«QORGAU» жобасы басталды
Среда, 07 Август 2019 05:28Үшінші мегаполисте азаматтардың құқығын қорғауды қамтамасыз етуге арналған «Qorgau» жобасы басталды. Жаңа жобаның алдағы жұмысы туралы «Отырар» медиахолдингінде өткен баспасөз жиынында жобаның аймақтық үйлестірушілері мәлімдеді.
«Qorgau» – халық көмекшісі. Ол 200-ден астам өзекті тақырыпты қамтиды. Оның аясында тұрғындар тегін заңгерлік көмек алып, өздерінің құқықтық сауаттылықтарын арттыра алады.
Жобаны аймақтық бөлімшелерін ашуды азаматтық сектордан, үкіметтік емес ұйымдарының жетекшілері қолға алған. Жанболат
Жамантаев пен Сабира Байзақова миллионды қаладағы аталған жобаның үйлестірушілері.
– Бұл халықтың құқықтық сауаттылығын арттыра отырып, оларға тегін заңгерлік көмек көрсету болып табылады. Әр өңірге бекітілген заңгерлер алдағы 4 ай бойы тұрғындарға кеңес береді. Жұмыс күні ішінде кез келген жас заңгердің көмегіне жүгіне алады. Бізде басына күн туғанда ғана заңгерді іздейтіндер көп. Ендігі жерде мәселелерін тыңдауға дайынбыз, -дейді өңірлік жетекшілер.
Бұл «Qorgau» ауқымды жобасы ҚР Ақпарат және қоғамдық даму министрлігімен бірлесе отырып, «Азаматтық бастамалар орталығы» КЕАҚ-ның қолдауымен «Бірінғай Call-орталық құру арқылы Құқыққорғаушы кешенді жобаның іске асырылу» гранты шеңберінде жүзеге асырылуда.
– 2019 жылдың 1 тамызынан бастап елдің барлық қала-ауданында 210 заңгерлік кеңес беру бөлімі ашылады. Шымкент қаласындағы бөлім жастар ресурстық орталықтарында орналасады. Қазір тиісті орындар дайындалған. Жоба шеңберінде заң факультетінің студенттеріне тәжірибеден өту мүмкіндіктері де қарастырылған. Жоба аясында түрлі әлеуметтік маңызы бар іс-шаралар ұйымдастыру жоспарланған, – дейді жастар ресурстық орталығының басышысы Нұрдәулет Тәңірберген.
Кәсіпкер – ең алдымен тәуекелшіл адам
Среда, 07 Август 2019 05:06Бүгінде елімізде кәсіп бастап, өзінің бағытын тауып, табысты болғысы келетін жандарға қолдау көп. Мемлекеттік бағдарламалардың тиімді тұстары жазылып, ел арасында кең насихатталып та жүр. Содан болар, қаламызда бизнеске икемділігін байқағысы келетіндердің қатары едәуір артқан. «Атамекен» Ұлттық кәсіпкерлер палатасының бизнес-тренері әрі психолог Гүлжан Вероцкая ісін жаңадан бастаған кәсіпкерлер туралы пікірімен бөлісті.
Шынайтуында соңғы уақытта кәсіпкерліктің қыр-сырын үйретіп, пайдаға оңай кенелуді ұрандатып жүргендер жаңбырдан кейінгі саңырауқұлақтай қаптап барады. Десек те, кәсіпкер болуды көздейтіндердің көптігі көңіл қуантады. Бұл жақын болашақта ел экономикасына үлкен өзгерістер алып келетін серпіліс деген сөз. Тәжірибелі бизнес тренер мұндай құбылысты қалыпты жағдайға балап, саннан сапа артып, бәсекелестіктен нақты нәтижеге қол жеткізуге болатынын тілге тиек етті.
– Кәсіпкер – ең алдымен тәуекелшіл адам. Үнемі ізденіс арқылы өзгеруді көздейтін жан. Өз ісін бастап, кәсібін дөңгелетуді мақсат тұтқан. Дегенмен, заман ағымына ілесе отырып, бүгінгі сұранысты қажет ететін, нарықты қамтыған кәсіпкерлер аса көп емес. Оған маңдай тер, үлкен қажыр-қайратпен жетуге болады. Ал біздің орталыққа келген азаматтардың кейбірі «алма піс, аузыма түс» деп оңай жолмен кәсіпкер атанып кетуді көздейді, - дейді Г.Вероцкая.
