Қалаға қосылған елдімекендерде шешілмеген проблемалар бар
Среда, 23 Январь 2019 04:40Қаратау ауданының Бозарық шағынауданы аумағында Бозарық қосалқы стансасының құрылысы жүруде. Станса биыл іске қосылып, аудандағы осы уақытқа дейін проблема болып келген жарық мәселесі шешімін табады. Бұл туралы Қаратау ауданының әкімі И.Қантөреев №89 мектепте халық алдындағы есептік кездесуінде баяндады.
Жиынға қала әкімінің орынбасары Данат Жумин, ҚР Президенті әкімшілігінің мемлекеттік инспекторы
Ерғали Егемберді, қалалық мәслихат депутаттары, басқарма басшылары мен Асар, Асар-2, Азат, Таскен, Достық, Қайтпас елдімекендерінің тұрғындары қатысты.
И.Қантөреев аталған елдімекендердегі атқарылған нақты жұмыстарды баяндап, алда атқарылар жоспарларына да тоқталды.
– Аудан аумағындағы елдімекендерде жол мәселесі өзекті болып келді. Бүгінде Нұртас, Тұран, Қайтпас, Азат шағынаудандары, Бозарық саяжайы, Тассай, Таскен, Қайнарбұлақ тұрғын алабтарында бюджет қаражатынан 68 шақырым көшеге, кәсіпкерлермен меморандум аясында 6,3 шақырым болатын 9 көшеге шағал тас төселді, – деді аудан әкімі.
Баяндамадан соң ауданның жас әкімінің жұмысана оң бағасын берген тұрғындар қарасы көп болды. Көшелерді асфальттау, аяқ жолдар салу, мемлекеттік трансформатор орнату, ауыз сумен қамтамасыз етуде тұрғындардың өтінішін дер кезінде атқарған жұмыстарына алғысын жеткізді.
Дегенмен, ауданның проблемасы аз емес. Қайнарбұлақ саяжайының тұрғыны А.Өмірзақова халықтың қауіпсіздігі үшін қойылған 16 камераның 9-ы істен шыққанын айтып, 40 мың халқы бар саяжайға бір банкомат қойылса деген ұсынысын жеткізді. Ал жаңадан бой көтерген Тұран шағынауданындағы көпқабатты тұрғын үйлердің тұрғындарының талабы – қоғамдық көліктің жайы, кондукторлардың мәдениетсіздігі.
Қайнарбұлақ тұрғыны Сегізбай Өскенбаев Сайрам ауданынан қосылған елдімекен тұрғындары жер учаскесінің құжатын қалаға өткізе алмай келе жатқанын айтып, көмек сұрады.
Тұрғындардың көкейіндегі сауалдарға аудан басшысы мен басқарма басшылары жауап беріп отырды. Аудан әкімі шағымдардың әрқайсысының орындалуы жеке өзінің бақылауында болатынын жеткізді.
Қаратау ауданы: Шаруалардың тілегі ескеріледі
Пятница, 18 Январь 2019 05:36Шымкенттегі Қаратау ауданының әкімі Исамидин Қантөреевтің жылдық есебін тыңдауға ауданға қарасты Сайрам, Шапырашты, Өтеміс,Орманшы, Достық, Қызылсу, Мәртөбе, Исфиджаб тұрғын алаптарының тұрғындары, қалалық мәслихат депутаттары, жауапты басқарма және құқық қорғау органдарының өкілдері қатысты. 250 мыңға жуық халқы бар ауданның басшысы алдымен жыл бойына жоғарыда атап өткен елдімекендерде атқарған жұмыстарына тоқталды.
– Аудан бойынша 47 202 жеке үй болса, 37 511 үй тәулік бойы сапалы ауыз сумен қамтылды. 5211 үйге кестемен, 4431 үйге тасымал арқылы су жеткізіледі. Бүгінде Сайрам тұрғын алабында жаңа құрылыс аумағына ауыз су жеткізуде құрылыс жұмыстары жүргізілуде. Жыл соңында сапалы су толығымен тұрғын алапқа жетеді, - деді аудан әкімі. Бұдан бөлек елдімекендердегі өзекті мәселе саналатын электр жарығы, табиғи газбен қамтамасыз ету мен жол салу, абаттандыру мен қала тазалығы секілді жұмыстардың барысын баяндады.
