков көшесі бойымен тіреу қабырғалары, ал Бәйдібек би даңғылында көпір өткелі конструкциялары орнатылуда, - деді Ержан Жақсылықұлы.

Ә.НҰРЖІГІТҰЛЫ

barys-kelis

Шымкент қаласының әкімі Мұрат Әйтенов Еуропа қайта құру және даму банкінің Орталық Азия бойынша басқарушы директоры Харгитай Жужаннамен кездесті.

Кездесуде Қазақстан Республикасының жасыл экономикаға көшу шеңберінде Шымкент қаласын дамыту, Қазақстанның «Жасыл қалалар» бағдарламасын енгізу және дамыту арқылы 2060 жылға қарай Париж келісімінің мақсаттарына және көміртегі бейтараптығына қол жеткізуі, ЕҚДБ-ның Қазақстандағы энергетика, көлік және коммуналдық инфрақұрылым және жасыл экономика саласындағы көрсеткіштері жайлы сөз қозғалды. Сондай-ақ, Шымкент қаласы мен ЕҚДБ арасындағы ынтымақтастықтың одан әрі басымдықтары талқыланды.

ЕҚДБ тарапынан Шымкент қаласында шағын және орта бизнес өкілдеріне қолдау білдіру жұмыстарының жалғасы табылатындығы жеткізілді.

Кездесу барысында қала әкімі ынтымақтастықты нығайтуға ниетті ЕҚДБ өкілдеріне алғысын білдіріп, тараптар өзара ынтымақтастық туралы меморандумға қол қойды.

Шымкент қаласы 2022 жылдың 5 ақпаннан бастап «Жасыл» аймаққа енген болатын. Дегенмен, соңғы онкүндікте коронавирусты инфекциямен шалдығу көрсеткіші артып отыр. Ағымдағы жылдың 14 шілдесінде COVID-19 инфекциясымен 103 жағдай тіркелді. Ауырғандардың көбі – ересектер. 18 жасқа дейінгі балалар арасында 25 жағдай анықталған.

Соңғы аптада алдыңғы аптамен салыстырғанда COVID-19 жағдайы 3,4 есе жоғары тіркелді.

Аурушаңдықтың тіркелуі жазғы кезеңде шет елге демалысқа барып келу, шет ел азаматтарының миграциялануы және көп шоғырлануға байланысты.

Коронавирусты инфекциямен ауырғандар профилактикалық тексеру кезінде және науқастар өз бетімен медициналық көмекке жүгінгенде анықталуда. Коронавирусты инфекцияның симптомды түрімен ауырғандар емдеу хаттамасына сәйкес ем алады, ал симптомсыз түрімен ауырғандар 10 күн медициналық бақылауда болады.

Еліміздегі статистикалық мәліметтерден коронавирусты инфекцияның қайта күш алғаны байқалады.

Шымкент қаласының санитариялық-эпидемиологиялық бақылау қызметінің мамандарымен ошақтарда эпидемиологиялық зерделеу жұмыстары жүргізіліп, аурудың алдын алу бойынша іс-шаралар және санитариялық-ағарту жұмыстары жүргізілуде. Науқастармен қарым-қатынаста болған адамдар анықталып, медициналық бақылауға алынуда.

Алайда, қала тұрғындарын мүмкіндігінше адам көп шоғырланған жерлерге бармауға, қоғамдық орындарда бетперде тағып, әлеуметтік арақашықтықты сақтауға шақыра отырып, сақтық шараларын барынша күшейту қажеттігін ЕСКЕРТЕМІЗ.

Егер, өзіңізді жайсыз сезінсеңіз немесе науқастанып қалған жағдайда, аурудың таралуын болдырмау үшін көпшілік орындарға бармай, үйде қалып, дәрігерді үйге шақыру керек.

Осы орайда, індеттің алдын алудың ең тиімді жолы вакцинация екендігін атап өту керек. Дер кезінде алынған вакцина – дерттің таралып кетпеуіне бірден-бір себеп. Алайда, белгілі бір уақыт өткеннен кейін екпенің күші әлсірей бастайды, сондықтан уақтылы қайта екпе алу маңызды.