Сегіз ай бойы өзінің іс бастап, кәсіпорын ашуға мүмкіндігі бар екенін көрсетіп, қолынан тірлік келетінін дәлелдеуге тырысқан психолог бір кездері бизнеске бет бұрғанын айтты. Ал қазір өзі кәсіби тренер атанғалы болашақ әріптестерінің әр қадамына асқан ұқыптылықпен қарайды. Үнемі өзін-өзі жетілдіруге кеңес береді. «Сонда ғана адамның тасы өрге домалайды», дейді бизнес өкілі.
Білім мен өзіңізге деген сенім көптеген кедергіні жеңіп, діттеген мақсатқа жетуге жол ашады. Осыдан 5 жыл бұрын автобус алаңын ашамын деген ой болды. Несие рәсімдеген «Даму» және мен, екінші дәрежелі банк арасындағы үш жақты келісіммен құжаттарым 8 ай дегенде дайын болып, алға қойған мақсаттыма бір табан жақындадым. Осы уақыт аралығында лицензия мен қарамағыма жұмысшылар қабылдадым. 15 млн теңге несиеге қол жеткізіп, автобус сатып алдым. Бұл кезде балам төрт айлық еді. Біраз осы саланың нанын жедім. Кейін бұл істі тоқтатып, жаныма жақын салаға ауысып, тұлғалық даму орталығын аштым, – деді бизнес-коуч.
Жыл басынан бері 100-ге жуық адамға кәсіп бастаудың алғашқы әліппесін үйреткен ол психология мен бизнестің қоғамда өзектілігі жоғалмағанын айтты.
– Мен маркетинг бойынша Игорь Ман, тұлғалық дамудан Ицхак Пинтосевич, ал психология тұрғысынан Михаил Пелехатый сынды ресейлік мамандардан дәріс алдым. «Бизнес жоспарлау», «Бизнес психологиясы» бойынша үш жылдан астам уақыт өзім де дәріс оқимын. Қосымша «ReFrame» тұлғалық-дамыту орталығында да осы аталған бағыттар бойынша кеңес беремін. Бизнестегі әйелдер, табысты адамдар туралы көп семинарлар ұйымдастыра келе жаңадан кәсіп бастағандардың қателіктерін үшке бөліп қарастырамын. Олар – білімнің аздығы, жалқаулық, қырсықтық. Нарықты зерттеуді үйреніп, бизнес жоспарлай алатын адамдар пайданың тек үшінші жылдан бастап қана алуға болатынын түсінеді, – деді маман.
Гүлжан Вероцкаяның айтуынша, іскерлік және инвестициялық ахуалды жақсартуға, тұрақтылықты нығайтуға, инвесторлардың бизнес жүргізуіне қолайлы жағдай жасауға бағытталған Шымкент қаласының Кәсіпкерлер палатасының жұмысы жүйелі. Онда келіп кәсіп бастаушылардың қатары күн санап артып келеді. Шымкентті мемлекеттің үшінші қаласына, кәсіпкерлік, сауда орталығына, тұрғындарға жайлы әрі қонақтарға ең қызықты заманауи мегаполиске айналдыру міндеті тұрғанын ескерсек, бұл жұмыстар әлі де жандана бермек.
#TAZAQAZAQSTAN – экологияға үлес
Среда, 31 Июль 2019 04:31Қазақстан бойынша қолға алынған #Birge #TazaQazaqstan экологиялық акциясына Шымкент тұрғындары да белсене қатысты. Сенбілікке қатысушылар Ақтас қоқыс полигонына барар жол мен Шымкент-Ташкент тасжолының бойындағы қоқысты тазалады.
Қалалық әкімдікке қарасты түрлі басқармалардың қызметкерлері, қала тұрғындары мен жастар тазалық шарасына белсене үлес қосты.
