Шымкент келбеті

Тұрғын үй кезегіне тұрған 180 отбасы
жаңа пәтерге қол жеткізді

Баспаналы болған тұрғындарды облыс әкімі Бейбіт Атамқұлов пен Шымкент қаласының әкімі Ғабидолла Әбдірахымов арнайы құттықтап, пәтер кілтін табыс етті.

Бұл күні 36 отбасы «Ақжайық» шағынауданында бой көтерген бес қабатты тұрғын үйдің алғашқы тұрғындары атанды. Қоныс тойын тойлағандардың арасында Ұлы Отан соғысының қатысушылары мен мүгедектері, жетім және ата-анасының қамқорлығынсыз қалған балалар, халықтың әлеуметтік әлсіз тобы, мемлекеттік қызметшілер, бюджеттік мекемелердің қызметкерлері мен әскери қызметшілер, сонымен қатар, жалғыз тұрғын үйі апатты жағдайда деп танылған азаматтар бар. Ондағы пәтерлер «Қазақстанның ипотекалық компаниясы» АҚ арқылы тапсырылды.

– Жылдан жылға алдымызға қойған мақсатымызды орындап жатырмыз. Жаһандық дағдарыс жағдайында да елімізде әлеуметтік саланы жақсарту бағытында қарқынды жұмыстар жүріп жатыр. Бүгінгі қуаныштарыңызға ортақпыз. Алдағы 5 жылдықта баспанаға мұқтаж жандардың саны біршама азаятынына сенімдімін. Себебі, «Қазақстан ипотекалық компаниясы» Ипотекалық ұйымы» акционерлік қоғамы тұрғындарды баспанамен қамту бағытында қызмет аясын біршама кеңейтіп отыр. Жыл соңына дейін «Қазақстанның ипотекалық компаниясы» АҚ арқылы қалада тағы 21 тұрғын үй, яғни, шамамен, 1700 пәтер пайдалануға беріледі, – деп атап өтті облыс әкімі Бейбіт Атамқұлов.

Сондай-ақ, «Нұрсәт» шағынауданында коммуналды тұрғын үй қоры есебінен 144 пәтер пайдалануға берілді. Көпқабатты үйдің құрылысы 10 ай уақыт ішінде тапсырылған. Мұнда бірыңғай үлгіде бой көтерген тағы алты үй бар. Алдағы уақытта онда 400-дей отбасы қоныс тойын тойлайды деп күтілуде.

– Бүгінде Шымкент қаласы бойынша баспана кезегінде 21 547 азамат тұр. Олардың 1500-і – жетімдер және ата-анасының қамқорлығынсыз қалған жастар. 8 мыңға жуығы тұрмысы төмен отбасы балалары, қалғаны мемлекеттік және бюджеттік мекеме қызметкерлері саналады. Апатты үйлерде тұратын 21 адам да баспана алуға өз кезегін күтуде, – деді қала әкімі Ғ. Рахматоллаұлы.

Өз кезегінде, жаңа пәтерге ие болғандар мемлекет тарапынан көрсетілген лайықты қолдауға ризашылық сезімін білдірді.

БИЫЛ ШЫМКЕНТ ҚАЛАСЫНЫҢ «ҚАЙТПАС-1», «ҚАЙТПАС-2», «ЫНТЫМАҚ», «АҚНИЕТ» ШАҒЫНДАУДАНДАРЫ, СОНЫМЕН ҚАТАР, «ЖАСТАР», «ЕЛАМАН», «ЗАСТЕННАЯ» ШАҒЫНАУДАНДАРЫНЫҢ БІРҚАТАР КӨШЕЛЕРІ САПАЛЫ ЭЛЕКТР ЖАРЫҒЫМЕН ҚАМТЫЛАДЫ. БҰЛ БАҒЫТТА ШЫМКЕНТ ҚАЛАСЫНЫҢ ӘЛЕУМЕТТІК «ДАМУ» КАРТАСЫ ШЕҢБЕРІНДЕ БЕЛГІЛЕНГЕН ЖҰМЫСТАР ҮШІН БЮДЖЕТТЕН 1 МИЛЛИАРД 631,6 МИЛЛИОН ТЕҢГЕ ҚАРЖЫ ЖҰМСАЛМАҚ.