Шымкент қаласында вакцинациялау, ревакцинациялау және қайта ревакцинациялау Қазақстанда қолдануға рұқсат етілген «QazVac», «Vero Cell», «Комирнати» (Phizer, АҚШ) вакциналарымен жүргізілуде. «Комирнати» (Phizer, АҚШ) вакцинасы 12-18 жас аралығындағы жасөспірімдерге, жүкті әйелдерге (жүктіліктің 16 аптасынан бастап 37 аптасына дейін) және лактация кезеңіндегі әйелдерге (босанғаннан 42 күннен кейін бала 2 жасқа толғанға дейін) жүргізіледі.

Вакцинациялау егуді жүргізуге алдын ала ақпараттандырылған жазбаша келісіммен, ерікті түрде және тегін жүргізіледі.

Қаладағы егу пунктерінде вакциналардың сақталуы, тасымалдануы, қолданылуы «Суықтық тізбегін» сақтай отырып санитариялық талаптарға сай жүргізілуде. Егуді арнайы оқытылып, рұқсат алған медициналық қызметкерлер жүргізеді.

Шымкент қаласында өткен тәулікте 102 адам екпе алды. Егу науқаны басталғалы барлығы 603309 адам вакцинацияланған. 354606 адам ревакцинациядан өтті.

Екпе алып, індеттен аман қалу мүмкіндігі әр адамда бар. Өзіңіздің және жақындарыңыздың денсаулығын қорғау үшін вакцинация алу қажет!

Шымкент қаласының
санитариялық-эпидемиологиялық
бақылау департаменті

samandar

Қаңтар оқиғасы. Ұлттық ұлан 6506 әскери бөлімінің жауынгерлері мен полиция қызметкерлері 5 қаңтарда Шымкент қаласы әкімдігінің алдында қауіпсіздікті қамтамасыз етіп тұрады. Қатардағы жауынгер Самандар Ташкенбаев өз өміріне төнген қауіпті түсінсе де, бульдозер көлігімен ғимаратқа қарай беттеген тәртіп бұзушының жолын бөгейді. Салдарынан Самандар ауыр жарақат алып, жедел түрде ауруханаға жеткізілген.

Еліміздің ішкі тыныштығының қалқаны – Ұлттық ұлан жауынгерлері ел басына күн туған қиын кезеңде жауынгерлік қызметке сәйкес әрекет етті. Шымкент қаласында орналасқан 6506 әскери бөлімінің жауынгерлері қарапайым халықтың қауіпсіздігін қамтамасыз ету мақсатында қақтығыс орнының алдыңғы қатарында тұрды. Тәртіпсіздік аяқталған соң, қатардағы жауынгер Самандар Бахтиярұлының ерлігі еленіп, ҚР Ішкі істер министрінің орынбасары – Ұлттық ұланның Бас қолбасшысының бұйрығымен «Ұлттық ұлан қызметінің үздігі» кеуде белгісімен марапатталған-ды.

«Еліңді сүйсең, ерлік істейсің» деген халық даналығы бекер айтылмаса керек. Самандар қиын кезеңде нағыз Ұлттық ұлан жауынгеріне тән батылдық, ерлік танытып, оң шешім қабылдау арқылы қаншама адамды өміріне төнген қауіптен сақтап қалды. Жуырда 6506 әскери бөлімінің жауынгері Самандар Ташкенбаевтың ерлігі бағаланып, ҚР Президенті Қ.Тоқаевтың Жарлығымен «ІІІ дәрежелі Айбын» орденімен марапатталды.