Жалпы, сенбілік қаланың бірнеше жерінде өтті. Мегаполис маңындағы сенбіліктен кейін акцияға қатысушылар Шымкенттегі Есіл және Өндіріс көшелерінің бойындағы тазалық іс-шарасына қатысты.
Мұндағы №2, 3 және 4 үйлердің аулалары тазартылып, тұрғындар жаппай қоқыс шығарды.
Қалалық ТҮКШ басқармасының мамандары көшеге жарықшамдар орнатты. Ал Әл-Фараби аудан әкімдігінің бастамасымен балалар ойын алаңшалары абаттандырылды.
Жалпы сенбілік нәтижесінде 20 шақырым өзен жағалауы, 14 шақырым теміржол бойы, 9 шақырым көше тазаланып, 158 текше метр қоқыс шығарылды.
Тазалық іс-шарасына жалпы саны 28 техника мен 3 мыңнан астам адам қатысты.
Аптап ыстықта абай болыңыз
Среда, 31 Июль 2019 04:24Жайдары жаздың шілде айы да аяқталып, тамызға өтіп барамыз. Қырық күн шілденің де бітер кезі таяу. Жалпы, биылғы шілде өзінің ми қайнатар ыстық күндерімен есте қалды. Аптап ыстық шымкенттіктерді әбігерге салмай қоймады...
100 құтқарушы жұмылған
Жадыраған жаз айын көп адам демалыспен өткізетіні жасырын емес. Тіпті, сенбі, жексенбі күндерінің өзінде табиғат аясына шығып, тынығуға лайықты жер іздеуге тырысады. Демалушылар күннің көзінен қалқалайтын жасыл желек жанға сая деп, көлеңке іздесе, қалғаны суға сүңгуді құп көреді.
Ал осы шомылу маусымында жазатайым оқиғалар орын алып жататыны тағы бар. Десек те, Шымкент қалалық төтенше жағдай департаменті мамандарының шомылуға рұқсат етілмеген орындарда өткізілетін бірлескен рейдтері мен үздіксіз жүргізілген үгіт-насихат жұмыстарының нәтижесінде болар, биыл судағы жазатайым оқиғалар тіркеле қоймады (2018 жылы 4 жазатайым оқиға тіркеліп, 4 адам қайтыс болды, оның ішінде 2 бала бар).
– «Қауіпсіз жаз» акциясы мамыр айында басталып, қалада ауқымды түрде өткізілуде. Су айдындарында адамдардың қауіпсіздігін қамтамасыз ету үшін қала аумағында 248 ескерту және тыйым салу белгілері, 10 билборд орнатылды, жергілікті полиция қызметімен бірге 44 рейд өткізілді, 20 мыңнан астам жадынама табыс етілді.
Қалада бүгінгі таңда 3 су айдыны орналасқан, оның ішінде 2 су қоймасы (Тоғыс, Бадам), 1 өзен (Қошқар ата), Бадам, Тоғыс су қоймаларында орналасқан 2 демалыс орнын жеке кәсіпкерлер жалға алған. Тыйым салынған жерлерде шомылу ережелерін бұзғаны үшін (ҚР ӘҚБК 364-бабы 1-тармағы) әкімшілік бұзушылықтар туралы 35 хаттама толтырылды (ескерту түрінде).
Ал 9 жедел-құтқару бекетінде 100 қызметкер жұмылдырылған,- деді Шымкент қаласы ТЖД Өрт сөндіру және авариялық құтқару қызметі бастығының орынбасары Орынбасар Төртбаев.
Жедел құтқару жасағаның басшысы Орынбасар Құлманбетұлының құтқарушылықпен тікелей айналысып жүргеніне биыл 22 жыл толып отыр.
Қаламыздың кез келген жерінде басқа сүңгуірлермен бірге тәулігіне 24 сағат бойы көмекке келуге даяр ол су тасқыны, табиғи апаттар, өрт секілді төтенше жағдайда да алғаш боп көмек қолын созады. Тілсіз жаумен арпалысып, төтенше жағдайда тұрғындардың қауіпсіздігін қамтамасыз етуге барын салады.