Есеп тыңдалған соң жиналғандардың ұсыныс-тілектеріне кезек берілді.
Шымкент қалалық мәслихатының депутаты Нұркөз Жаңабаев өткен жылы қарастырылған бюджет қаржысы аз болғанымен, Қаратауда көптеген тірліктің қолға алынғанын жеткізді: – Ендігі үлкен мәселе – тарихи-мәдени ескерткіштерге бай Сайрам тұрғын алабында туризм бағытын дамытуды қолға алсақ. Ол үшін жол алдымен жол мәселесін шешу керек, – деген ұсыныс айтты депутат.
Айта кетсек, Қаратау ауданына жаңадан қосылған елдімекендер саны аз емес. Олардың проблемасын қалалық мәслихат депутаты Х.Ахматханов былай жеткізді:
– Сайрам ауданынан қосылған елдімекендер диханшылықпен күн көріп отыр. Дегенмен, олар ағын суға зәру. Бізде 12 қанал бар. Егер олар жөнделіп, тазаланса, талай адамдың егіншілікпен айналысуына болар еді.
Ауданға қарасты Достық алабының тұрғындары мемлекеттік трансформаторға қол жеткізе алмай келеміз десе, З.Бекмырзаева Достықтағы Мәдениет көшесі Кеңес дәуірінен бері жөндеу көрмегенін, жарықтандыру, жол салу қажеттігін айтты.
Есептік жиында айтылған шағымдарға жауапты басқармалардың мамандары жауаптарын айтты. Ал аудан әкімі әр шағымның ескеріліп, өз бақылауына ұстайтынын атап өтті.
Исамидин Қантөреев,сондай-ақ, биыл Сайрам тұрғын алабындағы жиі сөнетін жарық, кәріз жүйесі, ауыз су, Өтеміс тұрғын алабында мәдениет үйін салу, Қызылсу мен Мәртөбеге қала орталығына қатынайтын қоғамдық көлік мәселесін шешуге уәде берді.
Патология бөлімшесі ашылды
Среда, 16 Январь 2019 05:37Шымкенттегі №2 қалалық ауруханада жүкті әйелдерді емдеуге арналған патология бөлімшесі ашылды. 20 төсек-орынға арналған бөлімше екінші деңгейдегі перинаталды көмек көрсету үшін заманауи медициналық құрал-жабдықтармен толыққан. Өткен жылдың өзінде ауруханада 4 мыңға жуық сәби дүниеге келген.
– Мегаполисте туу көрсеткіші артып, бала саны көбеюде. 2018 жылы ауруханада 3567 сәби дүниеге келді. Босану бөлімшесіндегі 90 төсек 155-ке көбейтілді. Бұл көрсеткіштер ауруханада жүкті аналарға медициналық қызмет көрсетудің аясын кеңейтіп, ана мен бала саулығын жақсартуда жаңа қажеттіліктер туындады, - дейді №2 аурухананың бас дәрігері Сәрсен Пернебеков.
Бөлімшеде емделіп жатқан қала тұрғыны Тұрсынай Пірматованы дәрігерлер отамен босандыруға дайындауда.
– Үшінші сәбиіме жүктімін. Алдында екі баламды отамен босандым. Кешеден бері дәрігерлер медициналық тексеруден өткізді, денсаулығымды бақылауға алып, жағдайымды сұрап жүр. Енді аман-есен босанып алсам, - дейді жүкті ана.
Патология бөлімшесінде жүктіліктің 34-аптасына бастап қан аздықтың ауыр дәрежесі, бір немесе екі кесарь тілігі бар жүкті әйелдер, айтолғақ, мерзімінен асқан жүктілік, ЭКҰ, көп ұрықты жүктілік секілді паталогиясы бар науқастарға медициналық қызмет көрсетіледі.
