Мемлекет басшысы дүйсенбі күні журналистерге баспасөз конференциясын өткізді, деп жазады Ақорданың ресми сайты. Қ.Тоқаев ҚР Президенті сайлауының қорытындысы бойынша отандық және шетелдік БАҚ өкілдерінің сұрақтарына жауап беріп, сайлаудың жоғары деңгейде, ашық әрі әділ өткенін атап өтті.

Tokaev-1

– Ең алдымен маған дауыс берген Қазақстан азаматтарына алғысымды айтқым келеді. Бұл – үлкен жауапкершілік. Жауапкершілікті орындау – мен үшін үлкен міндет. Бұл – халықтың сенімі. Сайлау жоғары деңгейде, әділ және ашық өтті. Сайлау барысын мыңнан астам халықаралық байқаушы қадағалады. Әлемнің 40 елінен келген 350-ге жуық шетелдік журналист дүние жүзіне хабар таратты, - деді Мемлекет басшысы.

Қ.Тоқаев бұдан кейін БАҚ өкілдерінің сұрақтарына жауап берді. Мемлекет басшысы сайлаудың ең басты ерекшелігі үміткерлер санының көп болуында екенін жеткізді. Оның айтуынша, жеті үміткер өз бағдарламасын жариялап, үгіт-насихат жүргізу ісінде тең мүмкіндікке ие болды.

– Бұл сайлау қызық әрі ашық өтті деп айтуға болады. Басқа үміткерлердің ұсыныстарын өте орынды деп есептеймін. Ең пайдалы тұстары жұмыс барысында назарға алынады, - деді Мемлекет басшысы. - Бұған дейін Қоғамдық сенім комитеті құрылатынын айтқан едім, оның құрамына қоғамымыздың түрлі топтарының өкілдері кіреді, онда пікір алмасатын боламыз.

Менің ойымша, әртүрлі көзқарастың болуы заңды, бірақ біз – бір халықпыз. Сан пікір – біртұтас ұлт.Қасым-Жомарт Тоқаев өңірлерде кейбір мәселелер әлі де шешімін күтіп тұрғанын айтты.

– Сайлау науқаны кезінде мен аймақтардың барлығын аралап шықтым. Әрбір аймақтың өз ерекшелігі бар және еліміздің дамуына өз үлесін қосып отыр. Ал шынына келсек, елімізде түйіні шешілмеген мәселелер бар. Мен оларды жақсы білемін, сіздер де жақсы білесіздер. Бұл – медицинаның сапасы, жалақының төмендігі, экология, ауыз сумен қамтамасыз ету. Сондықтан өзекті мәселелерді басты назарға аламыз, - деді Мемлекет басшысы.

сайлау1jpg

ҚР Президенті осы орайда Үкіметке тиісті тапсырмалар беретінін баса айтты.
– Қазіргі таңда нақты шешімдер қабылдау керек. Халық бізден осы шешімдерді күтіп отыр. Халық ұзақ сөзден әбден шаршады. Сондықтан мен Президент ретінде осы жұмыспен міндетті түрде шұғылданамын, - деді Қасым-Жомарт Тоқаев.
Мемлекет басшысы Үкіметке қатысты мәселеге де тоқталып өтті.

– Біздің заңнамамызға сәйкес Үкімет таратылмайды. Дегенмен, жекелеген кадрлық ауысу болады. 

Бұған дейін атап өткенімдей, Үкіметке жаңа тұлғалар, оның ішінде жастар тартылады. Меніңше, барынша қабілетті жас кадрларды тарту қажет, - деді Мемлекет басшысы.
Осы орайда Қасым-Жомарт Тоқаев бұған дейін кадрлық резерв дайындауға уәде бергенін еске салды. Президенттің айтуынша, оған еліміздің барлық өңірлерінен 300 адам кіретін көрінеді.

