ҚР Президенті Жарлығымен Ерлан Қуанышұлы Айтаханов Шымкент қаласының әкімі болып тағайындалды.

Әкім

Қала активіне мегаполистің жаңа әкімін таныстыруға ҚР Президент Әкімшілігінің басшысы Қырымбек Көшербаев арнайы келді.

Жиында ҚР Президент Әкімшілігінің басшысы әкімдерге халық пен билік арасындағы диалогты қамтамасыз етуде, Президент тапсырмаларын орындауда зор жауапкершілік жүктеліп отырғанын айтты. «Қазіргі таңда ең басты міндет те, мақсат та – халықтың басқарушы, атқарушы органдарға деген сенімі мен қолдауын нығайту, халықтың үмітін ақтау» деді Қырымбек Елеуұлы қала әкімдігінің актив мәжілісінде.

Қырымбек Елеуұлы мемлекеттік саясаттың негізгі басым бағыттарын атай келе Ерлан Айтаханов Шымкент қаласының жаңа әкімі лауазымына лайық деп мәлімдеді.
– Мемлекет басшысының кадрлық өзгерістер бойынша тапсырмасымен арнайы келіп отырмын. ҚР Президенті Жарлығымен, Шымкент қаласы мәслихаты депутаттарының келісімімен Ерлан Қуанышұлы Шымкент қаласының әкімі болып тағайындалды.

Бұл азаматты өздеріңіз жақсы білесіздер. Бүгінгі таңда еліміз жаңа қарқынмен дамып, жаңа серпіліс үстінде. Дамудың жаңа жолдарын айқындау, әділетті қоғам қалыптастыру, билік пен елдің арасындағы диалогты қамтамасыз ету – басты талап.

Қасым-Жомарт Тоқаев ел экономикасын жаңа деңгейге көтеру, халықты жұмыспен қамту, ел азаматтарының табысын көбейту, жаңа жұмыс орындарын ашу, әлеуметтік қолдауды нақты ұйымдастыру, аймақ өндірісін қарқынды дамыту, мемлекеттік қаржы саласын нығайту секілді көптеген мәселені шешуді негізгі міндеттер ретінде айқындап берді.

DSC 4552

Бүгінгі өтпелі кезеңде осынау тапсырмаларды орындауға бәріміз жұмыла жұмысқа кірісуіміз керек. Шымкент қаласында да шешімін күткен мәселелер бар. Шымкент қаласы жаңарып, дами беруі тиіс. Жаңа әкім қаланың әлеуметтік-экономикалық дамуына бар күш-жігерін салады деп сенеміз, – деді Қырымбек Елеуұлы.

Жиын барысында Ерлан Қуанышұлы Қазақстан Республикасының халқы мен Президентінің алдында, Отанды өркендету ісіне барлық күш-жігері мен білімін жұмсайтынына салтанатты жағдайда ант берді.

Ерлан Қуанышұлы 1971 жылы 10 желтоқсанда ОҚО Алғабас ауданында туған. Экономика ғылымдарының кандидаты.
М.В.Ломоносов атындағы Мәскеу мемлекеттік университетін, Қазақ мемлекеттік заң академиясын тәмамдаған.

Еңбек жолын 1994 жылы Alem Bank Kazakstan кредит беру департаментінің экономисі болып бастаған Ерлан Қуанышұлы түрлі жылдары ОҚО әкімінің орынбасары, ҚР Президенті Әкімшілігінің мемлекеттік инспекторы қызметін атқарған.

2014 жылдан бастап ОҚО әкімінің орынбасары, 2016 жылдан бастап Отырар ауданының әкімі лауазымын атқарып келді.

Жалақы қарызы азаюда

Пятница, 26 Июль 2019 03:32

Шымкент қаласында жыл басынан бері еңбек қауіпсіздігін сақтау бойынша 586 тексеру жүргізілген. Нәтижесінде 477 еңбек заңдылығын бұзу фактісі анықталып, ескертпелер түзілген. Кәсіподақ ұйымдары 55 еңбек дауын шешуге және 5 жазатайым оқиға орын алған жағдайларды зерттеуге қатысты.

«Шымкент қаласы кәсіподақтар орталығы» аумақтық кәсіподақтар бірлестігінің төрағасы Берік Бекжанов еңбек инспекциясымен бірге, үшжақты құрылған комиссия жұмысы нәтижесінде жүзеге асқан бірқатар шаруаларды баяндады.

