Шымкентте Сидней Олимпиадасының жеңімпазы, атақты былғары қолғап шебері Бекзат Саттархановқа арналған ескерткіш ашылды. Ел мақтанышына арналған ескерткіш Шымкенттегі дарынды балаларға арналған спорт интернатының аумағына орнатылды.
Мүсіннің биіктігі 3 метр. Ескерткіштің ашылу салтанатына еліміздің даңқты спортшылары, Олимпиада чемпиондары мен зиялы қауым өкілдері қатысты.
Бекзаттың есімі берілген спорт-интернатының түлектері бүгінде ел намысын түрлі халықаралық жарыстарда қорғап келеді. Бокстан бөлек мұнда жеткіншектер спорттың 7 түрімен шұғылданады. Өткен жылы ауыр және жеңіл атлетика бөлімдері ашылды. Жаңа оқу жылына іріктеу бір ай бойы жүргізіліп, әр топқа сыннан сүрінбей өткендер ғана қабылданды. Қазір мұнда 300-ден аса жеткіншек спортпен кәсіби түрде шұғылданады.