Диагностикадағы тәжірибе алмасу ордасы
Среда, 16 Январь 2019 05:31Шымкент қалалық №7 емхана – бүгінгі күннің талаптарына толық жауап беретін медициналық мекеме. Мұнда жылына екі-үш рет шетелдік дәрігерлер диагностикалауда жергілікті УДЗ мамандармен тәжірибе алмасуды дәстүрге айналдырып келеді. Емханадағы медицинадағы цифрландыру жүйесінің қолға алынуы, жаңа реформалар және бұдан өзге жаңашылдықтармен танысып қайтқан болатынбыз.
Шымкенттегі №7 емханаға қала аумағындағы 13 елдімекеннен 62 мыңнан астам тұрғын тіркелген. Олардың басым бөлігі Тоғыс, Қарабастау, Жалын, Бадам-1,2, Маятас, Жыланбұзған, Қарақия және Қаратөбе секілді қалаға қосылған елдімекендер. Дәл қазіргі уақытта емхана ұжымы тұрғындардың медициналық көмектің қолжетімділігін арттыруда және сапалы қызмет көрсетуде цифрландыру жүйесіне толыққанды өтуде.
– Емханада медициналық құжаттарды қағазсыз жүйеге көшіру бойынша нақты жұмыстар атқарылып жатыр. 24 журнал электронды форматқа көшірілсе, денсаулық құжаттарының 99,2% электронды түріне ауыстырылды. Енді тұрғындар бұрынғыдай қағаз тасымайды, құжаттардың барлығы бірыңғай базаға енгізіліп, дәрігер науқастың жеке кабинеті арқылы барлық деректерді көріп отырады. Емханадағы УДЗ, рентген, флюорография сияқтысоңғы үлгідегі медициналық құрылғылар бұл жұмыстарды жеделдеткенін атап өткім келеді. Енді тұрғындардың интернетті пайдаланудағы белсенділігін арттыруда жұмыстар күшейтілді. Бүгінгі таңда емханаға тіркелген 20-60 жас аралығындағы тұрғындардың 30% мобильдік қосымшаны пайдалануда, жүкті әйелдердің – 62%, 5 жасқа дейінгі балалары бар ата-аналардың 48% қосымшаның игілігін көруде, - дейді емхананың бас дәрігері Айман Оспанова.
Бас дәрігер емхана тұрғындарының басым бөлігі қалаға жаңадан қосылған шалғайдағы ауылды елдімекендер болғандықтан, интернет жылдамдығының төмендігі және смартфон мәселесінің өзекті екенін алға тартты.
– Бұл жұмыстарға арнайы мамандарды бекіттік. Олар ұялы телефонға мобильді қосымшаны қондырып, онымен жұмыс істеудің ережелерін түсіндіруде. Тұрғындар, әсіресе, дәрігерге жазылу және үйге шақыруды смартфон арқылы жүзеге асыруда уақыт үнемдеудің тиімді екенін түсінуде, - деді А.Оспанова.
Ауруларды басқару бағдарламасы тиімділігін көрсетті
2016 жылы Қазақстанның бес аймағында ауруларды басқарудың пилоттық бағдарламасы енген болатын. Мұндағы басты мақсат - елімізде өлім-жітімді көбейткен артериалды гипертензия, қант диабетіне шалдыққан, созылмалы жүрек талмасы секілді аурулардың көрсеткішін төмендету. Аталған жоба бойынша жұмыс істеген №7 емхана қаладағы емханалар арасында жақсы көрсеткіштерге қол жеткізген.
– Бұл жобаның мақсаты – клиникалық тәжірибенің озық үлгілерін пайдалана отырып, науқастың өз денсаулығына жауапкершілігін арттыру арқылы оның жағдайын жақсартып, өмір сапасын арттыру. Осы мақсатта науқастар арасында аталған үш дертке шалдыққан науқастар жіті қадағалауға алынды. Олар ай сайын медициналық тексерілуден өтіп, анализді ұдайы тапсырып, дәрі-дәрмекпен қамтамасыз етілу мен оны қабылдауына дейінгі жағдайлар дәрігердің бақылауында болды,- деді емхананың бас дәрігері.
Нәтижесінде бүгінде емхана тіркеуге алынған науқастар арасында артериалды гипертензияға шалдыққандардың қан қысымы қалпына түсіп, қант диабетіне шалдыққандардың анализ көрсеткіштері реттелген.
