Шымкент келбеті

V шақырылған Шымкент қалалық мәслихатының кезекті елу сегізінші сессиясы өтті. Жиынды сессия төрағасы Б.Салимов жүргізіп отырды. Сессия жұмысына қала әкімі Ғабидолла Әбдірахымов, қалалық мәслихаттың депутаттары, бөлім басшылары қатысты. Айта кетейік, бұл бес жылға сайланған қалалық мәслихаттың соңғы сессиясы. Осымен V шақырылған өкілетті органның  жұмысы аяқталады.

Күн тәртібінде барлығы 10 мәселе қаралды. Қалалық тұрғын үй инспекциясы бөлімінің есебі туралы баяндама жасаған қала әкімінің орынбасары Бейсенбек Жанбосынов қала аумағындағы 1971 көпқабатты тұрғын үйдің жартысына жуығы, яғни 947-сі күрделі жөндеу жұмыстарын қажет етіп тұрғанын жеткізді.
- Аталмыш көпқабатты үйлердің алғашқылары 1934 жылдан бастап салынған. Бүгінде тозығы жеткен ғимараттарды қайта қалпына келтіру үшін мемлекеттік «Өңірлерді дамыту-2020» бағдарламасы шеңберінде 104 үйде күрделі жөндеу жұмыстары жүргізілді. Биыл тағы 23 үйде жөндеу жұмыстары жүргізіледі, – деді баяндамашы.
Сондай-ақ, күн тәртібіне сәйкес, қалалық қоғамдық көліктерде жолақы тарифін келісу туралы баяндама жасаған Бейсенбек Керімбекұлы мамыр айының 1-жұлдызынан бастап жолақы құны 70 теңгеге көтерілетінін айтты. Дегенмен, ҰОС және тыл ардагерлері, алтын, күміс алқа иелері, І топтағы зағип жандар мен оларды жетелеп жүрген бір азамат қоғамдық көліктерде тегін жүру мүмкіндігіне ие. Ал студенттер үшін бұрынғы баға, яғни 50 теңге қалпында қалады. Оқушылар бастапқы бағаның жартысын, яғни 35 теңге төлемек.
Күн тәртібінде қаралған мәселелерге мәслихат депутаттары бірауыздан қолдау танытты. Жиынды қала әкімі Ғабидолла Әбдірахымов қорытындылады.
– Бесінші шақырылған Шымкент қалалық мәслихаты шын мәнінде, көтерген мәселелердің ауқымдылығымен және көптігімен ерекшеленді деуге болады. Міне, бүгін кезекті елу сегізінші сессиясына қатысып отырмыз. Осы жиындардың барлығында халық қалаулылары ретінде сіздердің ұсыныстарыңыз бен қабылдаған шешімдеріңіз қала өмірінде маңызды рөл атқаруда, – деп атап өтті Ғ. Рахматоллаұлы.
Халық қалаулылары жиын соңында қала әкімімен естелікке суретке түсті.

Шымкент қаласының тұрғындары теміржол вокзалында Қазақстан Республикасы Тәуелсіздігінің 25 жылдығына арналған мерейтойлық шара аясында жолға шыққан «Мәңгілік Ел» пойызын қонақжайлықпен қарсы алды. Делегацияны салтанатты жағдайда күтіп алған Шымкент қаласының әкімі Ғабидолла Әбдірахымов, қала әкімінің орынбасары Қайрат Нұртай, облыс, қала әкімдігінің қызметкерлері, зиялы қауым өкілдері мен студент жастар жалпы республикалық акцияның мән-маңызын саралады.

– Бүгінгі күн қала өмірінде аса маңызды шара ретінде аталып өтуде, – деді Шымкент қаласының әкімі Ғ. Әбдірахымов. – «Мәңгілік Ел» идеясы аясында қала тұрғындары патриоттық іс-шараларға белсене қатысып, білікті мамандардан тегін кеңестер алу мүмкіндігін иеленіп отыр. Өз кезегінде, мұндай шаралар ортақ мақсат-мүддеге ұйысқан ел азаматтарының отансүйгіштік қасиеті мен ынтымақ-бірлігін нығайта түсері даусыз.
«Мәңгілік Ел» пойызы штабының жетекшісі Ә. Әлпейісов риясыз көңілімен қарсы алғаны үшін жергілікті тұрғындарға алғыс сезімін білдірді.

