ҚР тұрғын үй-коммуналдық шаруашылығын жаңғыртудың 2011-2020 жылдарға арналған бағдарламасы аясында Абай ауданы аумағында өткен жылы 11 көпқабатты тұрғын үйде күрделі жөндеу жұмыстары жүргізілген.
Бұл жұмыстардың жалпы сметалық құны 102 миллион теңгені құрайды. Бұл жөнінде мәлімет берген аудан әкімі аппаратының инфрақұрылым және көріктендіру бөлімінің басшысы Гүлжан Алтаева мемлекеттік бағдарламаның игілігін сезінгендер өзгелерге үлгі болып отырғанын айтып өтті. Маманның айтуынша, бағдарлама аясында биыл аудан аумағынан 19 үй қалалық тұрғын үй-коммуналдық шаруашылық бөліміне ұсынылыпты. Тұрғындар келісімін беріп жатса, көпқабатты тұрғын үйлер заманауи сәулеттік келбетке ие болып, инфрақұрылымдық жағдайы жақсарта түсері анық.
60 аулаға жарық берiледi
Бүгінгі таңда Абай ауданы аумағында 206 ауланың 103-і, яғни, 50 пайызына жарықтандыру жұмыстары жүргізіліпті.
Тек, өткен жылы 20 аулаға 57 бағана орнатылып, кешкілік уақыттарда жарықтандыру мәселесі бір жүйеге келтірілген. Аудан әкімдігінің мәліметтеріне сүйенсек, биыл 60 ауланы жарықтандыру бойынша тиісті бөлімге ұсыныс жолданған. Ұсыныс қолдау тапса, барлығы 92 үйдің ауласына электр бағаналары орнатылатын болады.