Биыл Ұлы Отан соғысы ардагерлері мен тыл еңбеккерлеріне жалпы сомасы 5,6 миллиард теңге көлемінде бір реттік материалдық көмек төленеді. Бұл туралы ҚР Денсаулық сақтау және әлеуметтік даму министрлігінің баспасөз қызметі хабарлады.
2015 жылы Ұлы Отан соғысына қатысушылары мен соғыс мүгедектеріне және олармен теңестірілген адамдарға, тыл еңбеккерлері мен Ұлы Отан соғысындағы Жеңіске үлес қосқан Қазақстанның басқа да азаматтарына республикалық бюджетте 5 миллиард 690 миллион 183 мың теңге қарастырылған. Ардагерлердің Астана мен Мәскеу қалаларында өтетін мерейтойлық шараларға баруы үшін бюджеттен 61,8 миллион теңге бөлінеді. “Нақты айтқанда, бір реттік материалдық көмек келесі ретте қарастырылған: Ұлы Отан соғысына қатысқандар мен мүгедектерге – 100 мың теңге; Ұлы Отан соғысына қатысқандар мен мүгедектерге теңестірілген, Жеңіске үлес қосқан азаматтарға – 70 мың теңге”, – делінген министрліктің хабарламасында.
Сондай-ақ Ұлы Отан соғысындағы Жеңіске қосқан үлесі үшін оларға теңестірілген тұлғаларға, тыл ардагерлеріне және тағы басқаларға да материалдық көмек көрсетіледі.
