Шымкент келбеті

БиылА. С. Пушкинатындағыкітапхананыңқұрылғанына 125 жылтолыпотыр. Осыған орай, Шымкент қаласының әкімдігі және Шымкент қаласының мәдениет, тілдерді дамыту және архивтер басқармасының қолдауымен «Кітапхана: Іздену. Жаңалық. Болашақ» тақырыбымен халықаралық ғылыми-практикалық конференция өтті.

БұданбіршамауақытбұрынқалаәкіміҒабитСыздықбековбұлмәденинысандыөзібарыпаралап, кітапхананыңжұмысыментанысыпқайтқанболатын. 2022 жылы жөндеу жұмыстарымен жаңғырған нысанда бүгінде оқырмандарға заманауи талапқа сай ақпараттық-библиографиялық, мәдени-ағартушылық қызметтер көрсетіліп келеді. Қазіргі таңда кітапханада 11 құрылымдық бөлімше мен оқу залдары, абонемент, өнер, көрме залдарымен қатар американдық бұрыш және келушілер үшін арнайы кофехана жұмыс істейді. Сондай-ақ, бүгінде бұл мәдени ошақ оқырмандар үшін жайлы, бос уақытты тиімді пайдалануға мүмкіндік беретін, эстетикалық мәдениетті қалыптастыратын ортаға айналған.

Ғылыми-практикалық конференция өткізудегі басты мақсат - Шымкент қаласының тарихы мен мәдени өмірінде өзіндік қолтаңбасы бар рухани орда – А.Пушкин атындағы қалалық әмбебап кітапхананың өткенін зерделеп, келешекке бағдар түзу. Қала тұрғындарының оқу мәдениетін қалыптастыру, жас ұрпақты кітап оқуға баулу, қоғамда кітапхана орны мен кітапханашы имиджін қалыптастыру.

Жиынға ҚР Ұлттық кітапханасы, ҚР Ұлттық Академиялық кітапханасы, сонымен қатар, Ресей, Өзбекстан елдерінен кітапхана өкілдері, зиялы қауым, ақын-жазушылар, еліміздің облыстық, қалалық, аудандық көпшілік кітапхана қызметкерлері мен кітапхана ардагерлері қатысты. Конференцияға келген қонақтар мен шетел делегаттарына кітапхананың тыныс-тіршілігі және көрме экспозициялары таныстырылды.

Салтанатты кеште Шымкент қаласы мәслихатының хатшысы Бахадыр Нарымбетов сөз алып, кітапханашыларды мерейтоймен құттықтады.

- Бүгінгі болып жатқан іс-шара -бұл біз үшін, кітапхана оқырмандары үшін ұлы той. Дүбірлі той. Мұндай атаулы мерекені көз жұмып, елеусіз қалдыруға болмайды. Қаламыздың мәдениетінің дамуына, өркендеуіне бірден бір ықпалы тиген, көп жылдық тарихы бар бұл кітапхананың бізге де, келер ұрпаққа да әлі берері мол,- деп сөзін аяқтаған ол әкімдіктің атынан кітапхана қызметкерлеріне құттықтау хаттарын табыс етті.

Сонымен қатар, кеш қонақтарына сан жылдық тарихы бар кітапхананың өмірі мен жай-жапсары түгел қамтылған деректі фильм ұсынылды.

Конференцияда Ресей Федерациясының Алматыдағы Бас консулы Дмитрий Александрович Тураев, Қазақстан Республикасы Ұлттық кітапханасының директоры, Қазақстандық Кітапханалық Одақ төрайымы Бақытжамал Қайырбекқызы Оспанова, жазушы, Қазақстан Жазушылар одағының Шымкент қаласындағы өкілетті өкілі Момбек Әбдіәкімұлы құттықтау лебіздерін білдіріп, кітапхана қызметкерлеріне алғыс хат ұсынып, директор Наталья Романоваға арнайы марапат-сыйларын табыстады.

Сондай-ақ, көпжылдық тарихы бар бұл кітапхананың жақында ғана жарыққа шыққан «Тарихпен үндескен кітапхана» кітабының тұсауы кесіліп, кешке келген өнер иелері ән шырқап, көрерменге көтеріңкі көңіл-күй сыйлады.

