ҚҰТҚАРУШЫЛАР МАҚТААРАЛДА

Вторник, 05 Май 2020 23:17

чс

Шымкент қаласы Төтенше жағдай департаментінің қызметкерлері Мақтаарал ауданындағы су басқан елдімекендерде авариялық-құтқару жұмыстарын жүргізуде.

Құтқарушылар ауданның елдімекендеріндегі судың деңгейіне мониторинг жүргізіп, жергілікті халыққа көмек көрсету үшін су алған ауылдарды аралап шығуда.
Атап айтқанда, Шымкент қаласы ТЖД Жедел-құтқару жасағының құтқарушылары Жеңіс ауылында ірі және ұсақ малдарды құтқару жұмыстарын жүргізді.
200-ден астам үй орналасқан Өргебас ауылында су басқан үйлерден олар құжаттарын алып, құнды заттарын көшіруге көмектесті. Сондай-ақ, ауылды су ағысынан қорғау үшін құтқарушылар жергілікті тұрғындармен бірлесіп, жағалауды бекіту жұмыстарын жүргізді.
Командалық-штабтық машинасы арқылы ҚР ІІМ Төтенше жағдайлар комитетінің, Түркістан облысының және Шымкент қаласы ТЖ департаментінің басшыларымен байланыс орнатылды. Шымкент қаласының құтқарушылары су деңгейінің мониторингін және авариялық-құтқару жұмыстарын жүргізуді жалғастыруда, оған жеке құрамнан 17 адам және 4 бірлік техника жұмылдырылды.

 

Шымкент қаласы
ТЖД ішкі және сыртқы коммуникациялар
тобы

ЖАНҒА ЖЫЛУ сыйлаған

Вторник, 05 Май 2020 23:16

95331795 2519037091742575 3481931644724576256 o

Төтенше жағдай кезінде қаламызда көмекке мұқтаж жандарға әлеуметтік қолдау көрсету шаралары жалғасуда. Шымкент қалалық «Жастар ресурстық орталығы»  «Жанға жылу» қайырымдылық акциясы аясында тұрғындарға көмек беруді қолға алған болатын.

Кезекті қайырымдылық акцияға «Петро Қазақстан» Шымкент мұнай өңдеу зауыты демеушілік жасады. Ұйымдастырушылар мен демеушілер Шымкент қаласындағы Абай, Әл-Фараби, Еңбекші, Қаратау ауданы әкімдіктерімен бірлесе отырып, әлеуметтік тұрғыда аз қамтылған және көпбалалы 100 отбасының тізімін нақтылады. Осыған сәйкес, ұйымдастырушылар күнделікті тұрмыста жиі тұтынатын: ұн, қант, май, макарон, қарақұмық, шай, печенье және өзге тәттілерден 100 азық-түлік себетін әзірледі.
Акция аясында ерікті жастардан жасақталған белсенділер қауіпсіздік ережелерін сақтай отырып, азық-түлік себеттерін отбасыларға таратты.
Айта кетейік, ұйымдастырушылар жыл басынан бері «Жанға жылу» қайырымдылық акциясы аясында 500-ден аса отбасыға көмек берілгенін атап өтті.

7

Жер бетіндегі елдер арасында бір күнде бірдей аталып өтетін мереке жоқ. Бірақ жарты әлемнің халқы бірдей тойлайтын бір ұлық мереке бар. Ол – 9 мамыр, Ұлы Жеңіс күні! Адамзат тарихында өткен қанқұйлы соғыстардың ең алапаты болып есептелген осынау Ұлы Отан соғысы жайын сөз еткенде, оның тарихына, оған қатысқан жауынгерлердің ерліктері мен өмірбаяндарына бір соқпай кете алмаймыз. Дегенмен соңғы кездері сол соғыста хабар-ошарсыз кеткен боздақтардың ғұмырбаяндарын зерттеу, олардың қай майданда қаза тауып, қай жерде жерленгені туралы мәліметтерді табу, осы жұмыспен тыңғылықты айналысу үрдісі жақсы жолға қойылып, бұл бағытта бірталай игі істер атқарылуда.

Біздің елде Ұлы Отан соғысы кезінде хабарсыз кеткен боздақтарды іздеп табумен айналысып, бұл жолда талай жетістіктерге жеткен азамат бар. Оның аты-жөні –
Аманжол Оразбаев. Ол «Арлан» әскери-патриоттық орталық» қоғамдық қорының директоры, заң ғылымдарының кандидаты, запастағы полковник. Аманжолдың айтуынша, бұл іске ол өз қызығушылығымен кіріскен.
–2008 жылы Мәскеу қаласында Қазақстан елінің өкілі болып жүргенімде, Андрей деген ұлты орыс әріптесім маған: «Өткен жылдың аяғында Ресейдің қорғаныс министрлігі 1941-45 жылдар аралығындағы соғыс кезінде хабарсыз кеткен боздақтардың аты-жөндері тізілген арнайы сайт ашты. Егер сенің де сол соғыста хабарсыз кеткен туыстарың болса, олардың аттарын сол сайттан іздеп көруіңе болады» деді. Содан кейін менің бұл іске деген құмарлығым артты, – дейді ол.
Аманжолдың Хайрулла деген атасының інісі сол соғыста хабарсыз кеткен екен. Андрейдің әлгі сөзінен соң ол Ресей Қорғаныс министрлігінің жаңағы тақырыпқа арналған «ОБД-Мемориал» сайтты ашып отырып, хабарсыз кеткендердің тізімі арасынан «Оразбаев 1942 жыл» деген жазуды тауып алады. Ары қарай ол жерден «Сталинград майданындағы 233 дивизияға қарасты 703 полкінің минометтік взвод командирі кіші лейтенант Оразбаев Хайрулла Балжанұлы 1942 жылдың 28 қарашасы күні ауыр жараланды» деген жазуды оқиды.
Ол жазуда Хайрулла Балжанұлының майданға Семей қалалық әскери комиссариатынан аттанғаны жайында да айқын жазылған екен. Сөйтіп, Аманжол өз атасын оп-оңай тауып алады да, бұл хабарды еліне жеткізеді.

