Самал-3-те жол құрылысы қарқынды
Жуырда Шымкент қаласының әкімі Мұрат Әйтенов Абай ауданына қарасты Самал-3 шағын ауданына арнайы барып, тұрғындардың хал-жағдайымен және атқарылып жатқан жұмыстардың барысымен танысты.
Айта кетейік, Самал-3 шағын ауданында бүгінде 27 мыңнан аса адам өмір сүріп жатыр. Соңғы жылдары атқарылған жүйлі жұмыстың арқасында мұндағы тұрғындар ауыз су, электр жарығы, табиғи газ және талшықты интернетпен 100 пайызға қамтылған. Халық ендігі жерде жолдардың сапасы жақсара түссе деген ойда.
Осыған орай, бүгінде бұл шағын ауданда жол жөндеу жұмыстары қарқынды түрде жүріп жатыр. Қала әкімі Тыңдала көшесінде жүргізіліп жатқан орташа жөндеу жұмыстарымен танысты. Бұл нысанда 2,2 шақырым жолға асфальт жабындысы төселеді.
Жалпы биыл Самал-3 шағынауданында 25,2 шақырымды құрайтын 14 көшеге орташа жөндеу жұмыстарын жүргізу жоспарланған екен. Соның ішінде қазір Қазақ ордасы, Алмалы бақ және Мәңгілік ел көшелерінде жол құрылыс қарқынды түрде жүріп жатыр. 2025 жылға дейін осы шағынаудандағы Төлепбергенов, Алтынбастау, Ештай ата, Арайтаң, Әлменов, Ақтасты, Тәуекел хан көшелері орташа жөндеуден өтпек.
Сонымен қатар Мұрат Дүйсенбекұлы шағын ауданның А.Әбдраманов көшесінде жаңадан орнатылып жатқан балалар ойын алаңшасының құрылысымен де танысып шықты. Жалпы, бүгінде бір ғана Абай ауданының аумағындағы 14 балалар алаңшасы мен 3 спорт алаңы салынып жатыр екен. Қала әкімі жауапты қызметкерлерге аталған жұмыстың сапалы әрі уақтылы атқарылуын қадағалауды тапсырды.
М.Әйтенов Самал-3 шағын ауданын аралау кезінде анықталған өзекті мәселелер мен халықтың талап-тілегін талқылау мақсатында арнайы жиын өткізді.
Айта кетейік, бұл шағын ауданда жалпы ұзындығы 37,3 шақырымды құрайтын кәріз жүйесі салынған. Нысан 4 мыңнан астам абонентті орталықтандырылған желіге қосуға мүмкіндік береді.
«Тұрғындардың көпшілігі жол салынып болған соң кәріз тартуға өтініш береді. Сондықтан, мен жол құрылысын инженерлік желілер толық тартылған соң бастауды ескерттім. Бұл ретте абоненттерді қолайлы бағада канализациялық желіге қосуды ұсыну қажет. Жауын-шашында су басу қаупі туындамас үшін ирригациялық жүйелердің де талапқа сай жүргізілуін бақылаңыздар» – деді қала әкімі.
М.Дүйсенбекұлы жауаптыларға тұрғындар арасында кәріз жүйесінің тиімділігін түсіндіре отырып, халыққа қолайлы жағдай жасау бойынша нақты тапсырмалар жүктеді.
Айта кетейік, қазіргі таңда қаладағы 81 шағын ауданның 24-і кәріз жүйесімен қамтамасыз етілген. Биыл 10 нысанның құрылыс жұмыстарына тиісті қаражат қаралған. Жыл қорытындысымен 6 нысанның, атап айтқанда, Мирас-Шапағат-2, Тассай, Тұран ішкі жүйе, Қайтпас-2, 112 орам, Бозарық шағынауадандарында құрылыс жұмыстары аяқталып, 60 мыңға жуық абонент канализация жүйесіне қосылуға мүмкіндік алады.