Батыр ұл 2000 жылдың 8 қазанында Шымкент қаласы Қаратау ауданы Қызыл су ауылында дүниеге келген. Әкесі Базарбаев Бахтияр Ташкенбайұлы ауыл шаруашылығымен айналысса, анасы Базарбаева Шоира Пардабекқызы — «Мейір» ардагерлер үйінде медицина қызметкері. Самандар тірлігі мен ынтымағы жарасқан кішкентай ғана отбасындағы 3 перзенттің екіншісі. Тіл алғыш, еңбекке ебі бар ол бала күнінен ата-анасының қолқанаты. Ол Шымкент қаласындағы индустриялды-техникалық колледжінің түлегі. Ер азаматтың парызы Отан қорғау екенін үнемі санасына сіңіріп өскен Самандар әскери борышын Алматы қаласындағы 2458 әскери бөлімінде өтейді. Әскери борышын атқарып келген соң, салмақты шешім қабылдап, әскери қызметке орналасуға кіріседі. Ұлттық ұланның тыныс-тіршілігімен танысқан соң, барлық сынақтардан мүдірмей өтіп, 6506 әскери бөлімі жедел мақсаттағы батальоны 8 ротасының бөлімше командирі болып қызметке тағайындалған. Бүгінде жары Муслима екеуі үлгілі шаңырақ иелері.

Қатардағы жауынгер Самандар Ташкенбаевтың қайсарлығы мен батылдығы Ұлттық ұлан жауынгерлеріне ғана емес, өскелең буынға үлгі-өнеге.

М. ШЫНЖІГІТОВА,
6506 әскери бөлімінің лейтенанты

Сыйға толы 88-ші маусым

Среда, 13 Июль 2022 10:57

Ж.Шанин атындағы академиялық драма театры кезекті 88-ші маусымын сүбелі жеңісімен, жаңа қойылымдарымен жапты. «Сексеннің сеңгірін игеріп жатқан театрдың кезекті маусымы несімен есте қалды?» деген заңды сұрақ туындайтыны анық.

teatr 1

Сөзіміздің әлқиссасын театрымызға көркемдік жетекші болып Қазақстанның еңбек сіңірген қайраткері Бекболат Құрманғожаевтың тағайындалғанынан бастаған жөн болар.

«Білмейтін жердің – бұралаңы мол» демекші, шығармашылық тізгінді қолға алмас бұрын Б.Құрманғожаев Шекспирдің «Гамлеті» мен М.Әуезовтің «Қарагөзін» сахналаған-ды. Актерлік жетістігі мол өнер жолы режиссурамен біте қайнасып әрі шәкірт тәрбиелеген өнер тарланының алғашқы маусымы шығармашылықпен танысу кезеңі болды.

Көрермен көңіліне биік сахнадан жол табатын әртістің жанын жадырататын, шабыт беретін серпіліс болмаса, жабыға айналады. Актер әрдайым суытылған тұлпардай бабында болуы үшін республикалық, халықаралық деңгейдегі түрлі театр фестивальдерінде додаға түскені абзал.

Театр ұжымы ҚР Тәуелсіздігінің 30 жылдығына орай ұйымдастырылған ҚР Еңбек сіңірген өнер қайраткері Әшірбек Сығай атындағы «Сын шын болсын» атты республикалық театр фестиваліне Шекспир шығармаларының желісі бойынша қойылған «QORA Z» трагикомедиясымен қатысты. Осылайша 88 маусым қоғам қайшылықтарын театрдың көркем тілімен жеткізетін, ортаға ой тастайтын қойылымның жүлделі ІІ орынды қанжығаға байлауымен басталды.

Өзге өлкенің сахнасында өз шеберлігін сынау – актерге таптырмайтын тәжірбие алаңы іспеттес. Көктемнің алғашқы айында көрші жатқан Қызылордадағы Н.Бекежанов атындағы қазақ академиялық музыкалық драма театрында С.Жүнісовтің «Жаралы гүлдер» драмасымен гастрольдік сапардың шымылдығын түрдік. Сапарды «QORA Z» трагикомедиясымен жалғастырып, жергілікті автор М.Байғұттың «Жоғалған Жұрнақ» драмасымен қорытындылап, Сыр бойы көрермендерін сүбелі қойылымдарымызбен сусындатып қайттық.