 

89


Аманжол содан бастап соғыс кезінде хабар-ошарсыз кеткен боздақтарды іздейтін «Солдат. Ру» деген сайтқа тіркеліп, өз бетінше еңбектене бастайды. Мәскеу түбіндегі, Сталинград қорғанысындағы, Курск иініндегі алапат шайқастарда, одан соң Украина мен Белорусияны, Польша мен Чехославакияны азат ету жолында шейіт кеткен жүздеген боздақтардың есімдерін анықтайды. Осындай еңбектердің негізінде, Зейнолла Байжасаров деген ардагердің ұлы Болатпен бірігіп, «Солдат туралы хикая» атты кітап жазады.
Бұдан басқа аты аңызға айналған ұшқыш, 7 әскери орденнің, отызға жуық медальдардың иегері
Борис Князов жайында еткен еңбегі де аса елеуге тұрарлық. Аманжолдың бастамасымен талай адам соғыстың кесірінен жат жерде мәйіттері қалған өз әке-аталарының сүйектерін туған жерлеріне әкеп, қайта жерледі. Оның мұндай ізгілікті ісіне риза болған жүздеген ерікті азаматтар бүгінде оған қосылып, (оның ішінде мен де бармын) осынау сауабы мен мейірімділігі мол жұмысқа белсене араласып жүр.
Әлбетте, сауап іс әрқашан да өз жалғасын табады және ұдайы жақсылықтармен астасып отырады. Аманжол 2016 жылы әскери қызметтен запасқа біржолата шығуға дайындалып жүргенде, ҚР Ұлттық қауіпсіздігі комитетінің генералы-лейтенанты, інім Нұрғали Дәулетбекұлы Білісбековқа әлдеқандай шаруамен кіреді. Бұларды бір кездері Аманжол қатты құрмет тұтқан әрі ұстазы санаған генерал Тоқтархан Нұрахметов таныстырған екен. Араларындағы қызметтік шаруа біткен соң екеуі басқа тақырыптағы әңгімелерге көшіп, Аманжол Нұрғалиға қолындағы «Солдат туралы хикая» атты кітапты көрсетеді. Оның жазылу тарихын әңгімелейді. Нұрғали кітаппен таныса отырып: «Менің атам да – соғыста хабарсыз кеткен майдангер. Мәскеудегі Қорғаныс министрлігіне ол жайында мәлімет сұрастырып, қанша хат жазсақ та, ешқандай хабар ала алмадық» дейді.
Осыдан кейін Аманжол атамыз Әжібеков Білісбекті іздеуге кірісіп, жоғарыда аталған сайттарды ақтара бастайды. Бірақ Аманжол іздеген тізімдерден Әжібеков деген фамилия шықпайды. Есесіне, Шаян ауданының Жүзімдік ауылдық кеңесіне қарасты Ұсин-Тас (Үсіктас) ауылынан майданға аттанып, Тверь облысындағы «Бауырластар зиратына» жерленген Айжанов деген боздақтың фамилиясы шығады. Аманжол мұны Нұрғалиға айтады. Ал Нұрғали, Айжанов деген фамилия Білісбек атаның Ащысай поликомбинатында кадр қызметкерінің қате жазғанынан болатынын айтады. Содан Нұрғали мен Аманжол бірлесіп, бұл ұқсастықтың сырын зерттеуге кіріседі. Ал бүгінде Бәйдібек аудандық әскери комиссариатында жатқан құжаттарда нақ Үсіктас ауылынан соғысқа кеткен Әжібеков Білісбек болып шығады. Айта кетсек, Шаян ауданы (қазіргі Бәйдібек) Үсіктас ауылынан 81 азамат соғысқа кетіп, соның 19-ы ғана аман оралды. Зерттеу барысында «Именной список – 57 безвозвратных потерь начальствующего состава и рядового 362 стрелковой дивизии 1.03 по 1.04 1943г» - Айжанов Билиспек ал «Именной список - 670 человек безвозвратных потерь военнослужащих от 29.07.48г» - Ажибеков Блысбек болып жазылғаны анықталады, ал Ажибеков Мылтықбай атамнын кіші інісі, Айжанова Улдарбек әйелі.
Сонымен, не керек, біраз зерттеулер мен ізденістердің және басқа да деректердің арқасында Айжанов дегеннің нақты Әжібеков Білісбек екені анықталады. Айжанова Ұлдарбек Білісбектің әйелінің аты-жөні. Бір мәліметте 1943 жылдың 2-наурызы күні дұшпанмен болған алапат шайқаста 362-ші атқыштар дивизиясының Блыспек Айжанов пен Герасим Русанов деген екі жауынгерінің қайтыс болғаны көрсетілген.