Қыркүйекте Құрсайға таза су беріледі
Соңғы жылдары Шымкент қаласының тұрғындарын таза ауыз сумен қамтамасыз ету мақсатында өте ауқымды жұмыстар жүргізілді. Магистралды су құбырлары тартылып, ауыз суды тасымалдауға немесе кестемен ғана алуға мәжбүр болып келген қаншама шағын аудандар, тұрғын алаптар мен елді мекендер орталықтандырылған ауыз су жүйесіне қосылды. Соның нәтижесінде бүгінде Шымкентте тұрғындардың 98 пайыздан астамы таза әрі сапалы ауыз суды үздіксіз пайдалану мүмкіндігіне ие.
Ендігі жерде ауыз су мәселесі толық шешілмеген санаулы елді мекен қалды. Олардың өзінде құрылыс жұмыстары қарқынды түрде жүріп жатыр. Соның бірі – 25 мыңға жуық халқы бар Құрсай елді мекені.
Осы аптада Шымкент қаласының әкімі Мұрат Әйтенов Құрсай елді мекенінде жүргізіліп жатқан магистралды суаққы және ауыз су жүйесінің құрылысымен танысты.
Айта кетейік, халықты сапалы ауыз сумен қамту мақсатында 2020-2021 жылдар аралығында 2 кезеңдік жоба түзілген. Олар: Құрсайға тартылатын магистралды суаққы және ішкі орамдық ауыз су жүйелерінің құрылысы.
Екі нысанның да жобалау-сметалық құжаты әзірленіп, бастапқы сатысы мердігер мекеме «Риголит» жауапкершілігі шектеулі серіктестігі тарапынан 2021 жылы басталған. Бірінші кезең бойынша су жүйелерінің ұзындығы 185 шақырымды құрайды. Қазіргі уақытта бірінші кезеңнің жұмысы 98 пайызға орындалған. Ал. екінші кезең бойынша су жүйелерінің ұзындығы 151 шақырым болса, мұнда жұмыстың 97 пайызы істелген екен. Қазіргі уақытта Құрсай шағын ауданында жеткізуші магистралды суаққының және ішкі орамдық ауыз су жүйелерінің құрылысы қарқынды түрде жүруде.
Жалпы құрылыс жұмыстары биылғы жылдың қыркүйек айына дейін аяқталып, Құрсай шағын ауданы толыққанды сапалы ауыз сумен қамтамасыз етілетін болады.
Мұрат Дүйсенбекұлы ауыз сумен қамтамасыз ету жұмыстарының құрылысын уақытылы аяқтауды тапсырды.
«Ақжар» қосалқы станциясы – энергетикалық қауіпсіздікті нығайтатын нысан
Осы аптада Шымкент қаласының әкімі Мұрат Әйтенов «Ақжар» қосалқы станциясына барып, ондағы құрылыс жұмыстарының барысымен танысты. Жалпы аумағы 732 шаршы метрді құрайтын «Ақжар» қосалқы станциясының құрылыс жұмыстары 2019 жылдан бастап жүргізілуде. Қазіргі уақытта «Забадам» қосалқы станциясынан «Ақжар» қосалқы станциясына дейінгі қазылған электр кабелінің ұзындығы 12,3 шақырымды құрайды.
Мамандардың айтуынша, станцияда орнатылатын негізгі жабдық 110 кВ трансформаторы екен. Нысанның құрылысы биылғы жылдың қыркүйек айының соңына дейін аяқталатын болады. Нәтижесінде «Ақжар» станциясы арқылы 50 мыңға жуық халық, сондай-ақ сол аумақтағы бизнес нысандары сапалы электр қуатымен қамтамасыз етіледі. Мұрат Дүйсенбекұлы құрылыс сапасын назарға ала отырып, жұмысты жеделдетуді тапсырды.
Айта кетейік, Шымкент қаласына қарасты 81 елді мекеннің 78-і сапалы электр қуатымен қамтылған. Асар-2 (2-кезек), Қайнарбұлақ және Батыс елді мекенін сапалы электр қуатымен қамту құрылысы 2023 жылы толығымен аяқталады. Бекітілген жоспарға сәйкес, Шымкент қаласындағы барлық елді-мекендер 2023 жылы 100 пайыз сапалы электр қуатымен қамтылатын болады.