– «Бірлік бар жерде ғана тірлік бар» деген халық мәтелін жандандырған акцияның негізгі мәні Қазақстанда тұратын барлық этнос өкілдерінің бірлігі, олардың достығы, мәдениетінің дамуын көздейді. Осы мақсатта «дөңгелек үстелдер», түрлі деңгейдегі кездесулер ұйымдастырылуда. Күні бүгінге дейін 12 облысты аралап шықтық. Онда тұрғындар аса қонақжайлылық пейілін танытты. Біз Оңтүстік өңіріне ерекше сезіммен келіп отырмыз. Өйткені, бұл өңір ұлттық дәстүрді сақтай білгендігімен айрықша бағаға ие. Бүгінде Шымкент – инновациялық орталыққа айналуда. «Мәңгілік Ел» пойызының мақсаты – қазақ елінің тұрғындарын жарқын болашаққа жетелеу, бір мақсат жолында қызмет етуге ынталандыру, – деді Әміржан Қайырұлы.

Делегация құрамында мәдениет және спорт қайраткерлері, Қазақстан халқы Ассамблеясының өкілдері, мемлекеттік қызметкерлер және өнер адамдары бар. Бұл қатарда, медицина, заң және әлеуметтік сала мамандары жергілікті тұрғындарға тегін кеңес бермек. Акция аясында күні бүгінге дейін мамандар 40 мыңға таяу қазақстандық азаматтарға түрлі мұқтаждықтары бойынша кеңес түрінде жәрдем беріпті.
Қазақстандық біртектілік пен бірлікті нығайту және дамытуды көздеген «Мәңгілік Ел» жалпыұлттық патриоттық идеясы аясында 15 ақпан күні Астана қаласынан жолға шыққан делегация 34 күнде республиканың 33 аудан-қалаларында түрлі деңгейдегі іс-шараларға қатысқан. Шымкентте өткен сапар барысында делегация мүшелері Қазақстан халқы Ассамблеясының қоғамдық келісім кеңесі мүшелерімен кездесу ұйымдастырды. Зиялы қауым өкілдері қатысқан алқалы жиында штаб жетекшісі
Әміржан Әлпейісов бүгінде ел аумағында жұмыс жасап отырған 1700-ден аса қоғамдық мәдени кеңес ұйымдары елдің қоғамдық өмірінде үлкен белсенділікке ие болып отырғанын жеткізді.
Сондай-ақ, мемлекеттік этносаясат, қоғамдық келісімді қалыптастыру, толеранттылық және этносаралық қатынастар мәдениеті мәселелері бойынша «Қоғамдық келісім» КММ ғимаратында семинар тренинг өткізіп, одан әрі Бейнелеу өнері мұражайында «Қазақстан – Ұлы дала елі» атты фото көрме және облыстық «Отырар» ғылыми-әмбебап кітапханасында «Теңдессіз сый» акциясына қатысты.
Айта кетейік, «Мәңгілік Ел» пойызы акциясы наурыз айының 18-жұлдызында Алматы қаласында мәресіне жететін болады.

Шымкент алдағы бесжылдықта инновация, заманауи старт-аптар мен интеллектуалдар қаласына айналады. Бұл орайда, ел аумағында 4 агломерацияның бірі ретінде белгіленген Шымкентті өнеркәсіп, ғылым, инфрақұрылым тұрғысынан дамыту – «Шымкент қаласының 2020 жылға дейінгі әлеуметтік-экономикалық даму Тұжырымдамасында» басым бағыт ретінде көрсетілген. Тұжырымдамада айқындалған міндеттерді жүзеге асыру үшін 29 миллиард теңге көлемінде қаржы қарастырылып, нақты жоспарлар белгіленіп отыр. Бұл жөнінде облыс әкімдігі жанындағы орталық коммуникациялар қызметінде Шымкент қаласының әкімі Ғабидолла Әбдірахымов «ҚР Президентінің «100 нақты қадам» Ұлт жоспарының» және қаланың даму концепциясының жүзеге асырылуы бойынша БАҚ өкілдеріне арнап өткізген баспасөз мәслихатында кеңінен баяндады.