 

17

Білісбек атам жерленген «Бауырластар зираты» Ресейдің Тверь облысына қарасты Оленин ауданындағы Мостовая станциясының маңында. Негізі, біздің нақтылауымыз бойынша, Білісбек атамыз 1896 жылы дүниеге келген. Соғыс басталған 1941 жылы тура 45 жаста болған. Ол кезде қырық беске келгендерді соғысқа алмаған. Бірақ атам майданға аттанып жатқан өз бауырларынан қалғысы келмей әрі Отан үшін от кешуді өзіне парыз санап, әскери комиссариаттан соғысқа сұранады. Бұл кезде оның Ащысайдағы шахтада жұмыс істеп жүрген кезі болатын. Жас жігіттердің барлығы майданға кеткендіктен, шахтаға да қажетті жұмысшылардың саны азаяды. Осының кесірінен онда жұмысшы күші қат бола бастайды. Осыны білген және Білісбектің жасы ұлғайып қалғанын сылтауратқан әскери комиссариат оның өтінішін қабылдамайды. Алайда, атам алған бетінен қайтпай, соғысқа қайта-қайта сұранып, ақыры оның өтініші қабылданып, майданға кетеді.
Сол уақыттағы Шаян (қазіргі Бәйдібек) аудандық әскери комиссариаттың 1942 жылғы соғысқа аттанғандар тізімін тізген мәліметте Білісбек атамның туған жылы 1900 жыл деп көрсетілген. Соғысқа кеткен уақыты – 1942 жылдың маусымның 16-сы. Енді осы жерде маған бір ой келеді: Егер Білісбек атам 1896 жылы туылған болса, 1942 жылы 46 жасқа келеді. Ал ол уақытта 46 жастағы адамды соғысқа алмаған. Ал 40-41 жастағы азаматтар майданға алына берген. Ол кісі осыны біліп, біріншіден, жасын қолдан кішірейткен сияқты, екіншіден, фамилиясын Айжанов деп өзгерткен сыңайлы.
Аманжол атамыздың жатқан жерін тапқан соң, інілерім –
Ерғали, Нұрғали үшеуіміз 2016 жылдың 8 мамырында Ржев қаласына жол тарттық. Атамыз мәңгі қоныс тапқан Мостовая станциясындағы «Бауырластар зиратына» жетіп, ата рухына, сондай-ақ басқа да боздақ жауынгерлерге құран бағыштап, Үсіктас ауылынан әкелген бір уыс топырақты атамыздың зиратына салдық.
Мен «Бауырластар зиратында» орнатылған орасан үлкен тақтада жазылған мыңдаған боздақтардың аттарын көрдім. Олардың арасында қай ұлттың өкілдері жоқ дерсің. Біздің қазақ азаматтарының өзі қаншама. Олардың көбісі хабар-ошарсыз кеткен боздақтардың қатарынан саналып, мұнда жерленгендері елдегі туыстарына беймәлім екені кәміл. Сондықтан олардың аты-жөндерін елге таныстырайын, мұнда елеусіз жатқан боздақтардың туыстары табылар деген ниетпен, жоғарыда аталған Аманжол Оразбаевпен бірлесіп, «Ұлы Дала Батырлары» деген сайт аштық. Жаңа форматта 9 май мерекесін атап өтуді Президент аппаратына ұсындық, қорғаныс министрлігі қолдау көрсетті.
Расында, сол сайтты ашқаннан кейін майдан даласында хабарсыз кеткен әкелерін, аталарын іздеген адамдардар көбейіп, бізге хабарласа бастады. Қазірдің өзінде біз соғыста хабарсыз кеткен 400 адамның кімдер екенін анықтап, олардың қай өңір, қай ауылдан шыққанын білдік, жақындарын таптық. Алайда, біздің елде әлі де, соғыста жоқ боп кеткен туыстарын іздеп жүрген адамдар көп екені хақ. Егер ондай жандар табылып жатса, Шымкент қаласың Азаматтық Альянсы мен байланысуларына болады. Ондай ізгілікті істі атқарудан еш талмаймын және бастаған әрекетімді соңына дейін апарамын.

 

Жұмағали БІЛІСБЕКОВ,
Шымкент қаласы
«Азаматтық альянс»
ұйымының төрағасы

ҚАУЛЫ

Шымкент қаласы

 

ПОСТАНОВЛЕНИЕ

город Шымкент

   03.05. 2020ж.                                                                                      №16

 

 

Шымкент қаласында төтенше жағдай кезеңінде бизнес объектілердің жұмысын қайта бастау туралы

 

 

Мен, Шымкент қаласының Бас мемлекеттік санитариялық дәрігері Абдиманап Кошкарович Тулебаев, Қазақстан Республикасының 2003 жылғы 8 ақпандағы «Төтенше жағдай туралы» Заңына, «Қазақстан Республикасында төтенше жағдайды енгізу туралы» Қазақстан Республикасы Президентінің 2020 жылғы 15 наурыздағы № 285 Жарлығына, «Қазақстан Республикасында төтенше жағдайдың қолданысын ұзарту туралы» Қазақстан Республикасы Президентінің 2020 жылғы 29 сәуірдегі № 310 Жарлығына, Қазақстан Республикасының «Халық денсаулығы және денсаулық сақтау жүйесі туралы» Кодексінің 7-1-бабы 1-тармағы 13 тармақшасына, Шымкент қаласы бойынша төтенше жағдай режимін қамтамасыз ету жөніндегі өңірлік комиссияның 2020 жылғы 30 сәуірдегі № 15 хаттамасына сәйкес, азаматтардың өмірі мен денсаулығын қорғау мақсатында, ҚАУЛЫ ЕТЕМІН:

1.Шымкент қаласы аумағында 2020 жылғы 04 мамырдан бастап, жұмыс уақыты сағат 9.00-ден 18.00-ге дейін келесі бизнес объектілері жұмысын қайта бастасын:

1.1. Қызмет көрсету саласында:

- ақпараттық-коммуникациялық технологиялар компаниялары;

- фотосалондар;

- медициналық орталықтар;

- стоматологиялық клиникалар;

- жарнама агенттіктері;

- ашық спорт алаңшалары;

- жылжымайтын мүлік жөніндегі агенттіктер;

- алдын-ала жазылумен жеке кабиналары бар моншалар.

1.2. Сауда саласында:

- зоодүкендер және гүл сататын дүкендер;

- 500 м2 дейінгі жеке тұрған азық-түлік емес дүкендер (сауда ойын-сауық орталықтарынан және базарлардан тыс орналасқан).Объектілерді уақытша қайта жабдықтауға, қайта жаңартуға жол берілмейді.