– Үш жақты комиссия жалақы қарыздары мәселесін шешу бағытында тиісті жұмыс атқарды. Жыл басынан бері 9 мекеменің 819 жұмыскер алдындағы 121,8 млн теңге жалақы қарызы болса, 6 айдың қорытындысымен оның саны 3 мекемеге азайды. 740 жұмыскердің 107 млн теңге жалақы қарызы өтелді.

Дегенмен, 6 кәсіпорынның 79 жұмыскер алдындағы 14,6 млн теңге жалақы қарызы қалып отыр. 2019 жылдың 6 айында жазатайым оқиғалар саны өткен жылдың тиісті кезеңімен салыстырғанда 13 оқиғаға азайды. Қалада 24 жазатайым оқиға болып, оның салдарынан 24 адам зардап шеккен. Ауыр жарақаттанған адам саны - 8, жеңіл жарақаттанғаны - 13, - деді Берік Айдарбекұлы.

Сондай-ақ, Шымкентте жұмыс істеп тұрған 21 661 кәсіпорынның 1033-де ұжымдық шарт жасалған. Бүгінде кәсіподақтар орталығы жанында жұмыс істейтін татуласу орталығында жалпы 392 адамға көмек көрсетілген. Кәсіподақ төрағасы еңбек шартын жасасудың маңыздылығы, цифрлық жүйені енгізу, еңбек заңдылықтарына мониторинг жүргізудің маңыздылығы жөнінде айтып өтті.

Шымкент қаласында жыл басынан бері адвокаттық және нотариаттық қызметпен айналысу құқығына лицензия беру бойынша аттестациялау комиссиясының 4 отырысы өткізілген.

алимент1

Аттестаттаудан 46 үміткер өтсе, оның ішінде адвокатура бойынша – 21, нотариат бойынша 25 адамға лицензия берілген. Бұл туралы Шымкент қалалық Әділет департаментінің 2019 жылдың І жарты жылдығындағы атқарылған жұмыстар қорытындысы бойынша брифингінде айтылды.

Әділет департаменті басшысының міндетін атқарушы Бақтияр Камалов 2019 жылғы алғашқы жарты жылдықта жүзеге асырылған жұмыстар жөнінде баяндады.

Қалада алимент борышкерлеріне қатысты мәжбүрлеп өндіру шараларын қолдануда сот орындаушыларының, құқық қорғау органдары, жұмыспен қамту, мемлекеттік кірістер басқармасы өкілдерімен бірлескен арнайы жұмыс тобы құрылған. Жалпы қалада алимент өндіру бойынша 8222 іс бар. 59 адам әкімшілік жауапкершілікке тартылған.

Бүгінде Шымкент қаласы бойынша 155 жеке сот орындаушы, 4 аумақтық сот орындаушылар бөлімдерінің құрамында мемлекеттік 8 сот орындаушы қызмет атқаруда. Шымкент қаласынан Түркістан облысына ауысқанына байланысты олардың саны 14-ке азайған.

– «2008 жылға дейін тіркелген цифрланған азаматтық хал актілерін өзектендіру» жөнінде Жол картасы әзірленген еді. 1 шілдедегі жағдай бойынша азаматтық хал актілерінің түрлерін «АХАЖ» ақпараттық жүйесіне енгізуде Шымкент қаласы бойынша өзектендірілуге тиіс 946 639 акт жазбасы өңделуде.

2019 жылдың 1 тамызынан бастап барлық мемлекеттік органдарға, мемлекеттік корпорация және нотариустарға 2008 жылға дейін тіркелген мұрағат акт жазбаларына қол жетімділік беру жоспарлануда, – деді департамент басшысының міндетін атқарушы.

1 шілдеден бастап коммерциялық ұйымдарға жататын заңды тұлғаларды, филиалдар мен өкілдіктерді мемлекеттік тіркеу функциялары әділет органдарынан «Азаматтарға арналған Үкімет» мемлекеттік корпорациясына берілді. Ал функияларды мемлекеттік корпорацияға берген сәттен бастап тіркеуші органның қызметін бақылауды әділет департаменттері жүзеге асырады.

Шымкент қалалық Статистика департаментінің басшысы Ерназар Құлтаев БАҚ өкілдерімен брифинг өткізді. Департамент басшысы 2019 жылғы қаңтар-маусымдағы қаланың әлеуметтік-экономикалық даму көрсеткіштерін, атап айтқанда, демография, тұрмыс деңгейі, еңбек нарығы және еңбекақы төлеу, шағын және орта кәсіпкерлік, өнеркәсіп, көлік, сауда және байланыс салалары бойынша 6 айлық қорытындыларды баяндады.