Қалалық тұрғын үй-коммуналдық шаруашылық бөлімі энергетика секторының меңгерушісі Нұрлан Жаманкөздің айтуынша, бір ғана «Қайтпас-1» шағынауданында тұрғындарды сапалы энергия көзімен қамту үшін 433,7 миллион теңге қаржы бөлініпті. Нәтижесінде, ондағы 2010 абонент, сонымен қатар, бастапқы жобаға енбей қалған 180 үй жоғары кернеулі электр жарығын тұтынуға қол жеткізбек. Биылғы жылға өтпелі жұмыстар шілде айының 1-жұлдызына дейін толығымен атқарылуы тиіс. Ол жұмыстарды «Реал-Билдинг» ЖШС-гі жүргізуде. Осы орайда, біз шағынаудан аумағында бағаналарды орнату ісін қарқынды түрде атқарып жатқан мердігер мекеменің бүгінгі жұмыс барысымен танысуды жөн көрдік. 

Шағынауданның Алтай көшесінде мердігер мекеменің қазіргі жұмысы қарбаласқа толы. Себебі, белгіленген мерзімде мекеме жұмысшылары барлығы 2600 бағананы толығымен орнатып шығуы тиіс. Күні бүгінге дейін оның 640 бағанасы қойылыпты. Жұмыс қарқынын арттыра түсу үшін мұнда мекеменің 18 жұмысшысы мен 2 жер бұрғылаушы, 2 бағана орнатушы техникасы жұмылдырылған.
– Күн сайын жұмысшылар орта есеппен 40-45 бағананы орнатып жатыр, – дейді мекеменің учаске басшысы Талғат Айтбаев. – Ауа райының қатқыл мінезіне де қарамастан, алдағы наурыз айына дейін осы жұмыс қарқынымен 1080 бағананы орналастырамыз деген жоспарымыз бар. Қандай да бір кезіккен қиындықтарға қарамастан, тұрғындар белгіленген мерзімде сапалы электр жарығымен қамтылады.
Ұзақ жылдар бойы электр жарығынан тапшылық көріп, тиісті орындарға шағым жасап келген көше тұрғындары бұл игі іске дән риза. Қуаныш сезімін жасырмаған Сабыр есімді азамат күні бүгінге дейінгі кедергілерден енді құтылатынын айтады.
– Бірер жыл бұрын үй ауласынан көлік жуатын орын ашқан болатынмын. Жарықтың жеткіліксіздігі себебінен, су шашатын құрылғылар толыққанды жұмыс жасай алмады. Амалсыздан, ток күшін жинайтын құралды да пайдаланып көрдім. Енді міне, жоғары сапалы электр энергиясы берілетінін біліп, бірқатар қиындықтарды еңсеретінімізге қуанып отырмыз, – дейді ол.
Сапалы электр жарығымен қамту бағытындағы межелі жұмыстар бүгінде «Қайтпас-2» шағынауданында да қарқынды түрде жүргізілуде. Ондағы міндеттерді «Қуат құрылыс» ЖШС-гі атқарып келеді. Мекеме басшысы Рашид Нұрмахановтың айтуынша, аталмыш жұмысқа 50-ден астам жұмысшы мен 8 техника жұмылдырылған. Мамыр айына дейін олар шағынауданда 44 трансформаторды орнату міндетін толығымен орындайтынына сенімді. Нәтижесінде, ондағы 2400 абонент сапалы электр жарығына толыққанды қол жеткізетін болады.

Шымкент қаласының әкімі Ғабидолла Әбдірахымовтың өкімімен және қалалық мәслихат депутаттарының келісімімен қалалық ішкі істер басқармасының жергілікті полиция қызметіне жаңа басшы тағайындалды. Бұл лауазымды міндетті полиция подполковнигі Мейрхан Данияр Мейрханұлы атқаратын болды. Оның кандидатурасын Оңтүстік Қазақстан облысы ІІД жергілікті полиция қызметінің басшысы ұсынды.

Жергілікті полиция қызметінің жаңа басшысын ұжымға қала әкімі Ғабидолла Әбдірахымов таныстырды. Өз сөзінде полиция қызметінің қоғамда алар орнын айрықша бағалаған қала әкімі жаңа басшының алдағы қызметіне сәттілік тіледі.
– Сіздерге құқық бұзушылықтың алдын алу, қоғамдық тәртіпті сақтау бағытында үлкен жауапкершілік міндеті жүктеледі. Тиісінше, жергілікті полиция қызметінің жұмысын жандандыру үшін биыл қала бойынша 100 қызметтік автокөлік, 5-6 эвакуатор жеткізіледі. Сондай-ақ, қала аумағында қосымша 50 бейнебақылау қондырғылары орнатылмақ. Ел аумағындағы үшінші мегаполис атына сай, Шымкент қаласының жергілікті полиция қызметі де ұдайы жоғары көрсеткіштерге ие болуы тиіс, – деп атап өтті Ғ. Рахматоллаұлы.
Данияр Мейрханұлы бұған дейін Сайрам АІІБ бастығы болып еңбек еткен. Жаңа басшы алдағы уақытта қаладағы жергілікті полиция қызметінің жандануына күш салатынын жеткізді.