1.3. Қалыпты жұмыс режиміне өткізілсін:

- химиялық тазартқыштар, кір жуу, кілем тазарту объектілері;

- тұрмыстық техниканы (оның ішінде кеңсе техникасы, мобильді құрылғылар және т.б.), медициналық және өндірістік жабдықтарды жөндеу объектілері;

- тұрмыстық және кеңсе техникаларын сататын сауда үйлері мен дүкендер;

- автожуу, доңғалақ ауыстыру, май ауыстыру орталықтары, техникалық қызмет көрсету станциялары, автокөлік қызметтері.

2. Өз жұмысын қайта бастаған объектілерде санитариялық-дезинфекциялық іс-шараларды және төтенше жағдай режимі кезінде қабылданған басқа да санитариялық-эпидемиологиялық талаптар мен шаралар қатаң сақталсын.

3. Шымкент қаласының аудан әкімдеріне және Шымкент қаласы кәсіпкерлік және индустриалды-инновациялық даму басқармасы басшысына, Шымкент қаласының полиция департаменті бастығына:

3.1. Қала бойынша жүріп-тұру үшін осы қаулыда көрсетілген кәсіпорындар мен ұйымдардың қызметкерлерінің автокөліктерін «Сергек-патруль» деректер базасына енгізу қамтамасыз етілсін.

4. Шымкент қаласының аудан әкімдеріне, Шымкент қаласы тауарлар мен көрсетілетін қызметтердің сапасы мен қауіпсіздігін бақылау департаментінің аумақтық басқармалары басшыларына және Шымкент қаласының полиция департаменті бастығына:

4.1. Санитариялық-дезинфекциялық іс-шараларды және төтенше жағдай режимі кезінде қабылданған басқа да санитариялық-эпидемиологиялық талаптар мен шараларды сақтау мақсатында өз жұмысын қайта бастаған объектілер мониторингпен қамтамасыз етілсін;

4.2. Төтенше жағдай режимі, сондай-ақ санитариялық-эпидемиологиялық талаптар бұзылған кезде жауапты тұлғаларды әкімшілік және қылмыстық жауапкершілікке тарту жөнінде тиісті шаралар қабылдансын;

4.3. Атқарылған жұмыс туралы ақпарат Шымкент қаласы тауарлар мен көрсетілетін қызметтердің сапасы мен қауіпсіздігін бақылау департаментіне күн сайын сағат 16.00-ге ұсынылсын.

5. Осы Қаулы барлық мүдделі ведомстволарға жеткізілсін, тұрғындар БАҚ және әлеуметтік желілер арқылы ақпараттандырылсын.

6. Қаулы меншік нысанына қарамастан барлық жеке және заңды тұлғалардың орындауы үшін міндетті.

7. Осы Қаулының орындалуын бақылауды өз құзырымда қалдырамын.

8. Осы Қаулы қол қойылғаннан бастап күшіне енеді.

 

 

 

 

Шымкент қаласының

Бас мемлекеттік

санитариялық дәрігері

А. Тулебаев

Карантин басталғалы бері үшінші мегаполис тұрғындары ХҚО-ның бірыңғай терезесінен 8 мыңнан астам дайын құжаттн алды. Бұл құжаттардың басым бөлігі карантин барысында онлайн рәсімделген.

26 наурыздан бастап барлық халыққа қызмет көрсету орталықтарының жұмысы тоқтатылып, төтенше жағдай кезеңінде ХҚО және мамандандырылған ХҚО электронды үкімет порталы - egov.kz арқылы рәсімделген дайын құжаттарды беруге ғана жұмыс істеуде.

tcon-1

Бірыңғай терезеде берілген құжаттардың дені – АХАТ құжаттары, жүргізуші куәліктері, көліктің техникалық паспорты мен тіркеу нөмірлері, жылжымайтын мүлік пен жер учаскелерінің құжаттары, сондай-ақ жеке куәлік пен паспорт.

Дайын құжаттарды беру терезелерінің жұмыс кестесі: дүйсенбі-жұма - 9.00-ден 17.00-ге дейін, сенбі - сағат 9.00-14.00 аралығы. Мекенжайы: Шымкент қаласы, Мәделі қожа көшесі, 1Г мекенжайында орналасқан №1 ХҚО.

Ал автокөлік иелері дайын құжаттарын Достық шағынауданындағы мамандандырылған ХҚО-дан ала алады.

Еске сала кетейік, қазақстандықтар мемлекеттік қызметті электронды форматта алуда. Қазіргі уақытта мемлекеттік қызметтің 87% электронды үкімет порталы арқылы қолжетімді, сондай-ақ, кейбір қызметтер мен сервистерді ЕgovМоbile мобильдік қосымшасы, eGovKzBot2.0 телеграмм-ботынан және Facebook, Vk әлеуметтік желілеріндегі egov чат-боттарынан алуға болады.

1 мамыр – Қазақстан халқының бірлігі күні еліміз үшін орны ерекше, маңызы зор мейрамның бірі. Әсіресе, дәл бүгінгідей уақытта халқымыздың бірлігі мен тұтастығы айрықша білінеді.

 

 

mamyr-1

 

 

 

 

Індетпен күрес қызып, төтенше жағдай жариялан карантин кезінде үйлерінде отырған жерлестеріміздің көңілін аулау мақсатында Шымкент қалалық қуыршақ және жасөспірімдер театрының әртістері де сырт қалмай, көрермендерімен әлеуметтік желілер арқылы байланысқа шығуда.

Күнгей өңірінде 37 жылдан астам тарихы бар балаларға арналған өнер ордасының екі труппасы да қазақ және орыс тілдерінде онлай режимде жұмыс істеуде, дейді театр мамандары.