Статистика

– 2019 жылғы 1 маусымдағы жағдай бойынша қала халқының саны 1 022 449 адамға жетті. Өткен жылғы тиісті кезеңмен салыстырғанда халық саны 2 пайызға немесе 20 158 адамға артқан. 2019 жылғы қаңтар-мамырда халықтың табиғи өсімі 8900 адамды құрады.

Республика бойынша сәби туу мен табиғи өсім көрсеткіштері бойынша қала 4-орында. Бес айда қала бойынша 10 919 бала дүниеге келген немесе 2 пайызға өсті, - деді департамент басшысы.

Шымкентте І тоқсандағы жалпы өңірлік өнім көлемі 470 901,1 млн теңгені құрап, 2 пайызға артып отыр. Өнеркәсіп – 32,6%, көлік және қоймалау – 15,6%, көтерме және бөлшек сауда – 13,9%-ды құрайды. 2019 жылғы 1 сәуірдегі мәлімет бойынша шағын және орта кәсіпкерліктегі жұмыспен қамтылғандардың саны 138 482 адамға жетті.

Жалпы, қаладағы жұмыс күші – 430,6 мың адам. Жұмыспен қамтылғандары - 408,8 мың адам. Ал 126,1 мың адам өз бетінше жұмыспен қамтылды. Сондай-ақ, халықтың жұмыспен қамтылу сауалнамасының нәтижелері бойынша 2019 жылғы І тоқсанда жұмыссыздық деңгейі 2018 жылғы 1 тоқсанмен салыстырғанда сол деңгейде – 5,1% бойынша қалып отыр.

Ерназар Сейітханұлы алдағы халық санағына да дайындық басталғанын, бірқатар жұмыстар атқарылып жатқанын мәлімдеді.

Жолдарға бақылау күшеюде

Пятница, 19 Июль 2019 03:59

Шымкент қаласы бойынша көліктік бақылау инспекциясы жыл басынан бері көлік заңнамасының талаптарын сақтамауға қатысты 674-тен астам құқық бұзушылықты анықтаған. Жалпы сомасы 100 млн теңгеге жуық әкімшілік айыппұлдар өндірілген. Анықталған заң бұзушылықтардың тең жартысы – жүк көліктерінің белгіленген салмақтық және көлемдік тәртіпті сақтамауына қатысты. Жалпы, мегаполисте «Шымкент қаласының жолдарында ауыр салмақты автокөліктерге бақылауды қамтамасыз ету» бойынша 2018-2019 жылдарға арналған бірлескен Жол картасы аясында бірқатар жұмыстар атқарылуда.

60494470 132845047811317 5060566974816321536 o1

Елбасы Н.Назарбаев «Nur Otan» партиясының ХVIII съезінде қазіргі заманғы жергілікті жолдар желісін кеңейту Үкіметтің негізгі міндеті екенін атап көрсеткен-ді. 2025 жылға қарай облыстық және аудандық маңыздағы жолдардың 95 пайызын жақсарту мақсатында қосымша 350 миллиард теңге бөлуді тапсырғаны мәлім. Осыншама қаржы жергілікті жолдар желісін кеңейтумен қатар олардың сақталуын қамтамасыз етуге бағытталмақ.

Индустрия және инфрақұрылымдық даму министрлігінің Көлік комитетінің мәліметіне қарағанда, елімізде 55 мың өзі аударғыш ауыр салмақты жүк көлігі бар. Олар, негізінен, кеніштерден инертті материалдар тасумен айналысқанымен, күзде астық тасуға да кеңінен пайдаланылып келеді. 2018 жылы осындай өзі аударғыш көліктер тарапынан жол берілген 4384 заң бұзушылық әшкереленіп, 321 миллион теңге айыппұл салынған.

Алайда, мамандардың пікірінше, бұл сома еліміздің жолдарына келтірілген орасан зор залал орнын толтыра алмайды.
Жыл басында «Nur Otan» партиясы фракциясының мүшелері К.Мұсырман, М.Айсина, И.Аронова, С.Звольский, Қ.Қаракен және А.Платонов осы мәселеге орай депутаттық сауал жолдаған еді.

– Өкінішке қарай, «Автомобиль көлігі туралы» қолданыстағы Заңның орындалуын қатаң қадағалап, автожолдарды ауыр салмақты көліктердің бүлдіруіне жол бермеуге тиісті өңірлік көліктік бақылау инспекциялары өздеріне жүктелген міндетті толық атқарып отыр деу қиын. Себебі олардың қызметкерлерінің саны аз және материалдық-техникалық жабдықталуы жеткіліксіз.