Бүгінгідей талғамы биік, таңдауы мол көрерменді театрдан алыстатып алмау үшін талабын тояттандыратындай қойылымдар таңдап, сахналап отыру – театрдың басты стратегиялық ұстанымы. Әр қойылымнан ой сүзіп кететіндей деңгейде болуы үшін күллі ұжым жұмыла еңбек етіп, тер төгеді.

teatr 2

Сахнадан көрерменге жететін әр қойылымның өз айтары бар. Солай болуы тиіс. Мәселен, ақпан айында премьерасы өткен Жан Ануй мен Хайнер Мюллердің (аударған Өтен Ахмет) Медея/Филоктет трагедиясы әлемдік драматургияның мәңгілік өзегі: Абыл мен Қабылдан бастау алған сатқындықтың сан қырының түп-тамыры «билікке талас» тақырыбы бүгінгі қоғаммен жымдасып жатқандай әсер туғызады. Спектакльдің қоюшы режиссері – Ш.Айтматов атындағы Халықаралық сыйлықтың лауреаты Қуандық Қасымов, қоюшы суретші – ҚР Мәдениет қайраткері Қалтөре Жұмақұлов.

Уақыт жаңарғанымен – өткен қақтығыстар жаңғырып, жаңарып отыратын жаһандану кезеңі отқа оранған соғыстарымен, жалт беретін сатқындығымен өз дәлелін көрсетіп жатқаны да шындық. Адам адамға жау болған, қауіп-қатерлі, жұртты үрей билеген, қанды шайқастардан ел көзін бір ашпаған көне грек қоғамындағы кейіпкері Медеяның махаббаты жолында әкесін, бауырын, отанын сатып, күні кеше күйеуі болған Язонның опасыздығына күңірене отырып жан түршігерлік қылығын ақтағысы кеп жанталасқаны мәңгілік тақырып - сатқындық, махаббат, опасыздық, кек қайтару сезімдерімен өріліп отыратын трагедияның ой салғанын қойылым соңынан айтылған көрермен пікірінен таразыладық.

Отбасы – театрдың қалт жібермей қадағалап отыратын тақырыбы. Соңғы кезде әлеуметтік желілерде «Анаңызға жақсы көретініңізді қашан айттыңыз?» деген қоғамдық сауалнама жүргізілгенде, басым көбі ол жайында ойланбағанын айтты. Иә, ата-анамыз барында отбасы құндылығына жүре қарап, ешқашан ешқайда кетпейтіндей, ештеңе өзгермейтіндей қабылдап, мән бермейтініміз рас.

Сәуір айында премьерасы өткен Х.Хурсандовтың «Өлдік те, құрметті болдық» комедиясы (қоюшы режиссері Б.Құрманғожаев, қоюшы суретшісі Қ.Жұмақұлов) жанры көңілді комедия болғанымен, бүгінгі қоғамдағы басты мәселе: күнделікті тіршіліктің ағымында жүріп, ата-анасымен жиі кездесуге мұршасы жоқ перзенттердің қылығын көрсете отырып, «қанша жерден жұмысбасты болсаң да, ата-ананың қадірін көзі тірісінде біл» деген ойды көрермен таразысына тастайды.

Театр қоғамда індеп жатқан мәселеден тыс қалмай, үн қосатын жанды ағза десек болғандай. Шанин театры жергілікті әкімшілікпен тығыз байланыста болып, қала руханиятының өркендеуіне өз үлесін аямай қосып келе жатқанына дәлел – қалалық дін істері басқармасы ұсынған Б.Айдарбековтің «Құрық» әлеуметтік драмасын \қоюшы режиссері - Алмас Шымалиев, қоюшы суретшісі - Батырбек Қабылбеков\ сахналады.

Соңғы жылдары еліміздегі театрлардың шығармашылығын сараптап отыратын Халықаралық театр сыншылары бірлестігінің «Қазақстан театрлары – 2021» мониторингі нәтижесінде Ж.Шанин атындағы Шымкент қалалық академиялық қазақ драма театры жүлделі екі номинациямен марапатталды. «Эпизодтық рольдегі жыл актрисасы» номинациясымен театр актрисасы Нұржамал Қаламбаева, «Жылдың жаңа есімі» номинациясы бойынша театрдың «QORA Z» спектаклі үшін Әлібек Өмірбекұлы сыншылар жүлдесімен марапатталғаны – шаниндіктер үшін үлкен жеңіс!