 

 

mamyr-3

 

 

    

  – Карантин жарияланған сәуір айының басынан бері өнер ордамыздың жұмысы да жаңа тәртіппен жүруде. Онлайн көріністерді қазақ балалар әдебиетінің негізін салушы Ыбырай Алтынсариннің ертегілері мен Ахмет Байтұрсыновтың мысалдарын оқудан бастадық. Одан кейін театрымыздың майталман әртістері бала жанының рухани баюына үлкен септігін тигізіп, тәрбие дәнін себетін қазақ халық ертегілері мен батырлық эпос «Алпамыс», «Керқұла атты Кендебай», «Бәрекелді, кірпі!», «Аленький цветочек», «Теремок» және т.б. қойылымдары көрермендер назарына ұсынудамыз, - деді театрдың әдебиет бөлімінің меңгерушісі Айгерім Сапарбекова.

 

 

Өнер шаңырағының ұжыммы бұған қоса балалардың өй-өрісін дамыту мақсатында түрлі танымдық іс-шаралар, «Тыңда, ертегі балақай!» айдары, поэзия сағаттары, қазақтың ұлттық ойындары мен сергіту би-жаттығулары видео көріністер мен челлендждер арқылы ұсынуда.

 

 

Ал 1 мамыр күніне орай театрдың әлеуметтік парақшаларынан қуыршақ кейіпкерлері түрлі ұлт өкілдерінің әндері мен билерінен маржан шашып, «Ынтымақ – бірлік бұлағы» атты көрерменге мерекелік көңіл-күй сыйлайтын онлайн-жоба ұсынбақ.

 

 

 

mamyr-2

 

 

 

Сонымен қатар, 9 мамыр – Ұлы Жеңіс мерекесіне орай, ауқымды әдеби онлайн-марафон көрсету, 21 мамыр – Мәдениет өнер қызметкерлері күні мерекесіне орай жасөспірімдерге арналған шығыстың шайыры Низамидің «Ләйлі-Мәжнүн» драма-элегиясын онлайн көрсету жоспарлануда.

 

 

Театрдың әлеуметтік парақшалары:

Youtube: Shymkent quirshaq online teatr;

Facebook: Қуыршақ және жасөспірімдер театры;

Instagram»: teatrkukolshym

 

ҚАУЛЫ

Шымкент қаласы

 

ПОСТАНОВЛЕНИЕ

город Шымкент

   29.04. 2020ж.                                                                                     №14

 

 

 

Шымкент қаласының

Бас мемлекеттік санитариялық

дәрігерінің қаулысына

өзгеріс енгізу туралы

Мен, Шымкент қаласының Бас мемлекеттік санитариялық дәрігері Абдиманап Кошкарович Тулебаев, «Төтенше жағдай туралы» Қазақстан Республикасының 2003 жылғы 8 ақпандағы Заңына, «Қазақстан Республикасында төтенше жағдайды енгізу туралы» Қазақстан Республикасы Президентінің 2020 жылғы 15 наурыздағы № 285 Жарлығына, «Халық денсаулығы және денсаулық сақтау жүйесі туралы» Қазақстан Республикасы Кодексінің 7-1-бабы 1-тармағы 13 тармақшасына, Шымкент қаласы бойынша төтенше жағдай режимін қамтамасыз ету жөніндегі өңірлік комиссияның 28.04.2020 жылғы №14 хаттамасына сәйкес, азаматтардың өмірі мен денсаулығын қорғау, коронавирустық инфекцияның (COVID-19) Шымкент қаласында таралуына жол бермеу мақсатында, ҚАУЛЫ ЕТЕМІН:

1.  Шымкент қаласының Бас мемлекеттік санитариялық дәрігерінің 2020 жылғы 2 сәуірдегі №9 қаулысына келесі өзгерістер енгізілсін:

- 2.2. тармағы мынадай редакцияда жазылсын: «Қоғамдық орындардың жұмыс істеуі: саябақтар, скверлер, жағалаулар»;

- 5. тармағы мынадай редакцияда жазылсын: «Шымкент қаласының әкімдігі карантин аяқталғанға дейін коммуналдық және әскери қызметтерді тарта отырып, қоғамдық көлікті, аялдамаларды, балалардың ойын алаңдарын қоса алғанда, дезинфекциялау құралдарын қолдана отырып, қала аумағын өңдеумен толық қамтуды және көрсетілген жұмыстарды карантин аяқталғанға дейін күн сайын жүргізуді қамтамасыз етсін»;

- келесі тармақпен толықтырылсын: «8.5. Сағат 10:00-ден сағат 18:00-ге дейін жас балаларға бетперделік режимді қатаң сақтай отырып, ата-аналарының бақылауында жүруімен көпқабатты тұрғын үйлердің ауласында орналасқан балалардың ойын алаңдарында серуендеп ойнауға рұқсат етілсін. Ойын алаңдарында көп балалардың жиналуына жол берілмесін»;

- келесі тармақпен толықтырылсын: «8.6. Тұрғындарға тұрғын үйлердің аулаларында 2 метрден кем емес ара қашықтықты, бетперделік режимді сақтай отырып, сағат 06:00-ден 12:00-ге дейін және сағат 15:00-ден-21:00-ге дейін серуендеуге рұқсат етілсін (18 жасқа дейінгі балалар ата-анасымен бірге)»;

- келесі тармақпен толықтырылсын: «8.7. Қала аумағында орналасқан саяжайлар мен бақшаларға сағат 06:00-ден 21:00-ге дейін баруға рұқсат етілсін (өздерімен бірге саяжай немесе бақша меншігін растайтын құжаттары болуы міндетті)»;

- 15. тармағы мынадай редакцияда жазылсын: «Шымкент қаласының полиция департаменті, аудан әкімдеріне:»;

- 15.2. тармағы мынадай редакцияда жазылсын: «Азаматтардың қоғамдық орындарда, саябақтарда, скверлерде, жағалауларда, балалар ойын алаңдарында, тұрғын үйлердің аулаларында (рұқсат берілген уақытты есептемегенде) болуына жол бермеу мақсатында енгізілген шектеулерді сақтау бойынша патрульдеуді ұйымдастыру».