– Біз бұл тізімді жаңартып отырамыз. Басты мақсат – жастарды мемлекетті басқаруға тарту. Жалпы айтқанда, Үкімет жұмысына жаңа тыныс, жаңа серпін беру керек. Сондықтан менің талабым өте қатаң болады, - деді Президент.
Кездесу барысында Қазақстан аумағында атом электр стансасын салу мәселесі күн тәртібіне шығарылмайтыны нақты айтылды.

– Атом электр стансасының құрылысы біздің күн тәртібімізде жоқ. Егер мұндай мәселе көтеріліп жатса, міндетті түрде халықпен ақылдасамыз. Тіпті қажет болса бұл мәселе бойынша референдум өткіземіз. Себебі бұл – өте жауапты, өзекті мәселе, - деді Қасым-Жомарт Тоқаев.

Жиында ҚР Президентін ұлықтау рәсімі 12 маусымда өтетіні мәлім болды.
Конференция соңында Мемлекет басшысы сайлау үдерісін жариялап көрсетуге және оның ашық өтуін қамтамасыз етуге қосқан үлесі үшін журналистердің барлығына ризашылығын білдіріп, осындай кездесулердің дәстүрге айналатынын айтты.

Шымкенттегі Ұлттық теннис орталығында халықаралық теннис турнирі өтуде.

Теннис-1

Shymkent ATP Challenger сайысының ашылу салтанатына қала әкімінің бірінші орынбасары Қайрат Нұртай, қалалық спорт және дене шынықтыру басқармасының жетекшісі Әлібек Нұртаев, Қазақстан теннис федерациясының вице-президенті Диас Досқараев, федерацияның Шымкент қалалық филиалының директоры Виктор Афимин және судьялар қатысты.

Турнирді ашып берген бірінші орынбасары Қайрат Нұртай қаладағы теннис спортының дамып келе жатқанына тоқталып, теннис секцияларының саны көбейіп келе жатқанын айтты.

Қазақстандық теннис таланттарының арасында Достанбек Ташболатов пен Жібек Құламбаева секілді шымкенттік өрендер де бар. Ал Диас Досқараев мегаполис басшыларының турнирді өткізуде ғана емес, жалпы теннис спортын дамытуда көрсетіп жатқан қолдауларына тоқталып, алғыс білдірді.

Айта кетейік, Shymkent ATP Challenger турнирі 16 маусымға дейін жалғасады. Байрақты бәсеке ҚР Президенті Кубогынан кейінгі екінші турнир саналады. Жүлде қоры 50 000 АҚШ долларынан асатын халықаралық сайысқа 25 елден 100-ге жуық кәсіпқой теннисшілер қатысуда.

Шымкентте белсенді өмір сүру орталығы ашылды. Салтанатты рәсімге үшінші мегаполистің әкімі Ғабидолла Әбдірахымов қатысты.

DSC 3822

Бұл – мегаполистегі алғашқы көп функционалды орталық. Мұнда интернет-кафе, физиологиялық кабинет, кинозал, кітапхана, жаттығу залы мен йога, үстел теннисі, бильярд ойнау секциялары бар. Зейнеткер қариялар мен мүмкіндігі шектеулі жандар, балалар үйінің тәрбиеленушілері осында бос уақыттарын өткізіп, денсаулықтарын жақсарта алады. Зейнеткерлерге тегін әлеуметтік және медициналық қызмет көрсетіледі.

– Қоғамның дамуы қарияларымызға көрсетілетін қамқорлықпен байқалады, - деді қала әкімі Ғ.Әбдірахымов. - Жылдың басындағы есептік кездесуде қала тұрғындарының бірі менен Шымкенттен қарт кісілерге өмір салтын жақсартып, дене шынықтыруға арналған орталық ашуды сұранған болатын. Міне, бүгін осы орталықты ашып отырмыз. Зейнеткерлер мен қариялар бұл орталыққа отбасымен, балалары және немерелерімен келе алады.

Шымкенттегі бұл алғашқы орталық Елбасы Нұрсұлтан Әбішұлы Назарбаевтың отандастарымыздың өмір сүру жасын ұзарту мен бұқаралық спортты дамыту бойынша тапсырмасы аясында ашылып отыр. Айта кетейік, шымкенттіктердің өмір сүру жасы ұзарып келеді. Мегаполис тұрғындарының қазіргі таңдағы орташа жасы 78 жастан асады.