Э.Сәрсенбайқызы

Президент Агенттік төрағасының еліміздегі сыбайлас жемқорлыққа қарсы іс-қимыл шаралары туралы есебін тыңдады. Қасым-Жомарт Тоқаевқа жоғары лауазымды тұлғалардың қатысы бар қылмыстардың жолын кесу жұмыстары жалғасып жатқаны жөнінде мәлімет берілді.

Асхат Жұмағалидың айтуынша, ведомство 2022 жылдан бастап мемлекет пен квазимемлекеттік сектор субъектілеріне 1 триллион 90 миллиард теңге сомасында мүліктік активтер мен қаражаттың қайтарылуын қамтамасыз еткен. Білім беру инфрақұрылымын қолдау қорына 153,3 миллиард теңге аударылған. Осы қаржыға қазірдің өзінде 50-ден астам мектеп ашылған. Сондай-ақ тағы 30 білім ошағын салу жоспарланған.

Мемлекет басшысына бұған дейін берген тапсырмаларының орындалу барысы туралы баяндалды. Атап айтқанда, Агенттік Ұлттық банкпен және Қаржы министрлігімен бірлесіп, «Цифрлық теңге» платформасы арқылы жүзеге асыратын «ақшаны бояу» жобасын іске қосты. Асхат Жұмағали Президент Жолдауында жүктеген міндеттерге сай жол құрылысы мен ауыл шаруашылығы салаларында сыбайлас жемқорлықты жою жұмыстары жүргізіліп жатқанын айтты.

Сонымен қатар «Жайлы мектеп» ұлттық жобасына мониторинг жасалып жатыр. Тексеру барысында қаражатты тиімсіз пайдалануға және нысандарды тапсыру уақытын кешіктіруге себеп болатын сыбайлас жемқорлық тәуекелдері талданады.

Президентке халықаралық қатынастар, кадр саясаты, нормативтік-құқықтық актілер әзірлеу процесі секілді ведомствоның басқа да басты бағыттары бойынша атқарылған жұмыстар туралы ақпарат берілді.

Кездесу соңында Мемлекет басшысы еліміздегі сыбайлас жемқорлықпен күресті күшейту жөнінде бірқатар тапсырма берді.

Ел Президенті Қасым-Жомарт Тоқаев Ұлттық құрылтайда «Елімізде жаңа қоғамдық этика қалыптасуы керек. Онда ел бірлігі және тұрақтылығы, әділдік, заң мен тәртіп, сенім және жауапкершілік сияқты құндылықтар үстемдік құруы қажет деген болатын.

Отаншылдық, адамгершілік, білімпаздық, нағыз маман болу, үнемшілдік, еңбекқорлық, ел мен жерге жанашырлық сияқты асыл қасиеттер бәрінен биік тұруға тиіс. Осындай ізгі қасиеттің бәрін бойына сіңірген жанды адал азамат деген бір ауыз сөзбен сипаттауға болады» деп атап көрсетті. Сонымен қатар Мемлекет басшысы «Адал азаматқа тән қасиет әрбір жастың бойынан табылу керек. Ұлттың жаңа болмысы білім, ғылым және мәдениет саласын дамыту арқылы қалыптасады. Осы үш бағытты рухани даму саласындағы жұмыстың мызғымас үштағаны деуге болады» деген еді.

Расында, Қазақстанның өркениетті мемлекеттер көшіне ілесіп, елімізде әділетті қоғам орнағанын қаласақ, адал азаматқа тән асыл қасиеттерді өз бойымызға, қала берді ұрпағымыздың бойына сіңіруге талпынуымыз керек. Тұлғалық тұрғыдан өсу, жұмысты адал атқарып, өзі ісіміздің, өз кәсібіміздің хас шеберіне айналуға ұмтылу, кез келген жетістікке, игілікке тек тура, адал, заңды жолмен жетуге талпыну – өмірлік қағидамызға айналуы тиіс. Міне, осындай қасиеттерді бойына жинап, елге, қоғамға шын мәнінде пайдалы бола білген азаматтарды қалай марапаттасақ та жарасады.