2. Шымкент қаласы Тауарлар мен көрсетілетін қызметтердің сапасы мен қауіпсіздігін бақылау департаментіне барлық мүдделі мемлекеттік органдарға жеткізілсін және бұқаралық ақпарат құралдары, әлеуметтік желілер арқылы жариялансын.

3.Осы Қаулының орындалуын бақылауды өз құзырымда қалдырамын.

4. Осы Қаулы қол қойылған күнінен бастап күшіне енеді.

 

Шымкент қаласының

Бас мемлекеттік

санитариялық дәрігері

А.Тулебаев

 

1000 t

Мемлекет басшысы Қасым-Жомарт Тоқаевтың мәлімдемесі

Құрметті отандастар!

Баршаңызға белгілі, Қазақстан халқы 16 наурыздан бастап төтенше жағдай режиміне көшті.
Әрине, бұл кезең жұртшылыққа оңай тимегені анық.
Кейбір азаматтар жұмысын жоғалтып, табыссыз қалды.
Ойға алған жоспарларын өзгертуге мәжбүр болғандар да бар.
Адами тұрғыдан мен мұны түсінемін.
Қауіпті вирус Қазақстанда кең жайылып кетпеуі үшін осындай күрделі, бірақ аса қажет шешім қабылдадым.
Соның арқасында індет жаппай таралған жоқ.
Дүниежүзілік денсаулық сақтау ұйымы да, халықаралық сарапшылар да Қазақстанның іс-қимылын оң бағалап отыр.
Елімізде қатаң карантин шаралары енгізіліп, қоғамдық көліктің жұмысы тоқтатылды.
Мекемелер мен кәсіпорындардың басым бөлігі қашықтан жұмыс істеу режиміне көшті.
Көшелер, тұрғын үйлер дезинфекцияланып, науқастарға дәрігерлік көмек көрсетілуде.
Әрине, барлық облыстағы жағдай бірдей емес.
Кейбір аймақтарда індет шарықтау шегінен өткен сияқты.
Бірақ бірқатар өңірде вирустың таралу қаупі әлі де сейілмей отыр.
Біз ондағы нақты санитарлық ахуалға қарай әрекет жасаймыз.
Басты міндет – азаматтарымыздың денсаулығын сақтап, өмірін қорғап қалу.
Әлеуметтік және экономикалық тұрақтылықты қамтамасыз етіп, халықтың табысын сақтау үшін де арнайы шаралар қабылданып жатыр.
Тағы да қайталап айтамын: қазіргідей күрделі кезде әрбір азамат біздің назарымызда болады. Мемлекет ешкімді қиындықта қалдырмайды.
Мен төтенше жағдай кезеңінде азаматтарымызға қолдау көрсетуге арналған шаралардың екі топтамасын жария еттім.
Бұл шаралар барынша жүзеге асырылуда. Қоғам тарапынан айтылған орынды сын-пікірлер де бар. Оны ескереміз.
Бүгінгі күні 4 миллион 250 мың азаматқа қаржылай көмек көрсетілді.
570 мыңнан астам адамға азық-түлік таратылды.
Жалпы, 1,1 миллионнан астам адамды азық-түлікпен қамтамасыз етуді жоспарлап отырмыз.
Елбасының бастамасымен құрылған «Біргеміз» қорынан қаржы бөлінді.
«Nur Otan» партиясы белсенді жұмыс атқаруда.
Сәуір-мамыр айларында 1,6 миллионнан астам адамға коммуналдық төлем үшін көмек көрсетіледі.
Азық-түліктің жеткілікті болуына және оның сапасына қатысты ұдайы мониторинг жүргізілуде.
Елімізде азық-түлік тапшылығы жоқ.
Жергілікті билік органдары әлеуметтік маңызы бар тауарлар бағасын бақылауда ұстап отыр.
Біз індетпен күрестің алдыңғы шебінде жүрген дәрігерлерді қаржылай қолдап жатырмыз.
Денсаулық сақтау министрлігі және әкімдер басқа да медицина қызметкерлеріне көмек көрсету үшін шаралар қабылдауда.
1,6 миллионнан астам адам, 11,5 мың шағын және орта бизнес өкілі несиелерін кейін төлеуге мүмкіндік алды.
Бұл жалпы алғанда 360 миллиардтан астам теңгені қамтиды.
Бүгінде шағын және орта бизнес күрделі жағдайға тап болды.
Осы салаға қазір көмектеспесек, экономиканы қалпына келтіре алмаймыз.
700 мыңнан астам компания мен жеке кәсіпкерге салықтық жеңілдіктер жасалды.
Сол арқылы олар 1 триллион теңгеге жуық қаржыны үнемдей алады.
Шағын және орта бизнеске тиімді несие беру үшін қаражат бөлінді.
Жұмысшы санын және еңбекақы көлемін азайтпау мақсатында ірі компанияларға тиісті қолдау көрсетіледі. Қазір олардың тізімі жасалуда. Оған ел экономикасы үшін аса маңызды компаниялар ғана енгізіледі.
Ауыл шаруашылығы еңбеккерлері қиындыққа қарамастан жұмыс істеуде.
Шаруалардың еңбегіне дән ризамыз.
Көктемгі егіс науқаны мәселелері шешімін тапты. Бұл жұмысқа ешқандай кедергі болмауы керек. Ауыл шаруашылығы министрлігіне және әкімдерге осындай міндет жүктеледі.
Осы науқанға және өнімді алдын ала сатып алуға 200 миллиард теңге бөлінді.
Соның 70 миллиарды тұқым өндірісін дамытуға, тыңайтқыштар сатып алуға жұмсалады.