Еліміздің автомобиль жолдарын сақтауды жақсарту мақсатында көлік бақылау инспекциясымен қатар, жол-патрульдік полициясына да ел аумағында автокөлік құралдарының рұқсат етілген салмақтық өлшемдерді сақтауын бақылауды жүзеге асыру функциясын беру мәселесін қарастырған жөн, – деген еді Мәжіліс депутаттары ұсыныстарын да жолдап.

516 әкімшілік-құқық бұзушылық

61740319 134701797625642 130500360790867968 n-1

Шымкент республикалық қала статусына ие болғаннан кейін 2018 жылдың қыркүйек айында Шымкент қаласы бойынша көліктік бақылау инспекциясы жаңадан құрылып, жұмысын бастады. Қаланың автомобиль жолдарының сақталуын қамтамасыз ету мақсатында 2018 жылдың 12 желтоқсанында Шымкент қаласы әкімінің тапсырмасымен «Шымкент қаласының жолдарында ауыр салмақты автокөліктерге бақылауды қамтамасыз ету» бойынша 2018-2019 жылдарға арналған бірлескен Жол картасы әзірленді.

Шымкент қаласы бойынша көліктік бақылау инспекциясының басшысы Ержан Жолдасов та осы мәселеге орай өткізілген мәжілісте мемлекеттік кірістер департаменті, табиғи ресурстар және табиғат пайдалануды реттеу басқармасы, жергілікті полиция өкілдері және карьер қазушылар мен тасымалдаушыларға заңнаманың талаптарын түсіндіріп берген-ді.

Жол картасы аясында инспекция жергілікті полиция қызметімен бірге рейдтік іс-шараларды жүзеге асыруда. Нәтижелері де баршылық. 2018 жылдың қыркүйек айынан бастап бүгінге дейін инспекция тарапынан 516 әкімшілік-құқық бұзушылық анықталып, 75 млн 789 мың теңгеге әкімшілік айыппұл мен жол жүру алымдары өндірілді.

Жүк жөнелтушілер мен тасымалдаушыларға тауар-көлік құжаттарының берілмеуі, жүктерді тиеу кезінде артық салмаққа жол беру сынды құқық бұзушылықтар да бар.
Инспекция қызметкерлері тарапынан жеке тұлғаға тиесілі тіркемесі бар «Хово» карьер автокөлігін өлшеп-тексеру барысында рұқсат етілген салмақтан тыс салмақ тиелгені анықталды.

Артық салмаққа жол берген осы автокөлік иесіне ҚР жүк тасымалдау ережесінің талаптарын бұзғаны үшін 481 мың теңге әкімшілік айыппұл салынды. Бұл жерде де жүк жөнелтуші әкімшілік жауапкершіліктен жалтару үшін, тауар-көлік құжатын бермегені мәлім болған.

Шымкент қаласы бойынша көліктік бақылау инспекциясының басшысы Ержан Жолдасовтың айтуынша, Шымкент қаласы әкімдігі тарапынан бүгінде 38 карьер иелерімен қосымша келісім жасалған. Яғни, 2019 жылдың мамыр айына дейін карьерлерге таразы жабдықтарын орнату міндеттелген болатын.

Алайда, қазір бұл талаптар сақталмай келеді. Яғни карьерлерге жүк көліктерін өлшеуге арналған таразы жабдықтары орнатылмаған және жүк жөнелтушілер тарапынан тасымалдаушыларға жүктің құжаттары да берілмей келеді. Инспекция тарапынан бұл талаптар бойынша 97 құқық бұзушылық анықталып, тиісті шара қолданылған.

Талап күшейеді

«Автомобиль көлігімен жүк тасымалдау қағидасына» сәйкес жүк жөнелтуші тасымалдаушыларға тауар-жүк құжатын беруге, жөнелтілетін жүктің массасын анықтауға мүмкіндік беретін таразы жабдықтарын орнатуға және автокөліктерді бағытқа жіберу кезінде салмақтық өлшемдерін сақтауға міндетті.

Ал ауыр салмақты жүк тасымалдағаны үшін салынатын айыппұл көлемінің өсуі әкімшілік құқық бұзушылық туралы кодекстің 571-бабының 6-тармағында көзделген. Мысалы, артық салмақ 1-5 тоннаға дейін, 5-10 тоннаға дейін, 10 тоннадан жоғары болып белгінеді.