Шымкент қаласының 2020 жылға дейінгі әлеуметтік-экономикалық даму тұжырымдамасы аясында қала аумағына қосылған елді мекендерді ауыз су, электр жарығымен және табиғи газбен қамту бағытында жүйелі жұмыс жүргізілуде. Тек өткен жылы 8 елді мекенге ауыз су, 5 елді мекенге кәріз жүйесі, 5 елді мекенге электр жарығы, 2 елді мекенге табиғи газ құбыры тартылған. Нәтижесінде, қала тұрғындарының коммуналдық қызмет түрлеріне мұқтаждық көрсеткіші айтарлықтай төмендеген.
Әлеуметтік саланың да сапа көрсеткіші едәуір жақсарғаны байқалады. Құрылыс жұмыстары жоғары қарқын алып, нәтижесінде биыл 1 260 пәтерлі 19 тұрғын үй пайдалануға берілмек. Білім саласында жаңа пилоттық жоба ретінде қала мектептерінде оқушылар үшін электронды бақылау жүйесі орнатылуда. Өнеркәсіп саласында 29 жоба іске асып, жыл соңына дейін 3 мыңнан астам жаңа жұмыс орындары ашылмақ. Одан бөлек, инвесторларды ынталандыру мақсатында Тассай және Жұлдыз елді мекендерінен 2 индустриалды аймақ құрылады.
Ел аумағындағы ірі мегаполис қалаға айналу үшін қаладағы ең тартымды салаларға инвестициялар тарту жайы да басты назарда. Бұл бағытта отандық және шетел инвесторларын тарту үшін жыл сайын 20 жоба іске асырылмақ. Сондай-ақ, биыл «Shymkent PLAZA» сауда кешені пайдалануға беріледі және қаладағы ең ірі «Shymkent mall» сауда-ойын сауық орталығының құрылысы жүзеге асырылады.
Шымкент – жылыжайлар отаны. Табиғаттың берген мүмкіндігін пайдалана отырып, ендігі жерде тамақ өнеркәсібін ұйымдастыруға қала аумағынан арнайы 136 гектар жер телімі бөлінген. Одан бөлек, жалпы аумағы 1100 гектар алқапқа көкөніс және бақша, жылыжай, өсіру секциясы ұйымдастырылмақ. Бұл жерлерге қызығушылық танытқан кәсіпкерлер болса, жергілікті әкімдік тарапынан лайықты қолдау көрсетіледі.

Баспасөз мәслихаты аясында қала әкімі БАҚ өкілдерінің қойған сауалдарына да жауап берді. Бұл қатарда, қала аумағына жаңа қосылған елді мекендерде жоспарланған инженерлік-инфрақұрылымдық өзгерістер жайы да тілшілер қауымының басты сауалына айналды.