Адамның еңбегін елеп, лайықты азаматтардың мәртебесін биіктетіп, оларды қоғамға өнеге ретінде ұсыну – мемлекеттің ішкі саясатының маңызды бағыты деп байлам жасауға болады. Сондықтан Мемлекет басшысы бұл іске ерекше назар аударып келеді. Ел Президенті әдебиет пен өнер саласындағы Мемлекеттік сыйлыққа Абай Құнанбайұлының атын берді. Ал, әскерилер мен құқық қорғау саласының қызметкерлеріне берілетін «Айбын» орденінің әртүрлі дәрежелері Бауыржан Момышұлының, Сағадат Нұрмағамбетовтің және Рақымжан Қошқарбаевтың аттарымен аталатын болды. Бұның бәрі аталған наградалардың дәрежесін өсіріп, қадірін арттыра түскені анық. Президент осылай мемлекеттік наградалар мен марапаттардың дәрежесін өсіріп жатқан кезде қайдан шыққаны белгісіз қаптаған қоғамдық ұйымдар мен бірлестіктер жұртқа көк тиындық құны жоқ медалдар, төсбелгілер, атақ-дәрежелерді үлестіріп жатқаны өкінішті.

Иә, бүгінде елімізде «атақ-даңқ» пен марапат саудасының дәурені жүріп тұр. Әрине, орнымен берілген атақ та, сыйлық та, басқасы да адамның мерейін өсірері ақиқат. Алайда, дүниеге деген ынтызарлық пен мансапқұмарлықтың жетегіне ергендердің ерсі әрекеттеріне қарап тұрып, қарның ашады. Мансапқұмарлықтың шыңына шығу үшін бүкіл өмірін соған арнайтындарды да көзіміз көрді. Қазіргі заманда өзін өзі дамыту жолына, білім алуына емес, тек мансапқа, атаққа қол жеткізу үшін қолындағы барын шашуға дайын адамдар да бар. Осындайда Абайдың:

“Арсыз болмай атақ жоқ,

Алдамшы болмай бақ қайда?” дегенін күрсіне еске аласың.

Иә. Мойындау керек, өз саласында, өз еңбек жолында әділ мойындалған, еңбегі еленген лайықты азаматтар жоқ емес, жетерлік. Оның өзінде де тым әсірелеп, мақтауын асыру - даңғойлық. Кез келген дүниенің шекарасы бар, орны бар. Соңғы уақытта түрлі сала мамандары арасында жөн-жосықсыз медальдар үлестіру, қисынсыз марапаттар мен лайықсыз атақ беру белең алуда. Одан бөлек, сыйлық, атақ, марапат алу үшін жанкештілікпен араға кісі салып, тамыр-таныс, «көке-жәкесін» пайдалану үрдісі шаш етектен. Адамның дәрежесін еткен еңбегіне, төккен теріне, жасаған жұмысына қарай бағалау керек емес пе? Өкінішке орай, қазір оның қадірін қашырған заман.

Атақ алушы үміткердің еңбектері, қоғамға мен мемлекетке тигізген пайдасы жан-жақты зерттеліп, атақ пен дәреженің иесі болуға расымен лайық па, жоқ па деген тұрғыда таразылануы тиіс. Қазір кеудесіне жез-темірден «әшекей» тағынған адамнан көз сүрінеді. Лайықтысы да, лайықсызы да, қатысы бары да, қатысы жоғы да жанталасып ілініп жатыр... Салтанатты жиындар мен мерекелік іс-шараларға барсаң, үздіксіз мақтау-мадақтауларды шапалақпен қолпаштаудан шаршайсың. «Пәлен өңірдің құрметті азаматы», «түген мекеменің пәлен жылдығының мерейтойлық төсбелгісі», «пәлен саланың лидері»... Айта берсең, шегі жоқ. «Еңбегім сіңді ме, жоқ па, лайықпын ба, лайық емеспін бе?» деп саралап жатқан ешкім жоқ. Жарқ-жұрқ етіп суретке түсіп, оны мақтанышпен елге жариялап, әлеуметтік желіні "жарып" жатады.. Мемлекеттік награда немесе сыйлық болса, бір сәрі. Қаптаған түрлі қоғамдық ұйымдар мен мекемелердің арзанқол мадақ-марапаттары.. Ең қызығы, мұндай «марапаттар» ақылы. Ақыға алынған атақ! Ақыға сатылған марапат!

