Әйелдер арасындағы беделді турнирдің ІІ кезеңіне қатысу үшін Шымкентке әлемнің үздік 10 шахматшысы келді. Олардың арасында Қазақстан әйелдер құрамасының көшбасшысы – XLV шахмат Олимпиадасының күміс жүлдегері Бибісара Асаубаева да бар.
8 қарашаға дейін жалғасатын турнирдің тұсаукесері Rixos Khadisha Shymkent қонақ үйінің салтанат залында өтті. Турнирдің ашылу салтанатына ФИДЕ президенті Аркадий Дворкович, қала әкімінің бірінші орынбасары Қуаныш Асылов, турнирге қатысушылар, зиялы қауым, танымал кәсіпкерлер, инфлюенсерлер қатысты.
– Халықаралық шахмат федерациясы әйелдер арасындағы беделді турнирдің қазақ жерінде, атақты Шымкент қаласында өтіп жатқанына қуанышты. Қазақстанда әлемдік ірі жарыс ұйымдастыру қазірдің өзінде жақсы дәстүрге айналып келеді. Біз шахмат спортының дамуына Президент, үкімет, федерация мен бизнес өкілдерінің атсалысып, үлес қосып, қолдау көрсетіп отырғанын жоғары бағалаймыз. Жарысқа қатысушыларға сәттілік және әр партия тамаша өтсін деп тілеймін!, – дейді ФИДЕ президенті Аркадий Дворкович.
15 жылдық тарихы бар классикалық шахматтан әйелдер Гран-приінде жалпы есепте екі жеңімпаз келесі әлемдік шахмат тәжінен үміткерлер турниріне (FIDE Women’s Candidates 2026) қатысуға мүмкіндік алады. 2024-25 жылғы турнир сериясына қатысып отырған әлемнің ең мықты 20 шахматшысы 6 кезеңде бақ сынасады. Аталмыш кезеңдердің біріншісі тамыз айында Тбилисиде өтті. Шымкентте өтетін 2-ші кезеңде осы жиырма үміткердің оны, гроссмейстерлер қытайлық Тань Чжунъи, ресейлік Александра Горячкина, үндістандық Хампи Конеру, германиялық Катерина Лагно және Элизабет Петц, халықаралық шеберлер Дивья Дешмух, еліміздің мақтанышы Бибісара Асаубаева, Ставрула Цолакиду, Нургюл Салимова және монголиялық Батхуягийн Монгонтуул шеберлігін көрсетеді. Барлық үмірткер де тәжірибеге бай, түрлі турнирлердің жеңімпадары. Сондықтан мықтылардың сайысы, дәстүрге айналғандай, тартысты да тартымды болатыны анық.
Жарыстың салтанатты тұсаукесерінде бәрін елең еткізген тағы бір тамаша оқиға қазақстандық белгілі дизайнер Аида Қауменованың биылғы турнирге арнайы әзірлеген жаңа топтамасының көрсетілімі болды. Аида ханымның айтуынша, оны осы топтаманы жасауға шабыттандырған жұмбақ шахмат әлемі және «шындық қиялмен тоғысқан, ал әр жүрісің – жеңіске жеткізер бір қадам!» делінген «Айнаның ішкі жағына саяхаттаған Алиса» фильмінің сиқыры болды дейді.
Жарысқа қатысушы шахматшы қыздар қазақтың ұлттық ерекшелігін сезіне отырып, Aida KaumeNOVA сән үйінің заманауи стильде дайындаған ұлттық шапанын киіп шықты.
Әйелдер арасындағы ФИДЕ Гран-приі – ақшалай жүлдесінің қомақты болуымен ерекшеленетін турнир. Әр кезеңнің жүлде қоры $80 000, оның $18.000 бірінші орын алған шахматшыға табыс етіледі. Бүкіл серияның жалпы жүлде қоры рекордтық $600 000 тең, соның $120 000 жалпы есепте үздік он ойыншыға үлестіріледі. Шымкенттегі турнир 8 қарашаға дейін жалғасады, жанкүйерлер шахмат жарысының барысын және барлық жаңалықты онлайн-платформалар мен KazChess және ФИДЕ парақшаларынан көре алады.
Салтанат ЖАМАЛДИНОВА