Айта кетейік, жаңа құрылым Ұлт жоспары «100 нақты қадам» бағдарламасына сәйкес жасақталған болатын. Полиция қызметінің құрамына учаскелік полиция инспекторлары мен олардың көмекшілері, кәмелетке толмағандар істері жөніндегі инспекторлар, табиғат қорғау, қабылдап-тарату және арнайы қабылдайтын орындар, әйелдерді зорлық-зомбылықтан қорғау бөлімшесі, жол-патрульдік полиция қызметкерлері бар. Жергілікті полиция қызметі ішкі істер органдарының біртұтас жүйесіне кіреді және қызметкерлері бірыңғай құқықтық мәртебеге ие.
Жергілікті полиция қызметінің басшысы әр тоқсан сайын тұрғындар алдында есеп беріп отырмақ. Өз кезегінде, бұл міндет сала қызметкерлерінің жауапкершіліктерін арттыратын болады. Оған қоса полиция қызметін тұрғындар да лайықты бағалай алады.
Сонымен қатар, бұл күні қалаға қарасты төрт ауданда жергілікті полиция қызметінің басшысы лауазымына жаңа басшылар тағайындалды.

Өткен жылы Шымкент қаласында 19 мемлекеттік қызметкер тәртіптік жауапкершілікке тартылған. Бұл жөнінде Шымкент қаласының әкімі Ғабидолла Әбдірахымовтың төрағалығымен өткен қала әкімдігінің жиынында кеңінен талқыланды. Күн тәртібінде үш мәселе қаралды.

Алдымен, Шымкент қаласы әкімдігінің жанындағы сыбайлас жемқорлыққа қарсы күрес мәселелері жөніндегі комиссиясының 2015 жылы атқарған жұмыстары туралы қала әкімінің орынбасары Қайрат Нұртай баяндама жасады. Баяндамашы келтірген мәлімет бойынша, мемлекеттік әкімшілік қызметшілердің тәртібін нығайту және жауапкершілігін арттыру мақсатында қаланың барлық құрылымдық бөлімдерінде сыбайлас жемқорлыққа қарсы күрес мәселелері бойынша «дөңгелек үстелдер» ұйымдастырылып, оның мемлекеттік деңгейде келген салдары жөнінде жете түсіндірілген. БАҚ беттерінде 142 мақала жарық көріп, қала әкімдігінің ресми сайтында сыбайлас жемқорлыққа қарсы күрес тармақшасы дайындалды. Онда сенім телефондары, Қазақстан Республикасы мемлекеттік қызметшілерінің Ар-намыс кодексі және Қазақстан Республикасындағы сыбайлас жемқорлыққа қарсы іс-қимыл жөніндегі 2011-2015 жылдарға арналған салалық бағдарламасының толық нұсқасы жарияланған. Осы орайда қала әкімі өз тарапынан тиісті міндеттерді жүктеді.
– Алдағы 2 ай уақыт ішінде арнайы құрылған комиссия тарапынан іс-шаралар жоспары түзіліп, онда әсіресе, көпқағаздылық мәселелері бойынша әкімшілік кедергілерді жою бағытында нақты ұсыныстар көрсетілсін. Яғни, комиссияның жұмысын қайта қарап, бекітетін боламыз. Ұсыныстар бойынша шешім қабылданады, – деді Ғабидолла Рахматоллаұлы.
Күн тәртібінде, сондай-ақ, ҚР «Жұмыспен қамту – 2020» бағдарламасының орындалу барысы да қаралды. Баяндама жасаған қалалық жұмыспен қамту және әлеуметтік бағдарламалар бөлімі басшысының міндетін атқарушы Бауыржан Қуанышбеков өткен жылда 19 834 азамат жұмысқа орналасу бойынша өтініш берсе, оның 15 648-і тұрақты жұмыспен қамтылғанын мәлім етті. Яғни, көрсеткіш 78,9 пайызға орындалған.
– Жалпы, Шымкент қаласында 377 мың тұрғын экономикалық тұрғыдан белсенді, яғни, қызмет етуге қабілетті болып есептеледі, – дейді Бауыржан Шераханұлы. – Жалпы, өткен жылы 148 адам кәсіби оқудан өтті. 498 мүмкіндігі шектеулі азамат тұрақты жұмыспен қамтылды. Десек те, орын алған кемшіліктер де жоқ емес. Бұл бағытта 150 тұрғын қызметі сапасына наразылық білдіріп, шағым түсірген.
Айта кету керек, жұмыспен қамту орталығында қазіргі таңда арнайы операциялық зал ашылып, жұмыс берушілер мен жұмыс іздеушілерді байланыстыратын алаңға айналып келеді. Бұл алаң интернет желісіне қосылған, арнайы техникалық құралдармен жабдықталып, «бір терезе» қағидасы бойынша қызмет көрсетеді. Өз кезегінде, қала әкімі Ғ.Әбдірахымов алдағы уақытта бөлімнің жаңа пайдалануға берілген операциялық залының қызметімен арнайы танысатынын жеткізді. Сондай-ақ, бөлім басшылығына нақты міндеттер жүктеп, осы мәселелердің орындалу барысын өз қадағалауына алатындығын мәлімдеді.

