Мықтылардың бағын ашқан
29 қыркүйек пен 5 қазан аралығына жоспарланған халықаралық бокс додасында Қырғызстан, Өзбекстан, Түркия, Украина, Тәжікстан, ҚР ұлттық құрамасы, еліміздің өңірлерінен, жалпы 200-ге жуық спортшы бақ сынауда. Іс-шараның ашылу рәсіміне Шымкент қаласы әкімінің бірінші орынбасары Қуаныш Асылов, қала мәслихатының төрағасы Бахадыр Нарымбетов, ҚР бокс федерациясының вице-президенті Дархан Қызайбаев, белгілі спорт ардагерлері қатысып, ізгі тілектерін жеткізді. Қала мәслихатының төрағасы сайыстың 43-і рет өткізілуі аз уақыт еместігін, бұл турнир тарихымызға деген тағзым екенін атап өтті. Биылғы бәсеке ұлттық құраманың спортшыларын алдағы жауапты сындарға іріктеу болмақ.
Олимпиада ойындарына қатысушы Закир Сафиуллин, Илияс Сүлейменов, Асланбек Шымбергенов осы бәсекеде тәжірибесін ұштады. 2016 жылы турнирдің үздік боксшысы болған Жомарт Ержан 2017 жылы әлем чемпионатының қола жүлдесін жеңіп алды. Асланбек Шымбергенов әлем чемпионы атанып, Олимпиада шаршы алаңында өнер көрсетті. Көрші Өзбекстан, Қырғызстан, Тәжікстан спортшылары осы турнирге ұдайы келеді.
Жалпы айтқанда, Моңғолия, Түркіменстан, Тәжікстан, Қырғызстан, Өзбекстан, Қытай боксшылары үшін дәстүрлі мемориал тәжірибе алаңына айналған. Тіпті Армения, Венгрия, Түркиядан да боксшылар бақ сынап жүр.
Әлем чемпионы Болат Жұмаділов, олимпиада чемпионы Василий Жиров, Ермахан Ыбырайымов, Бақтияр Артаев осы турнирде топ жарған.
Париж Олимпиадасынан кейінгі алғашқы дода
Биылғы бәсекенің жөні бөлек. Ұлттық құраманың үздіктері, нөмірі бірінші спортшылардың бәрі де дәстүрлі турнирге қатысуда. Яғни, ел боксшылары үшін Париж ойындарынан кейінгі алғашқы доданың маңызы зор. Олимпиададан кейін біраз үзіліс алған қазақ боксшылары шаршы алаңға қайта оралып, ұлттық құрама сапына ілігу үшін бақ сынайды. Жалпы елімізден төрт құрама қатысады. Ұлттық құраманың бірінші нөмірлі боксшылары арасынан Асланбек Шымбергенов, Қамшыбек Қоңқабаев (+92 келі) және Нұрбек Оралбай (80 келі) ғана босатылыпты. Қалған үздіктер Шымкент шаршы алаңында бәсеке көрігін қыздырып жатыр.
Ұлттық құраманың бас бапкері Қайрат Сәтжанов турнирдің маңызына тоқталып өткен еді.
– Олимпиада ойындары аяқталған соң, бокстан ересектер командасы қандай да бір жарысқа қатысқан жоқ. Алдағы уақытта боксшылар Қарақозы Әбдәлиевті еске алуға арналған ірі халықаралық бәсекеде бақ сынайды. Бұл додаға ұлттық құрама спортшыларының барлығы да қатысады. Турнирге дейін Түркістан облысындағы «Алма тау» базасында Украина құрамасымен бірлескен жаттығу жиынын өткіземіз. Азия біріншілігіне қатысатын кейбір салмақтардағы спортшылар Қ.Әбдәлиев турнирінен соң анықталады. Яни, осы жарыс ұлттық құрама боксшылары үшін Азия біріншілігіне іріктеу болады, – деді Қ.Сәтжанов.
Бокстан Қазақстан құрамасы биыл Иорданияның Амман қаласында өтетін Азия чемпионатына қатысады. Азия чемпионаты 30 қараша мен 12 желтоқсан аралығына жоспарланып отыр.