Артық салмақ неғұрлым жоғары болған сайын айыппұлдың көлемі де арта береді. Салынған әкімшілік айыппұлды жүк тасымалдаушылар 7 жұмыс күннің ішінде төлесе, 50 пайыз жеңілдік қарастырылған.
Биыл Көлік заңнамасына да бірқатар өзгеріс енгізіліп отыр. Яғни, бұрын тасымалдаушылар бөлінбейтін заттарға арнайы рұқсат алушы еді. Енді тамыз айынан бастап рұқсат берілмейді.

– 2019 жылдың сәуір айында ҚР көлік мәселелері бойынша бірқатар заңнамалық актілерге өзгерістер мен толықтырулар енгізілді. Бұған дейін ауыр салмақты бөлінетін және бөлінбейтін жүктерге де арнайы рұқсат құжаттары берілген болса, жаңа Заңға сәйкес, 2019 жылдың тамыз айынан бастап, ҚР жалпы қолданыстағы автомобиль жолдарында ауыр салмақты бөлінетін жүктерді тасымалдау кезінде арнайы рұқсат құжаттары берілмейді.

Яғни ауыр салмақты бөлінетін жүктерді автомобиль көлігімен тасымалдауға ешқандай жағдайда да рұқсат етілмейді. Осыған байланысты бөлінетін жүктерді автомобиль көлігімен тасымалдау кезінде арнайы құжаттардың берілмейтінін ескере отырып, салмақ талаптарын сақтап жүруді сұраймыз, – дейді Ержан Жақсылықұлы.

Шымкент қаласының жолдарында ауыр салмақты автокөліктерге бақылауды қамтамасыз ету бойынша құзырлы органдардан жауапты тұлғалар белгіленіп, арнайы бұйрықпен жұмыс тобы да құрылған. Құрылған жұмыс тобы қаладағы жолдармен жүк көліктерінің қарқындылығына талдау жүргізді.

Нәтижесінде қаланың 7 көшесіне – Ю.Гагарин, Б.Алпысбаев, Н.Исмаилов, Т.Рысқұлов, Т.Өтегенов, С.Бәйтереков, І.Жансүгіров көшелеріне салмағы 8 тоннадан асатын жүк автокөліктеріне салмақтық шектеу белгілерін қою туралы шешім қабылданып, белгілерді орнату бойынша құзырлы мекемелерге ұсыныс жолданды.

Бүгінде Шымкент қаласы бойынша 2811 шақырым автомобиль жолдары бар. Мамандар есептегендей, қала жолдары көктем, жаз айларында 10 тоннадан артық жүкті көтере алмайды. Бүгінде қала ішіндегі 12 көшеде салмағы 8 тоннадан аспайтын жүк автокөліктері жүреді. Ал асатындарға шектеу қойылмақ.

27 заңсыз орын анықталды

Инспекция мамандарының мәліметіне қарағанда, Шымкент қаласы аумағында инертті материалдарды жинақтайтын 27 заңсыз орын анықталды. Ол қалалық жер қатынастары басқармасымен бірлесіп, осы орындардың қандай мақсатта берілгеніне талдау жүргізу кезінде анықталған. Мәселен, 14 жер – үй құрылысы үшін, 11 жер – дүкен құрылысы үшін, 1 жер – мешіт құрылысы үшін, 1 жер ауыз су құдығын қазуға және тағы басқа мақсаттарға берілгені мәлім болды.

Заңсыз жұмыс істеп тұрған құм-тас жинақтайтын орындардың жұмысын тоқтату жөніндегі инспекцияның ұсынысы Шымкент қаласы әкімдігіне жолданып, құзырлы мемлекеттік органдармен бірлесіп, жұмыстар жүргізілуде. Одан бөлек, қаланың 6 жеріне, кіреберіске арнайы автоматтандырылған өлшеуіш қою да жоспарда бар. Орнатылған жағдайда күндіз-түні бақылау жүргізіледі.

Сондай-ақ, Шымкент қаласындағы проблемалық мәселелердің бірі – құқық бұзушылыққа жол берген жүк көліктері үшін айып тұрағының болмауы. Бүгінде қала аумағында коммуналды меншіктегі 2 айып тұрағы және жеке меншіктегі 1 айып тұрағы жұмыс істеп тұр. Өкінішке қарай, бұл айып тұрақтарында бүгінде үлкен жүк көліктерін қабылдауға мүмкіндік жоқ.

Осыған орай жергілікті атқарушы орган тарапынан Шымкент қаласының аумағынан жер көлемі үлкен, жүк көліктерін қабылдау мүмкіндігі болатын айып тұрағы қызметін ұйымдастыру туралы ұсыныс жолданды.