Жалпы, азаматтар мен бизнесті қолдау үшін 6 триллион теңгеге жуық қаржы бөлініп отыр.
Бұл – қомақты қаражат.
Үкімет пен құзырлы органдардың міндеті – қаржының тиімді жұмсалуын және осы үдерістің барынша ашық болуын қамтамасыз ету.
Қол жеткізген нәтижемен шектелуге болмайды. Қалыптасқан ахуал әлі де күрделі.
Коронавирус бүкіл әлемді жайлап келеді.
Вирус жұқтырғандардың саны 3 миллионға жуықтады. Бұл көрсеткіш өсіп бара жатыр.
Пандемияның екінші кезеңі басталып кетуі де ықтимал.
Қазақстан індеттің шарықтау шегінен өткен жоқ. Ахуалдың бақылаудан шығып кету қаупі бар.
Өкінішке қарай, кейбір аймақтарда, әсіресе, Алматыда вирус жұқтырған дәрігерлер және медицина қызметкерлері өте көп.
Сондықтан, солардың қауіпсіздігін қамтамасыз ету үшін шұғыл шаралар қабылдануда.
Мәселенің анық-қанығын зерттеп, бұған жол берген басшылардың жауапкершілігін қарау керек. Мұндай жағдайларға жол бермеу қажет.
Қауіпсіздік шараларын қатаң сақтаған жөн. Онсыз болмайды.
Олай етпесек, індеттің жаңа ошақтары пайда болуы мүмкін.
Коронавирусқа жеңіл-желпі қарауға болмайды. Карантин талаптарынан бір сәтте бас тартсақ, дертті қайтадан өршітіп аламыз.
Коронавирус – адамның денсаулығына қатер төндіретін өте жұқпалы дерт.
Мұны бүкіл әлем мойындап отыр.
Ал, оны жоққа шығарып, жұртқа жалған ақпарат таратудың арты жақсылыққа апармайтыны белгілі.
Бұл – азаматтарымыздың денсаулығына нұқсан келтіретін әрекет.
Еліміздегі қазіргі ахуалға байланысты және Мемлекеттік комиссияның ұсыныстарын негізге алып, мен Төтенше жағдай режимін биылғы 11 мамырға дейін ұзарту туралы Жарлық шығару жөнінде шешім қабылдадым.
Бұл – біз бастан өткеріп жатқан күрделі кезеңнің талабы.
Заңға сәйкес 11 мамырда Төтенше жағдай режимі аяқталады.
Елімізді пандемияның шеңгелінен құтқару – бәрімізге ортақ міндет. Мен үшін әр азаматтың өмірінен қымбат ештеңе жоқ.
Сонымен қатар Төтенше жағдай режимін қамтамасыз ету жөніндегі Мемлекеттік комиссия карантин талаптарын жеңілдетуге дайын.
Алдымен, вирустың таралуын қатаң бақылауда ұстап отырған облыстар мен қалалардан бастауға болады.
Мемлекеттік комиссияға елорданың үлгісімен еліміздің барлық аймағында өз жұмыстарына кірісетін мекемелердің тізімін жасау тапсырылды.
Бірінші кезекте өнеркәсіп кәсіпорындары, құрылыс, жол құрылысы және көлік компаниялары, банктер және халыққа қызмет көрсету орталықтары жұмысқа кірісуі керек.
Бірақ барлық санитарлық нормаларды сақтап, жұмыс орындарында үнемі дезинфекция жүргізіп тұру қажет. Күнделікті өмірде әлеуметтік ара қашықтықты ұстанған жөн.
Кәсіпорын басшыларына және жергілікті атқару органдарына жеке жауапкершілік жүктеледі. Бұл орайда барлық деңгейдегі әкімдіктердің рөлі айтарлықтай артады.
Үкімет келесі айда да табысынан айырылған азаматтарға 42500 теңге көлемінде көмек береді.
Қайтадан өтінім жіберудің қажеті жоқ. Төлем бұрын ұсынылған құжат бойынша жүзеге асырылады.
Мұқтаж отбасылар азық-түлік ала береді.
Оқшаулану кезінде ата-аналарға кішкентай балаларымен төрт қабырғаға қамалып отыру оңай емес.
Мемлекеттік комиссия әкімдіктермен бірлесіп, аулаларды және ойын алаңдарын ашу мәселесін ойластыруға тиіс. Әрине, алдымен, барлық санитарлық нормалар мен санитарлық қауіпсіздік талаптары қатаң сақталуы керек.
Саяжай иелері де қатты алаңдап отыр. Өйткені, қазір көктемнің дәл ортасы, жұртқа қолайлы кезең.
Мемлекеттік комиссия бұл мәселені қарастырды, енді оны шешу жолын айтады.
Елімізде жолаушыларға арналған барлық әуе тасымалы тоқтады. Бұл дер кезінде қабылданған дұрыс шешім болды.
Дегенмен, салыстырмалы түрде жағдайдың тұрақтанғанын ескеріп, Үкімет 1 мамырдан бастап Елорда мен Алматы арасындағы рейстерді ашатын болды.
Мұндай шара азаматтармен қатар індетпен күресіп жүрген көптеген мамандардың жұмысы үшін қажет.
Барлық қауіпсіздік шараларын мұқият ойластырып, авиациялық және санитарлық қызметтердің өзара іс-қимыл тәртібін әзірлеу маңызды.
Карантин режимін біртіндеп жеңілдету дегеніміз өзіміз үйренген күнделікті тіршілікке қайта оралу емес екенін ұғынғанымыз жөн.