Кафедра жұмыс істейді Шымшаһарда емханалар арасында кафедралар жұмыс істейтін медициналық ұйымдар көп емес. Солардың бірі – осы №7 емханада үш бірдей кафедра жұмыс істейді. Олар: педатрия, жалпы тәжірибелік дәрігерлер және Қ.А.Яссауи атындағы ХҚТУ жоғары медициналық білімнен кейінгі білім беру институтының жұқпалы аурулар мен фтизатрия кафедрасы. Соңғы атап өткен кафедраға медицина ғылымдарының кандидаты, доцент Қуаныш Кулаев жетекшілік етеді.
– Емханада институттың студенттері тәжірибелік сабақ өтуіне барлық мүмкіндік қарастырылған. Мұнда материалдық-техникалық база стандартқа сай жасақталғандықтан, халықаралық деңгейде шеберлік-сабақтар өткізуге қол жеткіздік. Өткен жылы ультрадыбыстық зерттеу жасауда Беларуссиядан білікті мамандар А.Чуканов пен И.Тихененко келіп, республикада және өңірдегі УДЗ мамандарына шеберлік-сабақ өткізді. Әрі емханаға тіркелген 50-ден аса тұрғынға тегін медициналық кеңес берді, - деді доцент Қ.Кулаев.
Бұл дәстүр биыл да жалғасын таппақ. Қаңтар айының соңында емханаға Киевтен келген профессор О.Н.Ковалевская өңірдегі УДЗ-мамандарға күретамырдағы өзгерістерді сәулелі аппарат арқылы дұрыс анықтаудың жаңа әдістерін үйретпек.
40 баланы Қайырымды жандар қуантты
Среда, 16 Январь 2019 05:23Шымкентте «Қайырымдылық керуені» акциясы жалғасын табуда. Таяуда іскер әйелдер қауымдастығының ұйымдастыруымен және танымал режиссер-продюсер Тимур Бекмамбетов, «Асыл бала» қоғамдық қорының қолдауымен шымкенттік 40 бала «Гринч» мультфильмін тегін тамашалады.
Көрсетілім алдында Тимур Бекманбетов балаларға видиосәлемдеме жолдады. Продюсер еліміздің барлық аймағында өткізіп жатқан көрсетілім адамдарды қайырымды болуға үндейтінін жеткізіп, балаларға сәттілік тіледі.
– Республикалық деңгейде өтіп жатқан акцияға өз үлесімізді қосу үшін Шымкенттегі мектеп-интернат, балалар үйіндегі тәрбиеленушілерге қолдау жасағымыз келді. Жобаға қолдау көрсеткен «MEGA Park» кинотеатрына алғысымызды білдіреміз. Бүгін балалардың жүзінен шаттықты көрдік. Әр азаматты осынай акцияларға үлес қосуға шақырамын, - деді Шымкент қалалық іскер әйелдер қауымдастығының төрайымы Эльмира Созақбаева.
Балалар қызықты мультфильмді тамашалаған соң арнайы жайылған дастархандағы тәттілерден дәм татты.
Жерлесіміз – «Айбын» орденінің иегері
Пятница, 11 Январь 2019 05:12Шымкенттік полицей Нұрлан Тасболатовқа Елбасының Жарлығымен ІІ дәрежелі «Айбын» ордені берілді.
Бұл марапат Шымкент қалалық полиция департаментінің шұғыл арнайы жасағының аға инспекторы, полиция капитаны Нұрлан Тасболатовқа көзсіз ерлікке барып, бір отбасын оттан аман алып қалғаны үшін берілді.
Республика бойынша әскери және қызметтік борышын үлгілі орындаған, заңдылық пен тәртіпті қамтамасыз ету кезінде ерлік көрсеткен 38 қызметкерге арнайы марапатты ішкі істер министрі
Қ.Қасымов Тәуелсіздік мерекесі қарсаңында табыстады.