– Суға батқан, тауда адасқандарды іздеу жұмыстары қиындық тудырады. Жол-көлік оқиғалары орын алғанда да адамдар қысылып немесе көлік сынды ауыр заттың астында қалып қойса, жедел жәрдемнен бұрын баратын біз. Мұндайда санаулы секундтар өте үлкен рөл ойнайды. Табанды болу керек! Осы жылдар арасында 20-дан астам адамды ажалдан арашалап қалыппын.
Бір әттеген-ай дейтінім, қиын кезде адамдарға қол үшін бере алмай қалатынымыз бар. Ата-анасы жүруді үйренген баласына суда жүзуді де үйретсе, шомылу кезінде қайғылы оқиғадан сақ болар еді, - дейді Орынбасары Құлманбетұлы.
Жедел құтқару жасағының басшысы тұрғындарға суда жүзгенде мұқият болып, тауға шыққанда абай болуға, ал көлік жүргізу мен басқа да жұмыстар барысында қауіпсіздік ережесін сақтауға шақырады. Адамдар масаң күйде рөлге отырып, суға түспесе екен, дейді.
Ыстық сақталады
Ал синоптиктердің айтуынша, биылғы жазда ауа темперетурасы жылдағы нормадан аспаған. Ауа температурасы республиканың басым бөлігінде мөлшер шамасында, ал оңтүстіктің басым бөлігінде, оңтүстік-шығыс және оңтүстік-батыста мөлшерден 1°С жоғары күтіледі. Жауын-шашын мөлшері республиканың басым бөлігінде мөлшерден көп, тек еліміздің оңтүстік және оңтүстік-батыс аудандарының кей жерлерінде мөлшерден аз болады деп болжануда.
– Шілде айында ауа темперетурасы қалада 41,60С немесе 420С болды. Соңғы ең ыстық деп тіркелгені – 1997 жылы сынап бағанасы 45 градусты көрсеткен. Ондай ыстық биыл болмады. Ауа ағымы батыс пен оңтүстік шығысқа ығыспай, 10-12 күндей қалыпты температура сақталды. Тамыз айында орташа ауа температурасы сақталады, - дейді инженер-синоптик Әсия Қыдырбаева.
Дегенмен, мамандар дабылды ескерту жолданғанын айтып, Түркістан облысының кей аудандарында күн 45 градусқа дейін ысуы мүмкін, - дейді.
5365 қоңырау
Шымкент қалалық жедел медициналық жәрдем көрсету станциясының бөлімі меңгерушісі Раушан Оспанованың айтуынша, ми қайнатар ыстықтың салдарынан шымкенттік дәрігерлер күшейтілген жұмыс тәртібіне көшкен. Сондай-ақ, қатты ыстықтан жүрек-қан тамырлары дертіне шалдыққандар көбейіп, жедел жәрдем қызметіне жүгінушілер саны артқан.
– Соңғы үш тәулікте 5365 қоңырау келіп түсті. Шақырудың 18,9 пайызы жүрек-қан тамырлары дертіне байланысты. Ал басым бөлігі тыныс жолында ақауы бар, жедел респираторлы вирустық инфекциясы мен қан қысымы көтерілгендер. Биыл 6 айда келіп түскен қоңыраулар өткен жылғы осы кезеңмен салыстырғанда 15 мыңға артқан, - дейді маман.
Сондай-ақ, күн ыстықта қан қысымы көтеріліп, кардиологтың қабылдауына келетіндердің қатары да көбейген. Ақ халаттылар жоғары қан қысымы бар азаматтарға аптап ыстықта тынығуға кеңес берсе, жүрек-қан тамырларының ауруы мазалаған науқастарға арнайы диета ұстау қажеттігін айтады. Дәрігерлер, сонымен қатар, желдеткіш пен салқындатқыштан мейілінше аулақ болып, мұздай сусындарды шамадан тыс қолданудан бас тартуға шақырады.
Түйін:
Мамандардың ескертпесін жадына түйіп, қауіпсіздік мәселесін қаперінде ұстаған пайдалы. Әсіресе, балалардың демалыс кезінде мұқият бас-көз болуға шақырамыз. Жадыраған жаз қауіпсіз әрі көңілді өтсін!