Ойын-сауық және сауда орталықтары, кинотеатрлар, ресторандар, саябақтар мен адам көп жиналатын басқа да орындар әзірге жабық болады. Жоғары оқу орындары, колледждер, мектептер қашықтан оқытуды жалғастыра береді.
Ел тұрғындарын бұл шараларға түсіністікпен қарауға шақырамын.
Халқымызда «Төзім тілекке жеткізеді» деген мақал бар. Сондықтан сабыр сақтайық.
Күннің жылынуы мен карантиннен шаршағандық жауапсыздыққа себеп болмауға тиіс. Карантин режимі бұзылса, коронавирусқа шалдыққандардың саны күрт көбейіп кетуі мүмкін.
Әсіресе, созылмалы ауруы бар және егде адамдар ерекше сақ болуы керек.
Тіпті, кішкентай балалар да ауру жұқтыруы мүмкін екенін байқадық.
Сондықтан олардың денсаулығына бей-жай қарауға болмайды.
Әзірге бұл вирустың вакцинасы жоқ.
Карантин шараларын қатаң ұстансақ қана індеттен құтыламыз.
Аса қажеттілік болмаса, ешқайда шықпай, үйде отырыңыздар.
Бұл, әсіресе, қазіргі қасиетті Рамазан айында өте маңызды.
Осы кезеңнің де асыл мұраты – шыдам мен төзім, сабыр мен қанағат екенін білесіздер.
Биыл Қазақстан мұсылмандары діни басқармасы Оразада бірқатар рәсімнен тартынуды ұсынды.
Сондықтан осындай уақытта ауызашардың өзін көпшілікпен бірге өткізе алмайтынымыз белгілі.
Алдағы мамыр айындағы мерекелерді де үйде атап өтуге тура келеді.
Бірақ, Жеңіс күнінде Ұлы Отан соғысы ардагерлерінің бірде-біреуі елеусіз қалмайды.
Бәріне лайықты құрмет көрсетіледі.
Әкімдер соғыс және тыл ардагерлеріне материалдық көмек береді.
Денсаулық сақтау министрлігі ауруды тест арқылы анықтау жұмысын барынша күшейтуге тиіс.
Оны халықаралық стандартқа сәйкес тәулігіне кем дегенде 20-25 мыңға дейін жеткізу қажет.
Осыған орай, Үкіметке қысқа мерзім ішінде отандық тест-жүйесінің өндірісін қолға алуды тапсырамын.
Біз иммунобиологиялық препараттарды әзірлеу үшін қолда бар мүмкіндіктерімізді толық пайдалануымыз керек.
Вакцина қолжетімді болған кезде Қазақстан шетелдің дәрі-дәрмегін күтіп отырмауы қажет.
Дағдарыстан кейін де біз медицинаны дамытуға баса мән береміз.
Бұл салаға мемлекет тарапынан ауқымды қолдау көрсетіледі.
Үкімет Халық денсаулығы және денсаулық сақтау жүйесі туралы жаңа кодекс жобасына осы саланы жетілдіретін нақты ұсыныстар енгізуге тиіс.
Парламент бұл кодексті сессияның соңына дейін қабылдайды деп ойлаймын.
Біз қазірден бастап дағдарыстан кейінгі кезеңге дайындалуымыз керек.
Бұл жөнінде Елбасы Қауіпсіздік Кеңесінің 24 сәуірде өткен отырысында нақты айтты.
Үкімет пен Ұлттық банк 11 мамырға дейін Экономикалық дамуды қалпына келтіру жөніндегі кешенді жоспарды дайындайды.
Онда дағдарыстан зардап шеккен салаларға қолдау көрсету шаралары қамтылады.
Бүгінде еліміз дамудың жаңа деңгейіне қадам басып отыр.
Шын мәнінде, біз енді мүлде жаңа жағдайда өмір сүретін боламыз.
Сондықтан экономикаға және мемлекеттік басқару жүйесіне ауқымды әрі маңызды өзгерістер қажет.
Індетпен күрестің алдыңғы шебіндегі азаматтарды тағы да ерекше атап өткім келеді.
Халықтың қауіпсіздігі үшін жанкештілік танытып жүрген дәрігерлер мен медицина қызметкерлеріне, құқық қорғау органдарының өкілдеріне және әскери қызметшілерге алғыс айтамын.
Қауіп-қатерге қарамай мұқтаж жандарға көмек қолын созған волонтерлерге де ризашылық білдіремін.
Сондай-ақ, халыққа жедел және шынайы ақпарат таратып жүрген журналистер қауымына алғыс айтамын.
Дағдарысқа қарсы шараларды жүзеге асыруға атсалысқан мемлекеттік аппараттың қызметкерлері де құрметке лайық.
Қазақстан халықаралық қоғамдастықтан еш нәрсені жасырмай, барлық мәліметті ашық жариялап отыр.
Сондықтан кейбір азаматтарды бос сөз бен жалған мәліметке жол бермеуге шақырамын.
Әрине, мемлекеттік органдардың жұмысында олқылықтар бар, бірақ, мемлекеттік қызметшілердің көпшілігі жұмысын адал атқаруда.
Кемшіліктерді біз көріп отырмыз. Одан тиісті сабақ алып, қажетті шараларды қабылдаймыз.
Бұл дағдарыс бірлігі бекем, елін сүйетін отаншыл жұрт екенімізді көрсетті.
Қашанда осылай ұлт болып ұйыса білсек, барлық мақсатымызға қол жеткіземіз. Оған ешқандай күмән жоқ.
Елдің қамы үшін бастаған ісіміз қайырлы болады деп сенемін!
Халқымыз «Береке басы – бірлікте» дейді.

Жұдырықтай жұмылсақ, кез келген қиындықты жеңеміз!

Біз біргеміз!

 
Страница 9 из 383