– Мемлекеттік «Нұрлы жол» бағдарламасы аясында өткен жылы 5 елді мекенге кәріз жүйесі тартылған болса, биыл тағы 5 елді мекенде бұл мәселе толық шешімін табатын болады. Ал «Құрсай» шағынауданындағы қалыптасқан электр жарығының жеткіліксіздігі де басты назарда. Бастапқы жоба бойынша мұнда 700 үйді қамтуға лайықталған подстанция қою жоспарланған. Ал бүгінде ондағы шаңырақтың саны 2300-ден асып жығылады. Сол себептен де, бұл мәселеге назар аударып, алдағы уақытта жобаға қажетті өзгерістер енгізілетін болады, – деді Ғ.Рахматоллаұлы.
Сондай-ақ, тілшілер қауымы асфальт жолдарын бұзып, қайта салып жататын құзырлы мекемелердің жұмысына алаңдаушылық білдірді. Бұл ретте қала әкімі құбырларды жаңарту бағытында ауқымды жұмыстарды қолға алған «ҚазТрансГазАймақ» АҚ басшылығымен арнайы кездесіп, құзырлы кәсіпорынға көлік жолдарын сапалы әрі белгіленген уақытында қайта қалпына келтіруді тапсырғанын жеткізді.
Бұқаралық спортты дамыту, салауатты өмір салтын ұстану мүмкіндігін жақсарту бағытында қойған тілші сауалына да тиянақты жауап берілді. Яғни, қазіргі таңда жеке меншік иелігіндегі Металлургтер стадионы, Фосфоршылар және Металлургтер сарайы мемлекет меншігіне алынбақ. Сонымен қатар, заманауи талапқа сай, көлік жолдарында арнайы велосипедшілер жолағы сызылып, велосипед мінген жолаушылардың қала ішінде еркін жүруіне қолайлы мүмкіндік жасалмақ. Бұл үшін тіпті, қала аумағында 40 велостанция салынатын болады.
Шымкент бизнеске қолайлы, тұрғындар үшін жайлы таза әрі қауіпсіз қалаға айналады. Тілшілердің қойған өзге де сауалдарына жауап берген қала әкімінің жауабы осылай қорытындыланды.

Ортақ мүддеге ұйысқан халқымыз биыл алғаш рет Алғыс айту күнін атап өтеді. ҚР Президентiнiң Жарлығымен, 1 наурыз – Алғыс айту күні ретінде бекітілген мереке. Бұл туралы Елбасы: «Қазақстан халқы ассамблеясы құрылған күн – 1 наурызды жыл сайын барлық этностардың бір біріне мейірбандық танытып, адамдарды өз туғанындай қабылдаған қазақтарға алғыс айту күні ретінде атап өту әділетті болар еді. Ол күн бізді бұрынғыдан да гөрі жақындастыра түспек. Бұл күн мейірімділіктің, бүкіл қазақстандықтардың бір біріне деген достығы мен махаббатының жарқын мерекесі бола алар еді», – деп атап өткен болатын.
Жалпы 20-шы ғасырдың басында қазақ жеріне бес жарым миллионнан астам ұлттар жер аударылған. Қиын-қыстау жылдары қазақ халқы қуғын-сүргінге ұшыраған түрлі ұлттарға көмек қолын ұсынды. Сол себепті де, этномәдени орталықтардың өкілдері бүгінде «Алғыс айту күні қазақстандықтарды бір-біріне жақындастарып, біртектілік пен біртұтастықты нығайта түседі», – деп санайды.

Тыныштық пен құрметтiң мерекесi

Исамуддин РЫСБАЙ, 
Шымкент қалалық ардагерлер кеңесінің төрағасы:

– Қазақстандағы әр этнос өкілінің өмірлік өз тарихы бар. Сондықтан, олар 1 наурыздың Алғыс айту күні болып аталуын тек ризашылық қана емес, тарихтан сыр шертетін тағылымды мереке деп қабылдайды. Бүгінде елімізде 137 ұлт пен ұлыс өкілдері тұрады. Бұл бағытта облыс деңгейінде жиырма ұлттың мәдени орталықтары жұмыс істеп жатыр. Бұл орталықтардың қала, аудандарда 71 филиалы бар.
Бүгінде зерттеушілеріміз патша үкіметінің күштеуімен 1690-1990 жылдар аралығында қазақ жеріне 7 миллионнан астам адамның көшірілгенін айтып жүр. Ендеше, осыншалық түрлі ұлттар мен ұлыстардың қоныстану үдерісін шынайы бағалап, дархан пейілін таныта білген аға ұрпақтың кіршіксіз көңілі үшін бүгінгі диаспора өкілдерінің айтар алғысы шын мәнінде, аса құптарлық дүние. Сол себептен де, Алғыс айту күні – бұл ең алдымен елімізде тыныштық пен өзара сенімділік, барлық қазақстандықтардың бір-біріне деген құрметтің орнығуына негіз болатын идея. Мереке бірнеше бағытты қамтиды. Бұл қатарда халқымыздың «Асар», «Жылу», «Сүйінші» және тағы да басқа дәстүрлерін қамти отырып, біздер, ардагерлер кеңесі жан-жақты шаралар ұйымдастыру, түрлі қайырымдылық жиындары, көрмелер, кездесулер өткізу ойымызда бар.
Елбасы айтқандай, тарихтан тәлім ала отырып, біз келешегімізді бірге құрамыз. Яғни, болашағымыз қандай болатыны өзімізге байланысты. Бүгінде, ел Тәуелсіздігінің 25 жылы ішінде этносаралық түсіністіктің шынайы моделі құрылды. Бұл көбінесе Қазақстан халқының тарихи естелігі арқасында жүзеге асты. Күнтізбеде жаңа белгіленген «Алғыс айту күнінде» дәстүрді жалғастырып, аға ұрпаққа құрмет көрсетіледі. Бұл күн ендігі жерде қазақстандық бірліктің, бауырмалдықтың күніне айналмақ.

Қазақ елiнiң дархан пейiлiне қарыздармыз

Бахадыр САЛИМОВ,
облыстық ұйғыр этномәдени бірлестігінің төрағасы:

– Биыл мемлекетте ұлттар татулығы мен бірлігін жаңа деңгейге көтеретін ерекше мереке пайда болды. 1 наурыз Елбасының Жарлығымен Алғыс айту күні болып бекітілді. Қазақстан халқы Ассамблеясының құрылған күнімен тұспа-тұс келген бұл мереке ұлыстар достығын нығайта түсері анық.
Тарих қойнауында қалған Патша империясы Қазақстанға көпэтносты халықты мұра етті. Олар күштеп қоныстандыру, сталиндік репрессия, тың игеру кезінде қазақ жеріне қоныс тепті. Бүгінде бәрі бір шаңырақ астында ғұмыр кешуде.
Жалпы, ұйғыр халқы Қытайдан қазақ жеріне XIX ғасырдың 70-80-жылдары көптеп қоныс аудара бастаған. Тағдырдың талқысына түскен ұйғырлар бұрынғы отырған жерлеріндегі өңделіп бапталған жерлерін, жеміс беріп тұрған бау-бақшаларын, үй-жайларын түгел тастап кеткен болатын. Сондықтан да алғашқы жылдары едәуір қиындықты бастарынан қешіруге мәжбүр болды. Алғашқы кездері мұнда жер кепелер мен күркелерде тұрды. Себетін тұқым, бағатын мал, құрылыс материалдары да жетіспеді. Осындай қиын сәттерде өмірдің теперішін көрген диаспора өкілдеріне жергілікті қазақ халқы қол ұшын созды. Қолда барын бөлісіп жеп, қайыршылық жағдайындағы халықтың тұрмыс жағдайын түзеуге жәрдемдесті. Тек ұйғыр халқы емес, татарлар, ингуштер, орыстар, немістер, тағы басқа ұлттар жергілікті ұлттың үлкен қолдауын сезінді. Бұл тағдырдан теперіш көрген ұлыстарға өзекке теппеген қазақ елінің дархандығын көрсетеді.
Бүгінде, облыс аумағында 4 мыңға таяу ұйғыр халқы мекен етсе, бұл қатарда Шымкент қаласында тұратын 1 жарым мың этнос өкілі жергілікті тұрғындармен туыстық қарым-қатынаста ғұмыр кешуде.
Бұл мереке – тек қазақ халқына алғыс айту, түрлі этностардың өзара сыйластығы ғана емес, бұл әрқайсысымыздың бір-бірімізге деген құрметіміз, отбасындағы түсіністік, жас ұрпақтың ата-аналарына, үлкенге деген құрметі, яғни бұл – бір шаңырақ астында өмір сүріп келе жатқан барша адамдарды жақындастыруға бағытталған мереке. Көптеген ұлт өкілі бірлікте, татулықта күн кешіп жатқан біздің мемлекет үшін бұл әсіресе маңызды күн болады деп есептейміз.