Саяси мәні зор науқанға Шымкент қалалық сайлау комиссиясы да дайындығын тыңғылықты түрде атқаруда. Комиссия төрағасы Марс Елекеев қала аумағында 29 округтік сайлау комиссиясы белгіленгенін, күні бүгінге дейін жергілікті мәслихат сайлауына 20 азаматтың үміткер ретінде өзін-өзі ұсынғанын мәлім етті.
Сонымен қатар, Шымкентте қала аумағының кеңеюіне байланысты 14 облыстық сайлау округі жұмыс жасамақ. Қазір дауыс беру орындарында дайындық жұмыстары жүргізілуде. Комиссия төрағасы өз сөзінде кейбір елді мекендердің облыс орталығының аумағына енуіне байланысты өзгерістер орын алуы мүмкін екенін де жасырмады.

– Сайлау мерзімі Ұлыстың ұлы күні қарсаңында өтетін болғандықтан, мереке сәтінде өзге қалаларға қыдырып кеткен немесе іссапармен жүрген азаматтардың да дауыс беруі үшін қолайлы жағдайлар қарастырылуда. Тұрғындарға бір ескерте кететін жайт, сайлау мерзіміне дейін өзіне тиесілі сайлау округіне барып, толық тізімде өз аты-жөні барын біліп алғаны дұрыс болар еді. Бұл күні тиісінше, сақтық шаралары да күшейтіледі. Өңірде арнайы құзырлы органдар штабы құрылуы мүмкін, – дейді Марс Атымтайұлы.
Комиссия төрағасының берген мәліметінше, сайлаушыларға толыққанды мәлімет беру мақсатында, қалада арнайы белгіленген орындарда Парламент Мәжілісі мен барлық деңгейдегі мәслихат депутаттарының сайлауын насихаттау бойынша 20 билборд дайындалған. Қаладағы халық санының ұлғаюына байланысты сайлау учаскелерінің саны да едәуір өсіп отыр. Яғни, өткен жылы ҚР Президенті сайлауында барлығы 222 сайлау учаскесі жұмыс жасаса, бұл жолы көрсеткіш 236-ға дейін артқан. Қазіргі таңда Шымкентте 377 мың сайлаушы тіркелген.
Сайлау округтерінің аумағы мен мекен-жайы жергілікті «Шымкент келбеті», «Панорама Шымкента» газеттерінде жарияланған. Учаскелік сайлау комиссиялары жұмыс күндері және сенбіде таңғы 9-дан кешкі 6-ға дейін жұмыс істейді. Тек, жексенбі демалыс күні ретінде белгіленген.

