«Астана ЭКСПО – 2017» ҰҚ» АҚ компаниясының арнайы кестесі бойынша Оңтүстік Қазақстан облысынан 150 мың азамат «ЭКСПО – 2017» халықаралық мамандандырылған көрмесін тамашалауға барады деп жоспарланып отыр. Олардың 35 700-і студенттер мен мектеп оқушылары. Жалпы, көрмені жарнамалаудың есебінен халықаралық шараға 200 мыңдай өңір тұрғыны барады деп күтілуде.
Жыл барысында Елорадада өтетін көрмені таныстырып, оны насихаттау жұмыстары аясында аймақта бірқатар іс-шаралар өтпек. Мәселен, өңірде қазақстандық шоу-бизнес пен спорт жұлдыздарының арасында гольфтен «EXPO CUP – 2016» турнирі ұйымдастырылады. Сонымен бірге, демеушілердің көмегімен өлкетану туризмін дамыту аясында балалар үйінің тәрбиенушілеріне арналған ақпараттық тур, «SITF» халықаралық форумы, «ЭКСПО – 2017» флешмобтары мен «Болашақтың энергиясы: EXPO – Ontustik» инновациялық жобалардың республикалық шағын көрмесін өткізу жоспарланып отыр. Жыл соңына дейін «Астана ЭКСПО – 2017» ҰҚ» АҚ-мен бірлесу арқылы бұл азаматтарға халықаралық мамандар арнайы оқыту тренингтері мен курстарын ұйымдастыратын болады. «ЭКСПО – 2017» нысандарын салуға облыстың тауар өндірушілерінің қатысуына байланысты бүгінде бірқатар жұмыстар атқарылуда. Атап айтқанда, жергілікті тауар өндірушілердің арасында былтыр өткен форумның нәтижесінде түзілген меморандумның аясында көрменің құрылыс алаңдарына «Зерде Керамик» ЖШС-нан керамикалық плиталар, «Стандарт Цемент» ЖШС-нан цемент, «Ferrum Vtor» ЖШС-нан арматура, «Кентау трансформатор зауыты» АҚ-нан трансформаторлар тасымалданып, жеткізілуде. Алдағы уақытта «ЭКСПО – 2017» құрылыс алаңдарына облыстағы «Azala textile», «Mega Art», «Алем БТ» сынды тауар өндірушілерден тоқыма мата мен жиһаз өнімдерін жеткізу жоспарланып отыр.