Әйтеуір, жапа-тармағай жалған атаққа ұмтылып жатырмыз. Бұған шектеу жоқ па? Бұл "даңғазалықтан" шығудың шешімі бар ма? Бар. Жалғыз жолы – адал еңбекті әділ бағалау ғана.

Мәжіліс депутаты Аманжол Әлтай елде арзан атаққа алданғандар мен жеңіл жолмен жетістікке жеткіштер, атақ сатқыштар көбейіп жатқанын тілге тиек етіп, Үкіметке сауал жолдаған болатын.

«Сіз 50 мың теңгеге сондай бір ұйымның атынан «Қазақстанның еңбек сіңірген қызметкері» медаліне, 100 мың теңгеге «Қазақстанның құрметті азаматы» атағына ие бола аласыз. Ал, сан ғасырдан бері «Ұлт ұстазы» деп халық ұсынған сәулелі сөзді қастерлеп Ахмет Байтұрсынұлына ғана қолданушы едік. Қазір ше? Қазір «Ұлт ұстазы» деген атақты бар болғаны 10 мың теңгеге сатып ала саласыз», - деп ашынып сөйлегені бар Мәжіліс отырысында. Сөз соңында Мемлекеттік рәміздерді ретсіз қолданып, жалған атақ сатып, пайда іздегендердің әрекетіне құқықтық негізде тыйым салу керектігін жіті бақылауға алу керектігін айтып өткен еді.

Атақ-даңқ, шен-шекпен, орден-медаль сияқты сый-сияпатқа құмарлық, сыбайлас жемқорлыққа деген құштарлық қай халықта болсын бар нәрсе. Ал, қазақтар арасында ондай жағымсыз жағдайлар неге орын алады деп ойлайсыз? Мұндай даңғойлық, дарақылық бізге қайдан келген?

Сұрақ көп, жауап жоқ. Арсыздық, атаққұмарлық – қызғанышты, күншілдікті күшейтетін, ашкөздік пен бақталастыққа бастайтын қауіпті дерт. Ол ұлт ұстанымын, сана-сезімін дамытуды тежеп, қоғамның құлдырауына жол ашатын жөнсіз әрекет. Бұл жағдай қазіргі таңда еліміздегі өзекті мәселеге айналды. Оның шешімін табу үшін қоғам ең алдымен ақыл мен парасат, тәртіп пен қағидат күшін біріктіруі қажет-ақ.

«Айтпаса, сөздің атасы өледі» демекші, тағы бір қынжылтатын мәселе, соңғы жылдардағы мұғалімдерге беріліп жүрген қиюы бар да, қисыны жоқ ретсіз марапаттар. Әрине, көпке топырақ шашудан аулақпын. Десе де, айтылып жатқан құнсыз медальдарды ұстаздар қауымының ойланбастан сатып алып, алшаң басып жүргендері көңіл көншітерлік жағдай емес. Осы мәселе бас көтергелі көптеген әлеуметтік парақшалар мен мәдени сайттарда біраз пікірталастар туындаған-ды.

«Қазір өкінішке орай, нарық заманы деп ар, ұят, намыстан гөрі материалдық құндылықтардың бәсі артып тұр ғой. Бүгінде, тіпті, кейбір қоғамдық ұйымдар тарапынан атақ, марапаттардың да ақшаға сатылатындығы туралы естіп жүрміз. Өте ұят! Бұған тоқтам болу керек.

Игілігі болып кейде өңгенің,

Сатылады жерің, суың,

көлдерің,

Оңашада жатыр дейсің

кім көріп,

Біреулердің не алып,

не бергенін?

Нарық заңы. Нені шешпес ақшалар?

Сатылады үй-жай, мүлік, басқалар.