Қала әкімі тұрғындарды спортпен жаппай шұғылданып, салауатты өмір салтын ұстануға шақырды. Бұл күні зейнеткерлерге арнап концерттік бағдарлама қойылып, қариялар би биледі. Өздеріне көрсетілген қамқорлықты сезініп, бір жасап қалды.

Айта кетейік, бұл орталықта 70-ке жуық қарияға күндіз 4 сағат арнаулы әлеуметтік және медициналық қызметтер көрсетіледі.

Қолыңда барды бағала

Среда, 12 Июнь 2019 05:27

Барлығымыздың көздегеніміз – тұрақтылық екені айқын. Ал елдегі тұрақтылық алдымен әрқайсымыздың өзімізден басталады.

Ділдәбеков

Осы тұрғыда әр замандасым «Саясат менің не теңім?» деген сауалды ой елегінен өткізсе екен деймін. Себебі, тәуелсіз елім бар, еңбекшіл халқым бар, ұйысқан ұлтым бар, жақындарым аман, алдымда жейтін асым бар.

Ендеше, қолында барды бағалау – қанағаты бар пенденің баяны. Көшеге шығып, өзіңше әділдік талап еткен боласың. Сенің осы жүрісіңнің өзі әділ ме? Зер салып қарашы, бауырым. Барды қанағат тұтпайтын пендені әділ деп айта аламыз ба?

Ендеше, көлденең көк аттыларға, ниеті бөтен, сырттан көз тіккен дұшпанға тыныштығымызды бұзуға жол бермейік!

Мұхтархан Ділдәбеков,
Қазақстанның еңбек
сіңірген спорт шебері

Қазақстандықтар тағы бір тарихи кезеңнен өтіп, кезектен тыс Президент сайлауында елдің ертеңі мен ұрпақтың жарқын болашағы үшін таңдау жасады, мемлекетті басқаруды Қасым-Жомарт Тоқаевқа сеніп тапсырды.

Қалыбекова-1

Тәуелсіздігімізді алып, егемендігімізді бекіткеннен кейінгі еліміздің дамуында, әлем алдындағы беделінің өсуінде, елдегі тұрақтылық пен тыныштықты сақтауда өлшеусіз еңбек сіңірген Тұңғыш Президент Н.Ә.Назарбаевтың ерен еңбегін атап өтуіміз қажет. Ал Қазақстан халқы дауыс беріп, сайлаған Қасым-Жомарт Тоқаев – Елбасының сенімді серігі.

Халық үміткерлер арасынан ел тынысы мен тіршілігін бес саусағындай білетін, ел басқарудағы тәжірибесімен, жаңашылдығымен дараланған азаматқа дұрыс таңдау жасады деп ойлаймын. Бұған дәлел ретінде Қасым-Жомарт Тоқаев «Мен әрбір қазақстандықтың лайықты жұмысы болып, еңбегіне қарай әділ жалақы алғанын қалаймын.

Әр азамат сапалы мемлекеттік қызметті пайдаланғанын қалаймын. Заманауи медицинаның қолжетімді болғанын қалаймын. Әрбір азаматтың үздік білім алып, заңмен толық қорғалғанын, болашаққа нық сеніммен қарағанын қалаймын» деген болатын.

Әлемдік дәрежедегі саясаткер, еліміздің ішкі, сыртқы саясатын терең меңгерген тұлға, әлем елдерінің саясаткерлерімен тең дәрежеде сөйлесе алатын сұңғыла шешен, тәжірибелі басшы Қасым-Жомарт Кемелұлы ел сенімінен шығып, Қазақстанды одан ары гүлдендіріп, даму жолында ерен еңбек ететініне сенеміз.

