Жиналғандар енді мұндай зұлмат жылдардың қайталанбауын тілеп, қаза тапқан қарулас достарының ерлігі еш ұмытылмайтынын атап өтті. Республикалық «Ауған және жергілікті соғыс ардагерлері» одағының төрағасы Шәріпбай Өтегенов іс-шараның маңызы жоғары екеніне тоқталды.
– Біз қарулас жолдастарымызды еш ұмытпаймыз. Қай жерде жүрсек те ерлікпен қаза болған азаматтардың отансүйгіштігі санамызда мәңгі тұрады. Олардың рухына Құран бағыштау, еске алу іс-шарасы жылда өткізіледі. Жиынды ұйымдастырушыларға, есіл ерлерді еске алуға келген азаматтардың бәріне рақмет айтамын. Енді мұндай зұлмат жылдар қайталанбасын, – деді Ш.Өтегенов.
Шымкент қаласы қорғаныс істері жөніндегі департаментінің бастығы Ә.Шегебаев ендігі ретте өскелең ұрпақты отансүйгіштікте тәрбиелеудің маңызы зор екенін айтты. Бүгінде ардагерлер жастар тәрбиесіне қатысты көптеген кездесу, жиындарда белсенділік танытып келеді.
1989 жылы 15 ақпанда Кеңес әскерінің соңғы жауынгерлері Ауғанстан аумағынан шығарылды. Жылдар өткенмен, жауынгерлердің өшпес ерлігі ел есінде сақталады. Жиында өмірден өткен Ауған соғысы ардагерлерінің рухына арнап Құран бағышталды.
