Биыл Шымкентке 100 қоғамдық көлік әкелінуі мүмкін. Қазір осы бағытта қала әкімдігі тарапынан жеке инвесторлармен келіссөздер жүргізіліп жатыр. Бұл туралы Шымкент қалалық жолаушылар көлігі және автомобиль жолдары бөлімі басшысының орынбасары Жарқын Байдуллаев мәлімдеді.
Бүгінде Шымкент қаласында қоғамдық көлік қызметінде 27 тасымалдаушы көлік компаниясы бар. Жарқын Байдуллаевтың айтуынша, қазіргі таңда Шымкенттегі қоғамдық көліктердің сапасын бақылау мақсатында бір айлық рейдтік шара басталған.
Қалада қатынайтын сыйымдылығы аз «Газельдерге» шектеу қойылып, олардың саны азаюда. Мәселен, жыл басында қала бойынша 29 бағытта 398 «Газель» болса, қазір оның саны 339-ға жетіп, 24 бағытта қызмет көрсетуде.
– Былтыр қаламызға жаңа 200 автобус әкелінді. Алдағы уақытта қаланы тағы да 100-ге жуық автобуспен қамтамасыз ету жоспарда бар, – дейді Ж. Байдуллаев.
Сәбит ТАСТАНБЕК