Өнері бағаланған әртістің шығармашылық көгіне қанат байлап ұшатыны айтпаса да түсінікті болар. Шанин театрының артистері де биылғы жылы марапаттан шет қалмады.

Қазақстан театр қайраткерлері Одағы «ДАРА» төсбелгісімен актриса Раушан Салова, «Қазақстан Тәуел-сіздігіне 30 жыл» мерекелік медалін актриса Бақыткүл Қожамұратова, дыбыс беру цехының меңгерушісі Рашид Оразбақов, «ҚР Мәдениет саласының үздігі» төсбелгісімен театр режиссері Жұмабек Есімов, актриса Бақыткүл Қожамұратова, Қазақстан салалық мәдениет, спорт, туризм және ақпарат қызметкерлерінің кәсіптік одағы бірлестігінің «Құрмет грамотасымен» театр актері Дүйсебек Аралбаев марапатталды.

М.Байғұттың «Жоғалған Жұрнақ» драмасымен 88-маусымды қорытындылаған Ж.Шанин атындағы Шымкент қалалық академиялық қазақ драма театры ұжымы келер маусымда да сүбелі қойылымдарымен көрерменін қуантпаққа белді бекем буып, кезекті демалысына кетті.

 

Сая ҚАСЫМБЕК,Ж.Шанин атындағы академиялық 
қазақ драма театры әдебиет бөлімінің меңгерушісі, драматург

saktandyru

Медициналық әлеуметтік сақтандыру жүйесі елімізде қолданысқа енгізілгеннен бері тұрғындар жоғары сапалы қызметтің қолжетімділігін сезініп келеді. Бұл ретте сақтандырылған мәртебесі бар азаматтарға көрсетілетін қызметтер түріне тоқтала кетсек.

Емханалық-амбулаторлық көмек аясында (әлеуметтік мәні бар аурулар мен өкілетті орган тарапынан бекітілген тізімдегі айналасына қауіп төндіретін сырқаттарға шалдыққандарға көрсетілетін медициналық көмекті қоспағанда) алғашқы медициналық-санитарлық көмекке; алғашқы медициналық-санитарлық көмек маманының және салалық мамандардың жолдамасы бойынша консультациялық-диагностикалық көмекке қол жеткізе алады.

Сонымен қатар:

- амбулаторлық деңгейде дәрігердің рецептісі бойынша дәрі-дәрмекпен қамтамасыз ету;

- стационарлық көмек (әлеуметтік мәні бар аурулар мен өкілетті орган тарапынан бекітілген тізімдегі айналасына қауіп төндіретін сырқаттарға шалдыққандарға көрсетілетін медициналық көмекті қоспағанда):

- алғашқы медициналық-санитарлық көмек маманының немесе өзге медицина ұйымының жолдамасы бойынша – стационарды алмастыратын көмек (әлеуметтік мәні бар аурулар мен өкілетті орган бекіткен тізімдегі айналасына қауіп төндіретін сырқаттарға шалдыққандарға көрсетілетін медициналық көмекті қоспағанда).

НЕ ӨЗГЕРІССІЗ ҚАЛАДЫ?

Мемлекет тегін медициналық көмектің мынадай түрлеріне кепілдік береді:

1) жедел медициналық жәрдем және санитарлық авиация;

2) әлеуметтік мәні бар аурулар мен өкілетті орган тарапынан бекітілген тізімдегі айналасына қауіп төндіретін сырқаттарға шалдыққандарға, сондай-ақ, Қазақстан республикасының «Міндетті әлеуметтік медициналық сақтандыру туралы» Заңы бойынша МӘМС жүйесінде медициналық көмек алуға құқығы жоқ тұлғаларға көрсетілетін емханалық-амбулаторлық көмек.

