Ғұмырын жас ұрпақты тәрбиелеуге арнаған ардагер ұстаз Қалтай Рысбекұлы 83 жасқа толды. Наурыз мерекесі қарсаңында дүниеге келген ардагер бүгінде немерелері мен шөберелерінің қызығын көріп отыр. Қашан көрсеңіз де, қазыналы қарттың пейілі кең, жүрегі таза. Ақжарқын, аңғал қалпынан айнымайды.
Дербес зейнеткер қаладағы қоғамдық іс-шараларға белсене атсалысады. Жергілікті басылымдарға да жиі қалам тартып тұрады.
Кезінде ұстаздық қызмет атқарған Қалтай Рысбекұлының өмірі өнегеге толы. Еңбек ардагері жастайынан қиындыққа мойымады. Еңбектің дәмін ерте татты. Әскери борышын Украина жерінде өтеген ол Венгрия соғысына қатысады.
Өмірдің мәні оқуда екенін ұққан Қалтай ата Алматыдағы С.М.Киров атындағы Қазақ мемлекеттік университетінің филология факультетіне оқуға түседі. Іргелі оқу орнында Мұхтар Әуезов, Ісмет Кеңесбаев, Ғабит Мүсірепов, Мәулен Балақаев сынды қазақтың марғасқаларынан білім алады. Оқуды үздік бітірген соң, Қазақ қыздар мемлекеттік педагогиалық институтына 9 жыл жемісті қызмет атқарады.
Бүгінде Қалтай Рысбекұлы ардагер ұстаз ғана емес, қамқоршы әке, ардақты ата.
Ардагер ұстазды Наурыз мерекесімен қатар келген туған күнімен құттықтаймыз. Қалтай атаға ұзақ өмір, мықты денсаулық тілейміз.