Салықтан жалтаратындар бар

Қаладағы карьер иелері, тасымалдаушыларға талап күшейді. Мемлекеттік кірістер департаментінің өкілдері жеке карьер қазушыларға, тасымалдаушыларға тіркеліп, заң аясында жұмыс жүргізуді ескертеді. Өйткені, тасымалдаушылардың да, карьер иелерінің арасында да салықтан жалтаратындар бар.

Қала әкімі Ғабидолла Әбдірахымов та қала экономикасын «көлеңкелі бизнестен» арылту керегін мәлімдеген еді. Табысын жасырып, салықтан жалтаратындарға шара көруді күшейту қажеттігін айтқан.
Қалалық мемлекеттік кірістер департаменті өкілдерінің есептеуінше, қалада тіркелмеген кәсіпкерлер көп.

Бұл бюджетке түсетін салықтың көлемін азайтады. Карьер иелерінің арасында жалдамалы жұмысшыларын жасыратындары да бар. Сол себептен енді заңсыз құм-тас тасушыларға, карьер иелеріне де бақылау күшейіп, шара қолдану да қатаңдатылмақ.

Грек-рим күресінен елордада кадеттер арасында өткен Азия біріншілігінің жеңімпазы Нұртас Қыдырбайға сый-құрмет көрсетілді. Шымкент қалалық дене шынықтыру және спорт басқармасының басшысы Әлібек Нұртаев жеңімпаз спортшыны қабылдап, сый-сыяпат табыс етті.

452745354

4-7 шілде аралығында Нұр-Сұлтан қаласында өткен күрестен кадеттер арасындағы Азия чемпионатында Шымкент қаласының №15 жекпе-жек спорт мектебінің оқушысы Нұртас Қыдырбай жеңімпаз атанып қайтқан-ды. Нұртас Қыдырбай – болашағынан үміт күттіретін дарынды балуан. 110 келі салмақта белдесетін ол құрлық сайысында қарсылас шыдатқан жоқ. Финалда етжеңді үнді балуанын жеңіп кетті.

Жас балуан №15 жекпе-жек спорт мектебінде 6 жылдан бері жаттығып жүр. Жеке бапкері – Данияр Сәрсенбаев. Бапкері шәкіртінің өте талапшыл, алғыр екенін айтады. Қарсыластарынан жылдамдығы жағынан артықшылығы бар. Елорда кілемінде де шапшаңдығымен қарсыластарынан басым түсті.

Мектеп директоры Ермек Байдуашов та шәкіртіне қолдау көрсетіп қайтты. Бұл мектептің күрес түрлерінен жеңісті дәстүрі бар. Міне, грек-рим күресінен ауыр салмақта тағы бір дарынды балуан шығып отыр.

Шымкенттегі «Көрме орталығы» ғимаратында «Қазақстанның үздік тауары» аймақтық көрме-байқауы және «Оңтүстік өнімдері» атты көрме-жәрмеңкесі өтті.

Көрмедегі байқау 2

Көрме-жәрмеңкеде Шымкент қаласындағы тамақ, фармацевтикалық, инженерлік, жеңіл және құрылыс индустриясы өнімдерінің 100-ге жуық отандық тауарөндіруші компания өз өнімдерін ұсынды.

Көрмені Шымкент қаласы әкімінің орынбасары Гүлжан Құрманбекова, Шымкент қаласы «Атамекен» кәсіпкерлер палатасы өңірлік кеңесінің төрағасы Қайрат Молдасейітов, Палата директоры Нұрлан Қабыштаев аралады. Көрме-жәрмеңкенің мақсаты – жергілікті өндірушілерді қолдау. Алғаш рет ондаған жаңа компаниялар да қатысуға өтініш берген.

Шымкент қаласы әкімдігі мен Кәсіпкерлер палатасы бірлесе ұйымдастырған іс-шара аясында «Халық тұтынатын үздік тауарлар», «Өндірістік мақсаттағы үздік тауарлар», «Үздік азық-түлік тауарлары» номинациясының иегерлері анықталды. Жеңімпаздар жыл соңында Нұр-Сұлтан қаласында өтетін “Қазақстанның үздік тауары” республикалық байқауына қатысады.

Сондай-ақ, ең үздік компаниялар таңдалып, аймақтық номинациялармен марапатталды. Марапаттау рәсіміне Шымкент қаласы мәслихатының хатшысы Ғани Ташқараев қатысты. Көрме күні бойы жалғасып, келушілерге ойын-сауық бағдарламалар, сыйлықтар мен лотореялар ойнатылып, бағалы сыйлықтар табысталды.