Орталық сайлау комиссиясы
бақылауды күшейтпек

Наурыз айының 20 жұлдызына белгіленген еліміздегі Парламент Мәжілісі мен барлық деңгейдегі мәслихат депутаттарының сайлауына байланысты бүгінде сайлау комиссиялары тарапынан үміткерлерді тіркеу жұмыстары жалғасуда. Сайлау күні ұзақ-сонар кезекті болдырмау үшін ел аумағында барлығы 9440 учаскелік сайлау комиссиясы жұмыс жасамақ. Сондай-ақ, шетелдерде қызмет бабымен жүрген отандастарымыз үшін де барлық мүмкіндіктер қарастырылған. Яғни, өзге елдер аумағында арнайы құрылған 65 сайлау комиссиясы ел азаматтарының өзіндік таңдауына бақылау жасайды.
Бұл орайда, округтік сайлау комиссиялары «Сайлау туралы» ҚР Заңына сәйкес, ақпан айының 19-на дейін қалалық мәслихатқа өзін-өзі ұсынушы азаматтарды есепке алу жұмыстарын жалғастырмақ. Ақпан айының
23 жұлдызына дейін өзін-өзін ұсынған азаматтар тіркеуге алынып, одан әрі үміткерлік мандатын иеленеді және сайлауалды үгіт-насихат жұмыстарын жүргізеді. Осы кезде сайлау комиссиялары ұйымдастыру және қадағалау жұмыстарына белсенді түрде қатыспақ.
Сондай-ақ, шетелдік бақылаушылар мен БАҚ өкілдеріне қолайлы жағдай жасау мәселесі де назарға алынған. Бұл ретте, әлемнің 112 елінен халықаралық бақылаушылар шақырылуда. Қазірдің өзінде бірқатар халықаралық ұйымдар сайлауға бақылау жүргізуге қатысатындықтарын ауызша қуаттап отыр. Олардың қатарында Шанхай ынтымақтастық ұйымы, Еуропа кеңесінің парламенттік ассамблеясы, сондай-ақ Түркі тілдес мемлекеттер ынтымақтастығы кеңесі бар.

Үмiткерлер назарына!

2016 жылдың 20 наурызына белгіленген еліміздегі Парламент Мәжілісі мен барлық деңгейдегі мәслихат депутаттарының сайлауына қатысатын үміткерлер үшін қалалық «Шымкент келбеті» және «Панорама Шымкента» газеттері үгіт парақшаларын жариялауға мынадай төлем мөлшерін белгілейді.

1. Үміткердің өз есебінен төленетін сайлауалды мақалалары үшін Қазақстан Республикасы Конституциялық Заңының 28-бабы 3-тармағы бойынша әр шаршы сантиметріне – 150 теңгеден есептеледі.
2. Сайлау қорының қаржысы есебінен сайлауалды үгіт парақшаларын жариялау үшін Қазақстан Республикасы Парламент Мәжілісі депутаттығына үміткерлердің әр шаршы сантиметрге төлейтін қаржысы – 200 теңгеден есептеледі.
3. Сайлау қорының қаржысы есебінен сайлауалды үгіт парақшаларын жариялау үшін мәслихат депутаттығына үміткерлердің әр шаршы сантиметрге төлейтін қаржысы – 200 теңгеден есептеледі.

Шымкент қаласының әкімі Ғабидолла Әбдірахымов 2015 жыл
қорытындысы бойынша халық алдында есеп берді

Республика көлемінде жер аумағы бойынша бірінші, тұрғындарының саны бойынша екінші орынға ие Шымкент қаласы бүгінде шын мәнінде, экономикасы тұрақталып, ажары айшықталып келеді. Әлеуметтік саланың деңгейі зерделеніп, ахуал-әлеуеті түзелді. Жаңа бой көтерген заманауи нысандары сәулеттік келбетімен көз тартып, қала тұрғындары мен қонақтарының көзайымына айналды. Қаланың даму деңгейін жоғары бағалаған ҚР Президенті Н.Назарбаев Оңтүстік Қазақстан облысына жасаған әрбір сапарында Шымкентті еліміздің үшінші қаласы ретінде атап, оның жақын келешекте ірі мегаполиске айналарына айрықша сенім білдіріп келеді. Ендігі жерде, талап-міндеттердің үдесінен көрініп, түйткілді мәселелердің түйінін шеше білу – үлкен қажыр-қабілетті қажет етері сөзсіз. Шымкент қаласының әкімі қызметіне тағайындалған қысқа уақыт мерзімінде өзін жан-жақты қалыптасқан тәжірибелі басшы ретінде таныта білген Ғабидолла Әбдірахымов ең әуелі, қаланы әлеуметтік-экономикалық тұрғыдан дамытудың стратегиялық бағытын айқындаған Тұжырымдамасын жүзеге асыруды көздейді. Бұл бағытта қала әкімі Ғабидолла Рахматоллаұлының 2015 жылы атқарған жұмыстары бойынша қала әкімдігінің үлкен мәжіліс залында жергілікті тұрғындарға есеп беру кездесуі өтті. Есепті кездесуге облыс әкімі Бейбіт Атамқұлов, ҚР Президенті Әкімшілігінің мемлекеттік инспекторы Жасұлан Естенов арнайы қатысып отырды.