«ПАРАСАТТЫ ПОЛИЦЕЙ»: олар кімдер?
Среда, 31 Июль 2019 04:06Шымкенттік тәртіп сақшылары өнерлерін ортаға салып, сайысқа түсті. Қалалық полиция департаментінің аудандық басқармаларының арасында дәстүрлі «Парасатты полицей» байқауының жеңімпаздары белгілі болды.
Үш кезеңнен тұратын байқауда полицейлерден құралған әр команда алдымен өз тобын таныстырып, одан кейін әзіл арқылы өнерлерін көрсетті. Үшінші кезеңде Абай Құнанбайұлының 175 жылдығына орай ұлы ақынның шығармашылығынан үзінді оқыды.
Сонымен, әділқазылар алқасының жоғары ұпайына ие болып, жеңіс тұғырынан көрінген «Жол періштелері» командасы 5-6 қыркүйекте Маңғыстау облысында өтетін республикалық байқауға жолдама алады. Екінші орынды «Жұлдызды жігіттер» тобы алса, үздік үштікке «Әл-Фараби ұландары» ие болды.
Ұйымшыл топ номинациясымен «Қақпан» тобы, өнерлі команда ретінде «Абай жастары» арнайы грамоталармен марапатталды.
Бұл өнер сайысы ішкі істер органдары қызметкерлері арасында мемлекеттік тілдің мәртебесін арттыру және қоғамда полиция қызметкерлері туралы оң имидж қалыптастыруға бағытталған.
Судьялар тағайындалды
Пятница, 26 Июль 2019 03:35Шымкент қалалық сотының азаматтық істер жөніндегі сот алқасының төрағасы Мұхтар Пәрменов Шымкент қалалық сотында ҚР Президентінің Жарлығына сәйкес тағайындалған судьяларды таныстырды.
Бахтияр Патшаханұлы Насридинов Шымкент қалалық сотының судьясы болып тағайындалды. Малик Алмазұлы Майсаканов Шымкент қаласының мамандандырылған ауданаралық экономикалық сотының төрағасы болып қызмет атқарады.
Ал Дәурен Түсіпханұлы Сайханов Шымкент қаласының кәмелетке толмағандар істері жөніндегі мамандандырылған ауданаралық сотының төрағасы болып тағайындалды.
Жиында құқық қорғау органдарының бірінші басшылары қатысты.
Шымкент қалалық сотының азаматтық істер жөніндегі сот алқасының төрағасы Мұхтар Абайұлы жаңадан тағайындалған әріптестеріне сәттілік тілеп, сот төрелігін сапалы жүзеге асыруды тапсырды.
Green city – жастардың жанашырлығы
Среда, 24 Июль 2019 04:51Тарихы тереңде жатқан көне қаланың аумағы кеңейіп, мәртебесі өскені жұртшылықтың қуанышын еселегені анық. Мегаполис жыл санап құлпырып, көркі көз тартар зәулім ғимараттармен толығуда.
Жаңа аудандар қосылып, халықтың демографиялық өсімі де ұлғайып келеді. Бұл оң өзгерістер жастарға да әсер етіп, жаңа идеялардың дүниеге келуіне сеп болып отыр. Тыңнан түрен салған үш жеткіншек әлеуметтік жобаны қолға алып, миллионды қала тұрғындарына жаңа қызмет түрін ұсынады.
Сұлтан, Даниял, Мирас есімді бұл үш жас ақпан айында өткен U:hack идеялар фестивалінде танысқан. Олардың екеуі ер балаларға арналған білім-инновация мектебінде оқыса, бірі – НЗМ-нің мақтанышы. Үнемі ізденісте жүрген үштікті ортақ мүддесі бір арнаға біріктірген. Осылайша жаңа жобаны бірлесіп жасауға бекініпті.