Тек сатылмас мына Жарық дүние,

Сатып алар еді байлар, патшалар» - , деп белгілі қаламгер, ҚР Жазушылар одағының мүшесі Бекшүкір Қаршалов өз пікірін өлең жолдарымен жеткізген.

Бұл туралы Мәжіліс депутаты Асхат Аймағамбетов: «Сатып алған марапат – марапат емес. Біз әрине, түсінеміз. Кей уақыттарда қоғамдық түрлі марапаттар болады. Бірақ, олар ақылы болмауы керек. Қоғамдық марапат ақылы болатын болса, оның еш қасиеті де, құны да жоқ. Біз бұндай мәселенің дұрыс еместігін түсіндіруіміз керек. Кейбір әріптестеріміз соны түсінбей, осындай жөнсіз әрекетке барып жатыр»,- деп үн қосқан болатын.

«Ұстаз» деген ұлағатты есімнің ұсақталып кеткені соншалық, тіпті, ақшаға сатып алған атақ-дәрежелерін кейбір мұғалімдер өздерінің түйіндемелеріне тіркеп, қандай "ұстаз" екендерін дәріптеп жүр. Осындай атақ-дәрежені құнсыз саудаға салып, табыс көздеріне айналдырып жүргендерге «әй дейтін әже, қой дейтін қожа» болмай тұр.

«Ұстаз атақ қуса, ұстаз жалғандыққа барса, ұстаздан ұят кетсе, ұлттың ертеңі не болмақ?» деп ашынады елге белгілі ұстаз Аятжан Ахметжанұлы. Расымен де, болып жатқан жағдаяттарға қарап, «Атың шықпаса, жер өртенің» кебін кигендердің заманы дерсіз. Жиған тәжірибесі мен еңбек жолы толысып үлгермеген, білім ұясынан шәкірт ұшырып көрмеген оқытушы «Ғасыр ұстазы», «Ұлт ұстазы», «Алаш Ұстазы», «Ұлағатты ұстаз» деген таудай атақты тер төгіп, қиналмай-ақ сатып алып жатса, жеткен жеріміз де осы шығар...

Мұндай көк тиындық құны жоқ атақ-дәрежелер мен медальдар тек білім саласы ғана емес, ғылымда, медицинада, әдебиетте, өнерде, журналистикада, тіпті, саясат пен қоғамдық қызметте және басқа салаларда да жетіп жатыр. Ең өкініштісі, осындай атаққа құмар адамдар, сол төсбелгіні кеудесіне тағып алып, соған кәдімгідей малданып жүретіндер арамызда күн өткен сайын көбейіп келе ме деген қаупіміз де жоқ емес. Өйткені, осындай жалған атаққа құмарлық деген ауруы аға буыннан бүгінгі жастарға да жұғып бара жатқандай.

Тоқсан ауыз сөздің тобықтай түйіні, Мемлекет басшысы айтқан адал азаматқа тән қасиеттерді дәріптейтініміз, жаңа қоғамдық құндылықтардың үстемдік еткенін қалайтынымыз, адал еңбекті бағалайтынымыз рас болса, кім көрінгеннің мән-мағынасыз, көк тиындық құны жоқ марапаттар таратып, шынайы, салмақты наградалардың, оны адал еңбегімен алған тұлғалардың қадірін қашыратындардың әрекетіне заңмен тыйым салған жөн болмақ. Өйткені, ақын Мұхтар Шахановтың «Мазмұн жоқта мазмұнсыздық шыға келеді ортаға» дегеніндей, мәнсіз, мазмұнсыз, арам жолмен сатып алынған марапаттар адал еңбектің бағасын төмендетіп, адал азаматтардың тасада қалуына себеп болып келеді.  

Эльмира  СӘРСЕНБАЙҚЫЗЫ

Орталық референдум комиссиясының хатшысы Мұхтар Ерман инспекциялық сапарлар барысында Шымкент қаласында 2024 жылғы 6 қазанға белгіленген республикалық референдумға дайындық мәселелері бойынша жиын өткізді.