Әсма Қалыбекова,
этнограф

Күні кеше ғана елдегі аса маңызды саяси науқан – Президент сайлауын да бір кісідей өткізіп алдық. Отандастарымыздың азаматтық парызын орындап, дауыс беруі нәтижесінде Қасым-Жомарт Тоқаев Президент болып сайланды.

Мархабат

«Тыныш елге – тоқшылық нәсіп» деген аталы сөзді Күлтегін бабамыз айтқан. Тыныштығы кеткен елден береке де қашады. Сонау 90-жылдардың аласапыранында жоғалмай, теңселмей, аяғынан тік тұрған елімізді бүгінгідей бейбіт заманда берекеден айыру – пиғылы басқада жатқан топтың әрекеті.

Арандатушылар бұрын да болған, қазір де бар. Бірлігіңнің бағасын біліп, берекеңізді шашып алмаңыздар, ағайын. «Қолда бар алтынның қадірін біл» дегенді де дана қазақ айтып кеткен.
Бірлік пен ынтымақ – қазақтың мәңгілік стратегиясы. Ата-баба аманаты – ерлік пен елдік, бірлік пен ынтымақ. Сондықтан, аманатқа қиянат жасамауымыз керек. Бір тудың астында болайық!

Мархабат Байғұт,
халықаралық «Алаш»
сыйлығының иегері

Қазақстан Республикасының Президентін сайлау әрбір сайлаушы үшін өте жауапты миссия екені белгілі.

Дәрменов

Өйткені, елдің жарқын болашағы біздің қандай үміткерді таңдап алғанымызға байланысты. Орталық сайлау комиссиясы 9 маусымда өткен кезектен тыс Президент сайлауында кандидаттарға сайлаушылардың қанша дауыс бергенін жариялады. ОСК мәліметінше, Қ.Тоқаев 70,96 пайыз дауыс жинады. Бұл халықтың жаңа Президентке деген үлкен сенімін білдірсе керек.

Еліміздегі сайлау барысын мыңнан астам халықаралық байқаушы қадағалады. Сайлау жоғары деңгейде, әділ және ашық өтті. Әлемнің 40 елінен келген 350-ге жуық шетелдік журналистер дүниежүзіне хабар таратты.

Қасым-Жомарт Тоқаев – парасатты, пайымды, халықаралық тәжірибесі бар беделді саясаткер. Терең ойлы, бірнеше тілді меңгерген кәсіби дипломат. Ол Елбасы Н.Назарбаевтың тәуелсіздікті қалыптастыру және нығайту жылдары жанында жүріп, жас мемлекетіміздің ең жауапты, ең күрделі кезеңдерінде, білікті маман, тәжірибелі мемлекетшіл тұлғалар тапшы тұстарда сенімді серігі бола білді.

Қай-қай мәселені де егжей-тегжейлі зерттей білетін зерделілігімен көзге түскен тұлға.

Қасым-Жомарт Кемелұлы – Қазақстан Президенті ретінде мемлекетті әлемдік аренада таныстыратын абыройлы тұлға. Тәуелсіздіктің алғашқы 10 жылында әлемнің әр мемлекетімен берік ынтымақтастық орнату жолында жанкештілікпен еңбек еткен ҚР Сыртқы істер министрі Қасым-Жомарт Кемелұлының тарихта айрықша орны бар. Әлемдік саясатта өз орнын ойып алған салиқалы саясаткер екенін осылайша дәлелдеді.

Сондықтан да кейіннен Қасым-Жомарт Тоқаевтың БҰҰ Бас хатшысының орынбасарлығына, Женева бөлімшесінің Бас директорлығына тағайындалуы жай кездейсоқтық емес, заңдылық дер едім.

Қасым-Жомарт Кемелұлы – үлкен саяси мектептен өткен білімді, білікті азамат. Бұл - лайықты таңдау. Қазақстан халқы Елбасы стратегиясының сабақтастығын берік қолдап отыр.