Ұлттар достығы мен махаббатын арттырады

Дмитрий СИДИРОПУЛО,
облыстық грек этномәдени бірлестігінің төрағасы:

– Жалпы, алғыс айту күнін айрықша атап өту үрдісі – АҚШ және Канада елдерінде қалыптасқан. Онда қараша айының әрбір төртінші бейсенбісі мерекелік мәртебеге ие. Мерекенің ешбір дінмен байланысы жоқ. Жергілікті тұрғындар не үшін алғыс айту керек екендігін ойланады. Өз кезегінде, бұл күні барлық отбасы міндетті түрде дастарқан басына жиналып, туыстарына жақсылық жасауға асығады, жақындарын қуанту үшін түрлі тосын сыйлар ойлап табады. Қаладағы метроларда ерекше үстелдер орнатылып, адамдар ақша, азық-түліктерін қайырымдылыққа әкеліп қояды. ХVІІ ғасырдан келе жатқан әр түрлі киімдерді киген тұрғындар шеруге шығып, думанды кештер ұйымдастырады.
Қазақстан халқы Ассамблеясының құрылған күнімен тұспа-тұс келген бұл мереке ұлыстардың өзара достығын нығайта түсеріне сеніміміз зор. Ел Тәуелсіздігінің 25 жылы бір мүддеге біріккен халықтың ғана дамудың таңғажайып шыңдарына жете алатынын көрсетті. Елбасы ұсынған 5 реформаның төртіншісі біртектілік пен бірлік деп аталады. Ол түрлі тарихи себептермен қазақ топырағына табан тіреген этностардың «Мәңгілік ел» идеясы төңірегіне топтасуын көздейді. Ұлттық біртектілік басты міндеті - этностардың түптің түбінде Қазақстанның патриотымыз, азаматымыз, Қазақстанның даму жолдары, даму мақсаты біздің де ісіміз деп түсінуі. Біртектіліктің бастауы – азаматтық патриоттық болу керек.
Осы орайда, ҚР Президенті Н.Назарбаевтың күні кешегі Қазақстан Халқы Ассамблеясында айтқан лебізі әрбіріміздің көкейіміздегі сөзіміз болғаны даусыз. Яғни, Елбасы айтқандай, Қазақстан халқы ассамблеясы құрылған күн – 1 наурызды жыл сайын барлық этностардың бір біріне мейірбандық танытып, ол адамдарды өз туғанындай қабылдаған қазақтарға алғыс айту күні ретінде атап өту әділетті болар еді. Ол күн бізді бұрынғыдан да гөрі жақындастыра түспек. Бұл күн мейірімділіктің, бүкіл қазақстандықтардың бір біріне деген достығы мен махаббатының жарқын мерекесі бола алар еді. Бүгінде Шымкент қаласын мекен ететін 600 грек этносының атынан, күллі қазақ еліне жүрекжарды алғысымызды жеткізгім келеді.

Жергілікті халықтың жанашырлығын сезiнемiз

Заал БОЧОРИШВИЛИ,
облыстық грузин этномәдени бірлестігінің төрағасы:

– ҚР Президентінің Жарлығымен Алғыс айту күні болып жарияланған 1 наурыз – бұл ең алдымен қазақ халқына деген алғыс деп санаймын. Бiздер, грузин диаспорасы үшiн қасірет-қайғысы мол жылдарда қазақтар бiздi құшақ жая қарсы алды. Ас-суымен, баспанасымен бөлiстi. Мiне, қазақ халқының арқасында бiз аман қалдық, өсiп-өндiк. Сондықтан, бұл алғыс тек мереке күнi ғана пайда болмауы керек.
Кеңестер одағының өзге де халықтары секілді грузиндер де саяси қуғын-сүргінді бастарынан кешті. Бүгінде грузин диаспорасының еліміздегі өкілдері негізінен медицина, құрылыс, гидроэнергетика, шағын кәсіпкерлік салаларында еңбек етуде.
Ел тәуелсіздігінің аз ғана мерзімінде республикамыз даму мен тұрақтылық жолында әлемдік қауымдастықты мойындатып, экономикалық, әлеуметтік тұрғыдан жоғары табыстарға қол жеткізді. Бұл әрине, ел ішіндегі ұлтаралық және конфессияаралық өзара келісімдердің нәтижесі. Мұраттар бірлігі мен ынтымақты еңбектің жемістері еді. Сол себептен де, 1 наурыз – «Қазақстандағы халықтардың бір-біріне және қазақтарға алғыс айту күнін» лайықты атап өтуге облыстағы грузин этносы да мүдделі екенін әрі зор жауапкершілікпен қабылдайтынын атап өткім келеді.

Шымкентте Қапал батыр көшесінің бойындағы теміржол көпірі биыл толығымен пайдалануға берілмек. Бүгінде мұнда көпір көлемін ұлғайту жұмыстары қарқынды жүргізілуде. Жоба бойынша аталмыш нысанның көлемі 18 метрге дейін кеңейтілуі тиіс. Нәтижесінде, тоғыз жолдың торабында орналасқан көпір жолы көлік қозғалысын реттеуде айтарлықтай сеп болмақ.

2014 жылдың қараша айында басталған көпір құрылысын «Береке-А» Корпорациясы» ЖШС-гі жүргізуде. Нысан құрылысын кестеден кешіктірмей, жүйелі атқару үшін мердігер мекеменің мамандары үздіксіз жұмыс жасап жатқанын айтады.

– Бүгінде нысанның 70 пайыз жұмысын аяқтап отырмыз,– дейді «Береке-А» Корпорациясы» ЖШС-нің бас инженері Тәңірберген Сүлейменов. – Шымкент қаласын Төлеби және Сайрам ауданының бірқатар елді мекендерімен байланыстыратын күре жол болғандықтан, көпір құрылысына жұмысшыларымыз аса жауапкершілікпен қарайды. Дегенмен, жұмысымыздағы қосымша қиындық сол – күнделікті кесте бойынша пойыздарды тоқтатып, электр қуатынан ажыратуға тура келеді. Олай етпесе 27 мың вольт кернеу арасында жұмыс жүргізу жұмысшының өмірі үшін аса қауіпті. Ал көпір астынан 23 теміржол өткелі өтеді.

Жаңа көпір құрылысы биыл ҚР Тәуелсіздігінің 25 жылдық мерейтойына орай пайдалануға беріледі деп күтілуде.

ҚР Ауыл шаруашылығы министрі
А. Мамытбеков жұмыс сапарымен Оңтүстік Қазақстан облысына келді

Несібесін жерден терген шаруалар үшін соңғы 5 жылда жанар жағар май мен тұқымға мемлекет тарапынан бөлінген қаржы көлемі 3 есеге ұлғайған. Бұл жөнінде Шымкент қаласына 2 күндік жұмыс сапарымен келген ҚР Ауыл шаруашылығы министрі Асылжан Мамытбеков мәлім етті.