Кәсiпкерлiк көкжиегi кеңейiп келедi

Алдымен, есепті кездесуге жиналған қала тұрғындарының назарына арнайы қойылған LED-экран арқылы қысқаша бейне хабар ұсынылды. Мұнан кейін баяндама жасаған қала әкімі өткен жылда қала бюджетін толықтырып, әлеуметтік салаға айтарлықтай дем берген кәсіпкерлік субьектілерінің бүгінгі ахуалына тоқталды.
Шағын және орта кәсіпкерліктің дамуы қала үшін үлкен маңызға ие екендігі белгілі. Бұл ретте, қала әкімінің баяндамасынан белгілі болғандай, қалада 120 мыңнан астам адам кәсіпкерлік саласында жұмыспен қамтылған. Соңғы жылдардағы мемлекеттік қолдау механизмдері кәсіпкерліктің дамуына оң ықпалын тигізуде. Нақты айтқанда, қалада кәсіпкерлік субьектілерінің саны 74 мыңнан асып, шығарылған өнім мен көрсетілген қызмет көлемі 315 миллиард теңгені құрапты.
2015 жылы индустрияландыру картасының шеңберінде жалпы құны 27,7 миллиард теңгені құрайтын 8 жоба іске қосылып, нәтижесінде, 1000-ға жуық жұмыс орны ашылған. Сондай-ақ, инвесторлар мен жергілікті кәсіпкерлер тарапынан өнеркәсіп кәсіпорындарын дамытуға инвестициялар салуға қызығушылық анағұрлым артып отыр. Осы мақсатта қаланың екі бірдей аумағында индустриялды аймақ құру жоспарланған. Атап айтқанда, Тассай елді мекеніндегі 89 гектар жерге индустриалдық аймақтың инженерлік-коммуникациялық жүйелерінің жобалық-сметалық құжаттары дайындалып, бүгінгі таңда республикалық бюджет есебінен құрылыс жұмыстарын жүргізу қолға алынған. Сондай-ақ, Жұлдыз елді мекеніндегі 76,2 гектарды құрайтын индустриалдық аймақтың инженерлік жүйелерінің жобалық-сметалық құжаттары дайындалуда.
Статистикалық мәлімет бойынша, өткен жылда қаладағы бөлшек сауда көлемі 248,5 миллиард теңгені құраған. Ал көтерме сауда көлемі 502,7 миллиард теңгеге жетіпті. Яғни, кәсіпкерлік саласындағы оңтайлы жұмыстар бүгінде табысты жүзеге асып келеді. Сондай-ақ, қала әкімі тұрғындарды толғандырған негізгі мәселелерді анықтап, нақты шешімін табу үшін әлеуметтік сауалнамалар жүргізілгенін мәлімдеді. Осының нәтижесінде, «Шымкент қаласының 2020 жылға дейінгі даму Тұжырымдамасы» дайындалып, аталмыш құжат облыс әкімдігі, депутаттар мен БАҚ өкілдерінің қатысуымен өткен жиында таныстырылды. Және көпшілік тарапынан қолдау тапты. Тұжырымдамада айқындалған міндеттер 2016 жылдың бюджетіне енгізіліп, жұмыстар кезең-кезеңімен атқарылмақ.