Ермек ДӘРМЕНОВ,
Шымкент қаласы
мәслихатының депутаты

Бар жағдай – сайлаушыларға

DSC 4038

Жалпы, Шымкентте Президент сайлауы республикалық қала дәрежесінде алғаш рет өтті. Үшінші мегаполистегі сайлау комиссиялары саяси науқанға тыңғылықты дайындықпен келді. Президент сайлауы күні қалада 260 сайлау учаскесі жұмыс істеді. Оның ішінде 25 учаске жаңадан ашылған. Бұған қоса әскери бөлімдер, тергеу абақтылары мен медициналық мекемелер аумағындағы 19 жабық сайлау учаскесі болды.

Шымкентте 569 мың 375 сайлаушы тіркелген. 2016 жылға қарағанда сайлаушылар саны 200 мың адамға көбейген. Сайлау барысын саяси партиялар, халықаралық және қоғамдық ұйымдардың өкілдері, журналистерден құралған 800-ден аса бақылаушы бақылады. Оның ішінде 26 шетелдік бақылаушы болды.

Сайлаушылардың ішінде мүмкіндігі шектеулі азаматтар да дауыс берді. Олардың өз өтініштері бойынша арнайы техникамен жабдықталған инватакси алып жүрді, сайлау учаскелері қажетіне орай арнайы кабинкалар, тактильді тақташалар, құлаққаптар, ұлғайтқыш әйнектер, аудио және видеобағдарламалармен жабдықталды.

Миллионды қаланың тарихында алғаш рет сайлау күні қоғамдық көлік тегін қатынап, тек сайлаушылар ғана емес, жолаушыларға да қызмет көрсетті.

Сайлау – азаматтық парыз

Аким

ҚР Президентінің сайлауы күнінде Шымкент қаласындағы сайлау учаскелері сағат 7:00-де ашылып, дауыс беру басталды. Алғашқылардың бірі болып қала әкімі Ғабидолла Әбдірахымов А.Пушкин атындағы N1 мектеп-гимназиясындағы 92 сайлау учаскесіне келіп, өз таңдауын жасады.

– Бұл саяси іс-шара - еліміз үшін өте маңызды. Сол үшін ең бірінші болып, әріптестеріммен бірге келіп дауыс беруді ұйғардым. Бұл – болашағымды таңдау. Баршамыздың өз таңдау құқығымыз бар, - деді қала әкімі.
Сонымен қатар Шымкент қаласы мәслихатының хатшысы Ғани Ташқараев та тіркелген сайлау учаскесіне келіп, дауыс берді.

Дауыс беруге барды жасың да, кәрің де...

Шымкенттегі сайлау барысы бірқалыпты, тыныш өтті. Бұл күні ерекше оқиғалар да тіркелді. Қалада жас жұбайлар мен жаңа түскен келіншек те азаматтық парызын орындап, дауыс берді.

Шаңырақ көтерген жас жұбайлар Мақсат Қабылбаев пен Камила Жауылбаевалар өздері тіркелген №37 сайлау учаскесіне келіп, дауыс берді. Олар той күнін осыдан 3 ай бұрын белгілеп қойғандарын айтады. Өмірлерінің ең бақытты сәттерінің бірінде сайлау учаскесіне ат басын бұрып, дауыс беруді шешіпті.

Ал тағы бір жаңа түскен келін сайлау учаскесіне ақ жаулығымен барған. Әлеуметтік желіде тараған келіннің суретін Шымкент қаласының әкімі Ғабидолла Әбдірахымов Инстаграм аккаунтында жариялап, «Бұл – Шымкент! Жас отау құрған жастар және беті ашылмаған келіншек», деген жазба қалдырды. Желі қолданушыларының мәліметінше, жас келін Қайтпас шағынауданындағы сайлау учаскелерінің бірінде дауыс берген.

Айта кетейік, сайлау күні Шымкентте 53 сәби өмір есігін ашты. Ақ халаттылар саяси дода күні дүниеге келгендердің басым бөлігі қыз балалар екенін айтады. Сайлау күні дүниеге сәби әкелген келіншектер де дауыс беріп, олар үшін перзентханаларда сайлау учаскелері жұмыс істеді.

Страница 14 из 327