Ұлыстың Ұлы күнін тоғыз күн атап өтуді дәстүрге айналдырған шымкенттіктер кеше «Шаттық күнін» қуанышпен қарсы алды.
Шымкент қаласы әкімінің орынбасары Гүлжан Құрманбекова №4 перинаталды орталықта болып, Наурыз мейрамы қарсаңында дүниеге келген сәбилер мен олардың аналарын құттықтады.
– Баршаңызға шуақты нұрымен шаттыққа бөлеген, табиғатты түлеткен, Ұлыстың ұлы күні құтты болсын! Аналар мен сәбилердің деніне саулық, ұзақ ғұмыр тілеймін, – деді Г. Құрманбекова.
«Шаттық күні» 25 ана қала әкімдігінің тарапынан сый-сияпатқа ие болды. Солардың бірі –
Динара Жанәлиева үшін бұл күн есте қалатыны анық.
Наурыз мерекесінде босансам деп армандағаным рас. Перзентімізді отбасымызбен күттік. Міне, Алланың қалауымен егіз балалы болып, қуанышқа кенеліп жатырмын, – дейді жас ана.
Ана мен бала денсаулығын сақтау мемлекетіміз дамуының басым бағыттарының бірі екені белгілі. Бүгінге дейін орталықта 4495 нәресте дүниеге келген.