Игi бастамаларға лайықты қолдау қажет

Жарыссөзге шыққан облыстың Құрметті азаматы Байдулла Қонысбек ең алдымен, қала әкімінің басқару стилі мен халықтың мұң-мұқтажын тыңдай білу қабілетін жоғары бағалай отырып, көпшіліктің ойында жүрген бірқатар мәселелерді атап көрсетті. Яғни, қоғамдық көлік қызметінің сапасын жақсарту, «Ескі шаһар» аумағының сәулет-кескінін заманауи келбетте жаңарту, Қошқар ата, Қарасу өзендерінің жағалауларын абаттандыру жұмыстарын жалғастыруды ұсынды. Сондай-ақ, қаламы қарымды белгілі журналист Әмірсейіт Әлиевтің есімімен көше атауын беруді сұрады.
Бүгінгі жаһандық дағдарыс жағдайында ең әуелі, бірлесіп, жұмыссыздық пен бейқамдықтың алдын алу маңызды болмақ. Жарыссөзге шыққан белгілі кәсіпкер, базарлар қауымдастығының төрағасы Қайрат Балабиев осы орайда, шұлық шығаратын кәсіпорынға мүмкіндігі шектеулі 30 азаматты жұмысқа қабылдағанын жеткізіп, өзге де кәсіпкерлерді жергілікті тұрғындарды тұрақты жұмыспен қамту бағытында қажырлы күш жұмсауға шақырды.
Ал өз кезегінде, ортақ мақсат-мүддеге ұйысқан қала тұрғындарын өзара ынтымақ-бірлікте болуға үндеген облыстық өзбек ұлттық-мәдени орталығының төрағасы Икрам Хашимжанов бұл бағытта қала әкімі ұсынған Стратегиялық даму құжаты көпшіліктің көңілінен шығып отырғанын жасырмады.

Түйткiлдi мәселелер – күн тәртiбiнде!

Жиын барысы өзара сұрақ-жауап түрінде де өрбіді. Кездесуде тұрғындар қала әкіміне өз көкейінде жүрген сұрақтарын қойып, тұшымды жауап алды. Қала тұрғыны Айзат Ілиясова көпқабатты тұрғын үйде жарықтандыру жұмыстары қаншалықты деңгейде жүзеге асып жатқанын сұрады.
– 2014-2015 жылдар аралығында қала аумағында барлығы 260 көпқабатты тұрғын үй аулалары жарықтандырылған, – деді Ғабидолла Рахматоллаұлы. – Биыл қалған 251 үйге жарық жеткізу мәселесі толық шешімін табатын болады.
«Қатын көпір» шағынауданының ауыл биі Пернеш Қазиев ондағы №56 жалпы орта мектебінің қазіргі ахуалын атап өтті. Яғни, 600 орындық білім ұясында бүгінде 2,5 мың оқушы дәріс алуда. Сондай-ақ, қала тұрғыны Әлібек ақсақал да Қаратөбе тұрғын алабындағы қос мектептің әбден тозғанын, күрделі жөндеу жұмыстарын қажет ететіндігін жеткізді. Бұл орайда, тұрғындардың сауалына жауап берген қала әкімі Ғ. Әбдірахымов
аталған шағынаудандарда жаңа мектеп ғимараттарын салу үшін ЖСҚ дайындалып жатқанын мәлім етті.
Қала тұрғыны Айзада есімді азаматша «Жаңаталап» тұрғын алабына балалар алаңшасын салуды ұсынды. Өз кезегінде, қала әкімі, тұрғынның сауалына орай, биыл қала аумағында 65 балалар алаңшасы және 15 спорттық алаңша салынатынын құлаққағыс етті. Ал қала аумағына жаңадан қосылған Маятас ауылынан келген Әбдімәлік Қаратаевты өз өтінішіне орай, қала әкімі арнайы қабылдайтын болды.
Сондай-ақ, «Тұран» шағын-ауданының бір топ тұрғындарының сәлемін жеткізе келген Айтқұл ақсақал әлі күнге ауыз су, көгілдір газ және электр жарығына зәру екендігін айтып, сұрақ қойды. Бұл орайда, қала әкімі нақты кесімін айтты.
– Бір кездері ауыл шаруашылығы мақсатында бөлінген жерлерге тұрғын үй ғимаратын салып алған азаматтардың қайсыбірінің де әрекеті көңілге қонбайды. Яғни, мұның барлығы заңсыз түрде жүзеге асырылған. Сол себептен де, ондағы тұрғындарды коммуналдық қызмет түрлерімен қамтамасыз етуге заң бізге мүмкіндік бермейді. Алдағы уақытта, шаруашылық жерлерін үлестіргенде, біз бұл мәселеге тым қатаң қадағалау жасайтын боламыз, – деді Ғ.Рахматоллаұлы. Айта кетерлігі, қала әкіміне жазбаша түрде жолданған сұрақтарға алдағы уақытта БАҚ беттерінде арнайы жауап берілмек.