Оған мыналар кіреді:

• алғашқы медициналық-санитарлық көмек;

• алғашқы медициналық-санитарлық көмек маманының және салалық дәрігердің жолдамасы бойынша көрсетілетін консультациялық-диагностикалық көмек;

3) стационарлық көмек:

4) алғашқы медициналық-санитарлық көмек маманының немесе өзге медициналық ұйымның жолдамасы бойынша, әлеуметтік мәні бар аурулар мен өкілетті орган тарапынан бекітілген тізімдегі айналасына қауіп төндіретін сырқаттар кезінде стационарды алмастыратын көмек;

5) профилактикалық екпелер.

С. Құралбек,
«Әлеуметтік медициналық сақтандыру қоры»
Шымкент қаласы бойынша филиалының директоры,

А. Қылышбаева,
Шымкент қалалық №6 емхананың бас дәрігері

jarna

2022 жылы жеңілдік санатындағы бір адамға мемлекет ай сайын 3 621 теңге жарна төлейді. Сонымен, МӘМС-ке жарна төлеуден кімдер босатылған және жеңілдікке ие 15 санаттың қатарына кіру үшін қайда жүгіну керек? Осы және өзге де сұрақтарға жауап берсек.

Міндетті әлеуметтік медициналық сақтандыруға жарналар мен аударымдар Ұлттық банктің арнайы шотына түседі. Сол себепті олар «сақтандырылған» мәртебесіне ие және МӘМС тізіміне кіретін медициналық қызметтердің барлық спектрін ала алады.

Мемлекет есебінен МӘМС жарналары келесі тұлғалар үшін төленеді:

1) 18 жасқа дейінгі балалар. Балаға туу туралы куәлігі табысталған яғни жеке сәйкестендіру нөмірі (ЖСН) берілген уақыттан бастап «сақтандырылған» болып саналады.

2) Жұмыссыз ретінде ресми тіркелген тұлғалар. Мұндай мәртебе алу үшін Халықты жұмыспен қамту орталығына барып, жұмыссыз ретінде тіркелу қажет.

3) Жұмыс істемейтін жүкті әйелдер. Аталған жеңілдік санатына ену үшін әйел тіркелген емханада жүктілігі бойынша уақтылы есепке тұруы тиіс.

4) Үш жасқа толмаған бала тәрбиесімен айналысатын жұмыс істемейтін тұлға. Бұл санаттағылар автоматты түрде «сақтандырылған» мәртебесіне ие болады, бірақ ресми түрде жұмыс істемеу және де олардың атына соңғы 2 айда зейнетақы жарналары мен әлеуметтік аударымдар жасалмаған болуы керек.

5) Жүктілікке және босануға, жаңа туған баланы асырап алуға байланысты, сондай-ақ бала үш жасқа толғанға дейін оның күтіміне байланысты демалыстағы тұлға. Олар демалысқа ресми түрде шыққан кезде «сақтандырылған» мәртебесін алады.

6) Мүгедек баланы күтіп-бағуды жүзеге асыратын жұмыс істемейтін адамдар. Баланың тиісті құжаттарын дайындаған кезде күтім жасайтын тұлғаның мәліметтері базаға енгізіледі. Кейін автоматты түрде «сақтандырылған» мәртебесін иеленеді.

7) Бірінші топтағы мүгедекке күтімді жүзеге асыратын жұмыс істемейтін адам. Мүмкіндігі шектеулі жанның тиісті құжаттарын дайындаған кезде күтім жасайтын тұлғаның мәліметтері базаға енгізіледі. Ізінше «сақтандырылған» мәртебесі автоматты түрде беріледі.

8) Зейнетақы төлемдерін алушылар, оның ішінде Ұлы Отан соғысының ардагерлері. Бұл жерде мемлекеттен сақтандырылғандардың тізіміне Қазақстанның Бірыңғай жинақтаушы зейнетақы қорынан зейнетақы алатындардың ғана енгізілгенін атап өту қажет. Зейнетақыны әлі ресми түрде рәсімдемеген адамдар және басқа мемлекеттерден зейнетақы алатын адамдар жеңілдік мәртебесін ала алмайды. Зейнеткерлік жасқа жеткендерге жеңілдік мәртебесі берілмейді, бірақ зейнетақының орнына асыраушысынан айырылу бойынша жәрдемақы ала алады.

