«Мерейлі отбасы» байқауының Шымкент қаласы бойынша бірінші кезеңінің жеңімпаздары анықталды. Биыл екінші рет өткізілген байқауға ұлттық құндылықты сақтап, салт-дәстүрді дәріптеген 20 отбасы бақ сынаған болатын.
Байқау нәтижесінде жеңімпаз болып танылған зейнеткер Көпжасар Бексеитов пен №86 жалпы орта мектептің мұғалімі Сабыржан Өтемісовтер отбасы қала әкімдігінің дипломы мен бағалы сыйлығына ие болды.
-Отбасы ең қасиетті ұғым. Екі отбасы қалалық байқаудың іріктеуінен өтіп, жеңімпаз атанды. Елбасы Өкімімен бекітіліп, бірінші рет ұйымдастырылған «Мерейлі отбасы» байқауында өңіріміздің мәртебесі бір биіктеген еді. Қандай қоғам, қандай мемлекет болса да отбасылардың орны айрықша. Өйткені отбасы – береке-бірліктің қайнар көзі болып саналады. Бауырмалдық, мейірбандық жанұяда қалыптасады. Алдағы облыстық және республикалық байқауда жеңімпаздардың топ жаратынына сенемін,-деді қала әкімінің орынбасары Қ. Нұртай.
Қалалық мәслихат хатшысы Нұрлан Бекназаров отбасыларды құттықтап, сый-сияпат жасады.
Жеңімпаз отбасы Көпжасар Бексеитов Оңтүстік Қазақстан облысындағы бірқатар әуе компанияларында қызмет еткен. 1982 жылы Кеңес Одағының Азаматтық авиация Министрінің «Еңбекте жоғары көрсеткіштері» үшін алғыс хатымен, 1989 жылы Қазақ авиациясы басқармасының бұйрығымен «7000 сағаттық апатсыз ұшқаны үшін» төсбелгімен марапатталған. Ал әйелі Сафура Бексеитова зейнеткер. Қазіргі таңда кәсіпкерлікпен айналысады. Алтын алқа иегері 6 қыз, бір ұл тәрбиелеп өсірген. Сондай-ақ, Сабыржан Өтемісовтер өнер саласында жемісті еңбек етіп келеді. Отбасы «Дидар» вокалды инструменталды ансамблін құрған. Ата-ана – отбасы діңгегі деп білетін олар өз міндеттерін мүлтіксіз орындап, бір-біріне деген құрметі арқылы ұл-қыздарына үлгі болып келеді. Ал, ұл-қыздары республикалық, халықаралық өнер байқауларының жүлдегерлері. Енді шымкенттік отбасылар екінші кезең бойынша облыстық байқауда бақ сынайды.
