Шымкент келбеті

Облыс әкімдігінде ҚР Мемлекеттік қызметі істері және сыбайлас жемқорлыққа қарсы іс-қимыл агенттігінің  ОҚО бойынша департаментінің ұйымдастыруымен семинар-кеңес өтті. Онда департамент басшысы Мұрат Ахметов білім саласында сыбайлас жемқорлықтың өршіп бара жатқаны туралы мәлімдеме жасады. Облыс әкімі Асқар Мырзахметов және облыстық прокуратура, құқық қорғау органдары мен мектеп директорлары қатысқан семинар-кеңесте облыс мектептеріндегі қауіпті дерт мәселесі қарастырылды.  

Өткен жылдың өзінде білім саласының қызметкерлеріне қатысты 62 қылмыстық іс қозғалған. Осылайша, мемлекетке 20 миллион теңгеден астам шығын келтіріліпті.  Бұл жылы да аталған көрсеткіштің өсуі әбден мүмкін. Жыл басынан бері үш айдың ішінде мемлекеттік қызмет істері және сыбайлас жемқорлыққа қарсы іс-қимыл агенттігі департаментіне мектеп директорларының парақорлыққа жол бергені жөнінде 374 шағым түскен.
Департамент басшысы М.Ахметовтің айтуынша, балабақша меңгерушілері, мектеп директорлары, олардың орынбасарлары, қалалық және аудандық білім бөлімдерінің басшылары мен бухгалтерлері және өзге де лауазымды тұлғалар сыбайлас жемқорлыққа жол беріп отыр. Ал, облыс прокуроры Ибрахим Иманов биыл Кентау қаласындағы №24 мектеп-интернаттың директоры 30 мың теңге көлемінде пара алу үстінде ұсталғанын және осындай фактілердің аз емес екенін айтты. Семинар барысында облыс әкімі А.Мырзахметов сыбайлас жемқорлыққа жол бермеу және оны қадағалау қажеттігін алға тартты.