Аумақтық референдум комиссиялары төрағаларының, жергілікті атқарушы және құқық қорғау органдары өкілдерінің қатысуымен өткен семинар-кеңесте өңірде азаматтардың тізімін нақтылау, референдумды материалдық-техникалық қамтамасыз ету, сайлау кезеңінде заңдылық пен құқықтық тәртіпті сақтау бойынша жұмыстар туралы баяндамалар тыңдалды, алдағы науқанның негізгі ерекшеліктері талқыланды.

Республикалық референдум өткізуге Шымкент қаласы бойынша 350 референдум комиссиясы қатысатын болады:

6 аумақтық (1 қалалық, 5 аудандық) және 344 учаскелік референдум комиссиялары, оның ішінде – 23 жабық референдум учаскелері (емханалар, тергеу изоляторлары, қарттар үйлері және әскери бөлімдер). 2024 жылдың 1 шілдесіне Шымкент қаласы бойынша сайлаушылар саны 660 563 адамды құрайды. 344 сайлау учаскесі толық материалдық-техникалық жабдықтармен қамтамасыз етілген. (дауыс беруге арналған жәшіктер, дауыс беруге арналған кабиналар, ақпараттық стендтер, мүгедектігі бар азаматтарға арналған бұрыштар, жолақтар т.б.).

Қалада 40 мыңнан астам мүгедектігі бар адамдар. Олар үшін дауыс беруге барлық жағдайлар жасалады, тұрғындарды әлеуметтік желілер, мессенджерлер арқылы ақпараттандыру ұйымдастырылады, арнайы онлайн-сервистер іске қосылады. Аудандарда call-орталық ашылады, 109 қызметі де болады.

Кездесу барысында Мұхтар Ерман республикалық референдум туралы заңнамадағы жаңалықтарды және осы науқанның ерекшеліктерін түсіндірді, сондай-ақ аумақтық, учаскелік комиссиялар мен тиісті құқық қорғау және өзге де мемлекеттік органдар тарапынан дауыс берушілерге таңдау жасауға толық жағдай жасалып, референдумды өз деңгейінде өткізу қажеттілігіне баса назар аударды.

Сондай-ақ, референдумды өткізу барысында барлық мемлекеттік органдар тарапынан заңнаманың қатаң сақталуын, жасырын дауыс беру, референдум процесінің барлық кезеңдерінің жариялылығы мен ашықтықтығын қамтамасыз ету қажеттілігін атап өтті.

ҚР Парламенті Сенаты және Мәжілісінің депутаттары Өзбекәлі Жәнібеков атындағы ОҚПУ ұжымымен кездесіп, АЭС салу мәселесін талқыға салды. Сенат депутаттары Нұртөре Жүсіп, Нұрлан Бекназаров, Айгүл Қапбарова және Мәжіліс депутаты Данабек Исабеков, қала мәслихатының төрағасы Бахадыр Нарымбетов елімізде АЭС салудың маңызы, қажеттілігі жөнінде кеңірек әңгімелеп берді.

Сенат депутаты Нұртөре Жүсіп АЭС салуды халыққа түсіндірудің маңызына тоқталып, елімізде бұл салада мамандар даярланып жатқанын атап өтті.

– Қазіргі таңда Парламент депутаттары өңірлерге шығып, халықпен кездесулер өткізіп жатыр. Бұл ретте ақпараттық-түсіндіру жұмыстарының маңызы зор. Әлемнің көптеген елдерінде атом реакторлары жұмыс істеп тұр. Жалпы болашақта энергетикалық тәуелділіктен арылу үшін біздің елімізге де АЭС қажет. Бүгінде атом энергетикасы саласында зерттеу жұмыстары жүргізілуде. 1800-ге жуық азамат осы салада білім алуда. Мамандар даярлау қолға алынған. Сол себептен біз де көштен қалмауымыз керек. Барша ел азаматтарын жалпыұлттық референдумге белсенді қатысуға шақырамын, – деді Н.Жүсіп.

Ел экономикасын әртараптандарыу үшін, энергетикаға тәуелділікті жою үшін жаңа бастамалар қажет-ақ. Соңғы жылдары энергия тапшылығы сезіліп жатыр. Жылу энергия орталықтарының тозу көрсеткіші артып келеді. Сенат депутаттары Н.Бекназаров, А.Қапбарова, Мәжіліс депутаты Д.Исабеков, қала мәслихатының төрағасы Б.Нарымбетов АЭС салу қажеттіліктен туындаған бастама екенін жан-жақты түсіндіріп берді.