Шымкент қаласын дамытудың 2023 жылға дейінгі кешенді жоспары – қала үшін маңызды құжат. Кешенді жоспарды іске асыру нәтижесінде 2023 жылға қарай ЖІӨ көлемі 3,5 трлн теңгеден аспақ. Өнеркәсіп көлемі екі есеге өсіп, 60 мыңнан астам жұмыс орындары ашылады. Шымкент қаласының әкімі Ғабидолла Әбдірахымов әкімдіктің кеңейтілген отырысында жоспарды іске асыру бойынша нақты тапсырмалар берді.

DSC 1692

Ең алдымен 10 күннің ішінде іске асырудың жоспары дайындалып, бекітіледі. Мәжілісте қала әкімі Ғ.Әбдірахымов бұл бағытта атқаратын негізгі жұмыстардан хабардар етіп, үлкен жауапкершілік жүктеліп отырғанын айтты. Негізінен 10 бағыттан тұратын кешенді жоспарға 89 жоба енген. 1 трлн теңгеден астам қаржы қаралған.

Стратегиялық маңызды кешенді жоспар көлік инфрақұрылымы, тұрғын үй құрылысын дамыту, білім беру, спорт, мәдениет, денсаулық сақтау, абаттандыру, қауіпсіздікті сақтау, индустриалды аймақтарды дамыту бағыттарын қамтиды.

– Жалпы, бұл кешенді жоспар Елбасының 2018 жылы 29 қыркүйектегі Шымкент қаласын әлеуметтік-экономикалық дамытуға қатысты кеңестері мен берілген хаттамалық тапсырмаларына сәйкес, Мемлекет басшысы
Қасым-Жомарт Тоқаевтың мегаполиске жасаған іс-сапары барысында қойған нақты тапсырмалар бойынша әзірленуде.

Жоба бойынша республикалық бюджет есебінен 299 млрд теңге, жергілікті бюджеттен 81 млрд және мемлекеттік-жекеменшік әріптестік аясында 68 млрд теңге қаржы қарастырылып отыр. Мемлекеттік органдардың, министрліктердің келісімін алдық. Қаржы да нақты есептелген, – деді қала әкімі.

Негізгі 10 бағыт

Қала әкімі жиында қамтылып отырған 10 бағыттың шаһардың әлеуметтік-экономикалық дамуға қосар үлесін егжей-тегжейлі баяндады. Әрбір жобаның маңызды тұстары айтылды.
Бірінші бағыт – тұрғын үй-коммуналды шаруашылықты дамыту бойынша 30 жоба жүзеге асырылады. Оған 181 нысан енгізіліп отыр.

Әуежай

Оның көбісі шағынаудандарға тиесілі. Құны 9 млрд теңгені құрайтын АГРС-3 газ тарату станциясының құрылысы биыл басталады. Республикалық бюджеттен ақша бөлінген. Екі жылдың ішінде нысан ел игілігіне берілуі қажет.
Қалада кәріз жүйесі мәселесі күрделі. Қазіргі уақытта кәріз жүйесімен қамтамасыз етілу көрсеткіші - 45 пайыз. Осыған орай қалада тағы 2 тазарту қондырғысы салынады.

Ал «Энергоорталық-3» мекемесі бойынша жеке инвесторлар 190 млрд теңгеге үлкен газ станциясын салуды жоспарлап отыр. Ол қаладағы барлық жылу беру мәселелерін шешеді.

Екінші бағыт – көлік-инфрақұрылымын дамыту бойынша 11 жоба іске асырылады. Бүгінде ұзындығы 31 шақырымдық А2 айналма жолын қайта құру жұмыстарының бірінші кезеңі басталып кетті. Ұзындығы 21 шақырым Қонаев даңғылының жалғасы бойынша да құрылыс жүруде.

Шымкент әуежайының жаңа терминалының құрылысы да басталды. Жоспар бойынша инвесторлар келесі жылдың соңына дейін қалада жаңа әуежай терминалы іске қосылады. Теміржол вокзалын қайта құру бойынша барлық құжаттамалар дайын. «Қазақстан теміржолы» компаниясымен келісім бойынша биыл қайта құру жұмыстары қолға алынбақ. Қаражат көлемі – 4,2 млрд теңге.

ТЖ вокзал

Тұрғын үй құрылысын дамыту – өзекті мәселе. Қалада үй және жер кезегінде 130 мыңдай адам тұр. Жоспар бойынша 2023 жылға дейін 20 мың 794 пәтер, 319 көпқабатты үй пайдалануға беріледі. Яғни тұрғын үй кезегі екі есеге дейін азаймақ.

