Арыс, Түлкібас, Сайрам және Сарыағаш локоматив депосында (ДЧ-32) қаңтар айында төрт қайғылы оқиға орын алды. Бір айдың ішінде жүйткіген пойыздардың жүргізушілері қайғылы оқиғалардың алдын алу үшін 27 рет шұғыл түрде тежегішті басуға мәжбүр болған.
Осы орайда, мамандар теміржолда қауіпсіздік ережелерін сақтап, арнайы белгіленген жерлерде ғана өту керектігін ескертеді.
Теміржолда ажал құшқан баланы анасы мектепке шығарып салған екен. Алайда, бір нәрсесін ұмытып кеткен болу керек, бала үйіне кері қайтқан. Сол кезде алыстан жүйткіп келе жатқан пойыздың жанынан өте бергенде мойнындағы шарфы пойыз вагонына ілініп, бүлдіршінді сүйреп әкеткен. ТД-16 Шымкент айналым депосының еңбекті қорғау және техника қауіпсіздігі инженері Сағидулла Мәденовтың айтуынша, теміржол маңында қауіпсіздік ережелері сақтала бермейді. Соның салдары қайғылы жағдайларға алып келеді.
– Теміржолдың бойында тұратын халық малын бос жібереді, ал балалары әрі-бері мектепке өтеді. Тіпті, кейбірі сол маңайда ойнап жүреді. Біз оларға бұлай етпеу керектігін үнемі ескертеміз. Мектептерге арнайы барып, түсіндіреміз. Ең бастысы қауіпсіздік ережесін сақтаған жөн. Әсіресе, үлкендер балаларының теміржолдан өткенде абай болуына жіті назар салса екен, – дейді С.Мәденов.
Өткен жылы теміржолда 14 адам қаза болған. Машинистер әртүрлі оқыс жағдайларға байланысты пойызды 535 рет жедел түрде тоқтатуға мәжбүр болыпты.