– Біздің мақсат – қала тұрғындарын тазалыққа баулу арқылы мәдениетін арттырып, экологиялық ахуалды жақсарту. Бір өкініштісі, жаз айларында қоқыс шашылып, қаланың сәнін бұзады. Қоқыс жәшіктеріне жетпей қалдықтарды тастап кететін тұрғындар көп, ал арнайы ыдыстар үнемі толып жататынын байқап жүрдік. Кейін келе осы мәселені шешу үшін жаңа қызмет түрін ұсынуға көштік.
Арнайы жейделер алдырдық. Қазір 8-9 сыныпты аяқтаған 25 адамнан құралған топ бар. Нұрсәт шағынауданындағы №168, 169, 170 үйлердің тұрғындарымен келісе отырып, бір мезгіл қоқыстарын алып кетіп отырамыз, - дейді жоба жетекшісі Сұлтан Балғабай.
2020 жылы ТМД елдерінің мәдени астанасы ретінде таңдалып алынған көне шаһардың тазалығы үнемі басты назарда болуы тиіс. Әлеуметтік жоба арқылы қаланың дамуына өз үлестерін қосуды көздген үш оқушының мақсаттары айқын. Олар жазғы демалыста 2000-ға жуық пәтердің қоқысын тиісті орынға жеткізіп беріп отырмақ.
«Бұл өз кезегінде мүмкіндігі шектеулі жандар мен қарт кісілерге көмек болар еді», дейді жоба жетекшісі. Егер әлеуметтік жоба қолдау тауып жатса, коммерциялық жоба ретінде жалғасады. Онда тұрғындарға арнайы ыдыстар таратылып, бекітілген кестеге сәйкес жұмыс істеуге көшеді. Ал түскен қаражатты жастар әлеуметтік жобаларды жандандыруға салмақ.
Алдағы уақытта жұмыс бір жүйеге түскенде тіпті, демеушілерді тартып, олардың есебінен қоқысты қайта өңдейтін зауыт ашуға да ниетті. «Тазалық – денсаулық негізі, денсаулық – байлық негізі» деген қанатты сөзді ұран еткен үш жас мегаполиске өзгеріс әкеліп, сананы дүр сілкіндіруді ниет етіп отыр.
505 мың теңге – кәсіпке!
Среда, 24 Июль 2019 04:07Шымкентте жаңа бизнес идеяларды жүзеге асыруға арналған мемлекеттік грантқа құжаттар қабылдау басталды.
Қалалық халықты жұмыспен қамту орталығының маманы Гүлбану Шанаеваның айтуынша, бұл жоба нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасы аясында жүзеге асырылуда.
– Бір реттік қайтарымсыз мемлекеттік грант конкурс арқылы үлестіріледі. Қазіргі таңда 18 бен 29 жас аралығындағы еңбекке жарамды жұмыссыз жүрген жастар мен мүмкіндігі шектеулі азаматтардан, сондай-ақ, әлеуметтік аз қамтылған және көп балалы отбасылардан құжаттарды қабылдауды бастадық, – деді маман.
Айта өтетін жәйт, жоғарғы санаттарға жататын азаматтардың конкурсқа қатысуы үшін арнайы мамандық немесе сертификаттары болуы шарт. Ол дегеніміз, халықты жұмыспен қамту орталығының 3 айлық кәсіптік оқуы немесе «Атамекен» кәсіпкерлік палатасының 25 күндік «Бизнес-бастау» курсының түлегі болуы тиіс.
Содан кейін бұл азаматтар комиссия мүшелерінің алдында өз бизнес жоспарын қорғап, 200 АЕК (500 мың теңге) көлеміндегі грант иегері атанады. Қалаға бөлінген грант саны – 4500. Конкурс тамыз айында басталып, грант иегерлері жыл соңына дейін анықталады.
Ал қалалық халықты жұмыспен қамту орталығы «Кәсіптік оқыту» бөлімінің басшысы Асылбек Наурызбаевтың мәліметіне сүйенсек, үш айлық курсты өткен жылы 1807 (675 жас) адам оқыған. Биыл 2035 адам қысқа мерзімді оқытудан өтіп, өз кәсібін ашуға ниет білдірген. Оның ішінде 930 жас бар. Бүгінде аталған бағдарлама арқылы кәсібін дөңгелетіп жүрген жастар тігін цехы мен шаштараз ашқан.