Еске сала кетсек, Н.Тасболатов жазда түнгі кезекшіліктен үйіне оралғанда көршісінің сарайы өртеніп жатқанын көреді. Құтқарушылар келгенше көрші-қолаңмен өртті сөндіруге әрекет жасап жүрген полицей сарайда газ баллондары тұрғанын көреді. Адамдарға келетін орасан қауіптің алдын алуды көздеген азамат жалынның арасынан бір газ баллонымен қоса түтіннен есінен танған бір адамды далаға алып шығады. Екінші баллонды алып шықпақ болғанда алапат жарылыс болады. Соның салдарынан денесін күйік шалған азаматқа дәрігерлер дер кезінде көмек беріп, ажалдан аман алып қалады.
Сарбаздарға сарқыт таратылды
Пятница, 11 Январь 2019 04:39Шымкентте осылайша ата дәстүр дәріптелді. Қазақстан халқы Ассамблеясының «Қайырымдылық керуені» атты акциясы бастау алды. 6506 әскери бөлімінде Шымкент қалалық Қазақстан халқы Ассамблеясының ұйымдастыруымен «Мейірімділікке бірге» ұранымен өткен іс-шарада Отан алдындағы борышын өтеп жүрген жас сарбаздарға сарқыт таратылды.
– Туған жерін қорғап жүрген сарбаздарға елден сәлемдеме ретінде сарқыт берілді. Бұл олардың туған жерге, ата-анасына деген сағынышын басып, рухтандырады деген ойдамыз, – деді «Ынтымақ» этносаралық мәдени бірлестігінің төрайымы Гауһар Уәлиханқызы.
Қазақтың әдеп-ғұрыптарын негізге алған акция жыл соңына дейін жалғасатын болады. Қаңтарда «Сарқыт», ақпанда «Сыбаға», ары қарай «Шашу», «Асар», «Қамқор», «Тоқымқағар», «Бес жақсы» секілді атаулармен өткізілмек. Сарбаздарға бауырсақ, құрт, ірімшік, жент-талқан сынды қазақтың ұлттық тағамдары таратылды.
Қайырымдылық акциясы «Көркем» әжелер тобы бастаған концерттік бағдарламаға ұласты.
Айта кетейік, игі бастама аясында көмекке мұқтаж жандарға көңіл бөлініп, материалдық көмек көрсетілмек. Оған Ассамблея жанындағы құрылымдар, этно-мәдени бірлестіктер, өңірдегі меценаттар атсалысады.
Ардагерлер Елбасы мақаласын талқылады
Среда, 09 Январь 2019 05:05Шымкенттік ардагерлер Елбасының «Ұлы даланың жеті қыры» мақаласын студент жастармен бірге талқылады.
М.Өтебаев атындағы жоғары жаңа технологиялар колледжінде өткен басқосуға ҚР Жоғарғы мектебі Ғылыми Академиясының академигі, профессор Өмірзақ Озғанбаев қатысты.
Профессор мақалада көтерілген мәселелер терең зерделуді талап ететіндіктен, бірнеше ірі жобаларды, атап айтқанда «Архив - 2025» жеті жылдық бағдарламасын жасау қажеттігін атап өтті. Бұл жобаны жүзеге асыру барысында тарихшылардан, деректанушылар мен мәдениеттанушылардан арнайы топ құрылып, отандық және шетелдік архивтерде зерттеу-зерделеу жұмыстарын қолға алу қажеттігі де сөз болды.
– Біздің жеріміз материалдық мәдениетке қатысты көптеген дүниелердің пайда болған орны, бастау бұлағы. Тарихи жәдігерлер, ежелгі металлургия бұйымдарының, Алтын адамның қазақ жерінен табылуы соның айғағы десек болады. Бүгінгі төл тарихымызға оң көзқарас керек. Ұлы даланың ежелгі мәдени құндылықтарын әлемге паш ете білуіміз керек, - деді колледж директоры Қ.Досалиев.
Шымкент қалалық ардагерлер кеңесінің төрағасы И.Рысбаев та Елбасы мақаласының Ұлы даладағы атқа міну мәдениеті, аң стилі, Алтын адам, түркі әлемінің бесігі сияқты қырларына тоқталып өтті. Колледж студенттері ел ағаларының пікірлерін тыңдап, өз ойларын да қосып отырды.