Жұмыс сапары барысында Асылжан Сарыбайұлы қаладағы «Бизнестің жол картасы – 2020» бағдарламасы аясында іске қосылған жылыжай кешендерінің жағдайымен танысып, ауыл шаруашылығын дамытуға ден қойған кәсіпкерлермен кездесті.
Алдымен ҚР Ауыл шаруашылығы министрі Мәртөбе елді мекенінде жылыжай өнімдерін өндірумен айналысатын «ҚазАгроном» ЖШС-де болды. Аумағы 3 гектарды құрайтын жылыжай алқабының иесі Мұрат Гелашвилидің айтуынша, жылыжай жылына 400 тонна қияр, сонымен қатар, 800 тонна томат өнімдерін дайындауға негізделген. Жылыжайды іске қосу үшін кәсіпкер алғашқыда 237 миллион теңге қаржысын жұмсапты. Сондай-ақ, мемлекеттік қолдау есебінен қосымша 813 миллион теңге қаржы беріліпті. Қазіргі таңда мұнда қиярдың голландиялық 3 сұрпы өсіріледі. Дайын өнімдер Ресейдің Новосібір аймағына, еліміздің солтүстік облыстарына жөнелтіледі. Бұл бағытта мекеменің 50 жұмысшысы еңбек етуде. Серіктестік жетекшісі алдағы жылы жылыжай аумағын 9 гектарға дейін ұлғайтуды жоспарлап отырғанын айтады. Дегенмен, дайын болған өнімге қойылған бастапқы баға еліміздің өзге өңірлеріне жеткенше құнын екі есеге дейін ұлғайтуы – салада бірқатар түйткілді мәселенің барын аңғартады. Өз кезегінде, бұл тұтынушыларға айтарлықтай қиындық туындатары сөзсіз.

– Оңтүстіктің шаруалары қиярды өсіріп, оны 400-420 теңгеден нарыққа шығарғанымен, еліміздің басқа аймақтарындағы оның саудалану бағасы 800-900 теңгенің айналасында болып отыр. Есептесек, қиярды республикамыздың өзге өңірлеріне апару шығыны көкөніс келісіне 20 теңгеден түседі. Онда неге баға қымбат? Себебі, арадағы делдалдар мен жол шығыны, бақылау бекеттеріндегі кедергілер, сонымен бірге, саудагерлердің арасында бәсекелестіктің жоқтығы себеп болған. Ал бұл мәселелерді жалпы мемлекеттік органдар бірлесе шешуі қажет, – деді А. Мамытбеков.

Мұнан кейін ҚР Ауыл шаруашылығы министрі «Ифтихари» шаруа қожалығында да болды. Аумағы 2 гектарды алып жатқан жобаның жалпы құны 500 миллион теңгені құрайды. Израил технологиясымен жабдықталған кешенде бүгінде жергілікті 30 тұрғын жұмыспен қамтылған.
Сондай-ақ, Асылжан Мамытбеков «Rixos» қонақүйінің мәжіліс залында өңір шаруаларымен кездесті. Онда шаруашылық мамандарына саладағы жаңа өзгерістердің бағдары мен тиімділігін түсіндіре отырып, олардың түйткілді сауалдарына жауап берді. Өз кезегінде, министр бүгінгі жаһандық дағдарыс жағдайында да жанар жағармай мен тұқымға мемлекет тарапынан бөлінетін субсидия көлемі қысқартылмайтынын жеткізді.
– Елбасының жыл сайынғы дәстүрлі Жолдауларында ауылшаруашылығы, агросалаға мейлінше көп көңіл бөлінуде. Оның ішінде фермаларға жағдай жасау, ірі қара мал мен ұсақ малды өсіру жайы үлкен басымдыққа ие. Сонымен қатар, техникаға қажетті жанар жағармайдың жеңілдікпен ұсынылуы, мал шаруашылығында маңызды жайылым мен жем-шөп мәселелері де ел Үкіметінің назарындағы дүние. Яғни, мемлекет тарапынан сіздерге лайықты қолдау көрсетіледі. Енді тек егін жұмыстарына, жалпы дала еңбегіне білек сыбана кірісулеріңіз керек, – деп атап өтті министр.
Айта кетейік, соңғы жылдары облысымыздағы ауыл шаруашылығына озық технологиялық құрылғылар кеңінен енгізіліп келеді. Нәтижесінде, өңірде өткен жылы қосымша 115 гектар жерге жылыжай салынып, жалпы көлемі 1025 гектарға жеткен. Бұл республикадағы көрсеткіш үлесінің 87 пайызын құрайды.