Сондай-ақ, қалада білім беру, дене шынықтыру және спорт, мәдениет, денсаулық сақтау салалары бойынша да бірқатар жобаларды жүзеге асыру жоспарлануда. Атап айтқанда қосымша 23 500 орынды 15 жаңа мектеп,
Қажымұқан атындағы орталық стадионды қайта құру, 2100 орынды Конгресс холл орталығы салынады. Биыл 2 аурухананың күрделі жұмыстары басталады. Сонымен қатар, жеке кәсіпкерлер 1000 орынды көпсалалы аурухана салмақ. Ол еліміздегі ең заманауи аурухананың бірі болады деп жоспарлануда.

Қалада абаттандыру, қауіпсіздікті сақтау, индустриалды-аймақтарды дамытуда да бірқатар жаңа нысандар қолға алынады. Атап айтқанда, қала әкімінің тапсырмасына сәйкес, Қошқар ата өзені бойын абаттандыру жұмыстары 1 жылдың ішінде аяқталуы тиіс. Бүгінде қауіпсіздікті арттыру бойынша бірыңғай басқару орталығының құрылысы басталып кеткен.

Оған жергілікті бюджеттен 1 млрд теңге бөлінген. Осылайша Шымкент – ең қауіпсіз қала болуы тиіс.
Алдағы уақытта қалада тағы 2 индустриалдық аймақ құрылып, онда жаңа кәсіпорындар іске қосылып, қайта өңдеу өнеркәсібі дамытылады.

Күтілетін нәтиже

Кешенді жоспарды іске асыру нәтижесінде 2023 жылға қарай ЖІӨ 3,5 трлн теңгеден асады. Өнеркәсіп өнімінің көлемі екі есеге ұлғайып, 60 мыңнан астам жұмыс орны құрылады. Тұрғын үймен қамтамасыз ету бір адамға 24-тен 27 шаршы метрге дейін артады.

Шымкентте орталықтандырылған сумен жабдықтау үлесі 93-тен 98%-ға дейін, табиғи газбен қамтамасыз ету – 92-ден 98%-ға, орталықтандырылған кәрізге қол жеткізу – 49-дан 75%-ға дейін, сапалы электрмен жабдықтау 91-ден 96%-ға дейін ұлғаймақ. Жолдардың өткізу қабілеті тәулігіне 75 000 көлікке дейін артады.

Жалпы, бюджетке жүктемені азайту үшін, 836 млрд теңге немесе жоспарланған соманың 65% жеке инвесторлар есебінен жүзеге асырылатынын да айта кеткен жөн.

«Жұмыла іске кірісу керек»

ҚР Премьер-министрі Асқар Мамин жуырда Үкімет отырысында Ұлттық экономика министріне және Шымкент қаласының әкімдігіне кешенді жоспарды іске асыру бойынша Shymkent city шағынауданында арнайы экономикалық аймақ құруға тапсырма берген еді. АЭА бойынша шетелдік және отандық құрылыс компанияларға салық жағынан жеңілдіктер беріледі.

Қала әкімі АЭА құру қажеттігін айтып, сонда инвестицияларды тез ақтайтын және кәсіпкерлер қызығатын жобалардың көбейетініне назар аударды. Елорда құрылысы жүргізілген кезде де осындай аймақ жұмыс істегенін еске салды.

Жиында Ғабидолла Рахматоллаұлы барлық басқармаларға бюджетке жүктемені азайту үшін кешенді жоспарда көзделген инвестициялар мен мемлекеттік-жекеменшік жобаларды мерзімде іске асыруға жауапты болатынын айтып, нақты тапсырмалар берді.

– Жоспарды іске асыруға әкімдіктің әр мүшесін белсенді атсалысуға шақырамын. Нақты мақсаттар айқын. Мерзім қысқа. Енді тек жұмыс істеу қажет. Бізде барлық мүмкіндік бар. Кадрлар да жеткілікті. Жұмыла іске кірісу керек. Тапсырма бойынша депутаттық топтар да өз сайлаушыларымен кездесіп, жобалармен таныстыру қажет.

Халық бұл жоспарды кеңірек білуі керек. Аудан әкімдеріне де осындай тапсырма беріледі, – деді қала әкімі.
Маңызды құжатты іске асыру жоспарына сәйкес кесте бойынша әр жобаның мерзімі көрсетіліп, жауапты адамдар бекітіледі.

Страница 7 из 52