Еліміз энергетика саласының маңызды кезеңінде тұр. Парламент депутаттары ендігі кезекте азаматтарды белсенді болуға шақырды. Сондай-ақ, депутаттар жиын соңында жастардың АЭС мәселесіне қатысты көкейдегі сауалдарына жауап берді.

«Шымкент келбеті»

Шымкент қаласының Чернобыль ардагерлері де АЭС салуды қолдайды. Одақтың жергілікті филиалында ардагерлер, белсенділер «АЭС -дамыған елдермен тең дәрежеде!» тақырыбында кездесу өткізіп, көпшілікті жалпыұлттық референдумға белсенді қатысуға шақырды.

Чернобыль ардагерлері Одағының жергілікті филиалының төрағасы Сайфулин Нахбаев АЭС салудың маңызын, жалпы энергетика саласында жаңа өндірістер қажет екенін атап өтті.

-Чернобыль ардагерлер одағы және "Семей-сынақ" қоғамдық бірлестігінің өкілдері келешек ұрпақ үшін біз АЭС салуды қолдаймыз. Қазіргі таңда энергия тапшылығы сезілуде. АЭС - өзінің құнын ақтайтын жоба. Бүгінде жастарға жұмыс керек. Атом электр станциясы салынса көптеген жұмыс орындары пайда болады. Жалпы атом энергетикасын еліміздің болашағы үшін қажеттіліктердің бірі деп санаймыз, - дейді С.Нахбаев.

Ардагерлер болашағын бейбітшілікпен байланыстырған мемлекетіміз өз жерінде салынатын жобаның қауіпсіздігіне баса назар аударса деген уәждерін айтты.

«Шымкент келбеті»

Шымкент қаласындағы А.Қуатбеков атындағы Халықтар достығы университетінде АЭС салуды қолдау жөніндегі республикалық халықтық штабтың мүшелері ардагер ұстаздармен және студенттермен кездесті. Кездесу барысында АЭС жобасының маңыздылығы түсіндіріліп, 6 қазан күні өтетін жалпыхалықтық референдумға қатысуға шақырды.⁣⁣⠀
⁣⁣⠀
Кездесуге ҚР Парламенті Мәжілісінің депутаттары Данабек Исабеков пен Олжас Құспеков, сондай-ақ «Amanat», «Қазақстан Халық», «Ауыл», «Ақжол» және «Республика» партияларының өкілдері мен қалалық мәслихат депутаттары қатысты.⁣⁣⠀
⁣⁣⠀
Депутат Данабек Исабеков атом электр станциясының ел экономикасына тигізетін пайдасына тоқталды. Ол қазіргі уақытта электр қуатының жетіспеушілігі байқалып жатқанын және халық саны өскен сайын тоқ көздеріне деген сұраныстың арта беретінін жеткізді. «Бұл жағдайда болашақта заводтар мен фабрикаларды қалай ашамыз?» – деді ол.⁣⁣⠀
⁣⁣⠀
Олжас Құспеков әріптесінің сөзін қуаттап, АЭС салынбаса, энергетика саласында шешімі қиын ауқымды проблемаларға тап болуымыз мүмкін екенін айтты. «Халық болып, қазіргі таңда кездесуі мүмкін мәселелерді шешуіміз керек. Сондықтан референдумға белсенді түрде қатысып, пікірлеріңізді нақты білдіруге шақырамын», – деді ол.⁣⁣⠀
⁣⁣⠀
Кездесу барысында ардагер оқытушылар штаб мүшелеріне бірнеше сұрақ қойды. Азаматтарды алаңдатқан басты мәселе – АЭС-тің қоршаған ортаға зиян келтірмеуі. Жұмысшы топ барлық сауалдарға тұшымды жауап беріп, халықтың алаңдаушылығын жеңілдетуге тырысты. Бұл кездесу АЭС жобасының маңыздылығын түсіндіру мен қоғамда дұрыс ақпарат таратуға бағытталған тағы бір қадам болды.