Шымкент келбеті

 

Оңтүстікте төрт күнге созылған БАҚ өкілдері арасындағы спартакиада ойындары өз мәресіне жетті. Журналистерді жақындастырып, әріптестік достықты дәріптеген сайыста БАҚ қызметкерлері спорттың алты түрінен сынға түсті. Жыл сайын өтетін дәстүрлі спартакиада ойындарын Қазақстанның Журналистер одағы ОҚО филиалы ұйымдастырды.

Жарыстың алғашқы екі күніндегі ойындар нәтижесін газетіміздің өткен нөмірінде жариялаған болатынбыз. Енді бильярд бәсекесі жөнінде толығырақ айта кетсек. Шымкенттегі «Айжарық» бильярд клубында өткен тастаяқ сайысына 30-ға жуық БАҚ өкілдері қатысты. Бұл жарыста Қазақстанның Құрметті журналисі, ардагер қаламгер Байдулла Қонысбек бастаған ел ағалары сайыстың көркін қыздырды. Тартысты өткен бәсекеде «Ел бірлігі» газетінің қызметкері С.Нұрлыханов чемпион атанып, бағалы тоңазытқышқа ие болды. «Жебе» ақпараттық орталығының жетекшісі Б.Қоныс екінші орынды (үй теледидары) иемденсе, үшінші орынды «Дөңгеленген дүние» газетінің бас редакторы Талғат Орманов (үй теледидары) жеңіп алды. Бильярд сайысына демеушілік еткен Шымкент қалалық мәслихатының депутаттары сайыстың ашылу салтанатында БАҚ өкілдерін төл мерекелерімен құттықтап, еңбекте табыс тіледі. Айта кету керек, журналистер арасындағы бильярд бәсекесінің жоғары деңгейде ұйымдастырылуына республикалық «Уақыт» газетінің директоры Талғат Балтабаев ерекше үлес қосты.

 

Спартакиаданың соңғы күні шағын футбол турнирімен жалғасты. Қажымұқан атындағы орталық стадионда ерлер арасында 16 команда 4 топқа бөлініп, сайысқа түсті. Өз тобынан бірінші орынмен шыққан «Шымкент келбеті» және «Панорама Шымкента» газеттерінің командасы ширек финалда «Қазығұрт» құрамасын, жартылай финалда «Әділет» газетінің командасын жарыс жолынан шығарды. Шешуші сынға дейін талай мықтыларды сүріндірген «Оңтүстік Қазақстан» командасы финалда «Шымкент келбеті» жігіттерімен кездесті. Бұл орайда біздің ұжымның бағы жанып, спартакиаданың чемпионы болды. Ал, үшінші орын «Әділет» ұлттық апталығының командасына бұйырды.

Ең үздік шабуылшы болып облыстық ішкі саясат және дін істері басқармасының басшысы Берік Құрманғали танылды. Үздік қақпашы номинациясын Шымкент қаласы әкімдігі баспасөз қызметінің жетекшісі Нұрлыбек Жеңісбек иеленді. Қыздар арасындағы бәсекеде «Ернұр-пресс» ұжымы бірінші, «Южный Казахстан» екінші, ал, «ТВК» телеарнасы үшінші орынды жеңіп алды. Ал, жалпыкомандалық есепте «Южный Казахстан» газетінің ұжымы үздік болса, «ТВК» телеарнасы екінші орынға ие болды. Жүлделі үшінші орын «Ернұр-пресс» командасына бұйырды. Сонымен қатар, жарыста «Ең белсенді команда» номинациясы «Оңтүстік Қазақстан» газетінің бас редакторы Абай Балажанға табыс етілсе, «Ең ұйымшыл команда» номинациясы Ербол Дайрашов бастаған «Ернияз» ұжымына берілді.

Сайыстың жабылу салтанатында барлық жүлдегерлерге диплом мен ақшалай сыйлықтар тапсырылып, Құрмет грамоталарымен марапатталды. Жарыс соңында сөз алған облыстық ішкі саясат және дін істері басқармасының басшысы Берік Құрманғали биылғы журналистер спартакиадасының өте жоғары деңгейде ұйымдастырылғанын атап өтті. Сондай-ақ, осы спартакиаданың басты ұйымдастырушысы Қазақстанның Журналистер одағы ОҚО филиалының төрайымы Айгүл Қапбарова ханым салауатты өмір салтын насихаттап, спартакиадаға қатысқан барша БАҚ өкілдеріне ризашылығын білдірді.