9) Қылмыстық-атқару (пенитенциарлық) жүйесі еңбектерінде сот үкімі бойша жазасын өтеп жүрген адамдар. Бұл жеңілдік санатына ену үшін қамаудағы мекеменің жауапты қызметкері жазасын өтеуші адамның деректерін ақпараттық жүйеге енгізуі қажет.

10) Тергеу изоляторларындағы адамдар, сондай-ақ үйқамақ түріндегі бұлтартпау шарасы қолданылған жұмыс істемейтін адамдар. Бұл санаттағы жандар туралы мәліметті уәкілетті органның қызметкерлері жүйеге енгізеді.

11) Жұмыс істемейтін қандастар. «Қандас» куәлігін алған соң, соңғы екі айда МӘМС үшін төлем жасалмаған болу керек. Сонда автоматты түрде жеңілдік санатына енгізіледі.

12) «Алтын алқа», «Күміс алқа» алқаларымен наградталған немесе бұрын «Батыр Ана» атағын алған, сондай-ақ I және II дәрежелі «Ана даңқы» ордендерімен наградталған көп балалы аналар. Автоматты түрде «сақтандырылған» мәртебесіне ие болады.

13) Мүгедектер. Ресми құжаты шыққан кезде, мәртебе автоматты түрде беріледі.

14) Орта, техникалық және кәсіптік, орта білімнен кейінгі, жоғары білім беру, сондай-ақ жоғары оқу орнынан кейінгі білім беру ұйымдарында күндізгі оқу нысанында білім алатын адамдар. Қазақстанда оқитын студенттер жеңілдетілген санатқа автоматты түрде қосылады.

15) Жұмыс істемейтін мемлекеттік атаулы әлеуметтік көмек алушылар. Әлеуметтік төлем тағайындалған кезде «сақтандырылған» мәртебесі автоматты түрде беріледі.

С. Құралбек, «Әлеуметтік медициналық сақтандыру қоры»
Шымкент қаласы бойынша филиалының директоры,


Ж. Пулатова, Шымкент қалалық №5 емхананың ЖТД

2019 жылдың 3 қаңтарында «Міндетті әлеуметтік медициналық сақтандыру туралы» Қазақстан Республикасының Заңына және ҚР Салық кодексіне өзгерістермен толықтырулар болып бірыңғай жиынтық төлем енгізілген. Оның ішінде, басқа әлеуметтік төлемдермен қатар міндетті әлеуметтік медициналық сақтандыру жарнасы да бар. Бұл төлем азаматтарға міндетті әлеуметтік медициналық сақтандыру жүйесіне қатысуға мүмкіндік береді. Бірыңғай жиынтық төлемді еңбек етіп жүрген, жалдамалы жұмысшылар еңбегін пайдаланбайтын, жеке тұлғаларға қызмет көрсететін жеке тұлғалар төлейді.

Төлем республикалық, облыстық маңызы бар қалаларда қала тұрғындары үшін - 1 айлық есептік көрсеткіш (АЕК) болса, немесе 3 063 теңге, ауыл тұрғындары үшін - 0,5 АЕК немесе 1 531,5 теңгені құрады.

Айлық есептік көрсеткіш мөлшері бүгінгі таңда 3 мың 60 теңгені құрап отыр.

Бірыңғай жиынтық төлемнің үлесі:

• жеке табыс салығы - 10 %;

• мемлекеттік әлеуметтік сақтандыру қорына әлеуметтік аударымдар - 20 %;

• Бірыңғай жинақтаушы зейнетақы қорына - 30 %;

• міндетті әлеуметтік медициналық сақтандыру қорына 40 % құрайды.

С. ҚҰРАЛБЕК, «Әлеуметтік медициналық сақтандыру қоры»
Шымкент қаласы бойынша филиалының директоры
Шымкент қалалық «№12 емханасы»

Страница 10 из 567