Қала әкiмi өз қызметiне лайықты

Қала әкімінің жергілікті тұрғындар алдындағы кезекті есепті кездесуін облыс әкімі Бейбіт Атамқұлов қорытындылады.
– Шын мәнінде, бүгінде берекелі істердің ұйытқысы бола білген қала әкімінің қызметіне барлығымыз да куә болып келеміз. Жасыратыны жоқ, Шымкентте жасалып жатқан жұмыс бар. Қазіргі таңда, Шымкент қаласының бюджеті 87 миллиард теңгені құрады. Оның ішінде, 44 миллиард теңгені қала әкімдігі өзі қамтамасыз етті. Тұрғындардың қай салада болсын, белсенділігі жоғарылап келеді. Ел аумағында ірі мегаполиске айналуға нақты қадам жасаған қалада қазірдің өзінде, кемі 40-45 медициналық жедел станциясының қажеттілігі байқалады. Бұл, қала халқының күн өткен сайын саны артып отырғанын көрсетеді.
Шымкент – ең алдымен, молшылық пен берекенің ордасы, бірліктің ұйытқысына айналған қала. Қашанда кім-кімді де бауырына жақын тартып тұратын дархан көңілімен, осыған орайласа қалған табиғаты және ауа райымен өзгелерден ерекшеленіп тұрады. Осындай бауырмалдығымен-ақ, қала халқы бірлесе қызмет етіп, игілікті істерге бастай беретініне сенімім зор, – деді Бейбіт Бәкірұлы.
Жиында жарыссөзге шыққан азаматтар қала әкімінің өткен жылда атқарған жұмыс нәтижесін жоғары бағалап, алдағы уақытта ісіне сәттілік тіледі.

Сіз не дейсіз?

Наталья РОМАНОВА, 
қалалық балалар мен жасөспірімдер орталығының директоры:

– Қала әкімінің өткен жылда атқарған жұмыстарын оң бағалауға болады. Әкімдік қызметінде жұмыс сапасын жақсартуға мейлінше күш салып, билік пен бұқара қауымның арасындағы «алтын көпірдің» жалғануына мүдделілік танытуы, көпшіл болуы ойға алған қайсыбір ісіне үлкен жәрдем болғанын жасырмаймын. Өз кезегінде, оқушылардың демалысын тиімді ұйымдастырып, әрбір кешті олардың есінде қалатындай етіп ұйымдастыруға ықылас таныта жүруі – біздің жұмысымызға да едәуір серпін береді. Оқушыларды әрбір қырынан талап-дарынын анықтап, белгілі бір өнерге қызығушылығын ұштауда мұндай қолдаудың берер пайдасы мол екені даусыз.

Оразалы МАХАНОВ, 
Еңбекші ауданының төбе биі: 

– Қала әкімі қай кезде де төбе билердің мәртебесін көтеруді, осы арқылы әсіресе, жасөспірімдер арасында түрлі құқық бұзушылық пен қоғамдық тәртіпті қалыптастыруды бір жүйеге келтіруге болатынын айтудан жалыққан емес. Осы мақсатта, төбе билердің қызметін бір жүйеге келтіріп, тұрақты түрде кездесулер ұйымдастырып тұруы – бізге әрине, үлкен жауапкершілікті де жүктейтіні анық. Яғни, бірлік пен береке ұйысқан ортада тұрғындарды ортақ мүддеге жұмылдыруға шақырған Ғабидолла Рахматоллаұлының бастамашыл әрекеттеріне өз тарапымыздан лайықты қолдау көрсетуге күш салатын боламыз.

Шерім МЕДЕУОВ,
Шымкент қаласының Құрметті азаматы:

– Қала әкімі Ғ. Әбдірахымовтың есепті кездесуінде байқағаным, тек өткен жылды екшеп, қорытындылап қана қоймай, тұрғындардың жарқын келешекке деген үміт-сенімін еселеп, нықтай түскенімен айрықша мәнді болды. Шынында, қала әкімінің бастамасымен қолға алынған қыруар шаруалардың қай деңгейде орындалғанын көзбен көріп те келеміз. Қашанда, бітер істің басында жүретін озық ойлы басшының жүйелі жұмысының нәтижесінде, қаланың жақын келешекте мұнан да асқақ келбетімен, сәулет-кескінімен ерекшелене беретініне анық көзіміз жетеді. Қарияларға қамқор болып, ой-тәжірибесімен бөлісіп, қолдау көрсетуге әзір тұратын қасиетін өз басым жоғары бағалаймын. Және өзі нұсқаған жолдан жаңылмай, береке-бірлікке бастай беретініне еш шүбәм жоқ.